Tü nüshajalakat Lucas 22:1-71
-
Aashajaajiraashii nikiira Jesús na sacerdotekana süpüla noʼutajachin naaʼin (1-6)
-
Yapajüsü atumawaa tü ekaanajatkat sünain tü Pascuakat (7-13)
-
Sukuwaʼipa tü Ekawaa Aipaʼajatkat nutuma chi Señotkai (14-20)
-
«Aniisa tamaa chi wayuu aapajachikai tekii» (21-23)
-
«Naʼülüjiraaka maʼin na nikirajüinkana Jesús sooʼopünaa jaralinjachin nemiyoʼusein» (24-27)
-
Nüpansaajüin nünüiki Jesús namüin na nikirajüinkana süpüla naluwataainjanain wanaa nümaa (28-30)
-
Aküjünüsü nuunjulajeechin Pedro nüchiki Jesús (31-34)
-
Eejüinjatü saaʼin wayuu. Piamasü chajaruuta (35-38)
-
Oʼuraajüshi Jesús saaʼu tü wutai kanüliakalü Olivos (39-46)
-
Ataʼünnüshi Jesús (47-53)
-
Nüküjain Pedro nnojolin niʼraajüin Jesús (54-62)
-
Meeʼerapalashi Jesús (63-65)
-
Asakiijünüshi Jesús natuma na sulujunakana tü kanüliakat Sanedrín (66-71)
22 Sülüʼütka tü Miʼiraa Saainjünakalü oʼu tü Pan Maʼakasatkat Soolojia, tü kanüliakat Pascua.*
2 Nayasaʼa nekiipüʼü na sacerdotekana namaa na karaloʼutamaajanakana, nachajaain sukuwaʼipa süpüla noʼutajachin naaʼin Jesús, mmotpejeʼe naya neema na wayuukana.
3 Niasaʼa Judas chi kanüliakai Iscariote, jüüjüüsü naaʼin nümüin Satanás, napüshi nia na Polookana Piamamüin aluwataaushi.
4 Nuʼunakalaka sünain aashajawaa namaa nekiipüʼü na sacerdotekana jee namaa na sülaülajanakana tü aʼwaajüleekat süpüla naapajatüin nikii Jesús.
5 Talatakalaka naya naapaiwaʼaya tia jee naküjaka nümüin nawalaajüinjachin nia.
6 Anashiika shia nümüin, nüchajaakalaka maʼin sukuwaʼipa süpüla naapajatüin nikii Jesús nnojotpa wainmain wayuu nümaa.
7 Süntakalaka sükalia tü Miʼiraa Saainjünakalü oʼu tü Pan Maʼakasatkat Soolojia, suʼutunaka oʼu saaʼin tü mürüt ekaanajatkat sünain tü Pascuakat.
8 Nüjütünaka Pedro nümaa Juan nutuma Jesús sümaa nümüin namüin: «Anashii juʼunule yapaiwa jutuma tü kasa wekaainjatkat sünain tü Pascuakat».
9 Anuujeseʼe nanüiki nümüin: «¿Jalasü pücheküin yapain shia watuma?».
10 Nusoutaka namüin: «Jüntapa pueulopaʼamüin, antiraajeena jia nümaa wanee wayuu alüʼüjakai wüin suluʼu wanee amüchi. Juʼuneenakalaka nüchiirua, jikeroleenaka suluʼumüin tü miichi nikerolokalü aluʼumüin.
11 Jümeenaka nümüin chi wayuu nipiajachikai: ‹Anuu nünüiki chi Ekirajüikai: «¿Jalasü tü kuatta tekaainjatkalü aluʼu tü Pascuakat namaa na tekirajüinkana?»›.
12 Niiʼiyateetkalaka jümüin wanee kuatta miyoʼu kaluʼusü korolo, chasü tia kuattakat iipünaa sünain tü miichikat, yapeetka shia jutuma wapüla».
13 Noʼunaka na nikirajüinkana. Ayatakajaʼaya napüla tü kuattakat maʼaka nüküjain shia Jesús namüin. Yapakalaka kasa süpüshuaʼa natuma süpüla nekaainjanain soʼu tü Pascuakat.
14 Süntapa tü oora nekaainjatkalü oʼu, nüikalaaka Jesús sünain ekawaa namaa na aluwataaushikana.
15 Nümakalaka Jesús namüin: «Suchuntaain taaʼin tekaain tü Pascuakat jümaa süpülapünaa teʼrüin tamüliala.
16 Nnojoleerü teküin shia piantua, waneʼereeya teküin shia nuluwataapeena Maleiwa saaʼu tü mmakat otta shikeraajapa süpüshuaʼa tü kasa kayaawasekat tü Pascuakat».
17 Sülatinnaka nümüin wanee iita kaluʼusü wiino, naapaka analuʼut nümüin Maleiwa jee nümakalaka namüin: «Anashii jüsüle jee jülatireetkalaka shia namüin na waneinnua.
18 Anuu tanüiki jümüin, nnojoleerü tasüin süchikuaʼa süsha tü uuwakat, waneʼereeya tasüin shia nuluwataapeena Maleiwa saaʼu tü mmakat».
19 Naapaakalaka wanee pan, nuʼuraajakalaka nümüin Maleiwa. Nüshaletakalaka tü pankat sümaa naapüin shia namüin na nikirajüinkana jee nümaka namüin: «Tüü shiyaawase teʼiruku, tü anuu joo taapajiraainjatüin jaaʼu. Ayataʼaya jaaʼinrüin tüü süpüla sotuinjachin taya jaaʼin».
20 Kettaapa neküin, naapaaka Jesús wanee iita kaluʼusü wiino jee nümakalaka namüin: «Asüüshikat tüü, shia süikaleʼeria tü pütchi apansaajünakat, tü oʼtteetkalü amülapeena tasha jüpüleerua.
21 »Aniisa tamaa chi wayuu aapajachikai tekii.
22 Shiimain outajachin chi Süchonkai Wayuu maʼaka süküjünüin paala nüchiki. Aluʼuleekaijaʼa maʼin chi wayuu aapüinjachikai nikii chi Süchonkai Wayuu».
23 Nalirajiraaya namaka na nikirajüinkana süchiki jaralinjachin müin aainjala.
24 Naʼülüjiraaka maʼin na nikirajüinkana Jesús sooʼopünaa jaralinjachin nemiyoʼusein.
25 Anuujese nünüiki Jesús namüin: «Na wayuu aluwataashiikana saaʼu mma, alaülaajaashii naaʼu na wayuu naluwataakana aaʼu. Nayasaʼa na wayuu kojutukana atumawaa, eʼnnaajünüshii suluʼu nakaalinjaliin wayuu.
26 Akaajasaʼa jiakana nnojotsü müinjatüin jukuwaʼipa. Chi eekai miyoʼuweein jaʼakajee, niainjachi chi tepichikai aaʼin, niasaʼa chi oʼunirakai sukuwaʼipa wanee kasa jüpüleerua, niainjachi aʼyataaka jüpüleerua.
27 ¿Niache miyoʼuka jaʼakajee chi wayuu ekakai?, ¿niataapasa chi aʼyataakai jüpüleerua? ¿Aashin niayaain chi wayuu ekakai? Yaashi taya jaʼaka maʼaka naaʼin wanee wayuu aʼyataakai jüpüleerua.
28 »Jia waneepiakana tamaa soʼunnaa tü müliaa teʼrakat.
29 Maʼaka nüpansaajüin nünüiki chi Tashikai tamüin, tapansaajüinjaʼa joo tanüiki jümüin süpüla juluwataainjanain wanaa tamaa.
30 Jikeenaka jee jüseenaka wanee kasa tamaa taluwataapeena otta aikalaajeena jia saaʼu einasee süpüla süsalain jutuma tü poloosükat piamamüin eʼirukuu yaakat Israel.
31 »Simón, nuchuntuinsaʼa jia Satanás süpüla nuwaajüinjanain jia maʼaka nuwaajüin wanee wayuu tü trigokat.
32 Achuntapejeʼe maʼin taya püpüleerua süpüla nnojoluinjatüin sümalajaain tü punoulakat. Shiasaʼa sükatchiraapa maʼin tü punoulakat, pütütüleʼera naaʼin na puwalayuukana».
33 Nusoutakalaka Pedro nümüin: «Señotkalee, aniweechia taya pümaa, jaʼitashi püreesain taya wanaa pümaa jee outulejeʼeya taya».
34 Anuujeseʼe nünüiki Jesús nümüin Pedro: «Tamüshi paala pia Pedro, waneʼereeya nukootoleerajaain chi kaliinakai soʼukai, apünüintuapa püküjain sümüin wayuu nnojolin piʼraajüin taya».
35 Jee nümakalaka namüin: «Wanaa sümaa tajütüin jia sümaa nnojoluin jülüʼüjain woʼot süta jünneetse sümaʼaleeya tü jüchisepalainjatkat jee nnojoluin jülüʼüjain suwalaʼata jukoʼusüin, ¿aashin nnojoluin kasain choʼujaain jümüin?». «Nnojotsü kasain choʼujaain wamüin», namakalaka nümüin.
36 Nusoutaka Jesús namüin: «Chi wayuu eekai amaʼana wanee woʼot süta nneerü, anasü nülüʼüjale shia. Akaataajaʼa chi wayuu kachisepalakai, anasü nülüʼüjale tü nüchisepalakat. Niasaʼa chi wayuu nnojoikai kamaʼanain chajaruuta, anasü nuiküle tü saajunakat nüsheʼin süpüla niyaʼlajüinjatüin wanee chajaruuta.
37 Tamüshii paala jia, ekeraajüinjatü tü aküjünakat paala tachiki, tü makat mayaa: ‹Wayuu kaainjarai nia saashin wayuu›, shiaʼaya maʼin alataka tamüin tia maaʼulu».
38 Anuujeseʼe nanüiki na nikirajüinkana nümüin: «Señotkalee, anuu piamasü chajaruuta wamaʼana». Nusoutakalaka Jesús namüin: «Aneerü türa piamasükat».
39 Nujuʼitapa yalejee, nuʼunakalaka saaʼumüin tü wutai kanüliakat Olivos maʼakaapuʼu nuʼunuin chamüin. Noʼunakalaka na nikirajüinkana nüchiirua.
40 Nantapa chamüin, nümakalaka Jesús namüin: «Yaashiʼiya paala jia oʼuraajüin suulia suuʼulakünüin jaaʼin».
41 Nuʼunakalaka mamüin aka tüsa, nüsapainkaka nia sünain oʼuraajaa
42 jee nümakalaka: «Tashikalee, nnojo puuʼulaain tasüin tü asüüshi suluʼukat iitakat* tüü, nnojotpejeʼe shiainjatüin ekeraajüin tü tachekakat neʼe, shia anaka aluʼu shikeraajüle tü püchekakat tapüleerua».
43 Niiʼiyalaaka nümüin Jesús wanee aapiee nümaʼanajeejachi Maleiwa jee nükatchinraka naaʼin.
44 Ayatapejeʼe nia oʼuraajüin süka shapaain maʼin naaʼin. Shottusü tü nirakat saaʼu tü mmakat, mataasü aka saaʼin isha.
45 Süchikijee nuʼuraajüin Jesús, nuʼunakalaka eemüin na nikirajüinkana. Yalajanaka naya atunkajaʼalüin nüpüla, mapüsajüshii maʼin naya, jama mojuin maʼin naaʼin.
46 Anuujeseʼe nünüiki Jesús namüin: «¿Jamüshiikai jutunkajaka? Anashii jütamaale, juʼuraaja waneepia suulia suuʼulakünüin jaaʼin».
47 Yalaiwaʼaya naashajaain Jesús, süntapaaka watta saalii wayuu. Nia palajachi napüleerua chi kanüliakai Judas, niajaʼa noʼutku na Polookana Piamamüin aluwataaushi. Nürütkaaka nünainmüin Jesús süpüla nutuʼlajatüin nuwalapaʼa.
48 Nümakalaka Jesús nümüin: «Judas, putuʼluinra maʼin chi Süchonkai Wayuu süpüla paapajachin nikii».
49 Nayasaʼa na yalajanakana nüʼütpaʼa Jesús nayaawataka saaʼu tü alatajatkat, namakalaka nümüin: «Señotkalee, ¿awataainjana waya nooʼomüin sümaa chajaruutakat?».
50 Nuwataaka wanee sümaa nüchajaruutse nooʼomüin nüchepchia chi laülaashikai napüleerua na sacerdotekana, nushottoko tü nücheʼe nikialuʼujeejatkat.
51 Anuujeseʼe nünüiki Jesús saalinjee tia: «Anashii juuʼulaale suulia tü makat». Niʼitaakalaka najapü saaʼu nücheʼe chi wayuukai jee anakalaka nia nutuma.
52 Nümakalaka Jesús namüin nekiipüʼü na sacerdotekana, na sülaülajanakana tü aʼwaajüleekat jee namüin na laülaashii antüshiikana sünain ataʼülaa nia: «¿Kaʼruwaraiyaa taya jaaʼinruʼu chajaruutamaaka jia jee wunuʼumaaka jia tooʼomüin?
53 Mataashi chapuʼukai tekirajüin weinshi suluʼu tü aʼwaajüleekat Maleiwa, nnojoipejeʼe taya jütaʼülüin. Shia jükaliaka tüü jee nakalia shia na ounjulaakana saʼaka piʼyuushi».
54 Nütaʼünnaka Jesús, nümaanaka nipialuʼumüin chi laülaashikai napüleerua na sacerdotekana jee nuʼunajaka Pedro nachiirua.
55 Nachuwajaaka na wayuukana wanee siki pasanain sünain tü paatiakat jee naikalaaka sünain aatulujaa, nüikalaaka Pedro namaa sünain aatulujaa.
56 Niʼnnakalaka Pedro soʼu suwarala tü sikikat sutuma wanee achepchiee, shiʼrajawaain sümaka nia jee sümakalaka: «Wayuukai chii nümaataraipuʼu Jesús».
57 Nüküjapejeʼe Pedro nnojolin niʼraajüin Jesús sümaa müin nünüiki: «Nii waaʼiraa, nnojoishisaʼa teʼraajüin chi wayuu pümakai».
58 Niʼnnaka mapa Pedro nutuma wanee wayuu jee nümakalaka nümüin: «Napüshi pia na nikirajüinkana Jesús». Nusoutaka Pedro nümüin: «Nnojolichi taya napüshinjaʼa».
59 Maʼaka wanee oora süchikijee tia, eekalaka wanee wayuu masütaajükai sünain maa: «Wayuukai chii nümaataraipuʼu Jesús, jaʼyasü naaʼu Galileajeʼewalin nia».
60 Nusoutakalaka Pedro nümüin: «Waʼle, nnojotsü tayaawatüin aaʼu tü paashajaakalü achiki». Yalaiwaʼaya naashajaain Pedro, nukootoleerajaaka wanee kaliina.
61 Nujununtaaka chi Señotkai, niirakaaka nümüin Pedro. Sotojooko naaʼin Pedro nünüiki chi Señotkai wanaa sümaa nümüin nümüin: «Waneʼereeya nukootoleerajaain chi kaliinakai soʼukai, apünüintuapa püküjain sümüin wayuu nnojolin piʼraajüin taya».
62 Nujuʼitaakalaka Pedro anooipaʼamüin sümaa niʼyalajüin maʼin, jama mojuin maʼin naaʼin.
63 Nayasaʼa na wayuu ataʼülakana Jesús, nemeeʼerainpalashi sümaa nasheʼejüin nia.
64 Koʼuutajanaka nia natuma jee namaka kojuyatua nümüin: «Shiimainrejeʼe nünüikimaajachin pia Maleiwa püküja wamüin jaralin aʼyaatüin pia».
65 Airuʼutkalaka maʼin nanüiki nümüin.
66 Mayaasü jaʼyuuin, noutkajaaka na laülaashiikana suluʼu tü pueulokot namaʼaleeya nekiipüʼü na sacerdotekana jee müshiʼiya na karaloʼutamaajanakana. Namaakalaka Jesús suluʼumüin tü kanüliakat Sanedrín jee namakalaka nümüin:
67 «Püküja wamüin pialejeʼeya chi Cristokai». Nusoutakalaka Jesús namüin: «Jaʼitayaain taküjain shia jümüin, nnojoleerü junoujain tanüiki.
68 Jaʼitakajeʼe neʼe tasakirüle jia sünain wanee kasa, nnojoleena jia asoutuin tamüin.
69 Soʼujeʼereeya kaʼikai tüü, jiʼreechi chi Süchonkai Wayuu nikialuʼujee chi Maleiwa Pülashikai maʼin».
70 Nüsakinnaka Jesús natuma: «¿Piaka chi Nüchonkai Maleiwa?». Nusoutaka Jesús namüin: «Aa, tayaʼayan, nnaaʼasa jüküjaitpain shia».
71 Anuujeseʼe nanüiki: «Nnojotsü choʼujaain süküjünajatüin wamüin sooʼomüin tia, nnaaʼasa nüküjaitpain shia wamüin».
Noota
^ Pünaʼla tia suluʼu tü kanüliakat «Jamaluʼulu pütchikat».
^ «Iitakat tüü» shiyaawase nuuʼulaain Maleiwa nuʼutunuin aaʼin Jesús sünainjee airuʼuluin nünüiki nüchiki Maleiwa saashin wayuu.
