Palajatka karaloʼuta namüinjatka na chajanakana Corinto 6:1-20
6 Mojujiraale jia nümaa wanee juwala, ¿jamüshii jeenajiraaka laülaapialuʼumüin namaʼanamüin na manoujainsaliikana? ¿Jamakaʼa nnojoliika nayain juʼunuin amaʼanamüin na wayuu aneekuushikana nutuma Maleiwa?
2 ¿Aashin jütüjaayaain saaʼu nayeenain kasalajanain atuma saainjala wayuu na aneekuushikana nutuma Maleiwa? Jialejeʼe kasalainjanain atuma saainjala wayuu, ¿jamakaʼa isaka jüchiki junoutuin sukuwaʼipa wanee kasa eekai mapüleein anoutaa?
3 ¿Nnojotsüjasaʼa jütüjaain saaʼu süsalainjanain watuma naainjala na aapieekana? Mülejeʼe sukuwaʼipa tia, ¿jamakaʼa kapüleʼewaika jümüin anoutaa wanee kasa eekai sülatüin eerejeʼe mapüleein tia makat?
4 Junouteerülejeʼe sukuwaʼipa wanee kasa eekai sülatüin, ¿jamakaʼa nayaka juʼunuin amaʼanamüin na manoujainsaliikana?
5 Taküjain jümüin tia süpüla japülinjanain jia. ¿Nnojoishikai eein wanee wayuu jaʼaka eekai kekiin süpüla nunoutajatüin tü mojujiraakalü aaʼujee na juwalayuukana?
6 Eekajasaʼa tü jaaʼinrakat shia neʼe jeenajirüin wanee juwala chaa laülaapialuʼumüin süpüla jüküjainjatüin süchiki tü naainjalakat noʼupala na manoujainsaliikana.
7 Nnojotsü kasain saamüin jümüin jeenajiraakuʼu jümüin laülaapialuʼumüin. Shia anaka aluʼu juuʼulaale saainjünüin jümüin wanee kasa eekai mojuin jee shimeʼraanüin aaʼu wanee kasa eekai jümaʼanain.
8 Jiapejeʼe aaʼinrüin kasa mojusü namüin na juwalayuukana otta jimeʼraa aaʼu wanee kasa eekai namaʼanain.
9 ¿Nnojotsüjasaʼa jütüjaain saaʼu nnojoleerüin neʼrüin tü kasa anasü eejeetkat nuluwataapeena Maleiwa na wayuu aaʼinrakana kasa mojusü? Nnojo jimeejiraain aaʼin. Na wayuu aʼluwajiraakana nakuwaʼipa,* na aʼwaajakana maleiwayaasü, na kawalaʼatakana atuma naʼwayuuse, na jaleetshiikana, na tooloyuu kakuwaʼipajiraakana namaa na tooloyuukana wanaa namaa,
10 na kaʼruwaraliikana, na wayuu achuntaakana aaʼin wanee kasa naata kakorotshi, na epeʼrüliikana, na wayuu airuʼutkana anüiki sümüin wayuu otta na emeejüliikana wayuu, nnojoleerü neʼrüin tü kasa anasü eejeetkat nuluwataapeena Maleiwa.
11 Mapuʼusü jukuwaʼipa jümaiwa, wuleitpapejeʼe jukuwaʼipa atumawaa maaʼulu yaa otta alaʼajaanüitpa jaainjala juulia saaʼu nünülia chi Waseñotsekai Jesucristo otta sükajee tü nüpülainkat Maleiwa.
12 Eesü süpüla taaʼinrüin tü taaʼinreekalü amüin, nnojotpejeʼe anain süpüshuaʼa tia makat. Nnojotsü aʼlaülaajaweerüin wanee kasa saaʼu takuwaʼipa jaʼitasü eein süpüla taaʼinrüin tü taaʼinreekalü amüin.
13 Tü weküinkat awataainjatü waleʼeruʼumüin otta tü waleʼekat süpülajatü tü weküinkat, najaʼttireetpejeʼe shia Maleiwa piamaleʼeya. Wanee wayuu nnojoishi akumajuushin süpüla nuʼluwajiraainjachin nukuwaʼipa, akumajuushi nia süpüla niʼyataainjachin nümüin chi Señotkai, naapeetkalaka chi Señotkai wanee kasa eekai choʼujaain nümüin wanee wayuu.
14 Asoʼireʼenna aaʼinchi chi Waseñotsekai nutuma Maleiwa otta nüsoʼireerü waaʼin Maleiwa sükajee tü nüpülainkat.
15 ¿Nnojotsüjasaʼa jütüjaain saaʼu saʼaniraain jukuwaʼipa nümaa Cristo? Nnojotkalaka anain saʼaniraale nukuwaʼipa wanee wayuu sümaa wanee jierü maaʼinsat.
16 Saʼaniraale nukuwaʼipa wanee wayuu sümaa wanee jierü maaʼinsat, waneesüitpa tü nakuwaʼipakat maʼaka nüküjain shia Maleiwa wanaa sümaa nümüin: «Nnojoleenaka naya katataawain».
17 Niasaʼa chi wayuu paaʼinwakai nümaa chi Señotkai, aʼaniraaleesia maʼin nukuwaʼipa nümaa.
18 Püchecheramaata paaʼin* suulia puʼluwajiraain pukuwaʼipa. Shia yarüttaleeka maʼin atuma nukuwaʼipa wanee wayuu nuʼluwajiraale nukuwaʼipa, niʼyarülajüin maʼin nukuwaʼipa sükajee tia.
19 ¿Nnojotsüjasaʼa jütüjaain saaʼu müin jia maʼaka saaʼin tü miichi aʼwaajüleekat Maleiwa eere tü nüpülainkat? Nia kapülainka tia Maleiwa. Nnojoishii laülaain jia saaʼu jukuwaʼipa,
20 jama naapüin Maleiwa jaaʼu wanee kasa kojutuka maʼin. Shiakalaka anain aluʼu jiʼyataale nümüin süpüla kojutuinjachin nia jutuma.
