Chiiruaajatka karaloʼuta namüinjatka na chajanakana Corinto 13:1-14
13 Apünüintuaichi maʼin taya yapajüin süpüla toʼunajachin jümaʼanamüin. «Punoutajatü noʼupala piamashii jee apünüinshii wayuu tü mojujiraakalü aaʼujee pia nümaa puwala».
2 Mayaainjeʼe nnojolin chain taya jümaʼana, müshijaʼa piantuaichikai taaʼin chaa jümaʼanamüin. Taapirüin palajana na aaʼinrapuʼukana kasa mojusü jaʼakajee otta taapirüinña jiakana jüpüshuaʼa: taleʼejüle tachikuaʼa jümaʼanamüin nnojoleena jia isajüin suulia jaainjala.
3 Jütüjawee aaʼu shiimainrejeʼeya naashajaain Cristo takajee, (nnojotsü eein wanee kasa isakat nüchiki, jütüjaa aaʼu pülain maʼin nia).
4 Shiimainsaʼaya nükachennüin sünain wanee wunuʼu süpüla outajachin nia, jama nnojoluin kasakainjatüin tia nutuma. Nüsoʼireʼerapejeʼe Maleiwa naaʼin sükajee tü nüpülainkat, akaajaʼa neʼe wayakana isasü wachiki tü wakuwaʼipakat maʼaka isain shia nüchiki. Eejeenapejeʼe waya nümaa sükajee tü nüpülain Maleiwa eekat jaaʼu müinmaʼa yaa.
5 Ayataʼaya jüsakireʼerüin jaaʼin icherejeʼeya jia süchiirua tü junoujakalü anain, jiyaawatüinjatpejeʼe saaʼu analejeʼeya tia jaaʼinrakat. ¿Aashin jütüjaain saaʼu paaʼinwain jia nümaa Jesucristo? Aluʼujasaʼa mojule jukuwaʼipa noʼuluʼu Maleiwa.
6 Kasataalejeseʼe jiyaawatüin saaʼu nnojoluin mojuin wakuwaʼipa noʼuluʼu Maleiwa.
7 Wachuntuin maʼin nümüin Maleiwa süpüla nnojoliinjanain jaainjain wanee kasa eekai mojuin. Nnojotsü wachuntuin tia nümüin süpüla müinjachin talatakai naaʼin wamaa saashin wayuu, wachuntuin tia nümüin süpüla jaainjain tü kasa eekai anain, jaʼitashijaʼa müin nnojoikai talatüin naaʼin Maleiwa wamaa saashin wayuu.
8 Nnojotsü süpüla wataʼülüin sukuwaʼipa tü shiimain nümaʼanajeejatkat Maleiwa, shiainjaʼa waʼyataain maʼin achiirua shiʼraajüinjatüin maʼin wayuu tü shiimainkat naashin Maleiwa.
9 Talatüsü waaʼin sutuma isain wachiki wanee kasa jee sutuma katchin junoula. Tü wachuntakat nümüin chi Maleiwakai wanaa sümaa woʼuraajüin nümüin shia junoutuinjatüin jukuwaʼipa.
10 Tashajüin jümüin karaloʼutakat tüü süka nnojolin chain taya jümaa, nnojoleetkalaka müliain jaaʼin tatuma chapeena taya jümaʼana. Tü laülawaa niʼitaakat Maleiwa tajapuluʼu süpülajatü takatchinrüin junoula, nnojotsü süpülajatüin tamalajeʼerüin shia.
11 Tawalayuwaa, ayataʼaya talatüin jia, junouta jukuwaʼipa, nnojo jiyoutuin süchiki amüliannaa aaʼin, wanaawainjatü tü jülüjakat jaaʼin jee anajiraa jia. Jaainjale tia, eejeechi jümaa chi Maleiwa aikai apüla wayuu jee aapakai jimataa aaʼin.
12 Kamaneejiraa jia jüsakapa napüshuaʼa na juwalayuukana.
13 Asakünüshii jia natuma napüshuaʼa na anoujashiikana.
14 Kasataalejeseʼe kamaneein jümüin chi Señotkai Jesucristo, kasataalejeseʼe alin jia nüpüla chi Maleiwa aapakai nüpülain jümüin, tü anuu jooluʼu anain atuma jukuwaʼipa.
