Génesis 50:1-26
50 Nuʼwachiraaka José naaʼu chi nüshikai, niʼyalajakalaka sümaa nutuʼluin nuwalapaʼa.
2 Nuluwataakalaka José na tottoonnuu aʼyataakana nümüin süpüla keraajüinjachin müliashii natuma, müsiaʼaya nukuwaʼipa Israel natuma na tottootkana.
3 Pienchi shikii kaʼi nekeraajaka oʼu müliashii na tottootkana, shiaʼaya nükaliaka tia wanee wayuu nikeraajünaka oʼu nünaajaapa. Naʼyalajaka na egipciokana soʼu akaratshi shikii kaʼi nüchiirua Jacob.
4 Sajaʼlajaapa tü kaʼi niʼyalajünakalü oʼu Jacob, naashajaakalaka José namaa na aʼyataakana niʼipajee faraón jee nümakalaka namüin: «Kojutulejeʼeya taya jümüin, anasü jüküjale pütchikat tüü nümüin faraón:
5 ‹Nuchuntuinka tamüin chi tashikai taapüinjatüin tanüiki nümüin sünain maa: «Alüʼütshisaʼa joo taya süpüla outaa, anashi piʼiküle taya suluʼu tü koʼushii takumajitkalinka tapüla suluʼu tü mmakat Canaán». Makalaka tachuntuin pümüin püjütüin taya süpüla teʼiküin chi tashikai, taleʼejeechikalaka tachikuaʼa›».
6 Anuujeseʼe nünüiki faraón nümüin José: «Anakajaʼaya puʼunule sünain eʼikaa chi püshikai maʼaka nuchuntuin shia pümüin paala».
7 Nuʼunakalaka José sünain eʼikaa chi nüshikai, oʼunushii nümaa napüshuaʼaya na nüchepchiakana faraón, na laülaashii aʼyataakana niʼipajee faraón namaʼaleeya napüshuaʼaya na laülaashii chajanakana Egipto.
8 Oʼunushii napüshuaʼa na nipialujunakana José, na nuwalayuukana namaʼaleeya na nipialujunakana chi nüshikai. Nayaʼala neʼe makataka chaa Gosén na tepichikana sümaʼaleeya tü anneetkalüirua, tü kaaʼulakalüirua jee müsia tü paaʼakalüirua.
9 Oʼunushiʼiya nümaa José wayuu sulujuna neʼejena namaʼaleeya wayuu amaajuna. Watta maʼin naalii na wayuu oʼunakana nümaa.
10 Nantapünaaka nümaa müliashii suluʼu tü mmakalü Atad, eere suwaajünüin trigo, süʼütpaʼa tü mma chakat Jordán. Chajana naya aʼyalajüin naaʼu müliashii sümaa mojuin maʼin naaʼin, chajachikalaka niʼyalajüin José naaʼu chi nüshikai soʼu akaratshi kaʼi.
11 «Aitaʼaleesüjaʼa nümüliala chira wayuukai namüin na egipciokana makaʼa naʼyalajüin maʼin nüchiirua», namakalaka na cananeo sulujunakana tü mmakalü Atad chaa eere suwaajünüin trigo. Abel-Mizraim sümünakalaka tia mma chakat Jordán.
12 Shiaʼaya maʼin naaʼinraka na nüchonniikana Jacob tü nuchuntakat namüin.
13 Neʼikakalaka nia na nüchonniikana suluʼumüin tü mmakat Canaán, neʼitaaka nia suluʼu tü koʼushii chakat suluʼu tü mmakat Macpelá, süʼütpaʼa Mamré. Niyaʼlajala paala tia mmakalü Abrahán nuulia Efrón chi hititakai, süpülajatü naamaka tia.
14 Nüleʼejakalaka José nüchikuaʼaya Egiptomüin namaa na nuwalayuukana süchikijee neʼiküin chi nashikai. Aleʼejüshiʼiya napüshuaʼaya na oʼunakana nümaa paala sünain eʼikaa chi nüshikai.
15 Anuukalaka nanüiki na nuwalayuukana José süchikijee outuin chi nashikai: «Nüʼürülataa neʼe waya José jee süsalataa waya nutuma tü kasa mojusü waaʼinrakalinkat nümüin».
16 Naluwataakalaka nanüiki nümüin José sünain maa: «Anuusa nünüiki chi washikai wamüin süpülapünaa nünaajaain:
17 ‹Jüküjaiwa maa nümüin José pütchikat tüü: «Pülatira sooʼopünaa paaʼin tü naaʼinrakat na puwalayuukana jee müsia tü namaʼülakat pümüin»›. Motoʼoya paaʼin tü waainjalakat, nüchepchia waya Nümaleiwase chi püshikai». Niʼyalajakalaka José naapaiwaʼaya nanüiki.
18 Noʼunakalaka na nuwalayuukana José nümaʼanamüin, nasapainkaka naya nümülatuʼu sümaa namüin nümüin: «Anaa waya, anashii püchepchiale waya».
19 Anuujeseʼe nünüiki José namüin: «Nnojo mmoluin jia. ¿Tayajasaʼa joo Maleiwa süpüla kasalajanainjatüin tü jaainjalakat tatuma?
20 Eesü kasa anasü nutuma Maleiwa mayaainjeʼe jümaʼülapaleein taya, nuʼtteʼerüin watta saalii wayuu süchikumüin outaa, shiaʼaya naaʼinraka tia maaʼutpünaa yaa.
21 Ayateeria talatirüin jümüin tü jiyaalujutkat jee tü nayaalujutuinjatkat na jüchonniikana». Nümüliatka naaʼin jee anakalaka naaʼin nutuma sünainjee tü nümakat namüin.
22 Ayatakalaka kepiain José chaa Egipto sümaa nüpüshi chi nüshikai. 110 nuuyase wanaa sümaa nünaajaain.
23 Niʼrakalaka José nüikeyuu Efraín namaʼaleeya na nüchonniikana Makir, chi nüchonkai Manasés. Müshii naya nümüin José maʼaka naaʼin nüchonnii.*
24 Anuukalaka nünüiki José namüin na nuwalayuukana: «Outataainjaʼa joo taya, nükaalinjeenapejeʼe jia Maleiwa, niyuʼleenaʼaya jia suluʼujee mmakat tüü, nümaajeena jia suluʼu tü mma nüküjatüjütkalia achiki nümüin Abrahán, nümüin Isaac jee nümüin Jacob».
25 Nuchuntakalaka José namüin na nüchonniikana Israel naapüinjatüin nanüiki nümüin sünain maa: «Nükaalinjeenaʼaya jia Maleiwa, jiyuʼlai maa teipüse yaajee».
26 Ciento diez nuuyase José wanaa sümaa nünaajaain. Keraajaka nia atumawaa, niʼitaanaka suluʼu nüta chaa Egipto.
Noota
^ «Joʼuushii naya saaʼu nüsapain José» maluʼulu tia suluʼu hebreo.
