Karaloʼuta nüshajalaka Judas 1:1-25
1 Karaloʼutakat tüü, tashajala tayakai Judas. Nüchepchia taya Jesucristo otta nuwala taya Santiago. Jümüinjatü jia aneekuushikana nutuma chi Washikai Maleiwa, jia aishiikana nüpüla jee naaʼinmajüin jia süpüla eeinjanain jia nümaa Jesucristo.
2 Kasataalejeseʼe sümülialaain maʼin naaʼin Maleiwa jaalin, jimatüin jaaʼin nutuma jee sükooʼomüinraain jaalin nüpüla.
3 Tawalayuu aishiikana tapüla, ashajeeshinka taya paala süpüla taküjain jümüin süchiki tü kasa anasü weʼrakat nutuma Maleiwa sünainjee nuʼtteʼerüin waya. Anashiipejeʼe tamüin tashajüin jümüin icheinjatüin junoula nünain Maleiwa, uwatua nekirajünüin na aneekuushikana sünain tia jee süpülajatü shia kaʼi süpüshuaʼa.
4 Eeshii waneinnua wayuu ekeronuwaaka jaʼakamüin ojuunaa, nnojotsü anain nakuwaʼipa maʼaka süküjatüjülüin shia tü Karaloʼuta Nüchikimaajatkat Maleiwa. Mojutusai Maleiwa namüin naya wayuukana. Naashin naya wayuukana, moteerü naaʼin Maleiwa naainjala saaʼujee kamaneein nia namüin müshiijeseʼe maapülin naya sünain aaʼinraa kasa mojusü* otta nnojoishii waneepiain naya nümaa Jesucristo, chi walaamainkai sümaa Waseñotsein nia.
5 Mayaainjeʼe jütüjaain saaʼu tü taküjainjatkat jümüin, tasoʼiree aaʼinchii jia sünain nujuʼitirüin Jehová* waneinnua wayuu suluʼujee tü mmakat Egipto. Najaʼttirapejeʼe mapa na eʼrüliijaakana wayumüin.
6 Na aapiee eʼrüliijaakana wayumüin, na ayoutakana süchiki makatüin naya eeinjanale naya paala, müshii kaleenaluʼukai naaʼin süpüla kaʼikat süpüshuaʼa otta müsü kojokai saaʼin piʼyuushi naaʼu süpüla tü kaʼi kasalajanainjatkalü oʼu naainjala nutuma Maleiwa.
7 Akaataajaʼa neʼe na wayuu chapuʼukana suluʼu tü mmakat Sodoma sümaa Gomorra jee tü pueulo pejepünaakat sünain, aʼluwajiraashii naya nakuwaʼipa* jee naaʼinrüin tü kasa mojusü suchuntaakat naaʼin, naata suulia tü akumajünakalü apüla naya nutuma Maleiwa. Süsalashii naya naainjala süka tü siki matüjainkalü oyokojowaa,* müshiijeseʼe waapinnüin suulia majüin wakuwaʼipa maʼaka nakuwaʼipa.
8 Mayaainjeʼe müin tia, nnojotsü kasajatüin namüin tia na wayuu ekeronuwaakana jaʼakamüin. Wainma kasa mojusü jülüjakuʼu maka naaʼin, naʼyarülajüin nakuwaʼipa otta nakuwaʼipa na waneinnua. Mojutusalii namüin na laülaakana naaʼu jee mojusü nanüiki nachiki na kojutukana nümüin Maleiwa.
9 Jamüshijaʼa Miguel, chi sülaülakai aapiee aʼülüjiraashi nia nümaa chi Yolujaakai saaʼujee niʼiruku Moisés, nnojotsü airuʼuluin nünüiki nümüin. «Kasataalejeseʼe nüchiaain pia Jehová* saaʼujee tia», müshi nia nümüin.
10 Eekajasaʼa naya wayuukana mojusü neʼe nanüiki süchiki tü kasa nnojotkat nayaawatüin aaʼu otta müshii naya maʼaka saaʼin wüchii aaʼinraka wanee kasa sooʼopünaa saaʼin, ayatüsia neʼe naʼyarülajüin tü nakuwaʼipakat mayaainjeʼe nayaawatüin saaʼu wanee kasa.
11 Neʼreerü noʼukajatü naya wayuukana, jama nashatüin nukuwaʼipa Caín. Shia naaʼinraka tü naaʼinrakat Balaam süka walaweein naya otta ajaʼttinnüshii naya süka neʼrüliin wayumüin suluʼu nanüiki maʼaka niʼrülin wayumüin Coré.
12 Eeshii naya wayuukana jaʼaka wanaa sümaa jaainjain wanee miʼiraa süpülajatka aijiraain na wawalayuukana, mapajeʼe naya maʼaka saaʼin ipa nnojotka jaʼyain shiinaluʼu wüin. Müshii naya maʼaka naaʼin arüleejülii maapülinkana saaʼu nakuwaʼipa, shia kapülaka neʼe naaʼin nakuwaʼipa namüiwaʼa,* müshii naya maʼaka saaʼin siruma unataka sutuma joutai, müshii naya maʼaka saaʼin wunuʼu machonka soʼu tü sükaliakat süpüla kachoinjatüin, jutsü neʼe,* atuʼujaaneerü.
13 Naya wayuukana müshii aka saaʼin sümüna palaa antiraka yarütshii sotpaʼamüin palaa. Eʼrüshii naya japülii sutuma tia. Müshii naya maʼaka saaʼin shüliwala eekai unatüin neʼe, keraaitpa napüla kojoinjatüin maʼin waneepia piʼyuushi naaʼu.
14 Eejachi wanee nülüin Adán,* kanüliashi Enoc aküjakai süchiki tia soʼu nümüin: «Antüshi Jehová* namaa na aapiee wattakana naalii.
15 Antüshi nia süpüla süsalainjatüin saainjala wayuu nutuma otta süpüla sütüjaanüin aaʼu mojuin maʼin tü naaʼinrakat na mojutukana amüin nia jee saaʼu airuʼuluin nanüiki nüchiki».
16 Naya wayuukana, younakuʼu müshii saaʼu müliain naya naküjainruʼu jee naaʼinrüin tü kasa mojusü suchuntaakat naaʼin. Aʼwaataashii naya suluʼu nakuwaʼipa jee anayaasü nanüiki süchiki wayuu shiiʼiree nayainjanain neʼe anain akuwaʼipa.
17 Tawalayuu aishiikana tapüla, soto jaaʼin tü naküjapuʼukat na aluwataaushikana nutuma chi Waseñotsekai Jesucristo.
18 Anuu tü naküjapuʼukat jümüin: «Sülüʼütpa sükalia süpüla sajaʼttüin kasa mojusü, eejeena wayuu emeeʼerajaakana süka kasa eekai anain jee shieerü neʼe naaʼinraka tü kasa suchuntaakat naaʼin».
19 Mojujiraashii na anoujashiikana natuma naya wayuukana. Müshii aka saaʼin wüchii jashichi jee nnojotsü tü nüpülainkat Maleiwa naaʼu.
20 Tawalayuu aishiikana tapüla, jükatchinra junoula sünain tü pütchi ekirajünakalü anain jia otta juuʼulaa nuʼuniraiwa Maleiwa jukuwaʼipa sükajee tü nüpülainkat juʼuraajapa nümüin.
21 Ayataʼaya jaaʼinrüin wanee kasa ayateenaka alin aaʼujee jia nüpüla Maleiwa sümaʼainruʼu jaʼatapajüin jümüliajünüin nutuma chi Waseñotsekai Jesucristo süpüla katüinjatüin joʼu waneepia.
22 Jümüliajaʼaya naaʼin na wainmajakana aaʼin sünain anoujaa.
23 Jükaalinja naya suulia najaʼlajeʼennüin.* Ayataʼaya jümüliajüin naaʼin na waneinnua, eejüinjatpejeʼe jaaʼin süpüla jiyoutuinjatüin tü kasa mojusü saaʼinrakat wayuu, yarüttaka atuma sukuwaʼipa wayuu sükajee kaainjalain shia.*
24 Nia Maleiwa aaʼinmajaka jia suulia kaainjalaa, nia wuleka atuma jukuwaʼipa, nia talataka atuma jaaʼin süpüla anainjatüin jukuwaʼipa noʼuluʼu.
25 Niaʼaya waneeshikai sünain Maleiwain, nia Oʼtteʼeraka waya nükajee Jesucristo, chi Waseñotsekai. Kasataalejeseʼe nuʼwaajünüin chi Maleiwakai, laülaainjachin nia, kasataalejeseʼe pülashin nia jee nuluwataain maaʼulu yaa maʼaka nuluwataapuʼuin paala sümaiwa jee maʼaka nuluwataajeechin süpüla kaʼikat süpüshuaʼa. Amén.*
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Jamaluʼulu pütchikat».
^ «Ajaʼttinnaleeinjana» maluʼulu tia suluʼu griego.
^ Pünaʼla tia suluʼu tü kanüliakat «Sooʼomüin pütchi A5».
^ «Emirashii neʼe naya sümaa nnojoluin mmoluin naaʼin» maluʼulu tia suluʼu griego.
^ «Piantua outuin» maluʼulu tia suluʼu griego.
^ Nünainjee Adán nünainmüinreʼeya chi nüshikai Enoc, eejana aipiruashii nutuushinuu Enoc.
^ Pünaʼla tia suluʼu tü kanüliakat «Sooʼomüin pütchi A5».
^ «Siki» maluʼulu tia suluʼu griego.
^ «Niyouteerü tü sutujunakat nüsheʼin yarüttaka sutuma asalaa» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
