Tü nüshajalakat Juan 7:1-52
7 Süchikijee tia nuʼunakalaka Jesús sainküinpünaa Galilea, nnojoishi nia oʼunuin Judeamüin, jama nuʼutuneein maʼin aaʼin natuma na judíokana.
2 Sülüʼütkalaka sükalia tü Miʼiraa Kalumaseyaawaikalü oʼu na judíokana.
3 Müshiijeseʼe namüin na nuwalayuukana nümüin: «Anakajaʼa puʼunule yaajee chai pukua Judeamüin, neʼraiwa na pikirajüinkana tü kasa anasü paaʼinrakat.
4 Niʼraajüneere wanee wayuu sutuma wayuu, nnojotsü naaʼinrüin wanee kasa ojuunaa, anakalaka natüjaale saaʼu na wayuukana tü kasa anasü paaʼinrakat».
5 Nnojoliipejeʼe anoujain na nuwalayuukana nünain.
6 Nusoutakalaka Jesús namüin na nuwalayuukana: «Choʼujaayülia takalia, eepejeʼe süpüla juʼunuin soʼu tü kaʼi juʼuneekalü oʼu.
7 Nnojoishii aʼürülaain na wayuukana jünain, aʼürülaapejeʼe naya tanain süka taküjain süchiki tü kasa mojusü naaʼinrakat.
8 Anashii jiale oʼunuin sünain tü miʼiraakat, nnojoleechi taya oʼunuin süka choʼujaayülüin takalia».
9 Nüküjain Jesús tia namüin sümaa makatüin nia Galilea.
10 Noʼunapa na nuwalayuukana Jesús sünain tü miʼiraakat, oʼunushi nia nachiirua, naaʼinrapejeʼe tia ojuunaa.
11 Nüchajaanaka achiki Jesús sünain tü miʼiraakat natuma na judíokana jee majiraashii naya: «¿Jalashiche eera nia?».
12 Wainma na wayuu ejejiraakana nüchiki Jesús, «wayuu anashi», eeshii na makana. «Nnojo, nnojoishi wayuuin anashi, emeejüshi neʼe wayuu», eetaashii joo na makanaya.
13 Nnojotpajaʼa jaralüin aashajaain nüchiki Jesús suʼupala wayuu süka mmoluin naya neema na judíokana.
14 Maʼaka pienchi kaʼi süchikijee suʼttuin tü miʼiraakat, nuʼunakalaka Jesús suluʼumüin tü aʼwaajüleekat jee nikirajakalaka chamüin.
15 Ponusü maʼin naaʼin na judíokana tü nikirajakalü anain Jesús jee müshii naya: «¿Jalejeekuwat maʼin nüpüla wayuukai chii nütüjain süpüleerua sünüiki tü Karaloʼuta Nüchikimaajatkat Maleiwa, eerejeʼe nnojolin koleejiain nia?».
16 Nusoutakalaka Jesús namüin: «Nnojotsü tanüikin tü tekirajakalü anain, nünüiki chi Kajünalakai taya.
17 Chi wayuu aaʼinreekai tü nuluwataakalü anain Maleiwa, niyaawateerü aaʼu nünüikire Maleiwa tü tekirajakalü anain jee tanüikire neʼe shia.
18 Chi wayuu ekirajakai sünain tü kasa nikiirujutkat, shia keeʼireeka naaʼin nuʼwaajünüinjachin neʼe, eekajasaʼa chi aküjakai tü shiimainkat waneepia otta lotokai akuwaʼipa, shia naaʼinmaaka maʼin nuʼwaajünüinjachin chi Kajünalakai nia.
19 ¿Aashin niain Moisés kaküjalain jümüin tü Pütchi Aapünakat nümüin? Nnojoliipejeʼe jia oonooin sümaa tia Pütchikat, ¿jamüshi juʼuteeka taaʼin?».
20 Anuujeseʼe nanüiki na wayuukana nümüin: «Yolujaashi neʼe pia, ¿jaraikai oʼuteeka paaʼin?».
21 Anuujeseʼe nünüiki Jesús namüin: «Waneesia neʼe tü kasa taaʼinrakat juʼupala, ponopejeʼe maʼin shia jaaʼin.
22 Jülüjataa jaaʼin tüü: nuluwataain jia Moisés sünain juchotooinjatüin süta nükorolo* wanee wayuu, nnojoipejeʼe niain Moisés keʼinaajalain tia jüpüleerua, naya keʼinaajalaka na jutuushinuukana jee müshiʼiya jiakana juchotooin süta nükorolo wanee wayuu sükalioʼu eemerawaa.
23 Jiʼyotoole süta nükorolo wanee wayuu sükalioʼu eemerawaa süpüla joonooinjanain sümaa tü Pütchi Aapünakat nümüin Moisés,* ¿jamakaʼa jashichika jia tamüin süka taawaleʼerüin sükalioʼu eemerawaa wanee wayuu eekai ayuulin?
24 Nnojo jiyoujain wanee wayuu saaʼujee tü sukuwaʼipakat juʼupala, lotuinjatü sukuwaʼipa tü jaaʼinrakat kasalajanainjatpa saainjala wanee wayuu jutuma».
25 Anuujeseʼe nanüiki waneinnua wayuu kepiashii chaa Jerusalén: «¿Aashin niayaain chii, chi wayuu oʼutuneekai aaʼin?
26 Nnaaʼasa nia aashajaʼalaain suʼupala wayuu, nnojotpejeʼe jamüin pütchi nümüin, ¿pansaaitpache eera namüin na wayuu aluwataashiikana waaʼu niain wayuukai chii, chi Cristo münakai?
27 Nnojoipejeʼe niain Cristo, watüjaa aaʼuchi jalejeʼewalin wayuukai chii, eekajasaʼa nüntapeena Cristo, nnojoleechi atüjaanüin aaʼu jalejeekuwalin nia».
28 Emetutka nünüiki Jesús sünain ekirajaa suluʼu tü aʼwaajüleekat, müshi nia: «Jiʼraajüin taya jee jütüjaa aaʼuchi jalejeʼewalin taya, nnojoipejeʼe antüshin taya süka taaʼin tamüiwaʼa, shiimain eein chi Kajünalakai taya jee nnojoishi jiʼraajüin nia.
29 Taya eʼraajaka nia süka tantüshin nünülialuʼu jee nüjünala taya».
30 Nachajaakalaka sukuwaʼipa na wayuukana süpüla nataʼülajachin nia, nnojoipejeʼe jaralin jamajüin atuma nia süka isayülüin nükalia.
31 Mayaainjeʼe müin tia, watta naalii na wayuu anoujakana nünain Jesús jee müshii naya: «Nüntapeena Cristo nnojoleerü alanaʼaleein tü kasa pülasü naaʼinrakat suulialeʼeya tü naaʼinrakat wayuukai chii, ¿aashin müin?».
32 Naapaka na fariseokana nejejaala na wayuukana nüchiki Jesús. Nayasaʼa naya fariseokana namaʼaleeya nekiipüʼü na sacerdotekana, najütüin waaria sünain ataʼülaa Jesús.
33 Nümakalaka Jesús namüin na wayuukana: «Yaajeechia paala taya jümaa motsomüin neʼe süpülapünaa toʼunuin nümaʼanamüin chi Kajünalakai taya.
34 Jüchajaweechi achiki taya, nnojoleechipajaʼa taya jüntüin anain. Nnojoishii süpüla juʼunuin chaa eeinjachire taya».
35 Namajiraakalaka na judíokana: «¿Jalainjaiche oʼunuin nia süpüla nnojolinjachin wantüin nünain? ¿Chainjaittaaka oʼunuin namaʼanamüin na judío chakana naʼaka na griegokana? ¿Nayainjanataapa nikirajüin na griegokana?
36 ¿Jamaluʼutche nünüiki wanaa sümaa nümüin: ‹Jüchajaweechi achiki taya, nnojoleechipajaʼa taya jüntüin anain. Nnojoishii süpüla juʼunuin chaa eeinjachire taya›?».
37 Soʼu tü kaʼi sujutaainjatkalü oʼu tü miʼiraakat jee anakalü oʼu maʼin shia, nüshaʼwalaakalaka Jesús jee nümakalaka sümaa emetuluin maʼin nünüiki: «Anashi nürütkaale tanainmüin chi wayuu eekai wüinñaasüin, tasireechikalaka nia wüin.
38 Chi wayuu kanoulakai tanain, ‹meerü süparatkai aaʼin suluʼujee naaʼin, wanee süchi sümaajatka wüin kataka atuma soʼu wayuu› maʼaka süküjünüin suluʼu tü Karaloʼuta Nüchikimaajatkat Maleiwa».
39 Shia naashajaaka achiki Jesús tü nüpülainkat Maleiwa, tü aapünajatkat namüin na kanoulakana nünain. Nnojotsü aapünüin tia nüpülainkat Maleiwa soʼu tia süka choʼujaayülüinña nükalia Jesús süpüla kojutuinjachin nia atumawaa.
40 Naapapa tü nünüikikat Jesús namajiraaka waneinnua wayuu: «Shiimainjaʼa maʼin niain chi Nünüikimaajachikai Maleiwa, chi antajachikai anülia».
41 Otta eeshii na wayuu makana: «¿Niainjaʼa eera nia Cristo?». Eepejeʼe na makana anüiki: «¿Aashin nnojolin süpüla Galileajeʼewalin chi Cristokai?
42 Mataasü süküjünakai suluʼu tü Karaloʼuta Nüchikimaajatkat Maleiwa, nülüin David chi Cristokai jee joʼuuinjachin nia chaa Belén, tü pueulo eejeʼewaire David».
43 Nnojotkalaka wanaawain nanüiki na wayuukana nüchiki Jesús.
44 Eeshii na wayuu ataʼüleekana nia, nnojoipejeʼe jaralin jamajüin atuma nia.
45 Naleʼejaakalaka na waariakana namaʼanamüin nekiipüʼü na sacerdotekana otta namaʼanamüin na fariseokana. Nasakinnakalaka na waariakana natuma na fariseokana: «¿Jalashikai chi wayuu jüsaajüinjachiaakai?».
46 Anuujeseʼe nanüiki na waariakana namüin: «Nnojoishi eeichin wanee wayuu eekai nütüjain maʼin ekirajaa maʼaka naaʼin chia wayuukai».
47 Nasoutakalaka na fariseokana namüin: «¿Jimeejünataaka neʼe nutuma chia wayuukai?
48 ¿Anoujataale jiʼrüin nünain chia wayuukai na aluwataashiikana waaʼu namaʼaleeya na fariseokana?
49 Nnojoishii kasain anain apüla wayuukana naainnua, nnojotsü natüjaain aaʼu tü Pütchi Aapünakat nümüin Moisés».
50 Nusoutakalaka Nicodemo, chi wayuu chajachikai aashajaain paala nümaa Jesús, napüshi nia na fariseokana, nümakalaka namüin:
51 «Saashin tü Pütchi Aapünakat nümüin Moisés, nnojoishi süpüla süsalainjachin naainjala wanee wayuu nnojorüle saapajünüin nünüiki palajana, atüjaanajatü aaʼu kasain naainjalain, ¿aashi müin?».
52 Nasoutakalaka na fariseokana naapaiwaʼaya nünüiki Nicodemo: «¿Chejeʼewaitaaka pia Galileajee? Pikirajaa sünain tü karaloʼutakat, piyaawateetka saaʼu nnojolin süpüla Galileajeʼewalinjachin wanee nünüikimaajachi Maleiwa».
Noota
^ Pünaʼla tü pütchikat «Circuncisión» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
