1 Samuel 18:1-30
18 Esi David ƒo nu kple Saul vɔ ko la, David ƒe nu lé dzi na Yonatan,*+ eye Yonatan lɔ̃e abe eɖokui ene.*+
2 Tso gbe ma gbe dzi la, Saul xɔe eye meɖe mɔ nɛ wògbugbɔ yi fofoa ƒe me o.+
3 Eye Yonatan kple David bla nu,+ elabena elɔ̃e abe eɖokui ene.*+
4 Yonatan ɖe eƒe awu ʋlaya si ŋu abɔ mele o tsɔ na David, etsɔ eƒe aʋawu, yi, dati kple eƒe alidziblanu hã nɛ.
5 Eye afi sia afi si Saul dɔ David ɖo la, edzea edzi nɛ.*+ Eya ta Saul tsɔe ɖo aʋawɔlawo nu,+ eye esia nyo dukɔ blibo la kple Saul ƒe subɔviwo hã ŋu.
6 Ne David kple aʋawɔlawo trɔ gbɔna tso Filistitɔwo wuƒe la, nyɔnuwo doa go tso Israel duwo katã me nɔa ha dzim+ nɔa ɣe ɖum eye wotsɔa axatsɛwo+ kple kasaŋkuwo nɔa aseye tsom va kpea fia Saul.
7 Eye nyɔnu siwo nɔa aseye tsom la nɔa ha dzim be:
“Saul wu ame akpewo,David ya wu ame akpe ewowo.”+
8 Esia na dzi ku Saul vevie,+ elabena ha la mevivi enu o, eya ta egblɔ be: “Wotsɔ akpe ewowo na David, ke wotsɔ akpewo na nye ya. Fianyenye la koe susɔ woatsɔ anɛ!”+
9 Tso gbe ma gbe la, Saul va nɔ susu vɔ̃ bum ɖe David ŋu.
10 Esi ŋu ke la, gbɔgbɔ vɔ̃ɖi aɖe tso Mawu gbɔ va Saul dzi,+ ale be wòle nu wɔm tramatrama* le aƒea me, esime David le kasaŋku ƒom+ abe ale si wòwɔna tsã ene. Saul lé akplɔ ɖe asi,+
11 kasia Saul da akplɔ+ la hegblɔ be: ‘Matɔ David amimii ɖe gli ŋu!’ ke David de axae zi eve.
12 Eye Saul de asi David vɔvɔ̃ me, elabena Yehowa li kplii,+ ke egblẽ Saul ya ɖi.+
13 Eya ta Saul ɖe David ɖa le eɖokui ŋu hetsɔe ɖo aʋawɔla akpe ɖeka nu ale be wòkplɔa dukɔ la yia aʋae.*+
14 Nu sia nu si David wɔna la dzea edzi nɛ,*+ eye Yehowa nɔ kplii.+
15 Esi Saul kpɔe be nu sia nu dzea edzi nɛ la, evɔ̃e ŋutɔ.
16 Ke Israel kple Yuda blibo la katã lɔ̃ David ƒe nya, elabena enɔa ŋgɔ na wo le woƒe aʋahohowo me.
17 Emegbe Saul gblɔ na David be: “Kpɔ ɖa, vinyenyɔnu tsitsitɔ Merab+ ye nye esi. Matsɔe na wò nàɖe.+ Gake wɔ kalẽ nam, eye nàwɔ Yehowa ƒe aʋawo ko.”+ Ke Saul gblɔ le eɖokui me be: ‘Matsi nye asi me o, ke boŋ netsi Filistitɔwo si me.’+
18 Ke David gblɔ na Saul be: “Ame kae menye, eye ame kae ƒonyemetɔwo kple fofonye ƒe ƒomea nye le Israel, ne mahayi fia ƒe to nye ge?”+
19 Ke esi ɣeyiɣi de be woatsɔ Saul vinyɔnu Merab ana David la, wotsɔe na Adriel+ Meholatɔ la xoxo wòɖe.
20 Ke Saul vinyɔnu Mikal+ lɔ̃ David, eye wova gblɔe na Saul, eye nya la dzɔ dzi nɛ.
21 Eye Saul gblɔ be: “Matsɔe nɛ, ne wòazu mɔ̃ nɛ, ale be wòatsi Filistitɔwo si me.”+ Eya ta Saul gblɔ na David zi evelia be: “Àzu tonye* egbea.”
22 Eye Saul de se na eƒe subɔviwo be: “Miɖe kpɔ David ne miagblɔ nɛ be: ‘Kpɔ ɖa! Wò nu nyo fia la ŋu, eye eƒe subɔviwo katã hã lɔ̃ wò. Eya ta lɔ̃ nàzu fia ƒe toyɔvi.’”
23 Esi Saul ƒe subɔviwo va gblɔ nya siawo na David la, David ɖo eŋu be: “Nu tsɛ wònye le mia ŋkume be, nye ame dahe si mele ɖeke me o la, nanye fia ƒe toa?”+
24 Eye Saul ƒe subɔviwo va gblɔe nɛ be: “Ale kple ale David gblɔ.”
25 Eye Saul gblɔ be: “Ale miagblɔ na David ye nye esi: ‘Fia la mele srɔ̃ɖenu aɖeke dim o,+ ke boŋ Filistitɔwo ƒe aʋanuyi alafa ɖeka,+ ne wòatsɔ abia hlɔ̃ fia ƒe futɔwo.’” Ke tame vɔ̃e Saul ɖo, be yeana David natsi Filistitɔwo si me.
26 Eya ta eƒe subɔviawo va gblɔ nya la na David, eye nya la dze David ŋu be yeanye fia ƒe to.+ Esi ŋkeke si woɖo la mekpɔ de haɖe o la,
27 David kple eƒe amewo yi ɖawu Filistitɔ alafa eve, eye David tsɔ woƒe aʋanuyiawo katã vɛ na fia la, ne wòazu fia ƒe to. Ale Saul tsɔ vianyɔnu Mikal nɛ wòɖe.+
28 Saul kpɔe dze sii be Yehowa li kple David,+ eye be ye vinyɔnu Mikal hã lɔ̃e.+
29 Ale Saul gavɔ̃ David ɖe edzi, eye Saul va zu David ƒe futɔ le eƒe agbemeŋkekewo katã me.+
30 Ɣesiaɣi si Filistitɔwo ƒe amegãwo ho yi aʋa la, David ɖua wo dzi* wu Saul ƒe subɔviwo katã;+ eye eƒe ŋkɔ de du ŋutɔ.+
Etenuŋɔŋlɔ
^ Alo, “elɔ̃e abe eya ŋutɔ ƒe luʋɔ ene.”
^ Alo, “Yonatan ƒe luʋɔ ku ɖe David ƒe luʋɔ ŋu.”
^ Alo, “elɔ̃e abe eya ŋutɔ ƒe luʋɔ ene.”
^ Alo, “edzea aɖaŋu.”
^ Alo, “abe nya gblɔm wòle ɖi ene.”
^ Egɔmeɖeɖe tẽe, “edzea dukɔ la ŋgɔ yina gagbɔna.”
^ Alo, “David dze aɖaŋu le nu sia nu si wòwɔna me.”
^ Alo, “Ànɔ srɔ̃ɖekadodo me kplim.”
^ Alo, “dzea aɖaŋu.”
