Tü nüshajalakat Marcos 11:1-33
11 Nülüʼülaapa Jesús namaa na nikirajüinkana Jerusalénmüin jee nantapa eemüin tü wutai kanüliakat Olivos, eere tü pueulokot Betfagué otta Betania, nüjütüin Jesús piamashii nikirajüin
2 sümaa nümüin namüin: «Juʼuna eemüin tüsa pueulokot, jüntapa samüin, eejeechi jüpüla wanee püliiküchon nnojoiyüitkai seʼejenain wayuu, jüsiwateetka tü nüpükat sümaa jajattüin nia yaamüin.
3 ‹¿Jamajachikai jümüin chira püliiküchonkai?› sümüle wayuu jümüin, ‹Choʼujaashi nümüin chi Señotkai nüleʼejiramaateechi nia nüchikuaʼa› meena jia sümüin».
4 Noʼunakalaka na nikirajüinkana Jesús, eejachika chi püliiküchonkai napüla kapüin süʼütpaʼa wanee puetta, yala sotpaʼa tü kaayekat otta nasiwataka nüpü.
5 Nayasaʼa waneinnua wayuu yalajanakana yala nasakirakalaka naya: «¿Jamüinjachikai jüsiwatakaʼa nüpü chira püliiküchonkai?».
6 Nayasaʼa na nikirajüinkana Jesús naküjain namüin naya wayuukana tü nüküjakat paala Jesús namüin, nnojoliika kasajanain naya namüin.
7 Nüntinnakalaka chi püliiküchonkai nümüin Jesús, neʼitaakalaka na nikirajüinkana Jesús tü saajunakat nasheʼin naaʼu chi püliikükai, noʼotookoloko Jesús naaʼu chi püliiküchonkai.
8 Eeshii na wayuu awayalakana saajuna nasheʼin süpaʼa tü wopukot, eetaashii joo na ashoʼttakana sütüna wunuʼu.
9 Nayasaʼa na wayuu oʼunakana nüchiiruajee Jesús jee na oʼunakana nüpüleeruajee emetutsü nanüiki sünain maa: «Puʼtteʼera wamüin, ¡anataʼaleeshijaʼa maʼin chi nüjünalakai Jehová!*
10 Anataʼaleeshijaʼa maʼin nüchon chi washikai David, chi antajachikai sünain aluwatawaa. Wachuntuin nümüin chi Chakai iipünaa süpüla nuʼtteʼerajachin nia».
11 Süchikijee nüntüin Jesús Jerusalénmüin, nuʼunakalaka suluʼumüin tü aʼwaajüleekat Maleiwa, nünanajaka tü kasa eejatkat chayaa. Shiasaʼa süka motsoin kaʼikat naaʼu oʼunushi nia Betaniamüin namaa na Polookana Piamamüin aluwataaushi.
12 Waneemüin kaʼi süchikijee naleʼejüin Betaniajee, outakalaka jamü Jesús.
13 Niʼraka wattajee wanee wunuʼu kapanasü maʼin, shia tü wunuʼu kanüliakat higuera, shiasaʼa nürütkaapa Jesús sünainmüin machonkalaka shia nüpüla, süpana neʼe eejatka jama nnojoluin shiain tü sükaliakat süpüla kachonwaa.
14 Nümakalaka Jesús sümüin tia wunuʼukot: «Müirümaʼaleeya mekujuin achon pia», saapünaka nünüiki natuma na nikirajüinkana.
15 Chapa Jesús Jerusalén nikerotoko suluʼu tü aʼwaajüleekat Maleiwa jee nüjünüjaaka yalejee na oikaaliikana jee na ayaʼlajüliikana wanee kasa, nujunuin nemeesain na aʼwanajüliikana nneerü jee neinase na oikaaliikana toomasü.
16 Nnojotkalaka nülatirüin wayuu sünain alüʼüjaa wanee kasa süpaʼapünaa tü aʼwaajüleekat Maleiwa.
17 Nikirajakalaka Jesús na wayuukana sünain maa: «¿Aashin mayaain tü Karaloʼuta Nüchikimaajatkat Maleiwa ‹Oʼuraajüleeinjatü tepia sutuma wayuu sainküinjeejatü tü mmakat›?, shipiapejeʼe neʼe shia kaʼruwarannuu jutuma».
18 Naapapa tia nekiipüʼü na sacerdotekana otta müshiʼiya na karaloʼutamaajakana, nachajaain sukuwaʼipa süpüla noʼutajachin naaʼin Jesús. Mmoluwaapejeʼe naya neema, jama ponuin maʼin saaʼin wayuu tü nikirajakalü anain Jesús.
19 Nuʼunakalaka Jesús motsouupa namaa na nikirajüinkana suluʼujee tia pueulokot.
20 Shiasaʼa waneemüin kaʼi nalatapa süʼütpünaa tü wunuʼu kanüliakat higuera, neʼrakalaka tü wunuʼukat juruleeinña suurulanainjee.
21 Sotokoloko naaʼin Pedro tü nümakat Jesús sümüin tia wunuʼukat, nümakalaka nümüin: «Piirakaa ekirajüikalee ojulujaʼaleesia tü higuera puʼulejakalü».
22 Naapaiwaʼaya Jesús tia, nümakalaka namüin: «Kanoula jia nünain Maleiwa.
23 Shiimain tü tamakat jümüin, jamüshijaʼa nümataarale wanee wayuu sümüin uuchikat tüü, ‹Anakajaʼa pujuttule shirokumüin tü palaakat›, nüküjale tia sümaa nnojoluin wainmajüin naaʼin otta nunoujale sünain meerüinña sukuwaʼipa, nuunteerü tia makat.
24 Kanoula jia sünain süpüshuaʼaleʼeya tü kasa juchuntakat juʼuraajapa nümüin Maleiwa, junouja sünain müin saapünüitpakai jümüin, saapüneetkalaka jümüin nutuma.
25 Shaʼwatapa jia sünain oʼuraajaa nümüin Maleiwa, moto jaaʼin tü kasa mojusü aaʼinnakat jümüin, moteetkalaka naaʼin jaainjala chi Jüshi iipünaajachikai».
26 *
27 Naleʼejaka nachikuaʼa Jerusalénmüin, warai nümakalaka Jesús süpaʼapünaa tü aʼwaajüleekat Maleiwa, narütkaakalaka nünainmüin Jesús nekiipüʼü na sacerdotekana, na karaloʼutamaajanakana otta müshiʼiya na laülaashiikana napüleerua na wayuukana.
28 «¿Jarai aluwataaka pia süpüla müinjatüin tü kasa paaʼinrakat? ¿Jarai aapaka laülawaa pümüin?» namakalaka nümüin Jesús.
29 Nümakalaka Jesús namüin: «Tasakirüinjaʼa paala jia sünain wanee kasa, jusoutule tamüin taküjeerüjaʼa jümüin jaralin aapüin laülawaa tamüin süpüla taaʼinrüin wanee kasa.
30 ¿Jarai kaluwanaajalaka Juan süpüla woutiisain wayuu nutuma? ¿Nuluwanaajalache nia chi Maleiwa chakai iipünaa? ¿Suluwanaajalataapa wayuu? Jusouta tamüin».
31 Anuujeseʼe nanüikijiraa: «Nuluwanaajala Maleiwa chakai iipünaa wamüle nümüin, eeshijaʼa süpüla nümüin wamüin: ‹¿Jamakaʼa manoujainka jia nünain?›.
32 Suluwanaajala wayuu nnojoishii süpüla wamüinjanain nümüin». Mmotshii naya seema jamajaa natuma na wayuukana, jama nünüikimaajachin Maleiwa Juan saashin wayuu.
33 Anuukalaka nanüiki nümüin Jesús: «Nnojotsü watüjaain aaʼu». Nusoutakalaka Jesús namüin: «Nnojoleerüjaʼa taküjain jümüin jaralin aapüin laülawaa tamüin süpüla taaʼinrüin wanee kasa».
Noota
^ Pünaʼla tia suluʼu tü kanüliakat «Sooʼomüin pütchi A5».
^ Ashajünüsü wetsiikulokot tüü suluʼu waneirua Biblia, nnojotpejeʼe shia eʼitaanüin suluʼu waneirua karaloʼuta sümaiwajatü ashajuushikat suluʼu griego. Pünaʼla tia suluʼu tü kanüliakat «Sooʼomüin pütchi A3».
