Naʼyataain na Aluwataaushikana 3:1-26
3 Niasaʼa Pedro nümaa Juan, oʼunushii naya suluʼumüin tü aʼwaajüleekat wanaa maʼin sümaa sükalia tü oʼuraajaakat, maʼaka saaʼin las tres* aliika.
2 Eejachikalaka wanee wayuu joʼuujiraashi sümaa masaʼain nia, eʼikajaanawaishi nia soʼuluʼu tü aʼwaajüleekat, tü kanüliakat Hermosa. Eʼitaanawaishi nia chayaa weinshi süpüla nujulijain naaʼu na wayuu ekerotokana suluʼumüin tü aʼwaajüleekat.
3 Niasaʼa chi wayuukai, niʼraiwaʼaya nikerolojachin Pedro nümaa Juan suluʼumüin tü aʼwaajüleekat, nujulijaka naaʼu.
4 Niirakaaka Pedro nümaa Juan nümüin jee nümakalaka nümüin: «Piirakaa wamüin».
5 Eirakaashijeseʼe chia wayuukai namüin, asülajüinjanayaa nümüin naaʼinruʼu.
6 Anuukalaka nünüiki Pedro nümüin: «Nnojotsü ooro tamaʼana, nnojotsü pülaata tamaʼanaya, eepejeʼe wanee kasa taapeetka pümüin. Müshi taya pümüin: püshaʼwalaa jee puwarairaa saaʼu nünülia Jesucristo chi chejeʼewaikai Nazaret».
7 Nümaiwaʼaya tia Pedro, naapaakalaka najapü chi wayuukai, tü najapü nikiakat jee nütameʼerakalaka nia, katsüinka nüsaʼa chi wayuukai.
8 Nüshaʼwalaamaataka chi wayuukai jee waraittakalaka nia, nikerotkalaka suluʼumüin tü aʼwaajüleekat nümaa Pedro otta müshia Juan. Munnatüshi neʼe nia jee nuʼwaajüin chi Maleiwakai.
9 Shiʼrakalaka nia wayuu maʼleekalia sünain waraittaa jee sünain aʼwaajaa Maleiwa.
10 Nayaawatakalaka saaʼu na wayuukana niain chi wayuu joyotopuʼukai sünain ojulijaa soʼuluʼu tü aʼwaajüleekat, soʼuluʼu tü puettoʼu kanüliakat Hermosa. Wakataka neʼe naanükü na wayuukana sümaa ponuin maʼin naaʼin tü kasa alatakat.
11 Ichekalaka neʼe chi wayuukai nünain Pedro otta nünain Juan. Nawataakalaka na wayuukana nanainmüin, eekai tü Luma naainjirakat Salomón.* Ponusü maʼin naaʼin na wayuukana tü kasa alatakat.
12 Niʼraiwaʼaya Pedro tia, nümakalaka: «Jia wayuu yaakana Israel, ¿jamüsü ponoko maʼin jaaʼin tü kasa jiʼrakat? ¿Jamüshii jiʼrajaakaʼa maʼin waya? ¿Wayayaa jaaʼinruʼu anaka atuma wayuukai chii sükajee pülashiin waya jee sükajee kanoulain waya nünain Maleiwa?
13 Chi Namaleiwasekai na watuushinuukana, chi Nümaleiwasekai Abrahán, Isaac otta Jacob, kojutushi chi Nüchepchiakai nutuma, chi kanüliakai Jesús chi anii jiyoutuin achiki jee chi jaapakai ekii nümüin Pilato mayaainjeʼe nüjüteein nüchiki.
14 Jiyouta achikichi chi wayuu wulekai akuwaʼipa jee chi lotokoi akuwaʼipa. Niakalaka neʼe jüjütirüin achiki wanee wayuu oʼunui saaʼin wayuu.
15 Juʼutiraka naaʼin chi Wekiipüʼükai nutuma Maleiwa, chi Katajachikai atuma Woʼu. Asoʼireʼennapejeʼe naaʼin nutuma Maleiwa jee watüjaa aaʼu shiimain tia süka weʼrüin nia.
16 Saaʼujee nünülia Jesús jee saaʼujee wanoujain nünain, akatchinraaichipa wayuukai chii, anii joo jiʼrüin jee jiʼraajüin nia, naawalaʼaleeka wayuukai chii saaʼujee kanoulain waya nünain Jesús.
17 Tawalayuwaa, tatüjaa aaʼu jaaʼinrüin tia süka nnojoluin jiyaawatüin saaʼu tü jaaʼinrakat, maʼaka naaʼin na wayuu aluwataakana jaaʼu.
18 Jee sükajee tia, nikeraajüin Maleiwa tü nüküjatüjütkalia achiki nakajee na nünüikimaajanakana, müliainjachin atumawaa Cristo.
19 »Anakajaʼa jiyaawajaale suulia jaainjala jee jüleʼeja nünainmüin Maleiwa süpüla sülatinnajatüin jaainjala juulia süsamalaajeetka jaaʼin nutuma Jehová.*
20 Jee nüjüteechikalaka jümüin Jesús, chi Cristo nüneekajalakai.
21 Chainjachi nia iipünaa süpülaleʼeya tü kaʼi nunoutajatkalü oʼu Maleiwa süpüshuaʼa tü kasa nüküjatüjütkalia achiki paala nakajee na nünüikimaajanakana.
22 Anuu tü nümakat Moisés: ‹Eekajasaʼa Jehová* chi Jümaleiwasekai, nüneeküinjachi wanee wayuu nünüikimaainjachikai maʼaka taaʼin tayakai, nüneeküinjachi nia naʼakajee na juwalayuukana. Kacheʼeinjana jia sümüin nünüiki otta jaaʼinrajatü süpüshuaʼa tü nümakat.
23 Chi wayuu nnojoikai kacheʼejüin nümüin chi Nünüikimaajachikai Maleiwa, oʼutunajachi aaʼin›.
24 Napüshuaʼa na nünüikimaajanakana Maleiwa, nünainjeʼereʼeya Samuel, aküjashii naya süchiki tü kasa alatajatkat maaʼutpünaa.
25 Nachonnii jia na nünüikimaajanakana Maleiwa otta jia na anainjanakana akuwaʼipa sünainjee tü pütchi nüpansaajakat Maleiwa namaa na jutuushinuukana wanaa sümaa nümüin nümüin Abrahán: ‹Aneerü sukuwaʼipa wayuu maʼleekalia nünainjee wanee pülüin›.*
26 Süchikijee nüneeküin Maleiwa chi Nüchepchiakai, nüjütüin nia palajana jaʼakamüin süpüla anainjatüin jukuwaʼipa nutuma, nükatalüinjeseʼe jia suulia tü kasa mojusü jaaʼinrakat».
Noota
^ «Maʼaka mekietsat oora süchikijee nujuʼitaain kaʼikai» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Tü pütchi griego ashajünakat yaʼayaa nia saashajaaka achiki nüchon wanee wayuu. Eeshijaʼa niale saashajaain achiki nülüin jee nayale nüikeyuu.
