1. Nu kae dzɔ esi Yosef nɔviwo biã ŋui?

YAKOB lɔ̃ viaŋutsuawo katã, ke hã, melɔ̃a nu le Yosef si xɔ ƒe 17 ya gbɔ kura o. Aleke esia na Yosef nɔviwo wɔ nu ɖe eŋui? Wova nɔ ŋu biãmee, eye esia wɔe be wolé fui. Yosef mewɔ naneke si tae nɔviawo nalé fui ɖo o. Ke hã, wotsɔ Yosef dzra wòzu kluvi eye woda alakpa na wo fofo be lã wɔadã aɖe wu via malɔ̃nugbɔa. Ŋubiabiã wɔe be wogblẽ ŋutifafa si le woƒe ƒomea me la me, eye wogbã dzi na wo fofoa.—1 Mose 37:3, 4, 27-34.

2. Le Galatiatɔwo 5:19-21 ƒe nya nu la, nu ka tae ŋubiabiã nye nɔnɔme gbegblẽ si vɔ̃ɖi ŋutɔ?

² Le Ŋɔŋlɔawo me la, woyɔ ŋubiabiã * hã kpe ɖe “ŋutilã la ƒe dɔwɔwɔwo,” siwo kplɔa ame yia ku me, siwo ate ŋu awɔe be ame aɖe madze anyi Mawu Fiaɖuƒea ƒe dome o la ŋu. (Xlẽ Galatiatɔwo 5:19-21.) Zi geɖe la, ŋubiabiã gbɔe kewɔwɔ, dzrewɔwɔ, kple dɔmedzoedodowo tsona.

3. Nu kawo me míadzro le nyati sia me?

³ Yosef nɔviwo ƒe ŋutinyaa ɖe ale si ŋubiabiã ate ŋu agblẽ amewo dome kple ale si wòate ŋu agblẽ ŋutifafa si le ƒomea me la dome la fia. Togbɔ be míawo ya míawɔ nu si gbegbe Yosef nɔviwo wɔ la gbeɖe o hã la, mí katã míede blibo o, eye míaƒe dzi nye alakpatɔ. (Yer. 17:9) Eya ta, mewɔ nuku o be, ɣeaɖewoɣi la, etea ŋu sesẽna na mí be míaɖu ŋubiabiã dzi. Na míadzro nuxlɔ̃amekpɔɖeŋu aɖewo siwo le Biblia me, siwo ate ŋu akpe ɖe mía ŋu míakpɔ nu siwo ate ŋu awɔe be ŋubiabiã nava ƒo ke  ɖe to ɖe míaƒe dzi me la me. Eyome, míadzro nu siwo míate ŋu awɔ be míaɖu ŋubiabiã dzi ahado ŋutifafa ɖe ŋgɔ la me.

4. Nu ka tae Filistitɔwo biã ŋu Isak?

⁴ Ne ŋutilãmenu geɖe le ame aɖe si. Isak nye kesinɔtɔ, eye Filistitɔwo biã ŋui le esi nunɔamesi geɖe va su esi ta. (1 Mose 26:12-14) Woxe vudo siwo me Isak dua tsi le naa eƒe lãhawo la gɔ̃ hã. (1 Mose 26:15, 16, 27) Abe Filistitɔ mawo ene la, egbea, ame aɖewo biãa ŋu ame bubuwo le esi nunɔamesi geɖe le ameawo si wu wo ta. Menye ɖeko wodina be nu siwo le ameawo si la nasu yewo si ko o, ke wodina hã be nu siwo le ameawo si la naganɔ wo si o.

5. Nu ka tae subɔsubɔhakplɔlawo biã ŋu Yesu?

⁵ Ne ame geɖewo lɔ̃ ame aɖe ƒe nya. Yudatɔ subɔsubɔhakplɔlawo biã ŋu Yesu le esi dukɔa me tɔwo lɔ̃ Yesu ƒe nya ŋutɔ ta. (Mat. 7:28, 29) Mawu teƒenɔlae Yesu nye eye enɔ nyateƒea fiam amewo. Ke hã, subɔsubɔhakplɔla mawo kaka alakpanya vɔ̃ɖiwo tso Yesu ŋu be yewoatsɔ agblẽ ŋkɔ nyui si le esi la ŋu. (Marko 15:10; Yoh. 11:47, 48; 12:12, 13, 19) Nufiame kae le ŋutinya sia me na mí? Eyae nye be, ele be míakpɔ egbɔ be míagabiã ŋu mía nɔviwo le esi hamea me tɔwo lɔ̃ woƒe nya le woƒe nɔnɔme nyuiwo ta la ta o. Ke boŋ, ele be míadze agbagba asrɔ̃ woƒe nɔnɔme kple nuwɔna nyuiwo.—1 Kor. 11:1; 3 Yoh. 11.

6. Aleke Diotrefo ɖe ŋubiabiã fiae?

⁶ Ne subɔsubɔmɔnukpɔkpɔwo su ame aɖe si. Le ƒe alafa gbãtɔ me la, Diotrefo biã ŋu ame siwo nɔ ŋgɔ xɔm le Kristo hamea me. ‘Edina be yeanɔ nɔƒe gbãtɔ’ le nɔviawo dome, eya ta, ekakaa alakpanya vɔ̃ɖiwo tso apostolo Yohanes kple nɔviŋutsu bubuwo ŋu kple susu be amewo nagade bubu wo ŋu o. (3 Yoh. 9, 10) Togbɔ be míawo ya míawɔ nu siwo gbegbe Diotrefo wɔ o hã la, ate ŋu adzɔ be míawo hã míava nɔ ŋu biãm mía nɔvi Kristotɔ aɖe si si subɔsubɔdɔdeasi aɖe si míenɔ mɔ kpɔm be woatsɔ ana mí la su, vevietɔ ne míese le mía ɖokui me be míawo hã míedze na dɔdeasi ma, alo míate ŋu awɔ dɔdeasi ma wu nɔvia gɔ̃ hã.

7. Aleke ŋubiabiã ate ŋu agblẽ nu le mía ŋu?

⁷ Ŋubiabiã le abe gbe vɔ̃ɖi ene. Ne ŋubiabiã ƒe ku nya mie le míaƒe dzi me ko la, ate ŋu asesẽ be míahoe ɖa. Nɔnɔme gbegblẽwo, abe ŋuʋaʋã si mesɔ o, dada, kple ɖokuitɔdidi ene, nana ŋubiabiã ƒoa ke ɖe to ɖe ame ƒe dzi me. Abe gbe vɔ̃ɖi ene la, ŋubiabiã ate ŋu avu atsyɔ amea ƒe nɔnɔme nyuiwo abe lɔlɔ̃, dɔmetɔtrɔ, kple dɔmenyonyo ene dzi. Ne míenya de dzesii be ŋubiabiã te miemie le míaƒe dzi me ko la, ehiã be míahoe ɖa. Aleke míawɔ aɖu ŋubiabiã dzi?

8. Nɔnɔme nyui kawoe ate ŋu akpe ɖe mía ŋu be míaɖu ŋubiabiã dzi?

⁸ Míate ŋu aɖu ŋubiabiã dzi ne míetu ɖokuibɔbɔ ɖo eye míena nu siwo le mía si la dze mía ŋu. Ne nɔnɔme nyui siawo yɔ míaƒe dzi me fũu la, awɔe be míabiã ŋu ame bubuwo o. Ðokuibɔbɔ akpe ɖe mía ŋu be míaganɔ mía ɖokui ŋu bum fũu akpa o. Ðokuibɔbɔla mesena le eɖokui me be yedze na nu nyuiwo wu ame bubu ɖe sia ɖe o. (Gal. 6:3, 4) Ne nu siwo le ame aɖe si la dzea eŋu la, ekpɔa ŋudzedze ɖe nu sia nu si le esi la ŋu eye metsɔa eɖokui nɔa sɔsɔm kple ame bubuwo o. (1 Tim. 6:7, 8) Ne ame si bɔbɔa eɖokui hekpɔa ŋudzedze ɖe nu siwo le esi ŋu la kpɔe be nu nyui aɖe su ame aɖe si la, ekpɔa dzidzɔ kplii.

9. Le Galatiatɔwo 5:16 kple Filipitɔwo 2:3, 4 ƒe nyawo nu la, nu kae gbɔgbɔ kɔkɔea akpe ɖe mía ŋu míawɔ?

⁹ Míehiã Mawu ƒe gbɔgbɔ kɔkɔea ƒe kpekpeɖeŋu hafi míate ŋu aƒo asa ana ŋutilã ƒe dɔwɔwɔ si nye ŋubiabiã eye míatu ɖokuibɔbɔ  ɖo ahana nu siwo le mía si la nadze mía ŋu. (Xlẽ Galatiatɔwo 5:16; Filipitɔwo 2:3, 4.) Yehowa ƒe gbɔgbɔ kɔkɔea ate ŋu akpe ɖe mía ŋu be míadzro míaƒe dzimesusuwo kple nu siwo ʋãa mí míewɔa nu la me. Le Mawu ƒe kpekpeɖeŋu me la, míate ŋu aɖe nuŋububu kple seselelãme gbegblẽwo ɖa ahatsɔ nyuitɔwo aɖo wo teƒe. (Ps. 26:2; 51:10) Bu Mose kple Paulo, ame siwo te ŋu ɖu ŋubiabiã ƒe gbɔgbɔ dzi dzidzedzetɔe la ƒe kpɔɖeŋuawo ŋu kpɔ.

10. Nɔnɔme kae do mo ɖa si ate ŋu azu tetekpɔ na Mose hafi? (Kpɔ nɔnɔmetata si le akpaa dzi.)

¹⁰ Mawu na ŋusẽ geɖe Mose ɖe eƒe dukɔa dzi, ke hã, Mose medze agbagba be yeaxe mɔ na ame bubuwo be ŋusẽ ma nagasu wo si o. Le kpɔɖeŋu me, ɣeaɖeɣi la, Yehowa ɖe eƒe gbɔgbɔ kɔkɔea ƒe ɖe le Mose dzi hetsɔe da ɖe Israel-metsitsi aɖewo siwo va ƒo ƒu ɖe takpegbadɔa gbɔ la dzi. Esia megbe kpuie la, Mose se be Israel-metsitsi eve aɖewo siwo ya meva takpegbadɔa gbɔ o la hã xɔ gbɔgbɔ kɔkɔea eye woawo hã wonɔ nu wɔm abe nyagblɔɖilawo ene. Aleke Mose wɔ nui esi Yosua gblɔ nɛ be wòana ametsitsi eve mawo nadzudzɔ? Mose mebiã ŋu ametsitsi eveawo le esi Yehowa na ŋusẽ woamawo ta o. Ke boŋ, esi wònye ɖokuibɔbɔla ta la, ekpɔ dzidzɔ kpli wo le mɔnukpɔkpɔ si su wo si ta. (4 Mose 11:24-29) Nu kae míate ŋu asrɔ̃ tso Mose ƒe kpɔɖeŋua me?

11. Aleke hamemetsitsiwo ate ŋu asrɔ̃ Mose ƒe kpɔɖeŋua?

¹¹ Ne hamemetsitsie nènye la, ɖe wobia tso asiwò kpɔ be nàna hehe nɔvi bubu aɖe be wòava wɔ dɔdeasi aɖe si nèlɔ̃ veviea? Le kpɔɖeŋu me, ɖewohĩ mɔnukpɔkpɔ si su asiwò be nèkpɔa Gbetakpɔxɔ Nusɔsrɔ̃a dzi kwasiɖa sia kwasiɖa la doa dzidzɔ na wò ŋutɔ. Gake ne ènye ɖokuibɔbɔla abe Mose ene la, ne wobia tso asiwò be nàna hehe nɔviŋutsu bubu aɖe kple susu be, ɣeyiɣi aɖe megbe la, wòava nɔ nusɔsrɔ̃a dzi kpɔm la, màse le ɖokuiwò me be wodi be yewoaɖe zi le ye te o. Ke boŋ, anye dzidzɔ na wò be yeakpe ɖe ye nɔvia ŋu.

12. Aleke Kristotɔ geɖewo ɖenɛ fiana egbea be nu siwo le yewo si la dzea yewo ŋu eye yewonye ɖokuibɔbɔlawo?

¹² Bu nɔnɔme bubu aɖe si dzea ŋgɔ nɔviŋutsu tsitsi geɖewo egbea ŋu kpɔ. Wo dometɔ aɖewo wɔ hamemetsitsiwo ƒe haa ƒe ɖoɖowo gbɔ kpɔla ƒe dɔa ƒe geɖe. Gake ne woxɔ ƒe 80 la, wolɔ̃na faa ɖea asi le woƒe dɔdeasia ŋu. Nenema kee ne nutome sue dzikpɔlawo xɔ ƒe 70 la, wolɔ̃na faa ɖea asi le woƒe subɔsubɔmɔnukpɔkpɔa ŋu hexɔa subɔsubɔdɔ bubu ɖe sia ɖe si wode asi na wo la ɖokuibɔbɔtɔe. Eye le ƒe ʋɛ siwo va yi me la, wobia tso Betel-ƒomea me tɔ geɖewo si le xexea me godoo be woaɖe asi le Betel subɔsubɔdɔa ŋu aɖawɔ subɔsubɔdɔ bubu. Nɔviŋutsu kple nɔvinyɔnu wɔnuteƒe mawo meléa nɔvi siwo va le dɔdeasi siwo wolɔ̃ vevie la wɔm la ɖe dɔme o.

13. Nu kae ate ŋu awɔe be Paulo nabiã ŋu apostolo 12-awo hafi?

¹³ Apostolo Paulo hã nye ame bubu aɖe si bɔbɔ eɖokui eye wòna nu siwo nɔ esi la dze eŋu. Paulo meɖe mɔ ŋubiabiã ge ɖe eƒe dzi me o. Eku kutri vevie le gbeƒãɖeɖedɔa me, ke hã, egblɔ ɖokuibɔbɔtɔe be: “Nyee nye suetɔ le apostoloawo dome, eye nyemedze woayɔ be apostolo o.” (1 Kor. 15:9, 10) Apostolo 12-awo nɔ Yesu ŋu kplikplikpli le eƒe anyigbadzisubɔsubɔdɔa me, gake Yesu ƒe ku kple eƒe tsitretsitsi megbe kura hafi Paulo va zu Kristotɔ. Togbɔ be Yesu va ɖo Paulo wònye “apostolo na dukɔwo” emegbe hã la, Paulo meva zu apostolo 12-awo dometɔ ɖeka gbeɖe o. (Rom. 11:13; Dɔw. 1:21-26) Le esi Paulo nabiã ŋu apostolo 12-awo kpakple mɔnukpɔkpɔ si su wo si be wonɔ Yesu ŋu kplikplikpli teƒe la, ɖe wòna nu siwo su esi la dze eŋu boŋ.

14. Ne míena nu siwo le mía si la dze mía ŋu eye míebɔbɔ mía ɖokui la, nu kae esia aʋã mí míawɔ?

¹⁴ Ne míenaa nu siwo le mía si la dzea mía ŋu  eye míebɔbɔa mía ɖokui la, míawɔ nu abe Paulo ene eye míade bubu ame siwo Yehowa na ŋusẽe la ŋu. (Dɔw. 21:20-26) Yehowa wɔ ɖoɖo be hamemetsitsiwo naxɔ ŋgɔ le Kristo hamea me. Togbɔ be gbɔdzɔgbɔdzɔwo le wo ŋu hã la, Yehowa bua wo be wonye “nunana siwo nye amewo.” (Ef. 4:8, 11) Ne míedea bubu nɔviŋutsu siawo ŋu eye míewɔna ɖe woƒe mɔfiafia dzi ɖokuibɔbɔtɔe la, esia awɔe be míakpɔtɔ anɔ Yehowa ŋu kplikplikpli eye ŋutifafa anɔ mía kple mía nɔvi Kristotɔwo katã dome.

15. Nu kae wòhiã be míawɔ?

¹⁵ Ne míebiãa ŋu mía nɔviwo la, ŋutifafa manɔ mía kpli wo dome o. Ehiã be míaho ŋubiabiã ɖa le míaƒe dzi me eye míaƒo asa na nu siwo awɔe be ame bubuwo nava nɔ ŋu biãm la wɔwɔ. Ele be míaɖe afɔ vevi siawo ale be míate ŋu awɔ ɖe se si Yehowa de be “míati nu siwo hea ŋutifafa vanɛ kple nu siwo tua ame ɖo la yome” la dzi. (Rom. 14:19) Nu kawoe míate ŋu awɔ atsɔ akpe ɖe ame bubuwo ŋu be woaɖu ŋubiabiã dzi, eye nu kawoe míate ŋu awɔ be míado ŋutifafa ɖe ŋgɔ?

16. Nu kawoe míate ŋu awɔ atsɔ akpe ɖe ame bubuwo ŋu be woaɖu ŋubiabiã dzi?

¹⁶ Míaƒe nɔnɔme kple nuwɔnawo ate ŋu akpɔ ŋusẽ gã aɖe ɖe amewo dzi. Xexea dina be ‘míatsɔ míaƒe nunɔamesiwo anɔ fiafiam adegbeƒoƒotɔe.’ (1 Yoh. 2:16) Gake nɔnɔme ma doa ŋubiabiã ɖe ŋgɔ. Ne míekpɔa mía ɖokui dzi eye míeƒoa nu tso nu siwo le mía si alo nu siwo míewɔ ɖoɖo be míaƒle ŋu enuenu o la, míate ŋu akpe ɖe ame bubuwo ŋu be ŋubiabiã nagage  ɖe woƒe dzi me o. Nu bubu aɖe si míate ŋu awɔ atsɔ aƒo asa na ŋubiabiã dodo ɖe ŋgɔ ye nye ale si míawɔ nu ɖokuibɔbɔtɔe ne subɔsubɔmɔnukpɔkpɔwo su mía si le hamea me. Ne míehea susu yia subɔsubɔmɔnukpɔkpɔ siwo su mía si la dzi enuenu la, esia ate ŋu awɔe be ŋubiabiã nage ɖe ame bubuwo ƒe dzi me. Gake ne míetsɔa ɖe le eme na amewo vavã eye míekafua wo ɖe nu nyui siwo wowɔna ta la, ekema míele kpekpem ɖe wo ŋu be woakpɔ ŋudzedze ɖe nu siwo le wo si la ŋu eye míele ŋutifafa kple ɖekawɔwɔ dom ɖe ŋgɔ le hamea me.

17. Nu kae Yosef nɔviwo te ŋu wɔ, eye nu ka tae?

¹⁷ Míate ŋu aɖu ŋubiabiã dzi keŋkeŋ! Gabu Yosef nɔviwo ƒe ŋutinyaa ŋu kpɔ. Esi Yosef nɔviwo lé fui hetsɔe dzra la, wova do goe le Egipte ƒe geɖe megbe. Hafi Yosef nana nɔviawo nanya be yee nye Yosef la, edo wo kpɔ be yeakpɔe ɖa be wotrɔ woƒe nɔnɔme mahã. Ena woɖo kplɔ̃ na wo eye esi wonɔ nua ɖum la, ewɔ nu ɖe wo nɔvi suetɔ, Benyamin, ya ŋu etɔxɛe. (1 Mose 43:33, 34) Ke hã, nɔviawo mewɔ naneke si ɖee fia be wobiã ŋu Benyamin o. Ke boŋ, woɖee fia be yewotsɔ ɖe le eme na yewo nɔvia kple yewo fofo, Yakob, vavã. (1 Mose 44:30-34) Esi Yosef nɔviwo dzudzɔ ŋubiabiã ta la, esia wɔe be wote ŋu na ŋutifafa gava nɔ woƒe ƒomea me ake. (1 Mose 45:4, 15) Nenema kee, ne míawo hã míeho ŋubiabiã kple eƒe ke ɖe sia ɖe ɖa le míaƒe dzi me la, esia awɔe be míakpe asi ɖe eŋu be ŋutifafa nakpɔtɔ anɔ míaƒe ƒomea kple míaƒe hamea me.

18. Le Yakobo 3:17, 18 ƒe nya nu la, ne míekpe asi ɖe eŋu ŋutifafa xɔ aƒe ɖi la, nu kae ado tso eme?

¹⁸ Yehowa di be míaɖu ŋubiabiã dzi, eye míati ŋutifafa yome. Ele be míaku kutri vevie be míawɔ evea siaa. Abe ale si míedzro eme le nyati sia me ene la, etea ŋu dzɔna be míebiãa ŋu ame bubuwo. (Yak. 4:5) Eye míele xexe si me wodoa ŋubiabiã ɖe ŋgɔ le la me. Gake ne míedzea agbagba be míanye ɖokuibɔbɔlawo, míana nu siwo le mía si la nadze mía ŋu, eye míakafu ame bubuwo ɖe nu nyui siwo wowɔ ta la, míaɖe mɔ be ŋubiabiã namie ɖe míaƒe dzi me o. Ke boŋ, mía dometɔ ɖe sia ɖe akpe asi ɖe eŋu be ŋutifafa naxɔ aƒe ɖi eye esia awɔe be mí katã míatu nɔnɔme nyuiwo ɖo.—Xlẽ Yakobo 3:17, 18.