Génesis 42:1-38
42 «¿Jamüshii jiirakaajiraakalaka sümaa nnojoluin kasain jaaʼinrüin?», nümakalaka Jacob namüin na nüchonniikana naapapa süchiki eein eküülü* chaa Egipto.
2 Ayatakalaka naashajaain sünain maa: «Taapa achikit eein eküülü chaa Egipto, anakajaʼa juʼunule chamüin jiyaʼlajeenakalaka eküülü süpüla woʼttaainjanain, nnojoleenaka waya outuin sutuma tü jamükat».
3 Noʼunakalaka Egiptomüin polooshii nuwalayuu José süpüla nayaʼlajüin eküülü.
4 Niapejeʼe naʼalijirüin Jacob Benjamín, chi nimüliakai José, nnojoishi nüjütüin namaa na nuwalayuukana süka müin nünüiki: «Eeshijaʼa jamajüle nia, jama outaleere joo nia».
5 Noʼunakalaka na nüchonniikana Israel Egiptomüin namaa waneinnua wayuu ayaʼlajüinjanakana eküülü, oʼunushii naya süka sooʼotuin tü jamükat suluʼu tü mmakat Canaán.
6 Nia José laülaaka saaʼu süpüshuaʼa kasa chaa suluʼu tü mmakalü Egipto, nia oikaka tü eküütkat sümüin wayuu sainküinjeejatka tü mmakat, müshiijeseʼe nantüin nümaʼanamüin sümaa nejepülaain nümülatuʼu.
7 Niyaawatakalaka José na nuwalayuukana niʼraiwaʼaya naya, nnojoipejeʼe nüküjain namüin jaralin nia. Nüsakitkalaka naya sümaa müin üttayaakai naaʼin: «¿Jalejeʼewalii jia?». «Chejeejana waya suluʼujee tü mmakat Canaán, antüshii waya sünain ayaʼlajaa eküülü», namakalaka nümüin.
8 Niyaawatüin José na nuwalayuukana nnojoipejeʼe nia nayaawatüin.
9 Sotokoloko naaʼin José tü nüʼlapüjaakalü amaa nachiki na nuwalayuukana, anuuka nünüiki namüin: «¡Antüshii neʼe jia sünain anajaa saaʼu tü mmakat! Antüshii jia süpüla jütüjaain saaʼu jalain anain süpüla ashutaa saaʼu Egipto».
10 Nasoutakalaka nümüin sünain maa: «Laülaashikalee, nnojoishii waya antüin sünain anajaa saaʼu tü mmakat, püchepchia waya, antüshii waya sünain ayaʼlajaa eküülü.
11 Pashijiraashii waya wapüshuaʼa, nnojoishii waya kaʼruwaraliin, waya püchepchiakana nnojoishii waya antüin sünain anajaa saaʼu tü mmakat».
12 «¡Jaʼalain neʼe! Shia jüntaka eeʼiree jütüjaainjatüin saaʼu jalain anain süpüla jushutuinjatüin saaʼu Egipto», nümakalaka namüin.
13 Anuukalaka nanüiki nümüin: «Wayakana püchepchiakana poloo piamamüin waya sümaa pawalaawain waya, pashijiraashii waya wapüshuaʼa chaa suluʼu tü mmakat Canaán. Ichaa makatüin chi emülieekai nümaa chi washikai jee müshia chi wane anaajaashi».
14 Anuupejeʼe nünüiki José namüin: «‹¡Antüinna jia sünain anajaa saaʼu tü mmakat!› mataashi tamakai jümüin.
15 Tooʼulaküin paala jaaʼin. Maʼaka shiimain katüin noʼu chi faraónkai, shiimain maʼin nnojoleenain jujuʼitüin yaajee yaa aluʼusaʼa niale jüntirüin chi jimüliakai.
16 Anakajaʼa nuʼunule wanee jaʼakajee süpüla nüsaajüinjachin chi jimüliakai, watüjaajeetka saaʼu jüküjain tü shiimainkat. Nnojorüle jaaʼinrüin tia, shiimainjaʼamata jüntüin sünain anajaa saaʼu tü mmakat maʼaka shiimain katüin noʼu faraón».
17 Mayaasü nüküjain tia nüpüreesajitka naya napüshuaʼa soʼu apünüin kaʼi.
18 Anuukalaka nünüiki José namüin apünüin kaʼi süchikijee tia: «Kojutushisaʼa tamüin chi Maleiwakai, anakajaʼa jaaʼinrüle tü tamakat jümüin kateetkalaka joʼu.
19 Nnojoliirejeʼeya kaʼruwaraliin jia, anakajaʼa makatüle waneeshia jaʼakajee yaa suluʼu tü kaatset süttakalü aluʼu jia, juʼuneenakalaka sümaa jülüʼüjain eküülü shiküinjatka jüpüshi suulia outajüin shia sutuma jamü.
20 Jüntirüinjachi tamüin chi jimüliakai süpüla tatüjaain saaʼu shiimain maʼin tü jümakat, nnojoleenaka jia outuin». Anashiikalaka namüin na nuwalayuukana José tü nümakat namüin.
21 «Shiimainña maʼin wawalaajüin tü waainjalakat nümüin chi wawalakai. Weʼrüin müliain maʼin nia soʼu nuchuntuin wamüin wamülialaainjanain naalin, nnojoliipejeʼe waya jaa müin. Shiajaʼa makaʼa jooluʼu weʼrüin wamüliala», namajiraakalaka na nuwalayuukana José.
22 «‹Nnojo jamajüin chi jintüikai jutuma› mataashi tamakai jümüin nnojoliipejeʼe jia jaa müin. Achekajünüsü wamüin jooluʼu tü nüsha amülakat», nümakalaka Rubén namüin.
23 Nnojotpejeʼe natüjaain saaʼu niyaawatüin saaʼu José tü nanüikikat süka kachepüʼüjanain nia.
24 Nükatalaaka José mamüin aka tüsa jee niʼyalajakalaka. Nüleʼejapa nüchikuaʼa süpüla naashajaain namaa, nütaʼülaka Simeón jee kapükalaka nia nutuma noʼupala.
25 Süchikijee tia, nipirajitkalaka José natoleekase sümaa eküülü jee nüleʼejirüin nanneetse na wayuukana waneʼewai nakua suluʼu tü natoleekasekat. Nuluwataakalaka süpüla kemiainjanain naya atumawaa süpüla tü oʼunajawaakat. Ayatüsia aaʼinnüin tia nümakat.
26 Noʼotokoloko tü nachisekat saaʼu tü napüliisekat jee noʼunakalaka.
27 Nantapa eemüinjanale natunkaapünaain, nujutatka waneeshia naʼakajee tü nutoleekasekat süpüla naapüinjatüin shiküin tü nüpüliisekat, niʼrakalaka tü nünneetsekat nujutalaiwaʼaya tü nutoleekasekat.
28 Nüküjamaatakalaka tia namüin na nuwalayuukana, anuu nünüiki: «Aleʼejinnüsü tanneetse süchikuaʼa, anuu shia suluʼu tü tatoleekasekat». Nainkuukalaka aaʼin naapaiwaʼaya nünüiki jee kutkuttakalaka naya. «¿Jamüsüche makaʼa tü naainjakat Maleiwa wamüin?», namajiraakalaka.
29 Nantapa suluʼumüin tü mmakat Canaán chaa nümaʼanamüin Jacob chi nashikai, naküjaka nümüin süpüshuaʼa tü alatakat namüin sümaa müin nanüiki nümüin:
30 «Müsü üttayaakai naaʼin chi laülaashikai saaʼu tü mmakalü Egipto wanaa sümaa naashajaain wamüin, niʼitaain waaʼu woʼunuin sünain anajaa saaʼu tü mmakalü Egipto.
31 Anuupejeʼe wanüiki nümüin: ‹Nnojoishii waya kaʼruwaraliin jee nnojoishii waya antüin sünain anajaa saaʼu tü mmakat.
32 Polooshii piamamüin waya sümaa pawalaawain waya, pashijiraashii waya. Anaajaashi wanee waʼakajee jee müshia chi emülieekai ichaa nümaa chi washikai suluʼu tü mmakat Canaán›.
33 Anuupejeʼe nünüiki wamüin chi laülaashikai saaʼu Egipto: ‹Tatüjaajeena aaʼu nnojoliin wayuuin kaʼruwaralii jia joonoole sümaa tü taluwataainjanakalü anain jia. Anakajaʼa jüpütüleʼeya tamaʼana waneeshia jaʼakajee jülüʼüjeenakalaka eküülü shiküinjatka jüpüshi suulia outajüin sutuma jamü, juʼuneenakalaka sümaa.
34 Jüntireechikalaka tamüin chi jimüliakai süpüla tatüjaain saaʼu nnojoliin kaʼruwaraliin jia jee nnojoliin jüntüin jia sünain anajaa saaʼu tü mmakalü Egipto. Teiteʼereechika jümüin chi juwala jüpütakai yaʼaya, jiyaʼlajeenakalaka wanee kasa eekai jiyaʼlajeein amüin yaa Egipto›».
35 Wanaa sümaa nayuʼluin tü nachisekat suluʼujee natoleekaseka, nantakalaka sünain waneʼewai nakua tü woʼot sümaajatkat nanneetse. Nainkuukalaka aaʼin wanaa nümaa chi nashikai neʼrapa tü woʼot sümaajatkat nneerü.
36 Niasaʼa Jacob chi nashikai, emetutkalaka nünüiki sünain maa: «¡Ajaʼlajaashii tachonnii jutuma! Anaajaaichipa José, nnojolitchipa joo Simeón, aniika joo jümaweein Benjamín. Taya eʼraka maʼin tamüliala sünainjee süpüshuaʼa tü kasa alatakat».
37 Anuupejeʼe nünüiki Rubén nümüin chi nüshikai: «Puʼuteena aaʼin na piamashiikana tachonnii nnojoirejeʼe taleʼejirüin Benjamín pümüin. Püjüta nia tamaa taaʼinmajeechika nia jee taleʼejireechika nia nüchikuaʼa pümüin».
38 Nusoutakalaka Jacob nümüin: «Nnojoishisaʼa oʼunajachin chi tachonkai jümaa, ichaaichipaʼasa anaajaain chi nipayakai niaʼala neʼe apütaaka chi emülieekai. Outeechi taya sutuma mojuin taaʼin nüchiirua jamataarüle nukuwaʼipa wopuluʼu jee outule nia».
Noota
^ Jee shiale «trigo jee shiale cebada».
