Génesis 19:1-38
-
Antüshii piamashii aapiee nümaʼanamüin Lot (1-11)
-
Aküjünüsü nümüin Lot sümaa nüpüshi naʼluwataainjanain (12-22)
-
Ajaʼttinnüsü Sodoma sümaa Gomorra (23-29)
-
Ichiijaasü tü nuʼwayuusekat Lot sümaa süchechejaain (26)
-
-
Lot namaa na nüchonniikana (30-38)
-
Natuushinuu na moabiitakana jee na ammoniitakana (37, 38)
-
19 Antüshii na piamashiikana aapiee Sodomamüin motsopa kaʼikat, joyotushi Lot soʼuluʼu tü pueulokot. Nüpanapajaka naya Lot niʼrapa naya jee nüsapainkaka nia mmoluʼu.
2 Anuukalaka nünüiki namüin: «Taʼlaülayuu, anashii jutunkaapünaale tepialuʼu soʼu aikat tüü jee toʼlojireerü juuʼui. Jütamaajeenaka wattaʼa maalü, juʼuneenakalaka eeinjanale jia». «Nnojo, yaajeena waya atunkuin pülaasapaʼa», namakalaka nümüin.
3 Noʼunakalaka nümaa nipialuʼumüin süka nuunejaain maʼin naya. Nüʼlakajaaka neküin sümaa naainjain pan maʼakasat soolojia, nekaka shia.
4 Süpülapünaa neisaajaain, antüshii wayuu miyoʼuyuu sümaʼaleeya tepichi chejeʼewalii Sodoma sünain outkaajawaa tü miichikat.
5 Neenajünaka Lot natuma sümaa namüin nümüin: «¿Jalashii na wayuu antapaakana pipialuʼu soʼu aikat tüü? Piyuʼla naya wamüin süpüla wainkaain namaa».
6 Nujuʼitaakalaka Lot nipialuʼujee sümaa nüsürülüin soʼu tü miichikat.
7 Anuukalaka nünüiki namüin: «Tawalayuu, nnojo jaaʼinrüin wanee kasa eekai mojuin maʼin.
8 Anuu piamasü tachonnii nnojoyüliika sünainpünaain tooloyuu, tayuʼleena jümüin süpüla jaaʼinrüin tü jaaʼinreekat naka. Nnojoliipejeʼe jamajüinjanain jutuma na wayuu antakana tepialuʼumüin, jama tounejaain naya süpüla natunkaapünaain tamaʼana».
9 «¡Püsünnaa wapüleerua!», namakalaka nümüin. Anuukaʼa sooʼomüin nanüiki nümüin: «¿Jamüshii piyoujakaʼa waya? Wayuu mapüshisai pia, nnojoishi yaajeʼewalin pia. Mojuleejeeria joo tü waaʼinrakat pümüin suulialeʼeya tü waaʼinrajatkat namüin nala wayuukana». Nawataka nooʼomüin Lot jee nojuttireein tü puettoʼukot.
10 Najaraitünaka Lot paülüʼümüin natuma na wayuu yalajanakana paülüʼü jee nasürütka tü puettoʼukot.
11 Moʼupaʼajaaka natuma na niʼiyoukana Lot, tepichi sümaa wayuu miyoʼuyuu yalajanakana soʼuluʼu tü miichikat, nakulajaalaaka aaʼin mapa suulia achajawaa soʼu tü miichikat.
12 Anuuka joo nanüiki na wayuu yalajanakana paülüʼü nümüin Lot: «¿Eeshii wayuu kasayuuka pünain pueulopaʼa? Peenaja na püshimiayuukana, na püchonnii tooloyuukana jee müshiʼiya na jieyuukana namaʼaleeya na kasayuukana pünain, piyuʼla naya yaajee.
13 Wajaʼttirüinjatü pueulokot tüü süka naapüin süchiki Jehová sutuma wayuu mojuin maʼin tü kasa saaʼinrakat wayuu yaʼayaa, müshiijeseʼe nüjütüin waya Jehová süpüla wajaʼttirüinjatüin tü pueulokot».
14 Nuʼunakalaka Lot eemüin na nüshimiayuu kasaalüinjanakana sümaa nüchonnii. Wainmatua nünüiki sünain maa: «¡Jooʼuya! Anashii jujuʼitüle yaajee, najaʼttirüinjatü Jehová tü pueulokot». Mapajeʼe nimeeʼerajaakai aaʼin Lot naaʼinruʼu na nüshimiakana.
15 Shiasaʼa jaʼyuupa, nüshapajeʼennaka Lot natuma na aapieekana sümaa namüin nümüin: «Puwataa, pümaa puʼwayuuse jee tü piamasükat püchonnii suulia outajüin pia saaʼujee saainjala tü wayuu yaakat suluʼu tü pueulokot».
16 Ayatapejeʼe kamaʼakuʼu müin Lot, sümülialaaka naaʼin Jehová naalin. Najattaka nia na aapieekana sümaʼaleeya tü nuʼwayuusekat jee tü piamasükat nüchonnii, nayuʼlaka naya suluʼujee tü pueulokot.
17 Anuukalaka nünüiki wanee aapiee chapa naya anooipaʼa sünain tü pueulokot: «Puwataa kataiwa poʼu, nnojo piirakaain püchiirua, nnojo pushaʼwalaakuʼu pümüin suluʼupünaa tü mma süpaʼakat tü nasapüshiikat. Puʼluwataa saaʼumüin tü uuchikat suulia outajüin pia».
18 Anuukalaka nünüiki Lot namüin: «Jehovákalee, nnojo püjütüin taya chamüin.
19 Tatüjaa aaʼu talatüin paaʼin tamaa jee kamaneein pia tamüin, müshijeseʼe katüin toʼu putuma, isasü tachiki toʼunuin uuchoʼumüin. Mmotshireʼe taya seema jamajüin taya jee outajüin taya.
20 Nnaasaʼa wanee pueulo pejesü yaajee, ¿jamüsüjaʼa pünüiki toʼunule chamüinña? Püjütaʼaya taya chamüin, joʼuuchon tia pueulokot, kateechikalaka toʼu».
21 Nusoutakalaka chi aapieekai nümüin: «Anakajaʼaya puʼunule suluʼumüin tü pueulo puʼuneekalü aluʼu, nnojoleerü tajaʼttirüin shia.
22 ¡Pümayawaata! Puʼunaata, nnojoleerü tajaʼttirüin Sodoma püntaleepaʼaya chamüin». Müsüjeseʼe Zóar sümünüin tia pueulokot.
23 Nüntaka Lot Zóarmüin niweetapa chi kaʼikai.
24 Sujutuukalaka chejee iipünaajee nutuma Jehová sikoʼu sümaʼaleeya «azufre»* saaʼu Sodoma otta Gomorra. Nia kajünalaka Jehová tia chejee iipünaajee.
25 Müsü sukuwaʼipa nutuma Maleiwa süpüla najaʼttirüin tü piamasükat pueulo, najaʼttiraleeinña süpüshuaʼa tü pueulo chajatkat süpaʼa tü nasapüshiikat sümaʼaleeya tü wayuu eejatkat suluʼu jee müsia wunuʼulia eejatkat chayaa.
26 Nüchiiruajeejatü Lot tü nuʼwayuusekat, shiirakaaka süchiirua, ichiijaakalaka shia sümaa süchechejaain.
27 Nütamaakalaka Abrahán wattachon maalü jee nuʼunakalaka eejachire naashajaain paala nümaa Jehová.
28 Niirakaakalaka sümüin tü mmakat Sodoma otta Gomorra otta sümüin tü pueulo chajatkat süpaʼa tü nasapüshiikat, niʼrakalaka kaittüin sümüsain wanee kasa maʼaka sümüsain wanee «horno».
29 Sotusü naaʼin Maleiwa tü nümakat nümüin Abrahán soʼu najaʼttirüin tü pueulokalüirua, ayuʼnnushijeseʼe Lot nutuma Maleiwa suluʼujee tü mma eejachire kepiain nia.
30 Mmotkalaka mapa Lot seema kepiaa Zóar, akolojooshijeseʼe nia uuchoʼumüin sümaa tü piamasükat nüchonnii, kepiaka nia namaa suluʼu wanee koʼushii.
31 Anuukalaka sünüiki tü nüchon epayaakat sümüin tü emiiruaakat: «Laülaaichi chi washikai, nnojoishi eein wanee wayuu suluʼu mmakat tüü wainkaainjachikai amaa, maʼaka sukuwaʼipa sutuma wayuu maʼleekalia.
32 Anashi wasajirüle wiino chi washikai wainkaajeenakalaka nümaa, kaikeyuujeechikalaka nia».
33 Nasajirakalaka wiino chi nashikai soʼu aikat tia, nipeʼtkalaka. Süinkaaka tü epayaakat nümaa chi süshikai, nnojotpejeʼe nütüjaain saaʼu Lot jalapüshin shiisalaain naʼatoʼu jee jalapüshin sütamaain.
34 Anuukalaka sünüiki tü epayaakat sümüin tü emiiruaakat waneemüin kaʼi: «Ainkaasüsaʼa taya saʼwaipa nümaa chi tashikai. Anakajaʼa wasajirüle nia wiino aipaʼaweena, pieetkalaka ainkaain nümaa, kaikeyuujeechikalaka nia».
35 Nasajitkalaka wiino nüchikuaʼa chi nashikai nipeʼrakalaka natuma, süinkaakalaka tü emiiruaakat nümaa chi süshikai, nnojotpejeʼe nütüjaain saaʼu Lot jalapüshin shiisalaain naʼatoʼu jee jalapüshin sütamaain.
36 Ipuonnuuka nutuma Lot na piamashiikana nüchonnii.
37 Tooloko süchon tü epayaakat, Moab nünülia sutuma. Nia natuushika na wayuu chejeʼewaliikana Moab.
38 Kachonsiaʼaya wanee toolo tü emiiruaakat, Ben-Ammí nünülia sutuma. Nia natuushika na wayuu chejeʼewaliikana Ammón.
Noota
^ Tü «azufre» münakat shia wanee ipa miyoʼu chuwatüsü.
