Tü nüshajalakat Lucas 20:1-47
-
Nnojotsü anoujunuin nümüin Jesús saapünüin laülawaa nümüin (1-8)
-
Nachiki na apünajülii uwomuyuukana (9-19)
-
Maleiwa nümaa «César» (20-26)
-
Asakinnüshi Jesús süchiki süsoʼiraainjatüin saaʼin wayuu (27-40)
-
¿Jaraiche kachonka Cristo? ¿Nüchonche nia David? (41-44)
-
Eʼreena müliaa na karaloʼutamaajanakana (45-47)
20 Soʼu wanee kaʼi nikirajaka oʼu Jesús suluʼu tü aʼwaajüleekat jee soʼu nüküjain tü pütchi anakat maʼin,* antapaashii nekiipüʼü na sacerdotekana namaʼaleeya na karaloʼutamaajanakana otta müshiʼiya na laülaashiikana.
2 «¿Jarai aluwataaka pia süpüla müinjatüin tü kasa paaʼinrakat? ¿Jarai aapaka laülawaa pümüin?», namakalaka nümüin.
3 Nusoutakalaka Jesús namüin: «Tasakirüinjaʼa paala jia sünain wanee kasa, asoutajanapejeʼe jia tamüin.
4 ¿Jarai kaluwanaajalaka Juan süpüla woutiisain wayuu nutuma? ¿Nuluwanaajalache nia chi Maleiwa chakai iipünaa? ¿Suluwanaajalataapa wayuu?».
5 Anuujeseʼe nanüikijiraa naya wayuukana: «Nuluwanaajala Maleiwa chakai iipünaa wamüle nümüin, eeshijaʼa süpüla nümüin wamüin: ‹¿Jamakaʼa manoujainka jia nünain?›.
6 Suluwanaajala wayuu wamülejeʼeya nümüin, eeshiijaʼa süpüla jamajüin waya natuma na wayuukana, jama nünüikimaajachin Maleiwa Juan saashin wayuu».
7 Naküjakalaka nümüin Jesús nnojoluin natüjaain saaʼu jaralin kaluwanaajalain Juan.
8 Nusoutakalaka Jesús namüin: «Nnojoleerüjaʼa taküjain jümüin jaralin aapüin laülawaa tamüin süpüla taaʼinrüin wanee kasa».
9 Kayaawaseka nutuma Jesús namüin na wayuukana tü nikirajakalü anain, müshi nia: «Eetaalashi wanee wayuu koumainshi apünajakai uuwoʼulia suluʼu. Naʼanapiraka tü nuumainkat saaʼu nneerü namüin wanee apünajülii. Nuʼunakalaka suluʼumüin wanee mma naata eere kakaliain nia.
10 Shiasaʼa mapa, nüjütaka wanee nüchepchia namaʼanamüin na apünajüliikana süpüla naluwataainjatüin nümüin süpüshi süchon tü aʼttieekat. Nayasaʼa na apünajüliikana, naʼyaajaka chia achepchieekai jee najütaka nia sümaa majapüitpain nia natuma.
11 Nüjütaka chi koumainshikai wane nüchepchiaya nanainmüin na apünajüliikana, niʼyaajünaka chia achepchieekai natuma jee airuʼutka nanüiki nümüin. Najütaka nia nüchikuaʼa sümaa majapüitpain nia natuma.
12 Nüjütaka chi koumainshikai wane nüchepchiaya, apünüinna joo nüjütaka nüka chia. Mataajaʼa chia atumawaa, amayeinjünüshi jee nujutunaka anooipaʼamüin.
13 Anuujeseʼe nünüiki chi kayüüjainshikai: ‹¿Kasache anaka süpüla taaʼinrüin? Anainjaʼa niale tajütüin chi tachon aishikai tapüla, eeshijaʼa nieechire kojutuin namüin naya wayuukana›.
14 Nayasaʼa na apünajüliikana namajiraaka neʼraiwaʼaya nüchon chi wayuukai: ‹Niasaʼa eʼipünaanajachikai apüla mmakat chi makai antüin, anashi woʼutule naaʼin, woumainjeetka tü mmakat›.
15 Nayuʼlaka nia anooipaʼamüin sünain tü uuwoʼuliakat jee noʼutakalaka naaʼin. ¿Kaseetche naaʼinraka chi koumainshikai naka na apünajüliikana?
16 Anteechi nia nooʼomüin na apünajüliikana, nuʼuteenaka naaʼin jee naapeetka tü mmakat namüin waneinnua apünajülii».
«¡Kasataalejeseʼe nnojoluin müin tia!», namakalaka na wayuukana naapaiwaʼaya nünüiki Jesús.
17 Niirakaaka Jesús namüin sümaa nümüin namüin: «¿Jamaluʼutche tü pütchi ashajuushi makalü anüiki mayaa: ‹Tü ipa nayoutakat na akumajüliikana miichi, shia tü ipa choʼujaakat maʼin›?
18 Chi eekai nujutuuin saaʼu ipakat tüü, eewaweechi jee shiataale ojutuuin ipakat naaʼu, yülaʼawaleejeechia».
19 Naapapa nekiipüʼü na sacerdotekana otta na karaloʼutamaajanakana tü shiyaawasekat nikirajia Jesús, nayaawataka saaʼu nayain kaliajanain tü nümakat. Nataʼüleeinñaaje nia soʼuleʼeya kaʼikat tia, mmotpejeʼe naya seema jamajaa natuma na wayuukana.
20 Niʼrajaanaka maʼin Jesús natuma jee süchikijee tia, nasakajaka ojuunaa waneinnua wayuu lotoyookana akuwaʼipa jee najütaka naya nümaʼanamüin Jesús süpüla süsalainjachin nia natuma saaʼujee wanee pütchi eekai nujuʼitirüin. Shia keeʼireeka naaʼin naapajatüin nikii nümüin chi aluwataashikai jee nümüin chi sülaülakai mma.
21 Namakalaka naya wayuukana nümüin: «Ekirajüikalee, watüjaa aaʼu lotuin sukuwaʼipa pünüiki otta lotuin sukuwaʼipa pikirajia, nnojoluin koʼuin pukuwaʼipa sümüin wayuu otta shiain pikirajüin anain tü nümakat Maleiwa suluʼu shiainjaʼa shiimain.
22 ¿Anasüche saaʼin pümüin wawalaajüle tü nneerü nümüinjatkat chi ‹César› münakai? ¿Nnojottaapa anain?».
23 Niyaawatapejeʼe saaʼu Jesús wayuuin mojulaashii naya, müshijeseʼe nümüin namüin:
24 «Jüsaaja tamüin wanee ‹denario›.* ¿Jarai kayaakuaka tü sünainkat tü nneetkat? ¿Jarai kanüliamaaka shia?». «Nia ‹César›», namakalaka nümüin.
25 Anuujeseʼe nünüiki Jesús namüin: «Jaapa jümata nümüin ‹César› tü kasa nümüinjatkat, jaapüinjatpejeʼe nümüin Maleiwa tü kasa nümüinjatkalia».
26 Nnojoikaʼa süsalain nia natuma saaʼujee wanee pütchi eekai nujuʼitirüin noʼupala na wayuukana, koʼutaka neʼe naya nuulia, jama ponuin maʼin naaʼin tü nümakat.
27 Nantakalaka nünainmüin Jesús waneinnua saduceo, na manoujainkana sünain süsoʼiraainjatüin aaʼin wayuu outusü jee namakalaka nümüin:
28 «Ekirajüikalee, saashin tü nümakat Moisés, nünaajaale wanee wayuu sümaa machooin nia sümüin nuʼwayuuse, niainjachi eisatka chi nuwalakai nüchikumüin. Kachooinjatkalaka tü jietkat nutuma süpüla müinjachin niakaijaʼa kachooin aaʼin chi amülouishikai.
29 Eejanainka akaratshishii wayuu pawalaawashii, kaʼwayuusetaalaka chi epayaakai, anaajaapejeʼe nia sümaa machooin nia sümüin tü nuʼwayuusekat.
30 Niasaʼa chi nutujeejachikai
31 nümaʼaleʼeya joo chi eweetüshikai nüchiiruajee chia, eisatshii sümüin tü jietkat. Nanaajaaka naya akaratshishiikana wayuu sümaa machooin naya sümüin tü jietkat.
32 Shiasaʼa mapa maʼin, sünaajaaka tü jietkat.
33 Nasoʼireʼennapa aaʼin na outushiikana, ¿jaraleechi kaʼwayuuseka tia wayuukot naʼakajee na akaratshishiikana wayuu, jama suʼwayuuseshiin naya napüshuaʼa paala?».
34 Nusoutakalaka Jesús namüin: «Nachooin na wayuu eekana maaʼulu yaa,* kasaatshii otta aapünüshii naya süpüla kaʼwayuuseinjanain naya,
35 eekajasaʼa na wayuu anakana naashin Maleiwa süpüla eeinjanain naya mapeena otta na asoʼiraainjanakana aaʼin süchikijee outaa, nnojoishii naya kasaalüin otta nnojoishii aapünüin süpüla kaʼwayuusee.
36 Nnojoleena outuin naya süka müin nakuwaʼipa maʼaka nakuwaʼipa na aapiee chakana iipünaa otta nüchooinjana naya Maleiwa, jama nasoʼiraain aaʼin süchikijee outaa.
37 Wanaa sümaa nüshajüin Moisés süchiki tü wunuʼu chuwatakat nüküjaleeinña süchiki nasoʼireʼennajanain aaʼin na outushiikana, wanaa sümaa nüküjain niain Jehová* ‹chi Nümaleiwasekai Abrahán, chi Nümaleiwasekai Isaac otta chi Nümaleiwasekai Jacob›.
38 Chi Maleiwakai, nnojoishi Sümaleiwasein wayuu outusü, Sümaleiwase eekai katüin soʼu, süka jamüin, katoʼuchii napüshuaʼa na wayuukana nümüin Maleiwa».
39 Naapaiwaʼaya nünüiki Jesús waneinnua karaloʼutamaajana namakalaka nümüin: «Pansaasü pünüiki, Ekirajüikalee».
40 Nnojoireeka nia nasakireein piantua.
41 Nümakalaka Jesús namüin na wayuu aapajakana nünüiki: «¿Jamüshii namakaʼa na wayuukana niain Cristo chi nüchonkai David?
42 Mapejeʼe nünüiki David suluʼu tü karaloʼuta ashajünakalü aluʼu Salmos: ‹Müshi Jehová* nümüin chi Taseñotsekai: «Püikalaa yaa tekialuʼujee
43 waneʼereeya puuʼuipalapa tatuma na püʼünüükana»›.
44 Señotkai nümülejeʼe David nümüin, ¿jamakuwaʼipaika süpüla nüchonjachin nia?».
45 Sümaʼainruʼu yalajanain na wayuukana sünain aapajaa nünüiki Jesús, nümakalaka namüin na nikirajüinkana:
46 «Jalia jia naaʼin na karaloʼutamaajanakana, kamalainsü namüin warai namüin sümaa miyoʼuin nasheʼin jee kamalainsü namüin nasakünüinjanain metkaaraluʼu. Aikalaashii naya palajana suluʼu tü miichi ekirajüleekat nüchiki Maleiwa jee noʼunapa sünain wanee ekawaa, aikalaashii naya eere naikalaain na wayuu kojutukana atumawaa.
47 Neʼra amüinrü wayuu eekai outuin suʼwayuuse süpüla nasütajatüin suulia wanee kasa eekai sümaʼanain jee kamaʼawaishii naya sünain oʼuraajaa shiiʼiree shiʼrüinjanain naya wayuu. Alanaʼaleejeeria tü müliaa neʼreetkat süsalapa naya naainjala atumawaa».
Noota
^ Pünaʼla tia suluʼu tü kanüliakat «Jamaluʼulu pütchikat».
^ Nneerü kachueera nanneetsepuʼuka na romanokana. Pünaʼla tia suluʼu tü kanüliakat «Sooʼomüin pütchi B14».
^ Jee nayale «na wayuu eekana soʼunnaa tü kasa alatakat sainküin mma». Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
