Naʼyataain na Aluwataaushikana 13:1-52
13 Eejana chaʼayaa Antioquía wayuu nünüikimaajana Maleiwa otta müshiʼiya wayuu ekirajakana suluʼu tü outkajaalee chajatkat. Eejachi Bernabé, Symeón, chi «Niger» münakai, Lucio, chi chejeʼewaikai Cirene, Manaén, chi ekirajünakai wanaa nümaa Herodes, chi aluwataakai saaʼu tü mmakat Galilea otta müshia Saulo.
2 Sümaʼainruʼu yalain naya sünain aʼwaajaa Jehová* jee sünain naamajüin, nümakalaka namüin sükajee tü nüpülainkat: «Anashi jükatarüle tamüin Bernabé otta müshia Saulo süpüla naaʼinrajanain tü aʼyatawaa taneekakalü apüla naya».
3 Kettaapa naya süchikijee aamajaa jee süchikijee oʼuraajaa, neʼitaakalaka najapü naaʼu Saulo jee müshia Bernabé. Najütakalaka naya yalejee.
4 Noʼuninnakalaka wayuukana naainnua sükajee tü nüpülainkat Maleiwa jee nantakalaka suluʼumüin tü mma kanüliakat Seleucia, noʼotooko yalejee suluʼu anuwa süpüla noʼunajanain Chipremüin.
5 Nantapa suluʼumüin tü mma kanüliakat Salamina, nekirajaka süchiki nünüiki Maleiwa suluʼupünaa tü ekirajüleekat nüchiki Maleiwa natuma na judíokana. Eejachijaʼaya Juan namaa sünain akaalinjaa.
6 Süchikijee noʼunuin Salaminajee nantakalaka suluʼumüin tü mmakat Pafos. Eejachikalaka yala napüla wanee wayuu judío kanüliashi Bar-Jesús, ouutshi chia makai otta nünüikimaajachiaa nia Maleiwa.
7 Yalajachi nia nümaa Sergio Paulo chi aluwataashikai, wanee wayuu kekiishi maʼin, neenajinnaka Bernabé otta müshia Saulo nutuma chia wayuukai süka naapeein maʼin tü nünüikikat Maleiwa.
8 «Elimas», münüshi chi ouutshikai (ouutsü maluʼulu tia nünüliakat), nnojotkalaka nuuʼulaain naya süpüla naküjainjanain tü pütchikat suulia nunoujain chi aluwataashikai.
9 Süntakalaka tü nüpülainkat Maleiwa naaʼu Saulo, chi Pablo münakai, niirakaakalaka maʼin nümüin Elimas
10 jee nümakalaka nümüin: «Wayuu alaa neʼe pia. Shia neʼe paaʼinraka tü kasa mojusükat. Nüchon pia chi Yolujaakai jee pumojujüin sukuwaʼipa wanee kasa eekai lotuin, ¿joujaleechi puuʼulaaka suulia pumojujüin tü nikirajakalü anain Jehová?*
11 Aniisa Jehová* pooʼomüin, moʼupaʼajeechi pia jee nnojoleerü piʼrüin nuwarala chi kaʼikai soʼu jeʼra kaʼi». Jee wanaa maʼin sümaa tia, müsatajaaka nuʼupaʼaluʼu Elimas, müsü kojokoijaʼa saaʼin tü mannuuyakat nüʼütpünaa sümaa shipiʼyuushijaain nuʼupaʼaluʼu, nüchajawaain nümaka wayuu nüʼütpünaa shiiʼiree sajattajachin nia.
12 Nunoujakalaka chi aluwataashikai niʼraiwaʼaya tü kasa alatakat. Ponusü maʼin naaʼin tü kasa nikirajakalü anain Jehová.*
13 Nuʼunakalaka Pablo chejee Pafos namaa na nümaajanakana. Anuwaluʼushii naya chamüin Perga, tü chakat Panfilia, nüpütaka naya Juan chaʼayaa jee nüleʼejaka Jerusalénmüin.
14 Ayatapejeʼe naya oʼunuin chaa Pergamüin jee nantakalaka Antioquíamüin, tü chakat Pisidia. Ekerotushiijeseʼe naya suluʼumüin wanee ekirajülee nüchiki Maleiwa sükalioʼu eemerawaa, naikaajaakalaka chamüin.
15 Jee süchikijee saashajeʼennüin sümüin wayuu tü Pütchi Aapünakat nümüin Moisés otta tü nashajalakat na Nünüikimaajanakana Maleiwa, naluwataakalaka nanüiki na laülaashiikana suluʼu tü ekirajüleekat nüchiki Maleiwa sünain maa nümüin Pablo jee nümüin Bernabé: «Wawalayuwaa, jüküjeerejeʼe wamüin wanee pütchi eekai atütüleʼereerüin waaʼin, anakajaʼa jüküjale shia wamüin».
16 Nüshaʼwalaakalaka Pablo sümaa niyalerüin najapü süpüla saapünajatüin nünüiki natuma na wayuukana jee nümakalaka namüin:
«Jia wayuu israelkana jee müshiʼiya jiakana wayuu kojutukana amüin Maleiwa, anashii jaapajüle tanüiki.
17 Chi Sümaleiwasekai Israel nüneeküin na watuushinuukana soʼu chajanain naya Egipto suluʼu tü mma nnojotkat noumain, nükaalinjain naya jee niyuʼluin naya chejee sükajee tü nüpülainkat.
18 Nnojoipejeʼe nia akulajaain aaʼin namaa soʼu tü pienchi shikii juya chajanakalü oʼu naya isashiipaʼa.
19 Najaʼttirakalaka chi Maleiwakai na wayuu chajanakana kepiain suluʼu tü akaratshisü mma chajatkat Canaán, niʼipünaainjeseʼe tü noumainkat napüla na wayuu israelkana süpüla nayainjanain koumain shia.
20 Alatüsü tia soʼunnaa 450 juya.
»Süchikijee tia, niʼitaaka Maleiwa wayuu oʼunirajatka nakuwaʼipa na israelitakana sünainmüinreʼeya nükalia Samuel, chi nünüikimaajachikai Maleiwa.
21 Nachuntakalaka na israelitakana wanee wayuu aluwataainjachikai naaʼu, niakalaka eʼitaanüin Saúl nutuma Maleiwa süpüla nuluwataainjachin soʼu pienchi shikii juya, nüchon nia Quis, wanee wayuu nülüin Benjamín.
22 Nuuʼuleʼerakalaka nia suulia aluwatawaa jee niʼitaakalaka David süpüla niainjachin aluwataain niiʼirakaluʼu. Anuujeseʼe nünüiki Maleiwa nüchiki David: ‹Talatüsü maʼin taaʼin nümaa David, chi nüchonkai Jesé, naaʼinreerü süpüshuaʼaleʼeya tü kasa tachekakat›.
23 Nuʼtteʼereena Maleiwa na israelitakana nükajee wanee nülüin David, nükajee chi Jesúskai anülia, maʼaka nüküjatüjülin shia paala Maleiwa.
24 Süpülapünaa nüntüin Jesús, nüküjain Juan namüin napüshuaʼa na israelitakana woutiisainjanain naya süpüla sülatinnajatüin naainjala noulia.
25 Anuujeseʼe nünüiki Juan sülüʼülapa sükalia süpüla nikeraajüin tü aʼyatawaa aapünakat nümüin: ‹Nnojoishisaʼa tayain chi wayuu jaʼatapajakai. Anteechipejeʼe wanee wayuu tachikumüin, nnojoishi taya keraain süpüla asiʼwataa saalaja nukoʼusüin chia wayuukai›.
26 »Wawalayuu, jia nüikeyuukana Abrahán jümaʼaleeya jiakana wayuu kojutukana amüin Maleiwa, aküjünüsü wamüin pütchikat tüü shiiʼiree woʼttaainjanain.
27 Na wayuu chajanakana Jerusalén namaʼaleeya na aluwataashiikana naaʼu, nnojoishi kasajachin namüin chi oʼtteʼerajachikai naya. Shiasaʼa süsalapa nia natuma tü kasa naainjakat, nekeraajirüin tü pütchi nashajatüjütkalia na Nünüikimaajanakana Maleiwa, tü emetutwaikalü aashajeʼennüin sükalioʼu eemerawaa.
28 Mayaainjeʼe nnojoluin eein wanee kasa outajachika anainjee Jesús natuma, nachuntuin nümüin Pilato nuʼutirajachin naaʼin.
29 Shikeraajapa süpüshuaʼaleʼeya tü aküjünatüjütkalia nüchiki Jesús, nüshakatinnaka sünainjee tü wunuʼukat jee niʼitaanaka suluʼu wanee woowira,
30 asoʼireʼennapejeʼe naaʼin nutuma Maleiwa.
31 Kojuya kaʼi niiʼiyataaka oʼu namüin na wayuu oʼunakana paala nümaa chejee Galileajee chaa Jerusalénmüin, na aküjakana pütchi nüchiki sümüin wayuu.
32 »Waküjainjeseʼe jümüin süchiki tü pütchi anakat maʼin,* tü apansaajünatüjütkalia achiki paala namüin na watuushinuukana.
33 Nüsoʼireʼerapa Maleiwa naaʼin Jesús süchikijee outaa nikeraajüin wamüin süpüshuaʼa tü nüküjatüjütkalia paala wamüin waya nüchooinkana, maʼaka nüküjain shia suluʼu salmo* piama: ‹Pia chi tachonkai, püshitchipa taya soʼukai›.
34 Nüküjatüjülia Maleiwa nüsoʼireʼerajatüin naaʼin Jesús süchikijee outaa jee müirüin nnojoluin ittüin niʼiruku wanaa sümaa nümüin: ‹Teeʼiyateetkalaka tamanee jümüin maʼaka taküjatüjülin shia nümüin David›.
35 Anuutaa joo pütchi suluʼu wane salmo:* ‹Nnojoleerü puuʼulaain ittüin niʼiruku chi wayuu waneepiakai pümaa›.
36 Wanaa sümaa katüin noʼu David, aʼyataashi nümüin Maleiwa, outapejeʼe nia mapa jee niʼitaanakalaka namaa na nutuushinuukana, ittaka niʼiruku.
37 Eekajasaʼa chi nüsoʼireʼerakai aaʼin Maleiwa, nnojotsü ittüin niʼiruku.
38 »Tawalayuwaa, sükajee outuichipain wayuukai chii, taküjeein jümüin nülatirüin Maleiwa jaainjala juulia.
39 Kanoulale wanee wayuu nünain Jesús, alatinneerü naainjala nuulia nutuma Maleiwa, nnojotpejeʼe süpüla sülatinnajatüin naainjala wanee wayuu sutuma tü Pütchi Aapünakat nümüin Moisés.
40 Eejeepejeʼe jaaʼin suulia sülanüin jümüin tü nashajakalü achiki na Nünüikimaajanakana Maleiwa, tü makat mayaa:
41 ‹Jiakana kemeeʼerainparaliikana wayuu, jiirakaa sümüin tü taʼyataakalü anain maaʼulu yaa. Nnojoleerü junoujain anain tayain kakumalain shia, jaʼitasü nüküjain jümüin wanee wayuu jamüin maʼin sukuwaʼipa tatuma, poneetpejeʼe shia jaaʼin jee outeena jia›».
42 Wanaa sümaa nujuʼituin Pablo nümaa Bernabé, nachuntakalaka maʼin na wayuukana namüin naküjainjatüin süchikuaʼa tia soʼu tü wane kaʼi neemeraakalü oʼu na judíokana.
43 Kettaapa tü jutkatirawaakat suluʼu tü ekirajüleekat nüchiki Maleiwa, watta naalii na judío oʼunakana nüchiirua Pablo jee nüchiirua Bernabé, akaʼaya na ekerotokana naʼakamüin na judíokana sünain anoujaa, oʼunushiʼiya naya nachiirua. Chajachikalaka Pablo nümaa Bernabé sünain aashajawaa namaa jee natütüleʼerakalaka naaʼin süpüla ayatüinjatüin anain nakuwaʼipa noʼuluʼu Maleiwa.
44 Shiasaʼa soʼu tü sükaliakalü eemerawaa, tü waneemüinkat semaana, noutkajaayaa namaka watta naalii wayuu suluʼujeejana tia pueulokot süpüla naapajüinjatüin tü nünüikikat Jehová.*
45 Neʼrapa na judíokana na wayuu wattakana naalii, mojushiikalaka tia namüin jee nayoutakalaka süchiki tü nümakat Pablo jee mojutukalaka Maleiwa natuma sükajee tia naaʼinrakat.
46 Nusoutakalaka Pablo otta Bernabé neʼipajee naya wayuukana sümaa yalayalain maʼin naaʼin: «Jiainjana aküjünaka amüin palajana tü nünüikikat Maleiwa, jiyoutapejeʼe süchiki tia otta jülüjasü jaaʼin nnojoliin keraain jia süpüla katüinjatüin joʼu süpüla kaʼikat süpüshuaʼa, müshiijeseʼe nayainjanain waküjain amüin pütchi na wayuu nnojoliikana judíoin.
47 Shiaʼaya nuluwataaka anain waya Jehová* tia wanaa sümaa nümüin: ‹Taneeküin pia süpüla müinjachin pia maʼaka saaʼin wanee luusa sümüin wayuu süpüla püküjainjatüin sainküinpünaa mmakat tü pütchi suʼttaajeetkalü anainjee wayuu›».
48 Naapapa tia na wayuu nnojoliikana judíoin, talatakalaka maʼin naaʼin jee naʼwaajaka Jehová* sünainjee tü nünüikikat, nanoujayaa namaka napüshuaʼa na wayuu achekakana süchiki katüinjatüin noʼu waneepia.
49 Süküjünakalaka maʼin tü nünüikikat Jehová* sainküinpünaa tia mmakat.
50 Nayasaʼa na judíokana, nashükajaka wayuu nooʼomüin Pablo otta Bernabé. Nashükajüin na jieyuu washinnuukana jee kojutukana maʼin amüin Maleiwa namaʼaleeya na wayuu kojutukana maʼin atumawaa suluʼu tia pueulokot. Müliakalaka maʼin atumawaa Pablo otta müshia Bernabé jee najünajaanaka suluʼujee tia mmakat.
51 Noʼotojookalaka nuuʼui Pablo nümaa Bernabé noʼupala naya wayuukana süpüla nayaawatüinjatüin saaʼu mojuin naainjala naya wayuukana, noʼunakalaka Iconiomüin.
52 Talatüsü maʼin naaʼin na nikirajüinkana Jesús otta eejatü naaʼu tü nüpülainkat Maleiwa.
Noota
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
