Chiiruaajatka karaloʼuta nüshajalaka Pedro 1:1-21
1 Karaloʼutakat tüü, tashajala tayakai Simón Pedro, nüchepchia taya Jesucristo jee aluwataaushi taya nutuma. Jümüinjatü karaloʼutakat tüü jia ekirajünakana sünain tü pütchi kojutukat maʼin jee shiimainkat, tü ekirajünakalü anain waya sükajee lotuin nukuwaʼipa chi Maleiwakai jee sükajee lotuin nukuwaʼipa Jesucristo, chi Oʼtteʼerakai waya.
2 Kasataalejeseʼe kamaneʼereeinña maʼin jümüin chi Maleiwakai jee jimatüin jaaʼin nutuma sükajee jiyaawatüin saaʼu tü pütchi shiimainkat nüchiki jee nüchiki chi Waseñotsekai Jesús.
3 Saaʼujee pülashin maʼin chi Maleiwakai naapüin wamüin tü kasa choʼujaakat süpüla waʼwaajüinjachin neʼe nia nümüiwaʼa. Naapüin tia wamüin süka weʼraajüin maʼin nia jee nüneeküin waya süka niain wanee Maleiwa anakai maʼin jee kamaneeshi maʼin nia.
4 Sükajee tia nikirajüin waya Maleiwa sünain tü nünüiki kojutukat maʼin sümaa anain maʼin shia. Müinnapaka meʼrujukai waaʼin maʼaka meʼrujuin chi Maleiwakai, jama müin wayuʼlaainnapakai aaʼin suulia tü kasa mojusü suchuntaakat saaʼin wayuu.
5 Müsüjeseʼe jaaʼinmaainjatüin maʼin kanoulainjanain jia jee jaaʼinrajatüin kasa eekai anain. Jaaʼinmaa maʼin jiʼraajüinjachin chi Maleiwakai.
6 Jüchechera jaaʼin suulia jaaʼinrüin kasa eekai mojuin, jaaʼinmaa maʼin jüchecherüinjatüin jaaʼin jiʼrapa müliaa jee waneepia jia nümaa Maleiwa.
7 Jaaʼinmaa maʼin alinjanain jüpüla napüshuaʼa na juwalayuukana jee alinjatüin jüpüla wayuu süpüshuaʼa.
8 Jaaʼinrülejeʼeya tia sümaa jukooʼomüinrüin shia nnojoleena müin jia maʼaka naaʼin chi wayuu nnojoikai aaʼinrüin kasa eekai anain jee nnojoleena müin jia maʼaka saaʼin tü wunuʼu eekai machooin sünain nnojoluin joonooin sümaa tü pütchi jütüjaaitpakalü aaʼu nüchiki chi Waseñotsekai Jesucristo.
9 Chi wayuu nnojoikai aaʼinrüin tia, müshi aka naaʼin wanee wayuu eekai moʼupaʼain, jama müin nüsürütkai saaʼin noʼu suulia tü luusakat jee motusü naaʼin sülaʼajaanüitpain naainjala.
10 Tawalayuwaa, sutuma juunejaaushin jee jüneekuushin nutuma Maleiwa süpüla nüpüshinjanain jia, ayataʼaya müin jukuwaʼipa süpüla keraainjanain jia süpüla tia, nnojoleetkalaka amülain neʼe tü kasa jaaʼinrakat.
11 Jaaʼinrüle tia, jiʼreerü tü kasa eejeetkat nuluwataapeena chi Waseñotsekai Jesucristo, chi Oʼtteʼerakai waya.
12 Tasoʼiree aaʼinchii jia sünain tia mayaainjeʼe jütüjaain saaʼu jee mayaainjeʼe ichein junoula sünain tü pütchi shiimain ekirajünakalü anain jia, tü jütüjaaitpakalü aaʼu.
13 Anakalaka saaʼin tamüin tasoʼirüle jaaʼin sünain waneirua kasa wayuuiwaʼaya taya.*
14 Nnojoleechi eekuʼu müin taya maʼaka nüküjain shia tamüin chi Waseñotsekai Jesucristo.
15 Taaʼinmaajeerü maʼin maaʼulu yaa tekirajüin jia sünain pütchikat tüü, soteetkalaka shia jaaʼin outapeena taya.
16 Wekirajapa jia sünain pülashin maʼin chi Waseñotsekai Jesucristo jee sünain yaaichipain nia, nnojoishii jia wekirajüin sünain wanee kasa shikiiruʼujeejatka neʼe wayuu, weʼrüin nia suluʼu pülashin maʼin nia.
17 Kojutushi maʼin nia nutuma chi Maleiwakai, chi Washikai, niʼrüin tia wanaa sümaa süküjünüin nümüin wanee pütchi makat mayaa nutuma chi Maleiwa shikiishikai tü kojutaakat: «Anii chi Tachon aishikai tapüla, talatüshi taya nümaa».
18 Waapüinña tia pütchikat iipünaajee soʼu chajanain waya nümaa saaʼu tü uuchi nüneekajalakat Maleiwa.
19 Watüjaʼaleeitpa aaʼu shikeraajeerüin tü kasa alatajatkat naashin Maleiwa, anashii joonoole sümaa tia pütchi makalü aka saaʼin wanee ranpara chuwataka saʼaka piʼyuushi, tia shia tü jaaʼinkat. Alateeriaʼaya tia suwasajaapa tü aikat jee shiweetapa tü jolotsükat.
20 Jütüjaa aaʼu nnojoluin shikiiruʼujeejatüin wayuu tü kasa alatajatkat naashin Maleiwa, tü aküjünakalü achiki suluʼu tü Karaloʼuta Nüchikimaajatkat.
21 Nnojotsü süküjairüin wayuu sülatajatüin wanee kasa, oʼuninna akuwaʼipachii naya nutuma Maleiwa sükajee tü nüpülainkat, naküjainnakalaka süchiki tü nümakat chi Maleiwakai.
Noota
^ «Miichi», maluʼulu tia suluʼu griego.
