Naʼyataain na Aluwataaushikana 5:1-42
-
Ananías sümaa Safira (1-11)
-
Wainma kasa pülasü naainjaka na aluwataaushikana (12-16)
-
Püreesashii atumawaa na aluwataaushikana jee ayuʼnnushii naya mapa (17-21 1)
-
Eʼikajaanüshii na aluwataaushikana nachikuaʼa namaʼanamüin na sulujunakana tü kanüliakat Sanedrín (21 2-32)
-
Niainjachi woonoʼoleeinjachika amaa anüiki Maleiwa suulialeʼeya sünüiki wayuu (29)
-
-
Nünüiki Gamaliel sünain achiawaa (33-40)
-
Aküjashii pütchi sainküinpünaa miichi na nikirajüinkana Jesús (41, 42)
5 Eejachikalaka wanee wayuu kanüliashi Ananías, Safira sünülia tü nuʼwayuusekat. Noikakalaka wanee noumain.
2 Nükatatpejeʼe Ananías süpüshi tü nneetkat. Nnojotsü jaralüin atüjaain saaʼu tia, shiaʼala neʼe tü nuʼwayuusekat. Niʼikajaaka tü süpüshikat namüin na aluwataaushikana.
3 Nusoutakalaka Pedro nümüin: «Ananías, ¿jamüshikai maapülinkaʼa maʼin pia nutuma Satanás süpüla püküjainjachin paʼalain? Mojutusat pümüin tü nüpülainkat Maleiwa otta pükatalüin süpüshi süliapala tü mma puikakat.
4 ¿Nnojoishisaʼa piain koumain tü mma puikakat? Eeshi süpüla paaʼinrüin tü paaʼinreekalü amüin süka tü süliapalakat. ¿Jamakaʼa pukumajaka suluʼu pikii makalü aka saaʼin tüü? Nnojoishi pia aküjain paʼalain sümüin wayuu, aküjashi pia paʼalain nümüin chi Maleiwakai».
5 Naapaiwaʼaya Ananías tü nümakat Pedro, nujuttakalaka mmoluʼumüin, outaʼaleejaʼa nümüin. Neimmolojooyaa namaka napüshuaʼa na wayuu aapakana süchiki tü alatakat.
6 Nayakaʼa atamaain na jimaʼaliikana. Nakoʼoloko nia süka kuluulu, nalüʼüjiraaka nia süpüla neʼikajachin nia.
7 Maʼaka apünüin oora süchikijee tia, süntakalaka tü nuʼwayuusekat, nnojotpejeʼe sütüjaain saaʼu tü alatakat.
8 Anuujeseʼe nünüiki Pedro sümüin: «¿Müinjaʼaya tü juikakalü aaʼu tü mmakat?» Susoutakalaka nümüin: «Aa, müsiaʼayan».
9 Anuukalaka nünüiki Pedro sümüin: «¿Jamüshii wanaawaka jia sünain ooʼulakaa naaʼin Jehová* sümaa mojutuin jümüin tü nüpülainkat? Anaainasaʼa soʼuluʼu miichikat na wayuu ojoitakana chi puʼwayuusekai otta nalüʼüjiraajeeriaʼaya pia».
10 Sujuttakalaka nüʼütpaʼa Pedro, outaleesia. Nekeronuwaapa na jimaʼaliikana, yalajatka shia napüla palasütüin. Nayuʼlaka shia jee nojoitoko shia naʼatoʼu chi suʼwayuusekai.
11 Mmotkalaka maʼin na nikirajüin Jesús chajanakana Jerusalén namaʼaleeya na wayuu aapakana süchiki tia.
12 Wainma kasa pülasü naainjaka suʼupala wayuu na aluwataaushikana otta chapuʼushii naya outkajaain eekai tü Luma naainjirakat Salomón.
13 Shiimainyaajeʼe eein wayuu mmoluwaaka seema ekerotoo naʼakamüin na anoujashiikana, anapejeʼe maʼin pütchi nachiki na anoujashiikana.
14 Akaʼaya shiaya, akooʼomüinraashii maʼin na anoujakana nünain chi Señotkai. Watta naalii tooloyuu jee jieyuu.
15 Nayasaʼa na wayuukana namaashii na wayuu eekai ayuulin chaa kaayeruʼumüin. Kajulejiashii naya natuma süpüla anainjanain naya nutuma Pedro nülatapa naʼütpünaa, jaʼitasü shiain neʼe alatüin tü niyolojokat nooʼopünaa.
16 Watta naalii na wayuu alüʼüjakana wayuu eekai ayuulin jee eekai kaleʼeruʼuin yolujaa. Chejeejana naya süʼütpünaa Jerusalén. Anakalaka napüshuaʼa naya wayuukana.
17 Naashichijaakalaka chi laülaashikai napüleerua na sacerdotekana namaʼaleeya na wayuu eejanakana nümaa. Nayajaʼa na oʼunakana süchiirua tü nekirajakalü anain na saduceokana.
18 Nataʼünakalaka na aluwataaushikana jee püreesakalaka naya atumawaa.
19 Shiasaʼa saʼwai, nüntakalaka chi aapiee nümaʼanajeejachikai Jehová,* nujutalüinjeseʼe soʼu tü kaatsetkat jee niyuʼlaka naya yalejee sümaa nümüin namüin:
20 «Juʼuna suluʼumüin tü aʼwaajüleekat Maleiwa otta ayataʼaya jüküjain süchiki tü naaʼinrajatkat na wayuukana süpüla katüinjatüin noʼu süpüla kaʼikat süpüshuaʼa».
21 Süchikijee naapüin tia, noʼunakalaka suluʼumüin tü aʼwaajüleekat Maleiwa jee nekirajakalaka wayuu chayaa.
Niasaʼa chi laülaashikai napüleerua na sacerdotekana otta na wayuu yalajanakana nümaa, noutkajeʼerüin na sulujunakana tü kanüliakat Sanedrín otta müshiʼiya napüshuaʼa na laülaashii chajanakana Israel. Nasaajirüinjeseʼe suluʼujee tü kaatsetkat na aluwataaushikana.
22 Nantapa na surulaatkana chamüin, nnojoliikalaka naya napüla. Naleʼejakalaka nachikuaʼa jee naküjakalaka süchiki tia.
23 Anuukalaka nanüiki: «Süttüsü wapüla tü kaatsetkat jee anasü maʼin süsürülia. Eejanajaʼaya na waariakana soʼuluʼu. Wanaa sümaa sujutannüin, nnojotsü jaralüin yalajatüin suluʼu».
24 Naapapa süchiki tia chi sülaülajanakai tü aʼwaajüleekat Maleiwa otta nekiipüʼü na sacerdotekana, wainmajaka naaʼin, jama nnojoluin natüjaain saaʼu kaseerüin alatüin süchikijee tia.
25 Nüntakalaka wanee wayuu jee nümakalaka namüin: «Na wayuu jüpüreesajirakana paala, ichaa ekirajüin wayuu suluʼu tü aʼwaajüleekat Maleiwa».
26 Nuʼunakalaka chi sülaülajanakai tü aʼwaajüleekat Maleiwa namaʼaleeya na surulaatkana sünain asaajaa na nikirajüinkana Jesús, nnojoliipejeʼe naya jamajüin natuma, jama mmoluin naya seema eʼinaʼannaa sutuma wayuu.
27 Amaanüshiijeseʼe naya jee neʼikajaanakalaka namüin na sulujunakana tü kanüliakat Sanedrín. Nasakiijünaka nutuma chi laülaashikai napüleerua na sacerdotekana.
28 Anuujese nünüiki namüin: «Mataashii wachiaakai jia suulia jikirajüin piantua nüchiki chia wayuukai. Shialeeitpa aapünaka sutuma wayuu yaa Jerusalén tü jikirajakalü anain. Joʼoteein waaʼu wayain oʼutuin naaʼin chia wayuukai».
29 Anuujeseʼe nünüiki Pedro namaʼaleeya na wane aluwataaushikana: «Süka niain Maleiwa aluwataain waaʼu, niainjachi woonoʼoleeinjachika amaa anüiki suulialeʼeya sünüiki wayuu.
30 Asoʼireʼenna aaʼinchi Jesús nutuma chi Namaleiwasekai na watuushinuukana, chi Jesús jükacherakai sünain wanee wunuʼu süpüla outajachin nia.
31 Amaanüshi nia iipünaamüin nutuma Maleiwa süpüla nüikaleʼerüinjachin nia nikialuʼujee. Nia Wekiipüʼüka nutuma jee nia Oʼtteʼeraka waya süpüla nayaawajaainjanain na israelitakana suulia naainjala jee sülatinnajatüin noulia.
32 Shiimain süpüshuaʼa tia makalü yaa otta nükaalinjain waya Maleiwa sükajee tü nüpülainkat süpüla waküjainjanain pütchi süchiki tia, tü anuu jooluʼu aapünüin namüin na wayuu jaa makana nümüin Maleiwa».
33 Naapaiwaʼaya tia, naashichijaakalaka nooʼomüin jee noʼuteekalaka naaʼin.
34 Niasaʼa wanee wayuu fariseo kanüliashi Gamaliel, ekirajüi nia sünain tü Pütchi Aapünakat nümüin Moisés* otta kojutushi maʼin sümüin wayuu, nüshaʼwalaakalaka noʼupala na yalajanakana jutkatüin suluʼu tü kanüliakat Sanedrín. Nuchuntaka nayuʼnnajanain motsomüin na aluwataaushikana.
35 Anuujeseʼe nünüiki namüin na wayuu yalajanakana jutkatüin: «Jia wayuu yaakana Israel, eeja jaaʼin sünain tü jaaʼinreekat namüin wayuukana naainnua.
36 Eeirü joo sükalia süchikijee nüküjain Teudas nünüikimaajachin nia Maleiwa. Wanaawakalaka naaʼin 400 wayuu nümaa, shiasaʼa nuʼutunapa aaʼin, naʼwalakajaayaa namaka na nümaajanakana. Suʼwüinjaʼalaa sümaka tü naainjeekalü amüin.
37 Jamüsüjaʼa wanaa sümaa tü censokot, eejachi wanee wayuu kanüliashi Judas, chejeʼewai nia Galilea otta wainma na wayuu wanaawakana aaʼin nümaa. Outataajaʼaya wayuukai chia, naʼwalakajaayaa namaka na wayuu nümaajanakana.
38 Müshiijeseʼe tachiaain jia suulia jamajüin jutuma wayuukana naainnua, anashii juuʼulaale naya. Sünainjeejatüle wayuu tü naaʼinreekalü amüin jee tü naʼyataakalü anain, awüinjaweerü.
39 Nünainjeejatüle shia Maleiwa, nnojotsü kasakeerüin jutuma otta eeshiijaʼa jiale neʼe peʼipaajeenain nümaa Maleiwa».
40 Naapaakalaka sümaa tü nümakat Gamaliel, nasaajirüinjeseʼe na aluwataaushikana jee naʼyaajirakalaka naya. Nachiaaka naya suulia ekirajaa nüchiki Jesús jee najütakalaka nachiki.
41 Nojuʼitakalaka na aluwataaushikana sümaa talatüin maʼin naaʼin suluʼujee tü kanüliakat Sanedrín, jama kojutuin maʼin namüin müliain naya atumawaa saalinjee nünülialuʼuin naya Jesús.
42 Mojoʼlooinkalaka naya sünain ekirajaa jee sünain aküjaa pütchi anasü nüchiki Jesús, chi Cristokai. Naaʼinrüin tia suluʼu tü aʼwaajüleekat Maleiwa jee sainküinpünaa miichi.
Noota
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Jamaluʼulu pütchikat».
