Génesis 6:1-22
6 Nakojuyalaaka na wayuukana süpaʼapünaa tü mmakat jee kachonkalaka naya jieyuu.
2 Nayasaʼa na nüchonniikana chi shiimainshikai suluʼu Maleiwain, neʼrakalaka anapüijain maʼin na jieyuu nachooinkana na wayuukana, naʼwayuuseyaa namüsüjeseʼe tü süchekakat naaʼin.
3 Anuukalaka nünüiki Jehová: «Tayüülajeena na wayuukana süka shiain sücheküin naaʼin aaʼinraa kasa mojusü. Kateena neʼe oʼu naya soʼu 120 juya».
4 Eejana na kanüliakana nefilim saaʼu tü mmakat wanaa sümaa nüküjain Maleiwa tia. Nayasaʼa na nüchonniikana chi shiimainshikai suluʼu Maleiwain, nainkaakalaka namaa na jieyuukana, kachonkalaka naya namüin. Katchinjüshii maʼin na nachonniikana sümaa neʼnnaajünüin.
5 Niʼrakalaka Jehová sükooʼomüinraain maʼin tü kasa mojusü naaʼinrakat na wayuukana sümaa shiain neʼe jülüjain naaʼin waneepia aaʼinraa kasa mojusü.
6 Aikalaka nümüin Jehová nukumajüin wayuu yaa saaʼu tü mmakat, mojukalaka maʼin naaʼin.
7 Anuukalaka nünüiki Jehová: «Tajaʼttireena na wayuu takumajakana, tü mürütkalüirua jee tü wüchii lemütüsükat sümaʼaleeya tü waawatakalü iipünaapünaa. Anashiije nnojoliitüjüliire takumajüin naya».
8 Talatapejeʼe Jehová nümaa Noé.
9 Anuu tü nüchikimaajatkat Noé.
Wayuu loto akuwaʼipachi nia, wayuu wule akuwaʼipachi nia naʼakajee na wayuu eejanakana nükalioʼu. Nümaashi nia chi shiimainshikai suluʼu Maleiwain.
10 Kachonkalaka joo mapa Noé sümüin tü nuʼwayuusekat, apünüinshii na nüchonniikana. Sem, Cam otta Jafet nanülia.
11 Niʼrakalaka chi shiimainshikai suluʼu Maleiwain, mojuin maʼin tü mmapaʼakat otta wainmain wayuu mojulaasü süpaʼapünaa.
12 Niʼrüinña Maleiwa mojuin maʼin tü mmapaʼakat jee mojulaain maʼin wayuu süpüshuaʼa.
13 Anuujeseʼe nünüiki Maleiwa nümüin Noé: «Tajaʼttirajana na wayuukana, jama jouluin mojulawaa natuma. Tajaʼttireena naya napüshuaʼa, wulereejeeria tü mmakat tatuma.
14 Pukumaja wanee anuwa eekai miyoʼuin maʼin süka wunuʼu eekai anain maʼin. Kataüjieerü shia putuma, pushulejeerü mena suluʼupünaa otta müsia süsapuutajee.
15 Müinjatü sukumajia putuma: 134 metro* sajaʼapüin, piama shikii piamamüin metro* seeruluin otta müsia poloo apünüinmüin metro* shia iipünaamüin.
16 Apünüinjatü piso shia putuma. Wanee mmoluʼu, wanee pasanain otta wanee iipünaa. Shiatapünaa metro* sünainjee tü saajunakat piʼitaajeerü shiwentaanase süpüla warattüin suluʼupünaa. Piʼitaajeerü soʼu tü anuwakat shiatapaʼajee.
17 »Eekajasaʼa tayakai, taʼitireerü wanee juya miyoʼu maʼin shipirajaajeetka atuma tü mmapaʼakat, wüinsireetka atuma eekai katüin soʼu.* Outeerü süpüshuaʼa tü kasa eekat mmapaʼa.
18 Anii joo taya apansaajüin tanüiki pümüin, ekerotajachi pia suluʼu tü anuwakat sümaa puʼwayuuse, namaa püchonnii otta naʼwayuuse na püchonniikana.
19 Pikerotireerü suluʼu tü anuwakat kasa eekai katüin oʼu suluʼu piamawalin. Wanee toolo, wanee jiet, kateetkalaka soʼu.
20 Piamawalinjatü tü wüchiikalüirua putuma suluʼu naatawalin sukuwaʼipa, piamawalinjatü tü mürütkalüirua suluʼu naatawalin sukuwaʼipa otta piamawalinjatü tü wüchii lemütüsükat. Oʼuneerü shia pünainmüin, pikerotireetka shia suluʼu tü anuwakat süpüla katüin soʼu.
21 Pukotchojo eküülü maʼleekalia pipijaayainjatka jee shipijaayainjatka tü mürüt pümaainjatkat».
22 Oonooshijaʼa Noé sümaa süpüshuaʼa tü nuluwataakalü anain Maleiwa, naaʼinrüinña tü münakat nümüin.
Noota
^ «Eesü maʼaka 300 codo» maluʼulu tia. Pünaʼla tia suluʼu tü kanüliakat «Sooʼomüin pütchi B14».
^ «Eesü maʼaka 50 codo» maluʼulu tia.
^ «Eesü maʼaka 30 codo» maluʼulu tia.
^ «Eesü maʼaka wanee codo» maluʼulu tia.
^ Jee shiale «tü eekai katsüin saaʼin».
