Apocalipsis 2:1-29
2 »Püshaja nümüin chi aapiee chakai suluʼu tü outkajaalee noutkajaakalü aluʼu na anoujashii chakana Éfeso: anuu nünüiki chi kajapuluʼushikai tü akaratshisükat shüliwala suluʼu tü najapü nikiakat jee chi waraittakai saʼakapünaa tü akaratshisükat ranpara aainjuushikat süka ooro:
2 ‹Tatüjaa aaʼu tü kasa paainjakat. Tatüjaa aaʼu piʼyataain maʼin jee püchecherüin paaʼin soʼunnaa tü alatakat pümüin. Tatüjaa aaʼulia piyoutuin süchiki tü kasa mojusü naaʼinrakat na wayuu mojulaashiikana jee puuʼulaküin naaʼin na wayuu aluwataaushikana naashin, nnojoliipejeʼe naya aluwataaushin. Piyaawataka saaʼu wayuuin alaa naya.
3 Achechetshi pia paaʼin soʼunnaa tü alatakat pümüin, ayatüshia pia sünain tü kasa paainjakat saaʼujee tekirajanain pia, nnojoishi pia akulajaain aaʼin suulia.
4 Eepejeʼe wanee kasa mojuka putuma, nnojolitchipa alin maʼin püpüla Maleiwa maʼakaapuʼu alin nia püpüla.
5 »›Anakajaʼa sotule paaʼin tü kasa puuʼulaakalü oulia, piyaawajaa suulia tia, shia anaka aluʼu paainjale tü kasa paainjapuʼukat puʼttaiwaʼaya sünain anoujaa. Nnojorüle müin tia putuma oʼuneechi taya pooʼomüin, tasüteetkalaka puulia tü ranpara chakat pümaʼana, nnojoleetpejeʼe shia tasütüin piyaawajaale suulia paainjala.
6 Eepejeʼe wanee kasa anaka putuma, piyouta achikirü maʼin tü kasa naaʼinrakat na oʼunakana süchiirua tü nikirajakalü anain Nicolás, tayouta achikiriaʼaya tia.
7 Chi eekai kacheʼein, anakajaʼa naapajüle tü nümakat Maleiwa sükajee tü nüpülainkat namüin na anoujashiikana: Chi wayuu eekai nükanajüin nikeerü süchon tü wunuʼu katakalü atuma soʼu wayuu, tü suluʼukat tü paʼaraiisü eekat nutuma Maleiwa›.
8 »Püshaja nümüin chi aapiee chakai suluʼu tü outkajaalee noutkajaakalü aluʼu na anoujashii chakana Esmirna: Anuu nünüiki chi Palajachikai, chi Chiiruaajachikai, chi outakai paala, katapejeʼe noʼu mapa:
9 ‹Tatüjaa aaʼu tü müliaa piʼrakat, tatüjaa aaʼu maʼletsein pia mayaainjeʼe washirüin pia. Tatüjaa aaʼu airuʼuluin nanüiki pümüin na wayuu judíokana naashin, nnojoliipejeʼe naya judíoin, nümaajana neʼe naya Satanás.*
10 Nnojo mmoluin pia seema tü müliaa piʼrüinjatkat. Jamüshijaʼa chi Yolujaakai, ayateechia nia nüpüreesajirüin waneinnua jaʼakajee süpüla nooʼulakünaleeinña maʼin aaʼin, apüleeruaaneerü naaʼin soʼu poloo kaʼi. Poonoo nümüin Maleiwa outaleepaʼaya pia, kateetkalaka poʼu tatuma.*
11 Chi eekai kacheʼein, anakajaʼa naapajüle tü nümakat Maleiwa sükajee tü nüpülainkat namüin na anoujashiikana: chi eekai nükanajüin, nnojoleechi jamajüin nia sutuma tü chiiruaajatkalü outaa›.
12 »Püshaja nümüin chi aapiee chakai suluʼu tü outkajaalee noutkajaakalü aluʼu na anoujashii chakana Pérgamo: Anuu nünüiki chi kajapuluʼushikai tü chajaruuta piamakalü asa, tü chajaruuta miyoʼukat jee kasakat maʼin:
13 ‹Tatüjaa aaʼu jalain kepiain pia, chashi pia kepiain eere niinase Satanás sünain aluwatawaa. Mayaainjeʼe müin tia, ayatüshia pia oonooin waneepia tamüin.* Nnojotsü piyoutuin achiki anoujaa tanain, paaʼinrüinña tia soʼu nükalia Antipas, chi aküjakai pütchi tachiki jee jüüjüükai waneepia tamüin, oʼutuna aaʼinchi chia wayuukai chaa jüʼütpaʼa, chaa eere kepiain Satanás.
14 »›Eepejeʼe wanee kasa mojuka putuma: chashii pümaʼana na achecheraakana süchiirua tü nikirajapuʼukalü anain Balaam. Nia ekirajaka Balac süpüla nuuʼulaküin naaʼin na israelitakana shiiʼiree neküinjatüin shiʼiruku tü mürüt oʼutuushikalü aaʼin süpüla suʼwaajünüin shiyaakua maleiwayaasü jee nuuʼulaka aaʼinchii naya shiiʼiree naʼluwajiraain nakuwaʼipa.*
15 Ichaʼaya pümaʼana na wayuu achecheraakana süchiirua tü nikirajakalü anain Nicolás.
16 Anakajaʼa piyaawajaale suulia paainjala. Nnojoire piyaawajaain, antamaateechi taya jee tatkaweechika namaa naya wayuukana süka tü chajaruuta miyoʼu ojuʼitakat taanüküluʼujee.
17 »›Chi eekai kacheʼein, anakajaʼa naapajüle tü nümakat Maleiwa sükajee tü nüpülainkat namüin na anoujashiikana: chi eekai nükanajüin taapeechi amüin süpüshi tü maná ounjuluushikat jee taapeerü nümüin wanee ipachon kasuusü. Sünain tia ipachonkat ashajünüsü wanee anüliee jeketü nnojotka jaralüin atüjaain saaʼu, nia neʼe atüjaaka saaʼu chi eʼitaanakai anain shia›.
18 »Püshaja nümüin chi aapiee chakai suluʼu tü outkajaalee noutkajaakalü aluʼu na anoujashii chakana Tiatira: Anuu nünüiki chi Nüchonkai Maleiwa, chi chuwatakai oʼu maʼaka chuwatüin maʼin sikoʼu jee chi makai ooʼui maʼaka saaʼin cobre eekai sojojuushin:
19 ‹Tatüjaa aaʼu tü kasa paaʼinrakat, tü naalinkat Maleiwa püpüla, tü punoulakat, tü piʼyataainkat nümüin Maleiwa jee tatüjaa aaʼu püchecherüin paaʼin soʼunnaa piʼrüin müliaa. Anaʼleesia maʼin tü kasa paaʼinrakat maaʼulu suulialeʼeya tü paainjapuʼukat paala.
20 »›Eepejeʼe wanee kasa mojuka putuma: anashiisü pümüin tü kasa saainjirakat Jezabel, tü nünüikimaajatkat Maleiwa saashin, shikirajüin sünain alawaa na tachepchiakana shiiʼiree naʼluwajiraainjanain nakuwaʼipa jee shiiʼiree neküinjatüin shiʼiruku tü mürüt oʼutuushikalü aaʼin süpüla suʼwaajünüinjatüin shiyaakua maleiwayaasü.
21 Kakaliairü maʼin taʼatapajüin shiiʼiree shiyaawajaainjatüin suulia saainjala, ayatapejeʼe neʼe shia aʼluwajiraain sukuwaʼipa.
22 Juʼleteerü shia sutuma ayuulii tatuma jee mülieena tatuma na wayuu kawalaʼatakana atuma naʼwayuuse* saaʼujee naʼluwajiraain nakuwaʼipa sümaa Jezabel. Nnojoleetpejeʼe müin nakuwaʼipa nayaawajaale suulia tü kasa mojusü saainjirakat naya.
23 Toʼuteena aaʼin na süchonniikana süka wanee ayuulii outasiroʼu. Natüjaajeetkalaka saaʼu napüshuaʼa na anoujashiikana tayain chi atüjaakai saaʼu tü nikiirujutkat wanee wayuu* jee tü suluʼukat naaʼin. Süsaleena tatuma na aaʼinrakana kasa mojusü, eʼreenapejeʼe kasa anasü na jaa makana tamüin.
24 »›Anuu tanüiki jümüin juʼutku jia chakana Tiatira nnojoliikana aapaain sümaa tü shikirajakalü anain Jezabel jee nnojoliikana atüjaain saaʼu tü «alawaa nikirajakalü anain Satanás»: «Nnojoleerü toʼotuin jaaʼu wanee kasa eekai kapüleein maʼin.
25 Ayataʼaya kapülain jaaʼin tü kasa anasü jaaʼinrakat, ayataʼaya kapülain jaaʼin tia tantaleepaʼaya.
26 Chi eekai nükanajüin jee chi ayatakaʼiya oonooin maʼin* sümaa tü taluwataakalü anain, laülaajeechi tatuma saaʼu wayuu
27 maʼaka laülaain taya nutuma chi Tashikai. Chi eekai nükanajüin meena nürüleejakai naaʼin na wayuukana süka wanee kachueera, yülaʼaweenakalaka naya nutuma maʼaka yülaʼawain wanee iita aainjuushi süka pootshi.
28 Taapeeriaʼaya nümüin tü jolotsü eweetakat süpülapünaa suwasajaain aikat.
29 Chi eekai kacheʼein, anakajaʼa naapajüle tü nümakat Maleiwa sükajee tü nüpülainkat namüin na anoujashiikana»›.
Noota
^ «Sinagoga» maluʼulu tia suluʼu griego.
^ «Kotse kataka atuma soʼu wayuu» maluʼulu tia suluʼu griego.
^ «Ayatüshia ichein pia sünain tanülia» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ «Achüʼü» maluʼulu tia suluʼu griego.
^ «Sajaʼttaleepa» maluʼulu tia suluʼu griego. Eesü shiale saashajaain achiki outaleepaʼaya wanee wayuu jee shiale sajaʼttaleepa tü kasa alatakat sainküin mma.
