Karaloʼuta namüinjatka na Hebreokana 5:1-14
5 Nüneekünüle wanee wayuu süpüla laülaashinjachin nia napüleerua na sacerdotekana, aʼyataashi nia süpüleerua wayuu wanaapünaa sümaa tü nuʼwaajakalü akajee Maleiwa, müshijeseʼe eein süpüla nüsülajüin wanee kasa jee nuʼutuin saaʼin mürüt nümüin Maleiwa saaʼu saainjala wayuu.
2 Amülialaajeerü naaʼin chia wayuukai naalinjee na wayuu aaʼinrakana kasa mojusü, jama nnojoliin natüjaain saaʼu mojuin tü naainjakat. Niyaawata aaʼu chia wayuukai eein tü kasa isakat nüchiki,
3 müshijeseʼe nüsülajüinjachin wanee kasa nümüin Maleiwa saaʼu naainjala maʼaka naaʼinrawalin shia süpüleerua wayuu.
4 Nnojotkalaka anain nuʼwaataale wanee wayuu suluʼu tia aʼyatawaakat, jama niain Maleiwa aneeküin wanee wayuu süpüla naaʼinrajatüin tia, maʼaka nüneeküin paala Aarón.
5 Akaʼaya neʼe chi Cristokai, nnojoishi nia kojutujiraain nümüiwaʼa sünainjee nüʼlaülaajaain napüleerua na sacerdotekana, kojutushi nia nutuma Maleiwa, chi makai anüiki nümüin: «Pia chi tachonkai, püshitchipa taya soʼukai».
6 Anuu tü nümakalia Maleiwa suluʼu tü Karaloʼuta Nüchikimaajatkat: «Sacerdoteshi pia süpüla kaʼikat süpüshuaʼa maʼaka nukuwaʼipa Melquisedec».
7 Yaaiwaʼaya Cristo mmapaʼa, achuntushi maʼin nia süka süpüshuaʼa naaʼin sümaa emetuluin nünüiki jee niʼyalajüin nümüin chi eekai süpüla oʼtteʼerüin nia suulia outaa, saapünakalüjaʼaya nünüiki, jama kojutuin Maleiwa nümüin.
8 Mayaainjeʼe nüchoin nia Maleiwa, jüüjüüshi nia nümüin sünainjee tü müliaa niʼrakat.
9 Jüüjüüshi nia sünain kasa süpüshuaʼa,* nayasaʼa na wayuu oonookana sümaa nünüiki, eeinnapa süpüla noʼtteʼennüin jee katüin noʼu süpüla kaʼikat süpüshuaʼa nünainjee,
10 jama nüneekünüin nutuma Maleiwa süpüla laülaashinjachin nia napüleerua na sacerdotekana maʼaka nukuwaʼipa Melquisedec.
11 Watta saalii tü kasa eekat süpüla waküjain nüchiki, kapüleejeetpejeʼe aküjaa tia, jama nnojoleerüin jiyaawatamaatüin saaʼu.
12 Atüjainjana jia ekirajaa wayuu, choʼujaapejeʼe neʼe jümüin jikirajünüinjanain jüchikuaʼa sünain tü kasa sütüjaainjatkalü aaʼu wayuu palajana nüchiki Maleiwa, tü eekat suluʼu tü karaloʼuta nünüikimaajatkat. Müshii neʼe jia maʼaka naaʼin wanee joʼuu choʼujaakai amüin nüsüinjachin leechi, isasü jüchiki ekaa eküülü eekai kaʼüin, tü nikakat wanee wayuu eekai miyoʼuin.
13 Chi ayatakai asüin leechi, nnojotsüjaʼamata nütüjaain saaʼu tü pütchi süchikimaajatkat lotoo akuwaʼipaa, tü suluʼukat nünüiki Maleiwa, jama joʼuuin neʼe nia.
14 Eekajasaʼa tü eküülü kaʼüsükat napülajatü na wayuu laülaakana aaʼin, ekirajaashii naya waneepia süpüla anain tü jülüjakat naaʼin, nayaawataka saaʼu anale jee mojule wanee kasa.
Noota
^ «Süchikijee maainjalain nia» maluʼulu tia suluʼu griego.
