Apocalipsis 10:1-11
10 Teʼrakalaka nüshakatüin sirumatuʼujee wane aapieʼeya pülashi maʼin, saʼakapünaashi nia wanee siruma otta eejatü wanee kasüpolüin saaʼu nikii. Warattüsü maʼin nuʼupünaa maʼaka warattüin chi kaʼikai otta müsü tü nüsaʼakat maʼaka saaʼin süsaʼa miichi eekai ichein maʼin jee müsü shia maʼaka saaʼin sikoʼu.
2 Eejatü najapuluʼu wanee rooyochon ojutaluushisü. Niʼitaakalaka tü nuuʼui nikialuʼujeejatkat saaʼu tü palaakat, niʼitaainjeseʼe tü nuuʼui nipeʼeruʼujeejatkat saaʼu tü mmakat.
3 Emetutkalaka maʼin nünüiki, mataashi nia maʼaka naaʼin wanee león eekai nülonojooin. Emetutpa nünüiki, taapakalaka sünüiki akaratshisü sütürüla juya.
4 Ashajüinjachitchi taya wanaa sümaa taapüin sünüiki tü akaratshisükat sütürüla juya, taapakalaka wanee pütchi sirumatuʼujee sünain maa tamüin: «Puunjulaja süchiki tü sümakat tü akaratshisükat sütürüla juya, nnojo püshajüin shia».
5 Niasaʼa chi aapiee teʼrakai paala, chi eʼitaakai nuuʼui saaʼu tü palaakat jee saaʼu tü mmakat, niyalerüin iipünaamüin tü najapü nikiakat
6 otta nüpansaajüin nünüiki naaʼu chi katakai oʼu süpüla kaʼikat süpüshuaʼa, chi kakumalakai tü sirumatuʼukat sümaa tü kasa eekat chaa iipünaa, chi kakumalakai tü mmakat sümaa tü kasa eekat yaa saaʼu, chi kakumalakai tü palaakat otta tü kasa eekat shiroku. Anuujeseʼe nünüiki: «Nnojoleechi koulainkuʼu müin Maleiwa.
7 Sülüʼülapa maʼin tü kaʼi niʼyalajirüinjatkalü oʼu tü konneetakat chi chiiruaajachikai aapiee, ekeraajeerü tü kasa nütüjaakalü aaʼu Maleiwa, tü pütchi anakat maʼin* nüküjatüjütkalia achiki paala namüin na nüchepchiakana jee namüin na nünüikimaajanakana».
8 Taapakalaka süchikuaʼa tü pütchi sirumatuʼujeejatkat, tü taapakat paala. Sümakalaka tamüin: «Anashi paapaale tü rooyo jutatakat najapuluʼu chi aapiee yalakai shaʼwatüin saaʼu tü palaakat jee saaʼu tü mmakat».
9 Oʼunushijeseʼe taya nünainmüin chi aapieekai, tachuntaka nümüin tü rooyochonkot. Anuukalaka nünüiki tamüin: «Paapaa tü rooyokot sümaa piküin shia, ishaateetkalaka paaʼin sutuma, püsieetpejeʼe maʼin shia puwaraluʼu maʼaka püsiain tü mapakat».
10 Taapaainjeseʼe najapüluʼujee chi aapieekai tü rooyochonkot jee tekakalaka shia. Püsiasü maʼin shia tawaraluʼu, mataasü aka saaʼin mapa, ishaatapejeʼe maʼin taaʼin sutuma tekapa shia.
11 Anuujeseʼe pütchi tamüin: «Aküjainjachi pia pütchi püchikuaʼa süchiki pueulo, süchiki mma, nachiki na wayuu wattakana naalii, süchiki wayuu naatayaa maka anüiki otta nachiki watta naalii aluwataalii».
Noota
^ Pünaʼla tia suluʼu tü kanüliakat «Jamaluʼulu pütchikat».
