Génesis 12:1-20
12 Anuukalaka nünüiki Jehová nümüin Abrán: «Puʼuna suluʼujee puumain, puʼuna namaʼanajee na kasayuukana pünain jee na nüpüshikana chi püshikai otta puʼuna suluʼumüin tü mma teeʼiyatüinjatkat pümüin.
2 Watteena naalii na püikeyuukana tatuma otta kojuteena naya atumawaa, aneerü pukuwaʼipa tatuma jee kaawainjeechi pia tatuma, aneerü sukuwaʼipa wayuu pünainjee.
3 Aneerü nukuwaʼipa chi wayuu achekakai anaa püpüleerua otta toʼulejeechi chi eekai oʼulejüin pia, shiimain maʼin aneerüin sukuwaʼipa wayuu maʼleekalia pünainjee».
4 Oonooshi Abrán sümaa tü nümakat Jehová jee oʼunushi nia nuumainpaʼajee, oʼunushi Lot nümaa. Akaratshi shikii jaʼralimüin nuuyase Abrán nujuʼitapa suluʼujee tü mmakat Harán.
5 Nuʼunakalaka suluʼumüin tü mmakat Canaán, nümaasü Sarái tü nuʼwayuusekat jee müshia Lot, chi nüsiipükai. Nalüʼüjain süpüshuaʼa tü kasa eejatkat namaʼana, namaʼaleeya na nachepchia eejanakana namaa chaa Harán. Nantapa suluʼumüin tü mmakat Canaán,
6 alatüshi Abrán pasanainpünaa sünain, nüntaka suluʼumüin tü mmakat Siquem, peje sünain tü wunuʼu miyoʼuyuu chakat Moré. Kepiashii na cananeokana soʼu tia suluʼu tia mmakat.
7 Niiʼiyalaaka Jehová nümüin Abrán sümaa nümüin nümüin: «Taapeerü mmakat tüü namüin na püikeyuukana». Nüpaʼawajaaka Abrán ipa* nümüin Jehová, jama niiʼiyalaain nümüin.
8 Nukolojooka mapa uuchoʼumüin, wüinpümüin saaʼujee Betel, nukumajaka nipia pasanain sünain Betel otta Hai. Wopumüinsü Betel saaʼujee nipia, shiakalaka wüinpümüin Hai saaʼujee. Nüpaʼawajaaka yala ipa nümüin Jehová jee nuchuntaka nünülia Jehová soʼu tia.
9 Nütsajüin mapa Abrán tü nipiayaasükat sümaa noʼonoʼowalin suluʼumüin wanee mma, chakuwaishi nia suluʼumüin tü mmakat Négueb.
10 Eejaʼalaa sümaka wanee jamü chaa Canaán. Noʼonookalaka Abrán Egiptomüin sutuma alin maʼin tü jamükat.
11 Anuukalaka joo nünüiki Abrán sümüin Sarái, tü nuʼwayuusekat nalüʼülapa Egiptomüin: «Anuu joo tanüiki pümüin, tatüjaa aaʼu wayuuin anasü aaʼinrü pia.
12 ‹Shiainjaʼa nuʼwayuusein tüü›, meena na egipciokana neʼrapa pia. Noʼuteechi aaʼin taya, pieetkalaka katüin oʼu natuma.
13 Püküjai maa namüin puwalain taya süpüla kapülain naaʼin taya pünainjee otta suulia toʼutunuin aaʼin».
14 Nüntapa Abrán Egiptomüin, neʼraka na egipciokana wayuuin anasü maʼin aaʼinrü Sarái.
15 Neʼraka shia na niʼipajanakana faraón, naküjaka nuʼupala faraón wayuuin anasü aaʼinrü maʼin shia. Müsüjeseʼe nüsaajirüin shia faraón nipialuʼumüin.
16 Kapülainshi Abrán nutuma faraón saaʼujee Sarái. Saapünaka nümüin Abrán anneerü, paaʼa, püliikü, kameeya sümaʼaleeya wayuu nüchepchiainjatü.
17 Sülataka kasa mojusü maʼin nümüin faraón nutuma Jehová jee namüin na wayuu nipialujunakana saaʼujee Sarái, tü nuʼwayuusekalü Abrán.
18 Nuunejiraka faraón Abrán jee anuukalaka nünüiki nümüin: «¿Jamüsü makaʼa paainjala tamüin? ¿Jamüsü puunjulajakaʼa süchiki puʼwayuusein shia?
19 ¿Jamüsü püküjakaʼa tamüin puwalain shia? Taʼwayuusetaairüjeʼe shia. Anuu puʼwayuuse süchikuaʼa. ¡Puʼuna sümaa yaajee!».
20 Nuluwataaka faraón na wayuu aʼyataakana nümüin süpüla neʼikajaainjachin Abrán jee müsia nuʼwayuuse sümaʼaleeya tü kasa eejatkat nümaʼana nujuʼitaleepaʼaya Egiptojee.
Noota
^ Jee shiale «kamünajaaka mma nutuma».
