REÑEPYRŨRÕ guare restudia reaprende heta mbaʼe ha mbeguekatúpe rekambiáma repensa, reñeʼẽ ha reiko lája. Oiméne koʼã kámbio rejapóma reike mboyve jepe ko eskuélape. Upéi nde jerovia okakuaavéma ohóvo ha reñemeʼẽma Jehovápe ha rejevautisa. Péro, ¿heʼisépa upéva natekotevẽveimaha rejapo mbaʼeve? Ni mbaʼevéicharõ, resegi vaʼerã reñakãrapuʼã, pórke rejevautisávo reñepyrũ ramo hína reguata Jehová rapére.

Apóstol Pablo heʼi vaʼekue Timotéope ‘ojepyʼamongeta’ hag̃ua umi konsého omeʼẽ vaʼekuére chupe ha umi tembiapo oñemoĩ vaʼekuére ikárgope, hiʼarive upérõ Timoteo haʼéma vaʼekue ansiáno. Ha heʼi avei chupe: “Eñemeʼẽmbaite umíva rehehápe; péicha opavave ohechakuaáta reñakãrapuʼãha rehóvo” (1 Tim. 4:12-15). Upévare tahaʼe rejevautisa ramóva térã are guivéma reservíva Jehovápe, reñehaʼãmbaite vaʼerã resegi reprogresa.

Apóstol Pablo ojerure vaʼekue Ñandejárape iñermanokuérare, ‘ikatu hag̃uáicha ontende porã hikuái pe añetegua: ipekue, ipukukue, ijyvatekue ha ipypukukue’ (Efes. 3:14-19). Enterove jahupyty hag̃ua upéva Jesús omeʼẽ kongregasiónpe rregáloramo umi ansiánope, haʼekuéra ohekomboʼe, oñemoñeʼẽ, ha omombarete umi ermánope. Jajepyʼamongeta meméramo la Bíbliare ha ñahendu umi konsého omeʼẽva umi ansiáno, ikatúta “jakakuaapa opa mbaʼépe” (Efes. 4:11-15).

Ikatu hag̃uáicha resegi reñakãrapuʼã tekotevẽ ‘rembopyahu repensa lája’, upéva heʼise repensa vaʼerãha Ñandejára ha Cristo opensaháicha. Upearã rejepyʼamongeta meme vaʼerã haʼekuéra oguerohorývare, ikatu hag̃uáicha ‘reñemonde pe teko pyahúgui’ (Efes. 4:23, 24). Restudia jave la Bíbliape Jesucristo rembiasakue, ¿rehechakuaápa mbaʼéichapa nde ikatu resegi iñehémplo? ¿Reñehaʼãpa rehecha mbaʼépepa tekotevẽ rekambia rejoguave hag̃ua chupe? (1 Ped. 2:21.)

Ñañeʼẽ lájare ojekuaa avei mbaʼeichaite pevépa japrogresa hína. Umi oñemondéva pe teko pyahúgui ndaijapúi, ndoapoʼíri hapichápe, naitieʼỹi ni ndoikói ojeplagea oimeraẽ mbaʼére, síno ijurúgui osẽ ‘umi mbaʼe iporãva ha oporomombaretéva oñekotevẽ jave, péicha umi mbaʼe heʼíva ideprovécho umi ohendúvape’ chupe (Efes. 4:25, 26,  29, 31; 5:3, 4; Jud. 16). Umi mbaʼe eréva reime jave nde rógape térã rreunionhápe ohechauka vaʼerã pe añetegua nekambiamaha ohóvo.

Ojekuaáta avei reñakãrapuʼãha umi mbaʼe redesidívare, ‘nderehejavéima vaʼerã avave nembotavy ni ndegueraha ápe ha pépe umi oláda ha yvytu oguerahaháicha peteĩ várko oĩva márpe’ (Efes. 4:14). Iporã reñeporandu: “¿Chestira léntopa ko múndope ojejapóva, tahaʼe oñepensáva, ojediverti lája, térã añehaʼãpa siémpre ambovale che derécho? ¿Apensápa ndaivairiha ambotapykuéramo michĩmi jepe Ñandejára servísio aiko hag̃ua umíva rapykuéri?”. Eñatendéke, cháke koʼã mbaʼe ikatu nemongaigue rembaʼapo hag̃ua Jehovápe g̃uarã. Ani nderesarái ou porãvetaha ndéve reiporupaitéramo ne tiémpo reservi porãve hag̃ua Jehovápe (Efes. 5:15, 16).

Retrata lájare nde rapichakuérape ojekuaa avei reprogresaha. La Biblia heʼi: “Penembaʼeporã vaʼerã oñondive, pejoporiahuvereko ha peñoperdona pende pyʼaite guive” (Efes. 4:32). ¿Mbaʼéichapa retrata ermanokuérape, ojekuaápa nderehe rekumpliha ko konsého?

Añetehápe reime reimehápe ojekuaa vaʼerã nderehe rejaposeha Jehová oipotáva, tahaʼe nde rógape, kongregasiónpe, eskuélape, nde travahohápe térã oimeraẽ lugárpe (Efes. 5:21–6:9). Reiko lájare rehechauka vaʼerã siémpre rehaʼangaha Jehovápe, péicha entéro ohechakuaáta reñakãrapuʼãha rehóvo.

Apóstol Pedro heʼi vaʼekue: ‘Ñandejára omeʼẽ káda únope katupyry, ha oñemeʼẽ haguéicha peẽme, peiporupaitékena upéva peservi hag̃ua ótrope. Peẽ ningo majordómo katupyry, perekóva pende kárgope Ñandejára mbaʼeporã ijojahaʼỹva’ (1 Ped. 4:10, nóta). Heʼiháicha ko téxto Jehová omeʼẽ káda únope katupyry, ha oipota jaiporu ñaipytyvõ hag̃ua ñande rapichápe. Péicha Jehová ojevale hína ñanderehe ohechauka hag̃ua chupekuéra mbaʼeporã ijojahaʼỹva. ¿Rejapópa hína upéva?

Apóstol Pedro heʼive: “Oĩramo oñeʼẽva, oñeʼẽ vaʼerã omombeʼuramoguáicha Ñandejára marandukuéra” (1 Ped. 4:11). Ko téxto omyesakã porã umi mbaʼe jaʼévare ojekuaa vaʼerãha ñamombaʼeha Ñandejára Ñeʼẽ, péicha ñañeʼẽ lájare jahechaukáta akóinte ñambotuichaha Jehovápe. Ko eskuéla ñanepytyvõ jajapo hag̃ua upéva, péicha ikatúta jaiporu hekópe pe arandu ha katupyry jarekóva ñamombaʼeguasu hag̃ua Ñandejárape ha ñaipytyvõ hag̃ua ñande rapichápe. Upéicharõ, ¿mbaʼeichaite pevémapa reprogresa hína ko eskuélape?

 Upéva nodependéi mboy leksiónpa rejapóma térã mbaʼeichagua asignasiónpa oñemeʼẽ ndéve. Rejepyʼamongetávo koʼã porandúre reikuaáta mbaʼeichaite pevémapa reprogresa hína: “¿Ajeprepara porãpa asẽ hag̃ua apredika? ¿Ahechaukápa añeinteresaha che rapicháre apredika jave chupekuéra? ¿Ambohapépa avisita jey hag̃ua umi ohendu porã vaʼekuépe? ¿Añehaʼãpa añembokatupyryve ag̃uahẽ hag̃ua umi che estudiánte korasõme?”.

Ani reimoʼã reñakãrapuʼãha oñemeʼẽguinte ndéve heta priviléhio. Añetehápe umi mbaʼe ndohechaukái reprogresaha, síno la iñimportánteva hína mbaʼéicha rekumpli umi tembiapo oñemeʼẽva ndéve. Upévare remboʼe rire nde rapichápe térã kongregasiónpe, iporã reñeporandu: “¿Añetehápe piko aporomboʼe porã raʼe? ¿Amyesakã porãpa pe informasión ideprovécho hag̃uáicha umi cherendúvape?”.

Reiporu hag̃ua hekoitépe pe katupyry rerekóva rekuʼe vaʼerã. Upévare iporã reñeporandu: “¿Ainvitápa umi ermánope osẽ hag̃ua chendive predikasiónpe? ¿Mbaʼéichapa ikatu aipytyvõ umi ipyahúvape kongregasiónpe, imitãva térã hasykatúvape? ¿Ahápa amopotĩ salón otoka jave chéve térã añekuaveʼẽpa ambaʼapo hag̃ua asambleahápe? ¿Ikatúpa ajapo meme prekursorádo auxiliár? ¿Ikatúpa amopaʼũ che tiémpo ajagarra hag̃ua che prekursorádo rregulár, térã aha aservi peteĩ kongregasión oñekotevẽhápe hetave puvlikadór?”. Nde haʼéramo peteĩ ermáno, ¿reñehaʼãpa rekumpli umi mbaʼe oñehaʼarõva ndehegui reservi hag̃ua siérvo ministeriál térã ansiánoramo? Rehechauka avei reprogresaha, kyreʼỹme reñekuaveʼẽramo rejagarrave hag̃ua rresponsavilida (Sal. 110:3).

¿Mbaʼépa ikatu rejapo repensáramo nandekatupyryiha reservi porãve hag̃ua Jehovápe? Ani rejepyʼapy, pórke Ñandejára Ñeʼẽ “omoarandu umi iñaranduʼỹvape” (Sal. 19:7; 119:130; Prov. 1:1-4). Jasegíramo umi konsého oĩva la Bíbliape, jaheja hína Jehová ñanemoarandu, ha upéva ovaleve oimeraẽ mbaʼe ñande ikatúvagui ñaaprende ñandejehegui rei. Upéicharõ jepe, ohasávo pe tiémpo jarekove experiénsia. Péro, ¿mbaʼéicha ikatu ideprovécho ñandéve umi mbaʼe ñaaprendéva jahávo Ñandejára servísiope?

Peteĩ persóna ojeroviáva ijehe ohasáma haguére heta mbaʼe, ikatu opensa: “Vyroreieténgo kóva. Ahasapapyréma ningo che koʼã mbaʼe”. ¿Iporãpa ñapensa upéicha? Proverbios 3:7 heʼi: “Ani ere ndejehe nearanduetereiha”. Añetehápe umi mbaʼe jahasáva ñanepytyvõ jaikuaave hag̃ua  heta mbaʼe, ha umíva ikatu ideprovécho jadesidi porã hag̃ua. Péro oimérõ japrogresáma Ñandejára servísiope, umi mbaʼe jahasáma vaʼekue ñanepytyvõ vaʼerã jahechakuaa hag̃ua arakaʼeve ndaikatumoʼãiha ñasẽ porã Jehová reheʼỹ. Upéicharõ, oñepresenta jave peteĩ provléma, ¿mbaʼéichapa rehechaukáta reñakãrapuʼãha? Rehejáramo Jehová ndedirihi opa mbaʼe rejapóvape ha nderejeroviái ndejehénte. Avei regueroviáramo opa mbaʼe oikoha Jehová opermiti rupínte, rejeroviávo hese nde pyʼaite guive ha reñehaʼãvo reñemoag̃uive hese.

Jepeve apóstol Pablo unhído ha oservíma Jehovápe heta áñore, haʼe heʼi vaʼekue: ‘Añehaʼãmbaite aha meme tenonde gotyo ahupyty hag̃ua pe prémio Ñandejára omeʼẽva’ (Filip. 3:13-16). ¿Repensápa nde avei upéicha?

¿Mbaʼe mbaʼépa rehupytýma koʼág̃a peve? Reikuaa hag̃ua upéva epensami koʼã mbaʼére: ¿Mbaʼeichaite pevépa reñemondéma hína pe teko pyahúgui? ¿Rehechaukápa hína reñemoĩha Ñandejára poguýpe? ¿Reiporúpa umi mbaʼe reaprende ha reikuaáva rembotuicha hag̃ua Jehovápe? Pe Eskuéla Jaiporukuaa Hag̃ua la Biblia nepytyvõta rehechauka hag̃ua resegiha umi konsého oĩva la Bíbliape, ha upéva ojekuaáta nderehe reñeʼẽ ha remboʼe lájare. Rehupytývo umi mbaʼe porã, nde voi revyʼáta ha enterove ohechakuaáta reñakãrapuʼãha rehóvo.