Tü nüshajalakat Marcos 14:1-72
-
Aashajaajiraashii nikiira Jesús na sacerdotekana süpüla noʼutajachin naaʼin (1, 2)
-
Oʼyotunüsü seita jemeta eejuut saaʼu nikii Jesús (3-9)
-
Aapüna ekiichi Jesús nutuma Judas (10, 11)
-
Tü Pascuakat (12-21)
-
Sukuwaʼipa tü ekawaa aipaʼajatkat nutuma chi Señotkai (22-26)
-
Aküjünüsü nuunjulajeechin Pedro nüchiki Jesús (27-31)
-
Oʼuraajüshi Jesús chaa Getsemaní (32-42)
-
Ataʼünnüshi Jesús (43-52)
-
Asakiijünüshi Jesús natuma na sulujunakana tü kanüliakat Sanedrín (53-65)
-
Nüküjain Pedro nnojolin niʼraajüin Jesús (66-72)
14 Piama kaʼi süchikijee tia, antüsü sükalia tü Pascuakat* otta tü Miʼiraa Saainjünakalü oʼu tü Pan Maʼakasatkat Soolojia. Nayasaʼa nekiipüʼü na sacerdotekana namaa na karaloʼutamaajanakana, nataʼülee amüinchi Jesús sümaa noʼuteein naaʼin, müsüjeseʼe nachajaain sukuwaʼipa süpüla nemeejüinjachin nia.
2 «Nnojoleerü waainjain tia soʼunnaa tü miʼiraakat, jama saashichijaʼaleere wayuu wooʼomüin», namajiraakalaka.
3 Wanaa sümaa chajachin nikaain Jesús Betania nipialuʼu Simón, wanee wayuu ajaʼtta atachi sutuma tü ayuulii kanüliakat «lepra», sürütkaaka nünainmüin Jesús wanee wayuu sümaa wanee amüchichon aainjuushi süka tü ipa kanüliakalü «alabastro»,* kaluʼusü seita jemeta eejuut kojutukat maʼin, aainjuushi süka tü «nardo»* kaaʼukat maʼin. Susottoko chi amüchichonkai, shiʼyotoko tü seitakat saaʼu nikii Jesús.
4 Naashichijaaka waneinnua wayuu yalajana neʼrapa tia jee namaka: «Amülataʼaleesüjaʼa maʼin türa seitakat makaʼa shia sutuma.
5 Oikünüsüje türa seita jemetakalü eejuu, alatüsüjeʼe sülia suulia 300 ‹denario›* suikünüleje otta aapünüsüjeʼe tü süliakat namüin na wayuu maʼletsekana». Jashichikalaka maʼin naya sümüin tü wayuukat.
6 Nümakalaka Jesús namüin: «¿Jamajatkai jümüin türa wayuukot? Nnojo jikeʼejüin saaʼin, anasü maʼin tü saaʼinrakat tapüleerua.
7 Süpülajachire joo taya yaawaa jümaa waneepia, eekajasaʼa na wayuu maʼletsekana yaajeena jümaa waneepia otta eeshii süpüla jükaalinjain naya jümüliajeepa naya.
8 Shiimainjaʼa kaalin taya süpüla wayuukot tüü. Sükajee shiʼyotuin taaʼu tü seita jemetakalü eejuu, müsü shikeraajakai saaʼin takuwaʼipa süpüla teʼikünajachin outapeena taya.
9 Shiimain tanüiki jümüin, sainküin mmakat eepünaale süküjünüin tü pütchi anakat maʼin* aapüneerü süchiki tü saaʼinrakat wayuukot tüü süpüla sotuinjatüin shia saaʼin wayuu».
10 Niasaʼa Judas Iscariote, napüshi na Polookana Piamamüin aluwataaushi, nuʼunakalaka namaʼanamüin nekiipüʼü na sacerdotekana süpüla naapajatüin nikii Jesús.
11 Talatakalaka maʼin naya naapaiwaʼaya tia jee naküjakalaka nümüin nawalaajeechin nia. Nüchajaakalaka maʼin sukuwaʼipa Judas süpüla naapajatüin nikii Jesús.
12 Shiasaʼa soʼu tü palajatkat sükalia tü Miʼiraa Saainjünakalü oʼu tü Pan Maʼakasatkat Soolojia, wanaa sümaa suʼutunuin aaʼin tü mürüt ekaanajatkat sünain tü Pascuakat, namakalaka na nikirajüinkana Jesús nümüin: «¿Jalasü pücheküin yapain watuma eeinjachire pikaain tü Pascuakat?».
13 Nüjütakalaka Jesús piamashii nikirajüin sümaa nümüin namüin: «Juʼuna pueulopaʼamüin, antiraajeena jia nümaa wanee wayuu alüʼüjakai wüin suluʼu wanee amüchi. Juʼuneenakalaka nüchiirua.
14 Chaa eemüinre nüntüin, meena jia nümüin chi wayuu nipiajachikai: ‹Anuu nünüiki chi Ekirajüikai: «¿Jalasü tü kuatta tekaainjatkalü aluʼu tü Pascuakat namaa na tekirajüinkana?»›.
15 Niiʼiyateetkalaka jümüin wanee kuatta miyoʼu kaluʼusü korolo. Chasü tia kuattakat iipünaa sünain tü miichikat, yapeetka shia jutuma wapüla».
16 Noʼunaka na nikirajüinkana Jesús pueulopaʼamüin, ayataka napüla tü kuattakat maʼaka nüküjain shia Jesús namüin, yapakalaka kasa süpüshuaʼa natuma süpüla nekaainjanain soʼu tü Pascuakat.
17 Nüntaka Jesús chamüin aipoʼupa namaa na Polookana Piamamüin aluwataaushi.
18 Wanaa sümaa nekaain, nümakalaka Jesús namüin na nikirajüinkana: «Shiimain tanüiki jümüin, aapünajachi ekii taya nutuma wanee jaʼakajee jee anii nia ekaain tamaa».
19 Mojukalaka maʼin naaʼin na nikirajüinkana Jesús, namayaa namaka nümüin: «¿Aashin nnojolin tayain?».
20 Nusoutakalaka Jesús namüin: «Nia wanee naʼakajee na Polookana Piamamüin, nia chi achüʼttakai tü pankat suluʼu tü iitakat wanaa tamaa.
21 Outajachi chi Süchonkai Wayuu* maʼaka süküjünüin paala nüchiki. Aluʼuleekaijaʼa maʼin chi wayuu aapüinjachikai nikii chi Süchonkai Wayuu. Anashije nnojolinkale joʼuuin nia».
22 Wanaa sümaa nekaain, naapaain Jesús wanee pan jee süchikijee nuʼuraajüin, nüshaletüin jee naapüin shia namüin na nikirajüinkana sümaa nümüin namüin: «Anuu jiküin, tüü shiyaawase teʼiruku».
23 Naapaaka wanee iita kaluʼusü wiino jee süchikijee nuʼuraajüin nümüin Maleiwa, naapaka shia namüin na nikirajüinkana, nasayaa namaka shia.
24 Anuujeseʼe nünüiki namüin: «Tüü shiyaawase tasha. Tü anuu jooluʼu amülainjatüin süpüla süikaleʼennüin tü pütchi apansaajünakat jee shia anainjatka atuma sukuwaʼipa wainma wayuu.
25 Shiimain tü tamakat jümüin, nnojoleerü tasüin süchikuaʼa süsha tü uuwakat, waneʼereeya tasüin shia nuluwataapeena chi Maleiwakai».
26 Süchikijee tia, naʼwaajaka Maleiwa süka jayeechi jee noʼunaka saaʼumüin tü wutai kanüliakat Olivos.
27 Nümaka Jesús namüin: «Jüpüteechi taya tamüiwaʼa. Mataasü sümakai tü nüshajiralakat Maleiwa: ‹Toʼuteechi aaʼin chi anneetpüʼükai suʼwalakajaajeetkalaka tü naʼanneetsekat›.
28 Oʼuneechi taya jüpüleerua Galileamüin tasoʼireʼennapa aaʼin».
29 Nümaka Pedro nümüin Jesús: «Nnojoleechi pia tapütüin pümüiwaʼa, jaʼitashi napütüin pia pümüiwaʼa na waneinnua».
30 Nusoutaka Jesús nümüin: «Shiimain tü tamakat pümüin, soʼu aikat tüü, süpülapünaa nukootoleerajaain piantua wanee kaliina, apünüintueerü püküjain sümüin wayuu nnojolin piʼraajüin taya».
31 Ayatapejeʼe müin Pedro nümüin: «Nnojoireejaʼa taküjainjachin suʼupala wayuu nnojolin teʼraajüin pia, jaʼitashi toʼutunuin aaʼin wanaa pümaa». Mayaa müsü joo nanüiki na wane nikirajüinkana Jesús.
32 Nantakalaka suluʼumüin tü mma kanüliakat Getsemaní jee nümaka Jesús namüin na nikirajüinkana: «Yaashiʼiya joyotuin jia tapüla, oʼuraajüshi paala taya».
33 Nümaaka Pedro, Santiago otta müshia Juan, shiasaʼa chamüin mojukalaka maʼin naaʼin Jesús sümaa shapaain maʼin naaʼin.
34 Nümaka namüin: «Süpüleerua aaʼinchi maʼin taya tü shapawaakalü aaʼin, müshi outeekaijaʼaya taaʼin, yaashiʼiya jia tapüla, jalia jutunkajayaai».
35 Nuʼunakalaka noulia mamüin aka tüsa jee nüsapainkaka nia sünain oʼuraajaa, nuchuntaka nümüin Maleiwa nülatirajatüin nuulia tü müliaa niʼrüinjatkat.
36 Nümaka: «‹Abba›, Tashikalee, nnojotsü eein wanee kasa isaka püchiki, nnojo puuʼulaain tasüin tü asüüshi suluʼukat iitakat* tüü. Nnojotpejeʼe shiainjatüin ekeraajüin tü tachekakat neʼe, shia anaka aluʼu shikeraajüle tü püchekakat tapüleerua».
37 Nüleʼejaka nüchikuaʼa nanainmüin, yalajanaka naya atunkajaʼalüin nüpüla, nümaka nümüin Pedro: «Simón, ¿jamüshikai putunkakaʼa neʼe? Masamülakaiche maʼin pia, eeyaai katüin poʼu wanaa tamaa waneeyaakaije neʼe oora.
38 Nnojo jutunkajüin, shia anaka aluʼu juʼuraajüle waneepia suulia suuʼulakünüin jaaʼin. Mayaapejeʼe naaʼinreein maʼin wanee wayuu wanee kasa, eesüjaʼa matsüinre niʼiruku* süpüla naaʼinrajatüin shia».
39 Nuʼunaka nüchikuaʼa sünain oʼuraajaa, ayatüsüjaʼaya nuchuntuin tü nuchuntakat paala.
40 Nüleʼejaka nüchikuaʼa nanainmüin, yalajanaka naya atunkajaʼalüin nüpüla, jama kaʼlein maʼin lapü naaʼu. Nnojotkalaka natüjaain saaʼu tü nanüikinjatkat nümüin.
41 Apünüintuairü nukua nanainmüin, nümakalaka namüin: «¿Jamüshiikai jutunkajakaʼa? Keraashii jia suulia tia. ¿Nnojotsükai jütüjaain aaʼu tü alatajatkat? Keraaitpa nükalia chi Süchonkai Wayuu süpüla saapünajatüin nikii sümüin wayuu kaainjarannuu.
42 Jütamaa jümaala. ¡Jooʼuya! Alüʼülaashi chi wayuu aapüinjachikai tekii».
43 Yalaiwaʼaya naashajaain Jesús, nüntamaataka Judas, niajaʼa noʼutku na Polookana Piamamüin aluwataaushi. Eejanaka nümaa watta naalii wayuu chajaruutamaajana jee wunuʼumaajana. Aluwataanüshii naya natuma nekiipüʼü na sacerdotekana, na karaloʼutamaajanakana jee natuma na laülaashiikana.
44 Kettaatüjülia nünüiki chi aapüinjachikai nikii Jesús sümaa nümüin: «Niainjachi jütaʼülaka chi eekai tatuʼluin awalapaʼa. Jümaajeechika nia sümaa eejüin jaaʼin suulia nuʼluwataʼalaain».
45 Nürütkaaka nünainmüin Jesús sümaa nümüin nümüin: «¡Ekirajüikalee!», nutuʼlaka nuwalapaʼa.
46 Nütaʼünnakalaka Jesús suluʼujee tia.
47 Niasaʼa wanee wayuu eejachikai yala nuwataakalaka sümaa nüchajaruutse nooʼomüin nüchepchia chi laülaashikai napüleerua na sacerdotekana, nushottoko nücheʼe.
48 Nümakalaka Jesús namüin: «¿Kaʼruwaraiyaa taya jaaʼinruʼu, chajaruutamaaka jia jee wunuʼumaaka jia tooʼomüin süpüla jütaʼülajachin taya?
49 Mataashi chapuʼukai tekirajüin weinshi suluʼu tü aʼwaajüleekat Maleiwa, nnojoipejeʼe taya jütaʼülüin. Müsü sukuwaʼipa tia süpüla shikeraajüinjatüin tü sümakat tü Karaloʼuta Nüchikimaajatkat Maleiwa».
50 Napantajaayaa namaka napüshuaʼa jee napütaka nia nümüiwaʼa.
51 Eejachikalaka wanee jimaʼai kanainjachikai wanee kuluut anasü maʼin aainjuushi süka lino, nuʼunaka nüchiirua Jesús, ataʼünnataaichijeʼe nia.
52 Nüpütapünaaka tü nüsheʼin aainjuushikat süka lino, nüpantajaaka sümaa masheʼin nia.
53 Nümaanaka Jesús nümaʼanamüin chi laülaashikai napüleerua na sacerdotekana, noutkajaaka na laülaashiikana napüleerua na sacerdotekana namaʼaleeya na laülaashiikana jee na karaloʼutamaajanakana.
54 Nuʼunaka Pedro nüchiirua Jesús kaʼyatajee nünain, noʼotoleeka suluʼumüin süpaatiase nipia chi laülaashikai napüleerua na sacerdotekana. Nüikalaaka sünain aatulujaa wanaa namaa na wayuu aʼyataakana suluʼu tia miichikat.
55 Nayasaʼa nekiipüʼü na sacerdotekana jee napüshuaʼa na sulujunakana tü kanüliakat Sanedrín,* nachajaain wayuu aküjainjanakana alawaa nüchiki Jesús shiiʼiree nuʼutunajachin aaʼin. Nnojoipejeʼe nantüin anain wanee wayuu keraakai süpüla tia.
56 Wainma na antakana süpüla aküjaa alawaa nüchiki, nnojotpejeʼe wanaawain tü namakat.
57 Nashaʼwalaaka waneinnua wayuu süpüla naküjainjanain alawaa nüchiki, namakalaka:
58 «Anuusa nünüiki wayuukai chii: ‹Tojuttireerü tü aʼwaajüleekat Maleiwa, tü sukumalakat paala wayuu jee tashaʼwaleʼereerü wane shiiʼiraka soʼu apünüin kaʼi, wanee nnojotka sukumalain wayuu›».
59 Nnojotpejeʼe wanaawain tü namakat.
60 Nüshaʼwalaaka chi laülaashikai napüleerua na sacerdotekana jee nümaka nümüin Jesús: «¿Nnojoishi pia asoutajachin? ¿Jamüsü pünüiki shiʼipajee tü namakat nala wayuukana püchiki?».
61 Koʼutapejeʼe neʼe Jesús nuulia. Nüsakiijünaka nüchikuaʼa nutuma chi laülaashikai napüleerua na sacerdotekana, nümaka nümüin: «¿Piajasaʼaya chi Cristokai, Nüchon chi Maleiwa Miyoʼushikai?».
62 Nusoutakalaka Jesús nümüin: «Tayaʼayan, jiʼreechi chi Süchonkai Wayuu nikialuʼujee chi Maleiwa Pülashikai maʼin jee jiʼreechi nia sünain antaa saʼaka siruma».
63 Naapaiwaʼaya tia chi laülaashikai napüleerua na sacerdotekana, nüsüküijaaka nüsheʼin sümaa nümüin: «Nnojotsü choʼujaain wachajaainjanain nooʼomüin wayuu süpüla naküjainjanain süchiki tia.
64 Nnaaʼasa jaapüin nünüiki sünain mojutuin Maleiwa nümüin. ¿Jamüsüjaʼa jünüiki süchiki tia?». Wanaawaka nanüiki nikiira süpüla nuʼutunajachin aaʼin.
65 Sejetünaka noʼuutajee Jesús, koʼuutajanaka nia atumawaa, nüsheʼejünaka jee nümünaka amüin: «Shiimainrejeʼe nünüikimaajachin pia Maleiwa püküja wamüin jaralin aʼyaatüin pia». Süchikijee niʼyaajünüin awalapünaa, nümaanaka sutuma suwaariase tü laülaapiakat.
66 Chajachikalaka joyotuin Pedro wünaapünaa suluʼu tü paatiakat. Süntaka wanee nüchepchia chi laülaashikai napüleerua na sacerdotekana.
67 Shiʼrapa Pedro sünain aatulujaa, shiʼrajawaain sümaka nia jee sümaka nümüin: «Nümaataraipuʼu pia Jesús chi chejeʼewaikai Nazaret».
68 Nüküjapejeʼe Pedro nnojolin niʼraajüin Jesús jee nümakalaka: «Maaʼawataasü neʼe pia tooʼomüin, nnojoishi teʼraajüin chia wayuukai». Nuʼunakalaka Pedro soʼuluʼumüin tü paatiakat.
69 Shiʼrakalaka nia nüchikuaʼa tü achepchieekat jee sümakalaka namüin na yalajanakana: «Eekajasaʼa chira makai nialeʼeya napüshi na nikirajüinkana Jesús».
70 Ayatapejeʼe nüküjain Pedro nnojolin niʼraajüin Jesús. Shiasaʼa yaaulerü mapa, narütkaaka waneinnua wayuu nünainmüin Pedro sümaa namüin nachikuaʼa nümüin: «Napüshi pia na wayuu nümaapuʼukana Jesús, jaʼyasü paaʼu Galileajeʼewalin pia».
71 Anuukalaka nünüiki Pedro namüin: «Oʼulejüneechi taya nnojoire taküjain tü shiimainkat nuʼupala Maleiwa. Nnojoishi teʼraajüin chia wayuu jümakai».
72 Nukootoleerajaaka wanee kaliina nüchikuaʼa, sotojooko naaʼin Pedro nünüiki Jesús wanaa sümaa nümüin nümüin: «Süpülapünaa nukootoleerajaain piantua wanee kaliina, apünüintueerü püküjain sümüin wayuu nnojolin piʼraajüin taya». Mojukalaka maʼin naaʼin Pedro saalinjee tia, niʼyalajakalaka maʼin.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Nneerü kachueera nanneetsepuʼuka na romanokana. Pünaʼla tia suluʼu tü kanüliakat «Sooʼomüin pütchi B14».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ «Iitakat tüü» shiyaawase nuuʼulaain Maleiwa nuʼutunuin aaʼin Jesús sünainjee airuʼuluin nünüiki nüchiki Maleiwa saashin wayuu.
^ Tia shia süleʼeruʼuin wayuu süchiki kaainjalaa.
^ «Sanedrín» münapuʼusü tü Laülaapia Miyoʼusükat natuma na judíokana.
