Apocalipsis 7:1-17
7 Süchikijee tia teʼrakalaka pienchishii aapiee shaʼwashawatshii süshekeinruʼu tü mmakat, wanee palaajeeruʼu, wüinpüjeeruʼu, uuchijeeruʼu jee wanee wopujeeruʼu. Müsü nataʼülakai saaʼin tü joutaikat suulia suwawalüin palaajee, wüinpüjee, uuchijee otta müsia wopujee. Tia suuliajatü suwawalüin saaʼu tü mmakat, saaʼu tü palaakat jee saaʼu tü wunuʼuliakat.
2 Teʼrakalaka wanee aapiee ojuʼitaakai eejeere niweetüin chi kaʼikai, nümaʼanasü tü jeerü naapajalakat Maleiwa nümüin. Tia süpülajatü niʼitaain sejeetse wayuu, nuʼwaatakalaka namüin na pienchishii aapiee ajütünakana süpüla namojujain sukuwaʼipa tü mmapaʼakat jee tü palaakat.
3 Nümakalaka namüin: «Nnojo jumojujuin tü mmapaʼakat, tü palaakat jee müsia tü wunuʼuliakat, jaaʼinraleejeeria tia weʼitaapa neʼipoʼunain nejeetse na nüchepchiakana chi Wamaleiwasekai».
4 Taapakalaka süchiki jeʼrashiin na eʼitaanakana ejeetse, 144.000 naya, aneekuushi naʼakajee naikeyuu na nüchonniikana Israel.
5 Doce miit na wayuu eʼitaanakana ejeetse naʼakajee na nüikeyuukana Judá, doce miit naʼakajee na nüikeyuukana Rubén,doce miit naʼakajee na nüikeyuukana Gad,
6 doce miit naʼakajee na nüikeyuukana Aser,doce miit naʼakajee na nüikeyuukana Neftalí,doce miit naʼakajee na nüikeyuukana Manasés,
7 doce miit naʼakajee na nüikeyuukana Simeón,doce miit naʼakajee na nüikeyuukana Leví,doce miit naʼakajee na nüikeyuukana Isacar,
8 doce miit naʼakajee na nüikeyuukana Zabulón,doce miit naʼakajee na nüikeyuukana Joséotta doce miit na wayuu eʼitaanakana ejeetse naʼakajee na nüikeyuukana Benjamín.
9 Shiasaʼa süchikijee tia, teʼrakalaka watta naalii wayuu, isasü süchiki wayuu shiyaawajüin naya. Sainküinjeejana naya mmakat, saʼakajeejana naya eʼirukuukat süpüshuaʼa, sainküinjeejana pueulo otta naatayaa müsü nanüiki napüshuaʼa, shaʼwashawatshii naya sümülatuʼu tü einasee süpülajatkalü aluwatawaa jee shaʼwashawatshii naya nümülatuʼu chi Anneetchonkai. Miyoʼuyuu nasheʼin sümaa kasuujain shia otta kajapüipashii naya alanatüna.
10 Jee emetutkalaka maʼin nanüiki sünain maa: «Nuʼtteʼerüin waya chi Wamaleiwasekai, chi joyotokoi saaʼu tü einasee süpülajatkalü aluwatawaa otta nuʼtteʼerüinña waya chi Anneetchonkai».
11 Shaʼwashawatshii napüshuaʼa na aapieekana süʼütpünaa tü einasee süpülajatkalü aluwatawaa, naʼütpünaa na laülaashiikana jee naʼütpünaa na pienchishiikana aapiee. Nasapainkaka naya sümülatuʼu tü einasee süpülajatkalü aluwatawaa otta naʼwaajakalaka Maleiwa.
12 Anuu nanüiki: «¡Amén!* Kekiishi maʼin chi Wamaleiwasekai, pülashi maʼin nia, katchinshi maʼin nia, müshijeseʼe nuʼwaajünüinjachin, kojutuinjachin nia atumawaa otta saapünajatüin analuʼut nümüin süpüla kaʼikat süpüshuaʼa. Amén».
13 Anuu tü nüsakirakalü anain taya wane naʼakajeejachi na laülaashiikana: «¿Jaralii na miyoʼuyuukana asheʼin sümaa kasuuin maʼin shia? ¿Jalejeekuwalii naya?».
14 Tasoutamaatakalaka niʼipajee: «Pia atüjaaka saaʼu tia Señotkalee». Anuujeseʼe nünüiki tamüin: «Wayuukana naainnua naya oʼttaakana süchikijee neʼrüin maʼin müliaa, müsü nashijaakai saaʼin tü nasheʼin miyoʼuyuukat otta kasuusü shia sutuma nashijaain shia süka nüsha chi Anneetchonkai.
15 Müshiijeseʼe nasapainkain naya sümülatuʼu tü niinasekat Maleiwa süpüla aluwatawaa otta aʼyataashii naya nümüin saʼwai jee soʼukai suluʼu tü aʼwaajüleekat. Naaʼinmajüneenaka* nutuma chi joyotokoi saaʼu tü einasee süpülajatkalü aluwatawaa.
16 Nnojoleena naya alatirüin jamü, nnojoleena naya wüinñaasüin piantua, nnojoleena naya müliain maʼin sutuma naaʼayula chi kaʼikai otta nnojoleena naya müliain maʼin sutuma walatshi.
17 Arüleejüneena naya nutuma chi Anneetchon shaʼwatakai sümülatuʼu tü einasee süpülajatkalü aluwatawaa, nuʼunireena naya eere süparalüin tü wüin katakalü atuma soʼu wayuu otta meeria nülaʼajaakai saaʼin Maleiwa naʼwüira naya wayuukana».
Noota
^ Pünaʼla tia suluʼu tü kanüliakat «Jamaluʼulu pütchikat».
^ Jee shiale «eʼitaaneerü tü miichikat naaʼu».
