Ezekiel 27:1-36
-
Konyifaha ɖe Tiro tɔdziʋu si le nyɔnyrɔm la ŋu (1-36)
27 Yehowa ƒe gbe gava nam be:
2 “Amegbetɔvi, to konyifaha ɖe Tiro ŋu,+
3 eye nàgblɔ na Tiro be:‘Wò, du si le atsiaƒu ƒe agbo nu,Du si tsaa asi kple dukɔ siwo le ƒukpo geɖewo dzi,Ale Aƒetɔ Dziɖulagã Yehowa gblɔe nye esi:
“Oo Tiro, ègblɔ be, ‘Medze tugbe eteƒe mekɔ o.’+
4 Wò anyigbawo le atsiaƒu titina.Tsowòlawo na wò tugbedzedze teƒe mekɔ o.
5 Senir+ ƒe sesewutiwoe wotsɔ kpa wòe.Lebanon ƒe sedertie wotsɔ wɔ wò abalati.
6 Basan ƒe logotiwoe wotsɔ kpa wò atabluwo.Kitim+ ƒukpowo dzi kpomiti si ŋu wofa nyiɖu ɖoe wotsɔ kpa wò tɔdziʋuwo ƒe tagbɔ.
7 Egiptetɔwo ƒe avɔ ŋɔŋɔewoe nye wò abala.Ka blɔtɔ kple alẽfuka si wode ama aɖabɛ dzĩtɔe, siwo tso Elisa+ ƒukpowo dzi lae wotsɔ wɔ agbadɔvɔ le wò tɔdziʋu me.
8 Sidon kple Arvadtɔwoe+ nye wò ʋukulawo.
Oo Tiro, wò ame bibiwoe nye wò ƒudzidɔwɔlawo.+
9 Gebal-metsitsiwo+ kple eƒe ame bibiwoe nye nutrelawo le mewò,+ ne woatre wò ŋɔŋɔƒewo.
Tɔdziʋu siwo katã le ƒu dzi kple wo me dɔwɔlawo katã va gbɔwò be woatsa asi kpli wò.
10 Ame siwo tso Persia, Lud kple Put+ woe nye aʋawɔla siwo nɔ wò aʋakɔwo dome.
Wotsɔ akpoxɔnu kple gakuku ku nu le mewò, eye woɖo atsyɔ̃ na wò.
11 Arvadtɔ siwo nye wò aʋakɔ, nɔa wò gliwo dzi godoo va kpe,Eye ŋutsu kalẽtɔwoe nɔa wò gbetakpɔxɔwo me.
Wotsɔa woƒe akpoxɔnu kotooawo kua wò gliwo ŋu godoo va kpe,Eye wona nènya kpɔ ale gbegbe.
12 “‘“Tarsis+ tsaa asi kpli wò le wò kesinɔnu gbogboawo ta.+ Wotsɔa klosalo, gayibɔ, gaɣi kple tsumi ɖɔa li wò adzɔnuwo.+
13 Yavan, Tubal+ kple Mesek+ tsaa asi kpli wò; wotsɔa kluviwo+ kple akɔblinuwo ɖɔa li wò adzɔnuwo.
14 Wotsɔa sɔwo, aʋawɔsɔwo kple tedzisɔwo tso Togarma+ ƒe me va ɖɔa li wò adzɔnuwo.
15 Dedantɔwo+ tsaa asi kpli wò; ƒukpo geɖewo ƒe asitsalawo wɔa dɔ kpli wò; nyiɖuwo+ kple keyi wotsɔna ɖoa eteƒe na wò.
16 Edom tsaa asi kpli wò le wò adzɔnu gbogboawo ta. Wotsɔa nofek, alẽfu si wode ama aɖabɛ dzĩtɔe, atsyãvɔ ŋɔŋɔewo, avɔ biɖibiɖi, adzagbawo kple rubi-kpewo ɖɔa li wò adzɔnuwo.
17 “‘“Yuda kple Israel tsaa asi kpli wò. Wotsɔa lu tso Minit,+ nuɖuɖu tɔxɛwo, anyitsi,+ ami kple balsam+ ɖɔa li wò adzɔnuwo.+
18 “‘“Damasko+ tsɔa Helbon wain kple Zahar alẽfu tsaa asi kpli wò le wò adzɔnu geɖeawo kple wò kesinɔnu gbogboawo ta.
19 Wedan kple Yavan tso Uzal va naa gayibɔ si woté, kasia kple gbekee tsɔ ɖɔa li wò adzɔnuwo.
20 Dedan+ tsɔa sɔkpakuntru tsaa asi kpli wò.
21 Arabiatɔwo kple Kedar-megãwo+ nye wò asisi siwo tsɔa alẽviwo, agbowo kple gbɔ̃wo tsaa asi kpli wò.+
22 Seba kple Raama+ ƒe asitsalawo hã nye wò asisiwo; wotsɔa atike ʋeʋĩ nyuitɔwo katã ƒomevi, kpe xɔasiwo kple sika ɖɔa li wò adzɔnuwo.+
23 Haran,+ Kane, Eden+ kpakple asitsalawo tso Seba,+ Asur+ kple Kilmad tsaa asi kpli wò.
24 Wotsɔa avɔ dzeaniwo, avɔ blɔtɔ, atsyãvɔ ŋɔŋɔewo, kple kuntru si wolɔ̃ kple ka ƒomevi vovovowo, siwo wotsɔ ka bla nyuie la, va dzrana le wò asiwo me.
25 Tarsis+ tɔdziʋuwoe tsɔa wò adzɔnuwo vanɛ na wò,Ale be nu bɔ ɖe asiwò fũu, eye kpekpeme* va le ŋuwò ŋutɔ le atsiaƒu titina.
26 Kuwòlawo ku wò yi ƒu gbanaawo dzi;Ke ɣedzeƒeya gbã wò le atsiaƒu titina.
27 Wò kesinɔnuwo, wò adzɔnuwo, wò asitsanuwo, wò tɔdziʋumedɔwɔlawo kple wò ƒudzidɔwɔlawo,Wò nutrelawo, wò adzɔnuɖɔlilawo+ kple wò aʋawɔlawo+ katã,—Wò ameha blibo si le mewò la—Anyrɔ ɖe atsiaƒu titina le wò anyidzegbe.+
28 Ne wò ƒudzidɔwɔlawo do ɣli la, ƒutanyigbawo aʋuʋu kpekpekpe.
29 Atablukulawo katã, tɔdziʋumedɔwɔlawo kple ƒudzidɔwɔlawo katãAdo le woƒe ʋuwo me ava gota.
30 Woafa avi hehehe ɖe tawò,+Woalɔ ke akɔ ɖe tame eye woamli le dzofi me.
31 Woalũ ta kokoe, woata akpanya;Woafa avi vevie* le tawò, eye woafa konyi eteƒe makɔ o.
32 Woato konyifaha ɖe ŋuwò le woƒe nuxaxa me adzi ha ade wò be:
‘Ame kae le abe Tiro si nu ɖoɖoe zi le azɔ le atsiaƒu titina la ene?+
33 Esi wò adzɔnuwo to ƒu dzi va la, èɖi ƒo na dukɔ geɖewo.+
Wò kesinɔnu gbogboawo kple wò adzɔnuwo na anyigbadzifiawo zu hotsuitɔwo.+
34 Azɔ ègbã gudugudu le ƒu dzi, le tsi gogloawo me,+Eye wò adzɔnuwo katã kpakple wò amewo katã nyrɔ kpli wò.+
35 Ƒukpowo dzi nɔlawo katã ƒe nu aku ɖe ŋuwò,+Ŋɔdzi lé woƒe fiawo wole ƒoƒom kpakpakpa,+ eye adã le mo na wo.
36 Dukɔwo ƒe asitsalawo alia aku ɖe ŋuwò le nu si dzɔ ɖe dziwò la ta.
Nuwò ayi ŋɔdzitɔe zi ɖeka kpoyi,Eye màganɔ anyi akpɔ o.’”’”+
