Tü nüshajalakat Juan 6:1-71
6 Süchikijee tia, nuʼunakalaka Jesús waneemüin saʼata tü palaa kanüliakat Galilea, eesü Tiberíades sümünüle.
2 Wattakalaka naalii na wayuu akoʼulakana nüchiirua süka neʼrüin tü kasa pülasü naaʼinrakat süpüla naawaleʼerüin wayuu eekai ayuulin.
3 Nuʼunakalaka Jesús saaʼumüin wanee uuchi namaa na nikirajüinkana, naikaajaaka chamüin.
4 Wanaa sümaa tia, alüʼütsü sükalia tü Pascuakat, tü miʼiraa eeʼewaikat natuma na judíokana.
5 Niirakaapa Jesús napanapajee wayuu watta naalii alüʼülaaka nünainmüin, nümakalaka nümüin Felipe: «¿Jaleenache waya ayaʼlajüin pan nayaaluʼu nase wayuukana?».
6 Nütüjaatüjülia aaʼu Jesús tü naaʼinrajatkat, nünüikipejeʼe neʼe tia nümüin Felipe süpüla nuuʼulaküin naaʼin.
7 Anuujeseʼe nünüiki Felipe nümüin Jesús: «Nnojoleerü asetaain namaa 200 ‹denario›* süpüla wayaʼlajüinjatüin pan nayaaluʼu, jaʼitakajeʼe neʼe paliʼirüle neküin watuma».
8 Nürütkaakalaka wanee nikirajüin Jesús, nia Andrés, chi nuwalakai Simón Pedro jee nümakalaka nümüin Jesús:
9 «Anii wanee jintüi kamaʼanakai jaʼraisü pan aainjuushi süka cebada otta piamashiichen jime. Nnojoleetpejeʼe shia asetaain namaa na wayuukana».
10 «Jüma namüin na wayuukana naikaajaaiwa», nümakalaka Jesús. Naikaajaaka na wayuukana süka wainmain alama chayaa. Eejana maʼaka saaʼin 5.000 tooloyuu.
11 Naapaakalaka Jesús tü pankat jee süchikijee naapüin analuʼut nümüin Maleiwa saaʼu, niitajaka shia namüin na wayuu joyojoyotshiikana. Niitajüinjaʼa tü jimecheinkat, nekakalaka na wayuukana emiraleepaʼaya naya.
12 Emirapa naya, nümakalaka Jesús namüin na nikirajüinkana: «Jukotchojo tü apütaasükat suulia amülain neʼe shia».
13 Sukotchojunaka poloo piamamüin kanaasüta sümaajatü tü apütaasükat sünainjee tü jaʼraisükat pan aainjuushikat süka cebada.
14 Anuujeseʼe nanüiki na wayuukana neʼrapa naaʼinrüin Jesús kasa pülasü: «Shiimainjaʼa maʼin niain chi Nünüikimaajachikai Maleiwa, chi antajachikai anülia».
15 Nütüjaapejeʼe Jesús saaʼu nalüʼülaain na wayuukana süpüla nasaajüinjachin nia jee süpüla naikaleʼerüin nia sünain aluwatawaa. Müshijeseʼe nuʼunuin nüchikuaʼa nümüiwaʼa saaʼumüin tü uuchikat.
16 Aipoʼupa, noʼunakalaka na nikirajüinkana sotpaʼamüin tü palaakat.
17 Noʼotookoloko suluʼu wanee anuwa jee nalataka waneemüin saʼata tü palaakat, eemüin tü mma kanüliakat Capernaúm. Piʼyuupajatü tia otta nnojoishi antiraain Jesús namaa na nikirajüinkana.
18 Jashichikalaka maʼin tü palaakat sutuma katchin maʼin tü joutaikat.
19 Noʼunirapa tü anuwakat maʼaka saaʼin jaʼrai kilómetro* jee shiale aipirua kilómetro, neʼraka Jesús nüpanapajee warai müin sooʼopünaa tü palaakat. Arütkaashi nia sünainmüin tü anuwakat, mmotkalaka naya.
20 Anuupejeʼe nünüiki Jesús namüin: «Nnojo mmoluin jia, tayan».
21 Talataka naaʼin nümaa Jesús noʼotoopa suluʼumüin tü anuwakat. Jee mapa maʼin, süntakalaka tü anuwakat namaa chaa eeʼewaliire naya.
22 Waneemüin kaʼi, na wayuu makatakana paala wane saʼata tü palaakat, nnojotsü anuwa napüla sotpaʼa tü palaakat. Eejatiaaje paala wanee anuwachon, nnojotpejeʼe shiain nuʼunuin aluʼu tia Jesús namaa na nikirajüinkana. Oʼunushii na nikirajüinkana namüiwaʼa.
23 Soʼotokoloko waneirua anuwa, chejeejatü Tiberíades. Oʼotusü tia anuwakat süʼütpaʼa tü palaa eejatüle naapüin chi Señotkai analuʼut saaʼu tü pan nekakat na wayuukana.
24 Nayasaʼa na wayuukana süka nnojolin neʼrüin Jesús namaa na nikirajüinkana, anuwaluʼukalaka naya nüchiirua Jesús eemüin tü pueulokot Capernaúm.
25 Nantapa na wayuukana chaa eejachire Jesús, waneemüin saʼata tü palaakat, namakalaka nümüin: «Ekirajüikalee, ¿joujachi antüin pia yaamüin?».
26 Nusoutakalaka Jesús namüin: «Shiimain tanüiki jümüin, nnojoishi jüchajaain achiki taya süka taaʼinrüin kasa pülasü juʼupala, jüchajaa achikichi neʼe taya süka emirain jia pan tatuma.
27 Nnojo jiʼyataain süchiirua tü eküülü amojujaakat neʼe, shia jiʼyataa achiirua tü eküülü eekat waneepia, tü katakalü atuma soʼu wayuu waneepia. Shia tü eküülü taapeetkat jümüin tayakai chi Süchonkai Wayuu. Jaʼyasü naaʼu chi Tashikai Maleiwa talatüin* nia tamaa».
28 Anuujeseʼe nanüiki na wayuukana nümüin Jesús: «¿Kasa waaʼinrajatka süpüla talatajachin Maleiwa wamaa?».
29 Nusoutakalaka Jesús namüin: «Anuu tü jaaʼinrüinjatkat naashin Maleiwa: kanoulainjana jia nünain chi wayuu nüjünalakai».
30 Anuujeseʼe nanüiki nümüin Jesús: «Anashi paaʼinrüle wane kasa pülasü woʼupala, wanoujeenaka pünain. ¿Kasajaʼa paaʼinrajatka woʼupala?
31 Chaiwaʼaya na watuushinuukana isashiipaʼa, eküshii naya tü kanüliakat ‹maná›, maʼaka süshajünüin paala: ‹Eküshii naya nutuma tü pan iipünaajeejatkat›».
32 Nusoutakalaka Jesús namüin: «Shiimain tanüiki jümüin, nnojoishi niain Moisés aapüin jümüin tü pan iipünaajeejatkat, nia chi Tashikai aapakai jümüin tü pan shiimainsükajaʼaya iipünaajeejatüin.
33 Tü pan naapakat Maleiwa, nia chi ashakatakai iipünaajee, nia kataka atuma soʼu wayuu».
34 «Señotkalee, paapaʼaya wamüin waneepia tia pankat», namakalaka na wayuukana nümüin Jesús.
35 Anuujeseʼe nünüiki Jesús namüin: «Taya chi pan katakai atuma soʼu wayuu. Chi eekai nürütkaain tanainmüin nnojoleechi outuin jamü nüchikuaʼa. Otta chi eekai kanoulain tanain nnojoleechi wüinñaasüin nüchikuaʼa.
36 Manoujainsalii jia tanain eerejeʼe jiʼrüin taya, maʼaka taküjaitpain shia jümüin.
37 Arütkaajeena tanainmüin napüshuaʼa na wayuu niʼitaakana chi Tashikai tajapuluʼu. Jee chi eekai nürütkaain tanainmüin, nnojoleechi taʼleejüin.
38 Nnojoishi ashakatüin taya iipünaajee süpüla taaʼinrajatüin tü tachekakat neʼe tamüiwaʼa, shia taaʼinrakat tü nüchekakat chi Kajünalakai taya.
39 Tü nüchekakat chi Kajünalakai taya, shia nnojoliin amüloulin toulia na wayuu niʼitaakana tajapuluʼu. Tasoʼireʼerüinjana aaʼin naya soʼuweena wanee kaʼi.*
40 Anuu tü nüchekakat chi Tashikai: katüinjatü noʼu waneepia na wayuu anashiikana amüin nukuwaʼipa Nüchon chi Maleiwakai jee na anoujakana nünain. Tasoʼireʼereena aaʼin naya soʼuweena wanee kaʼi».
41 Naʼyounalaaka na judíokana saaʼujee «Taya chi pan iipünaajeejachikai», nümüin Jesús paala.
42 Anuujeseʼe nanüiki na judíokana: «¿Nnojoishi niain Jesús chii, chi nüchonkai José? ¿Aashin weʼraajüin chi nüshikai sümaʼaleeya tü niikat? ¿Jamataalakaʼa ‹Ashakatüshi taya iipünaajee›, nümaka?».
43 Naapapa Jesús tü namakat, nümakalaka namüin: «Juuʼulaa suulia jaashajaajiraakuʼu jümüin.
44 Nnojoishi süpüla nürütkaain wanee wayuu tanainmüin, aluʼusaʼa nürütkeʼerüle nia tanainmüin chi Tashikai, chi Kajünalakai taya. Jee müshia wayuukai chia, tasoʼireʼereechi aaʼin soʼuweena wanee kaʼi.
45 Anuu tü nashajakat na Nünüikimaajanakana Maleiwa: ‹Ekirajüneena nutuma Jehová* napüshuaʼa na wayuukana›. Naya arütkaaka tanainmüin napüshuaʼa na wayuu aapajakana nünüiki chi Tashikai jee na atüjakana nünainjee.
46 Nnojoishi eeichin wanee wayuu eʼrakai chi Tashikai, niaʼala neʼe eʼraka chi nümaʼanajeejachikai Maleiwa.
47 Shiimain tanüiki jümüin, nieechi kataka oʼu waneepia chi wayuu eekai kanoulain.
48 »Taya chi pan katakai atuma soʼu wayuu.
49 Na jutuushinuukana neküin chaa isashiipaʼa tü kanüliakat ‹maná›, ayatapejeʼe naya outuin.
50 Eekajasaʼa chi wayuu ekakai tü pan iipünaajeejatkat, nnojoleechi outuin.
51 Taya chi pan iipünaajeejachikai katakai oʼu. Niküle wanee wayuu pankat tüü, kateechi oʼu waneepia. Tü pan taapüinjatkat naaʼu na wayuukana süpüla katüin noʼu, shia tü teʼirukukat».
52 Naashichijaakalaka na judíokana jee namakalaka: «¿Anashiyaakaijeʼe wayuukai chii, naapüinjatka niʼiruku wamüin süpüla weküinjatüin shia?».
53 Nusoutakalaka Jesús namüin: «Shiimain tanüiki jümüin, nnojorüle jiküin niʼiruku chi Süchonkai Wayuu otta nnojorüle jüsüin tü nüshakat, nnojoleena jia katüin oʼu.
54 Chi eekai niküin teʼiruku sümaa nüsüin tasha, kateechi oʼu waneepia jee tasoʼireʼereechi aaʼin nia soʼuweena wanee kaʼi.
55 Anasü süpüla ekünaa tü teʼirukukat otta anasü süpüla asünaa tü tashakat.
56 Chi ekakai tü teʼirukukat sümaa nüsüin tü tashakat, paaʼinwajiraashi nia tamaa.
57 Katoʼuchi chi Tashikai, chi Kajünalakai taya jee katoʼuchi taya nutuma. Chi eekai niküin tü teʼirukukat kateechi oʼu nia tatumaya.
58 Anuu tü pan iipünaajeejatkat, nnojotsü müin aka saaʼin tü nekakat na jutuushinuukana, outushii neʼe naya. Chi eekai eküin pankat tüü, kateechi oʼu waneepia».
59 Nünüiki tia Jesús soʼu chajachin nikirajüin Capernaúm suluʼu wanee ekirajülee nüchiki Maleiwa.
60 Naapaiwaʼaya tia, namakalaka waneinnua nikirajüin Jesús: «Airuʼulu maʼin pütchikat tüü, ¿jaratkai aapajeeka shia?».
61 Nütüjaapejeʼe saaʼu Jesús tü naashajaajiraakalü achiki na nikirajüinkana, müshijeseʼe nümüin namüin: «¿Ponusü jaaʼin tü tamakat?
62 ¿Shiaka nnojoleematüin ponuin jaaʼin jiʼrataale chi Süchonkai Wayuu* sünain oʼunaa chaa eejachire nia paala?
63 Eesü kataa oʼuu sutuma tü nüpülainkat Maleiwa. Tü niʼirukukat wanee wayuu, nnojotsü kasain anain apüla. Tü pütchi taküjaitpakat jümüin, sükajeejatü tü nüpülainkat Maleiwa otta eesü kataa oʼuu sutuma.
64 Eepejeʼe waneinnua wayuu manoulakana jaʼakajee». Nüküjain tia Jesús süka nütüjaatüjülin saaʼu jaraliin na wayuu manoulakana otta jaralinjachin chi aapakai nikii.
65 Anuu sooʼomüin nünüiki Jesús: «Mataashi tamayüikai jümüin nnojolin süpüla nürütkaain wanee wayuu tanainmüin, aluʼusaʼa nürütkeʼerüle nia chi Tashikai».
66 Suluʼujee tia, wainma na nikirajüin Jesús nnojoliinnapakana nümaain. Shia neʼe naaʼinraka süchikuaʼa tü kasa naaʼinrapuʼukat paala.
67 Anuukalaka nünüiki Jesús namüin na Polookana Piamamüin aluwataaushi: «¿Jama jiakana, nnojoishii oʼuneein jia wanaa namaa?».
68 Nusoutakalaka Simón Pedro nümüin Jesús: «Señotkalee, ¿jalainjanakai waya oʼunuin? Pia ekirajaka waya sünain pütchi katüinjatkalü atuma woʼu waneepia.
69 Anoujashii waya pünain otta watüjaa aaʼuchi piain chi Nüjünalakai Maleiwa».
70 Anuujeseʼe nünüiki Jesús namüin: «¿Aashin taneekajalayaain jia Polookana Piamamüin aluwataaushi? Eepejeʼe wanee jaʼakajee aküjakai alawaa süchiki wayuu».
71 Nia naashajaaka achiki Judas, chi nüchonkai Simón Iscariote. Mayaainjeʼe napüshin nia na Polookana Piamamüin aluwataaushi, nia aapaka nikii Jesús mapa.
Noota
^ Nneerü kachueera nanneetsepuʼuka na romanokana. Pünaʼla tia suluʼu tü kanüliakat «Sooʼomüin pütchi B14».
^ «25 jee shiale 30 estadio» maluʼulu tia suluʼu griego. 185 metro tü waneekalü estadio. Pünaʼla tia suluʼu tü kanüliakat «Sooʼomüin pütchi B14».
^ Jee shiale «niʼitaain wanee ‹sello› tanain».
^ «Tü chiiruaajatkat kaʼi» maluʼulu tia suluʼu griego.
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Jamaluʼulu pütchikat».
