Naʼyataain na Aluwataaushikana 23:1-35
23 Niirakaakalaka Pablo namüin na wayuu sulujunakana tü kanüliakat Sanedrín jee nümakalaka: «Tawalayuwaa, nnojoiyüisaʼa taya kaainjalain* nuʼupala chi Maleiwakai».
2 Naapaiwaʼaya tia Ananías, chi laülaashikai napüleerua na sacerdotekana, nootoko na yalajanakana nüʼütpaʼa Pablo süpüla naʼyaajaainjachin Pablo niimatapünaa.
3 Anuujeseʼe nünüiki Pablo nümüin: «Niʼyaajaweechi eimatapünaa pia Maleiwa, pia wayuu piamakai oʼupünaa.* Aikalaashi pia süpüla püsakirüin taya süchiirua nnojoluin taapaain sümaa tü Pütchi Aapünakat nümüin Moisés, nnojoipejeʼe pia aapaain sümaa tia pütchikat, aniisa joo taya piʼyaatirüin eimatapünaa».
4 Nasoutaka nümüin Pablo na wayuu yalajanakana nüʼütpaʼa: «¿Jamüsü airuʼutka pünüiki nümüin chi laülaashikai nutuma Maleiwa napüleerua na sacerdotekana?».
5 Anuujeseʼe nünüiki Pablo namüin: «Tawalayuwaa, nnojoishireʼe tatüjaain aaʼu niain chi laülaashikai napüleerua na sacerdotekana. ‹Nnojo mojuin pünüiki namüin na laülaashiikana suluʼu tü pupueulosekat›, mapejeʼe tü nüshajiralakat Maleiwa».
6 Nütüjaa aaʼu Pablo eejanain wayuu saduceo otta wayuu fariseo suluʼu tü kanüliakat Sanedrín, müsüjeseʼe emetuluin nünüiki sünain maa: «Tawalayuwaa, wayuusa fariseo taya, süchooin taya wayuu fariseo. Süsalashi taya soʼukai tanoujain sünain süsoʼiraainjatüin naaʼin na wayuu outushiikana».
7 Naʼülüjiraayaa namaka na fariseokana namaa na saduceokana sünainjee tü nümakat Pablo, nnojoliika paaʼinwajiraain na wayuukana,
8 jama nnojoliin nanoujain na saduceokana süsoʼiraain aaʼin wayuu süchikijee outaa jee manoujainsalii naya sünain eein na aapiee nümaʼanajeejanakana Maleiwa. Eekajasaʼa na fariseokana nanouja anainrü süpüshuaʼa tia.
9 Nawoorolooyoo namaka na wayuukana. Atamaashiijeseʼe waneinnua karaloʼutamaajana naʼakajeejana na kanüliakana fariseo, makaʼa jamakai naaʼin sünain maa: «Nnojotsü kasain naainjalain wayuukai chii saaʼin wamüin. ¿Jama naashajaalejeʼeya nümaa wayuukai chii na aapiee nümaʼanajeejanakana Maleiwa?».
10 Niasaʼa chi sülaülakai surulaat saaʼu niʼrüin naʼülüjiraain maʼin na wayuukana, mmotkalaka nia saaʼu jamajüin Pablo atumawaa, neenajirüinjeseʼe waneinnua surulaat süpüla nayuʼluin Pablo yalejee otta neʼikajaainjachin nia suluʼumüin tü shipiakat surulaat.
11 Soʼu aikat tia, niiʼiyalaaka chi Señotkai naʼatoʼu Pablo jee nümakalaka nümüin: «Yalayala paaʼin, aküjeechi pia pütchi tachiki chaa Roma maʼaka püküjain maʼin pütchi tachiki yaa Jerusalén».
12 Waneemüin kaʼi, naashajaajiraaka na judíokana nikiira Pablo jee naküjakalaka nnojoluinjanain neküin otta nnojoluinjatüin kasain nasüin waneʼereeya noʼutapa naaʼin Pablo.
13 Alatüshii suulia pienchi shikii na wayuu aapakana nanüiki süpüla noʼutajachin naaʼin Pablo.
14 Oʼunushiijeseʼe naya namaʼanamüin nekiipüʼü na sacerdotekana jee namaʼanamüin na laülaashiikana sümaa namüin namüin: «Waküjain nnojoluinjatüin kasain weküin waneʼereeya woʼutapa naaʼin Pablo.
15 Jaashajaa nümaa chi sülaülashikai surulaat jiakana namaʼaleeya na sulujunakana tü kanüliakat Sanedrín, juchunta nümüin süpüla nüntirajachin Pablo jümüin. Müinjachi jüsakirayaakai naaʼin shiiʼiree jütüjaain saaʼu tü alatakat nümüin. Shiasaʼa süpülapünaa nüntüin, yapatüjüliijeena waya süpüla woʼutuin naaʼin».
16 Eekalaka wanee nüsiipü Pablo aapakai süchiki nuukajünüinjachin apüla Pablo, oʼunushijeseʼe nia suluʼumüin tü shipiakat surulaat jee nüküjaka süchiki tia nümüin Pablo.
17 Neenajitka Pablo wanee nutujeejachi chi sülaülakai surulaat jee nümakalaka nümüin: «Pümaa jintüikai chii eemüin chi sülaülashikai surulaat, eesü wanee kasa nüküjainjatka nümüin».
18 Nümaashijeseʼe nia nümaʼanamüin chi sülaülashikai surulaat jee nümakalaka nümüin: «Neenajirüin taya Pablo chi wayuu püreesashikai jee nuchuntaka tamüin tantirajachin pümüin jintüikai chii, eesü wanee kasa nüküjainjatka pümüin».
19 Najattaka nia chi sülaülashikai surulaat mamüin aka tüsa jee nümakalaka nümüin: «¿Kasa püküjainjatka achiki tamüin?».
20 Anuujeseʼe nünüiki chi jintüikai nümüin: «Paaʼinwajiraashiisaʼa na judíokana süpüla nachuntajanain pümüin puʼunirajachin Pablo wattaʼa chaa suluʼumüin tü kanüliakat Sanedrín, müinjana nasakirayaakai aaʼin süchiirua tü kasa alatakat nümüin.
21 Nemeejaʼalayaai pia, alatüshii suulia pienchi shikii na wayuu oukajakana nüpüla Pablo. Naküjain nnojoluinjatüin kasain neküin jee nnojoluinjatüin kasain nasüin waneʼereeya noʼutapa naaʼin Pablo. Shia neʼe naʼatapajaka paainjain tü namakat».
22 Nüjütünaka achiki chi jintüikai nutuma chi sülaülashikai surulaat, anuupejeʼe nünüiki nümüin nümaʼichiki: «Püküjaʼalayaai sümüin wayuu paashajaain tamaa süchiki tia».
23 Neenajitka piamashii surulaat nutujeejana jee nümakalaka namüin: «Yapaja jutuma 200 surulaat oʼunajanakana Cesareamüin maʼaka saaʼin las nueve* aipaʼa. Jümaainjana akaratshishii nekii surulaat amaajuna otta 200 surulaat kajapuluʼujashii wunuʼu keʼichisü kachueera.
24 Yapaja jutuma ama neʼejenainjatü Pablo, nünteechika sümaa anakalü akuwaʼipa nümaʼanamüin Félix, chi aluwataashikai».
25 Nüjütirakalaka nünüiki suluʼu wanee karaloʼuta sünain maa:
26 «Tashajala tüü tayakai Claudio Lisias pümüinjatü piakai Félix, chi sülaülakai mma, kojutushi pia sutuma wayuu. Tasaküin pia.
27 Ataʼünnüshi wayuukai chii natuma na judíokana, noʼutataaichijeʼe aaʼin nia. Shiasaʼa tatüjaapa saaʼu wayuuin romano nia, tamaakalaka na tasurulaatsekana süpüla tasaajaain nia namaʼanajee.
28 Tatüjawee aaʼu kasain müin aaʼujee nia, müshijeseʼe teʼikajaain nia namüin na sulujunakana tü kanüliakat Sanedrín.
29 Tayaawataka saaʼu shiʼitaanüin naaʼu nnojolin noonooin sümaa tü Pütchi Aapünakat namüin nayakana judíokana, nnojotpejeʼe eein wanee kasa outajachika anainjee nia jee wanee kasa kaleenaluʼuinjachika anainjee nia suluʼu kaatset.
30 Aküjünapejeʼe tamüin naashajaanüin ekiira wayuukai chii süpüla nuʼutunajachin aaʼin. Taluwataamaatüinjeseʼe nia pümaʼanamüin jee tamaka namüin na wayuu aküjakana nüchiki naküjainjatüin pümüin kasain naainjalain».
31 Amaanüshijeseʼe Pablo natuma na surulaatkana süka naapaain sümaa tü aluwataanakalü anain naya. Nantaka saʼwai suluʼumüin tü pueulo kanüliakat Antípatris.
32 Waneemüin kaʼi, nuʼuninnaka Pablo natuma na surulaat amaajunakana, nayaka aleʼejaain nachikuaʼa na wanee surulaatkana eemüin tü shipiakat surulaat.
33 Nantapa na surulaat amaajunakana Cesareamüin, naapakalaka tü karaloʼutakat nümüin chi aluwataashikai jee nantirüin Pablo nümaʼanamüin.
34 Naashajeʼerüinjeseʼe chi aluwataashikai tü karaloʼuta aluwataanakat nümüin jee nüsakiraka jalejeʼewalin Pablo. Süküjünaka nümüin chejeʼewalin nia Cilicia.
35 Anuujeseʼe nünüiki nümüin Pablo: «Taapajeerü süchiki tü kasa alatakat pümüin nantapeena na wayuu aküjakana süchiki kaainjalain pia». Nuluwataaka na surulaatkana süpüla neʼrajüinjanain naaʼu Pablo suluʼu tü miichi eepuʼule nuluwataain Herodes, tü eere kepiain joo chi aluwataashikai.
Noota
^ Tü pütchi «nnojoishi kaainjalain» münakat yaʼayaa, shia süküjeeka achiki anale jee mojule wanee kasa. Pünaʼla tü pütchikat «Conciencia» suluʼu tü kanüliakat «Jamaluʼulu pütchikat».
^ Jee nümünüle amüin «müshi pia maʼaka saaʼin wanee süsepü miichi kasuutatkat epintajia süpüla nnojoluinjatüin jaʼyain tü shiʼyarülakat».
^ «Maʼaka apünüin oora süchikijee nikerotüin kaʼikai» maluʼulu tia suluʼu griego.
