Karaloʼuta namüinjatka na chajanakana Roma 1:1-32
1 Karaloʼutakat tüü, tashajala tayakai Pablo, chi nüchepchiakai Cristo Jesús. Aneekuushi taya süpüla aluwataaushinjachin taya otta süpüla taküjainjachin tü pütchi anasü* nümaʼanajeejatkat Maleiwa.
2 Nüküjatüjülia achiki paala tia Maleiwa suluʼu tü Karaloʼuta Nüchikimaajatkat, nüküjain tia nakajee na nünüikimaajanakana.
3 Aküjünüsü suluʼu tia nüchiki chi Nüchonkai, chi nülüinkai David.
4 Atüjaana aaʼuchi Nüchoin nia Maleiwa, jama nüsoʼireʼennüin aaʼin nutuma sükajee tü nüpülainkat Maleiwa. Asoʼireʼenna aaʼinchia chi Waseñotsekai Jesucristo.
5 Kamaneeshi maʼin chi Maleiwakai, weʼrüin tia nükajee Jesús. Nüneeküin taya Jesús süpüla taluwataaushinjachin shiiʼiree takaalinjain wayuu maʼleekalia süpüla kanoulainjanain naya nünain, jüüjüüinjanain naya nümüin otta süpüla kojutuinjachin nia namüin.
6 Noʼutku jia na wayuu aneekünakana süpüla oushikajawaa süchiirua nukuwaʼipa Jesucristo.
7 Karaloʼutakat tüü namüinjatü napüshuaʼa na anoujashii chakana Roma, na aikana nüpüla Maleiwa, na nüneekakana süpüla aʼyatawaa nümüin.
Kasataalejeseʼe kamaneein jümüin chi Washikai Maleiwa jee jimatüin jaaʼin nutuma jee nutuma chi Señotkai Jesucristo.
8 Taapüin analuʼutkat palajana nümüin Maleiwa nükajee Jesucristo jaaʼu jüpüshuaʼa jiakana süka wattain naalii na wayuu aashajaakana süchiki tü junoujakalü anain.
9 Aʼyataashi taya nümüin Maleiwa süka süpüshuaʼa taaʼin. Eʼikajüshi taya tü pütchi anakat maʼin* nüchiki chi Nüchonkai, nütüjaa aaʼu chi Maleiwakai toʼuraajüin waneepia jüpüleerua.
10 Oʼuraajüshi taya nümüin Maleiwa süpüla toʼunajachin jümaʼanamüin, müleka nüchekülejeʼeya tia tapüleerua.
11 Teʼreein maʼin jia süpüla takatchinrüinjatüin tü junoulakat nünain Maleiwa
12 jee shiale süpüla watütüleʼerajiraain waaʼin waneʼewai wakua sükajee tü wanoulakat.
13 Tawalayuwaa, kojuyatuaichi oʼuneein taya jümaʼanamüin süpüla tekirajüinjatüin wayuu maʼaka tekirajapuʼuin wayuu sainküin tü mmakat shiiʼiree sunoujainjatüin. Wainmapejeʼe neʼe tü kasa ataʼülakat takuwaʼipa süpüla oʼunaa chaa jümaʼanamüin.
14 Müshi kojuyaalakai taaʼin suulia wayuu maʼleekalia, müshi kojuyaalakai taaʼin noulia na griegokana jee noulia na nnojoliikana griegoin. Noulia na wayuu kekiikana jee noulia na wayuu matüjainkana.
15 Taküjeein maʼin jümüin süchiki tü pütchi anakat maʼin, jümüin jiakana chakana Roma.
16 Nnojoishi taya japülin sünain aküjaa süchiki tü pütchi anakat maʼin, jama shiain wanee kasa pülasü naaʼinraka chi Maleiwakai süpüla nuʼtteʼerajanain na wayuu anoujakana nünain. Nuʼtteʼereena palajana na wayuu judíokana, nuʼtteʼera nümeenaʼaya na griegokana.
17 Lotusü maʼin nukuwaʼipa Maleiwa namüin na wayuu anoujakana nünain. Sükatchinraaka nanoula suluʼujee tia. Tia müsü aka saaʼin tü ashajünakat suluʼu tü Karaloʼuta Nüchikimaajatkat Maleiwa eere sümüin: «Kateerü noʼu chi wayuu lotokoi akuwaʼipa sünainjee kanoulain nia».
18 Jashichishi Maleiwa saalinjee tü kasa mojukat natuma na wayuukana jee saalinjee tü kasa nnojotkat lotuin akuwaʼipa. Müsü nataʼülakai saaʼin sukuwaʼipa suulia wayuu süpüla nnojoluinjatüin sütüjaain saaʼu tü shiimainkat.
19 Neʼraajüin maʼin nukuwaʼipa Maleiwa, jama niain aküjain namüin.
20 Mayaainjeʼe meʼrujuin chi Maleiwakai, eeshi süpüla weʼraajüin nia wekirajaale sünain jamüin sukumajia tü mmakat nutuma. Weʼraajeechi maʼin nia jülüjale waaʼin tü kasa nukumajalakat, wayaawateetka sünainjee tia pülain nia süpüla kaʼikat süpüshuaʼa otta niain Maleiwain nümüiwaʼa. Nnojoikalaka süpüla meʼraajuuinjachin chi Maleiwakai suluʼujee tia.
21 Mayaainjeʼe neʼraajüin Maleiwa wayuukana naainnua, nnojoishi kojutuin nia namüin otta nnojotsü kojutuin namüin tü naaʼinrakat napüleerua, süttüsü neʼe nekii otta nnojotsü kasain nayaawatüin aaʼu.
22 Wayuu kekiishii naya naashin, nnojotpejeʼe kasain natüjaain aaʼu.
23 Nnojoishi naʼwaajüin chi Maleiwa matüjainkai outaa, shia neʼe naʼwaajaka nayaakua na wayuu outajanakana. Naʼwaajüin shiyaakua tü wüchii waawatakat iipünaapünaa, shiyaakua wüchii wünaʼapüjatü otta müsia shiyaakua tü wüchii lemütüsükat.
24 Nuuʼulaaka Maleiwa naaʼinrajatüin naya wayuukana tü kasa yarüttüsü suchuntaakat naaʼin. Naaʼinrakalaka wanee kasa yarüttakalü atuma nakuwaʼipa.
25 Naküjakalaka alawaa shiiʼirakaluʼu tü shiimainkat nüchiki Maleiwa. Naʼwaajaka jee naʼyataaka sümüin tü kasa nukumalakat Maleiwa, nnojoika naʼwaajüin chi Kakumalakai tia makat, chi aʼwaajünüinjachikai süpüla kaʼikat süpüshuaʼa. Amén.*
26 Nuuʼulaainjeseʼe naya Maleiwa süpüla naaʼinrüinjatüin tü kasa mojusü suchuntaakat naaʼin jee tü kasa eekai mojuin. Jamüshiijaʼa na jieyuukana nnojoliinnapa ainkaweein namaa na tooloyuukana, shia neʼe naaʼinreeka amüin wanee kasa naata suulia tü akumajünakalü apüla naya nutuma Maleiwa.
27 Akaʼaya neʼe na tooloyuukana, nnojoliinnapa naya ainkaweein namaa na jieyuukana, shiakalaka neʼe suchuntaain naaʼin nainkaain namaa na tooloyuukana wanaa namaa. Naaʼinrakalaka wanee kasa kashüülasü maʼin, kasalajaneetpejeʼe namüin tia naainjalakat.
28 Nnojotkalaka kasajatüin namüin neʼraajüinjachin chi Maleiwakai, nuuʼulaainjeseʼe naya süpüla ayatüinjatüin jülüjain naaʼin kasa mojusü, naaʼinrakalaka naya wayuukana wanee kasa nnojotka anain.
29 Eesü suluʼu naaʼin naya wayuukana aaʼinraa kasa nnojotka lotuin akuwaʼipa, kamaʼüralii naya, suchuntaain naaʼin wanee kasa naata kakorotshi otta naaʼinrüin wanee kasa eekai mojuin, kachumuralii naya, oʼunulii naya saaʼin wayuu, katkaaralii naya, aküjashii naya naʼalain, aaʼinrüshii naya kasa mojusü sümüin wayuu otta perulaayuulii naya.
30 Aküjashii alawaa süchiki wayuu, naʼürülashi Maleiwa, eʼrülii wayumüin naya, yaletüsü naaʼin, aʼwaataashii suluʼu nakuwaʼipa otta nakumajüin suluʼu nekii kasa eekai mojuin, mojutusai namüin nashi jee mojutusat namüin nei,
31 nnojotsü kasain nayaawatüin aaʼu, nnojotsü nekeraajüin tü namakat, maalinsat wayuu napüla otta mamülialasat wayuu namüin.
32 Natüjaa aaʼu tü nümakat Maleiwa süchiki outajanain na wayuu aaʼinrakana wanee kasa eekai müin aka saaʼin tia, ayatapejeʼe naya wayuukana sünain aaʼinraa tia makat otta talatüsü naaʼin saaʼinrüle tia wayuu.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
