1 Korintotɔwo 11:1-34
11 Mizu srɔ̃nyelawo, abe ale si nye hã menye Kristo srɔ̃la ene.
2 Ke mele mia kafum, elabena mieɖoa ŋku dzinye le nuwo katã me, eye mielé ɖoɖoawo me ɖe asi goŋgoŋ, abe ale si metsɔ wo de mia sii ene.
3 Gake medi be mianya be ŋutsu sia ŋutsu ƒe tae nye Kristo la; eye nyɔnu hã ƒe tae nye ŋutsu; ke Kristo la hã ƒe tae nye Mawu.
4 Ŋutsu sia ŋutsu, si tsyɔa nu ta hafi doa gbe ɖa alo gblɔa nya ɖi la, doa ŋukpe eƒe ta;
5 gake nyɔnu sia nyɔnu, si metsyɔa nu ta hafi doa gbe ɖa alo gblɔa nya ɖi o la, doa ŋukpe eƒe ta, elabena ele ko abe nyɔnu si wolũ ta na la ene.
6 Elabena ne nyɔnu aɖe metsyɔa nu ta o la, nena woakpa ɖa nɛ; gake ne enye ŋukpe na nyɔnu aɖe be wòana woakpa ɖa nɛ alo woalũ ta nɛ la, ekema netsyɔ nu ta.
7 Elabena medze be ŋutsu natsyɔ nu ta o, elabena Mawu ƒe nɔnɔme kple ŋutikɔkɔe wònye; gake nyɔnue nye ŋutsu ƒe ŋutikɔkɔe.
8 Elabena ŋutsu metso nyɔnu me o, nyɔnu boŋ ye tso ŋutsu me;
9 eye gawu la, womewɔ ŋutsu le nyɔnu ta o, nyɔnu boŋ ye wowɔ le ŋutsu ta.
10 Esia tae wòle be ɖokuibɔbɔ ɖe ŋusẽ te ƒe dzesi nanɔ nyɔnu ƒe ta, le mawudɔlawo ŋuti.
11 Hekpe ɖe eŋu la, le Aƒetɔ la me la, nyɔnu meli ŋutsu manɔmee o, eye ŋutsu hã meli nyɔnu manɔmee o.
12 Elabena ale si ko nyɔnu tso ŋutsu me la, nenema kee ŋutsu hã to nyɔnu me va; gake nuwo katã tso Mawu gbɔ.
13 Mia ŋutɔwo mibu eŋu kpɔ: Ðe wòsɔ be nyɔnu nado gbe ɖa na Mawu ne metsyɔ nu ta oa?
14 Ðe dzɔdzɔme ŋutɔ mefia mi be, ne ɖa legbe le ta na ŋutsu la, enye ŋukpe nɛ;
15 gake ne ɖa legbe le ta na nyɔnu la, ŋutikɔkɔe wònye nɛ oa? Elabena wotsɔ ɖa nae ɖe tatsyɔnu teƒe.
16 Ke hã, ne ame aɖe le nya hem be ɖoɖo bubu aɖe li le nya sia ŋu la, bubu aɖeke mele mía si o, eye ɖeke mele Mawu ƒe hameawo hã si o.
17 Gake esi mele mɔfiame siawo nam mi la, nyemele mia kafum o, elabena ne miekpe ta la, nuwo menyona ɖe edzi o, ɖe wogblẽna ɖe edzi boŋ.
18 Elabena gbã la, mese be, ne mieva kpe ta le hamea me la, mamawo nɔa mia dome; eye mexɔ edzi se le go aɖe me.
19 Elabena ele be kɔmamawo hã nanɔ mia dome, bene mia dometɔ siwo ŋu wokpɔ ŋudzedze ɖo la naɖe dzesi.
20 Eya ta ne mieva ƒo ƒu ɖe afi ɖeka la, miete ŋu ɖua Aƒetɔ ƒe fiẽnuɖuɖu la ale si dze o.
21 Elabena ne ɣeyiɣia de be miaɖui la, ame sia ame ɖua ye ŋutɔ ƒe fiẽnuɖuɖu gbã, eye ale dɔ nɔa ame aɖe wum, gake ame bubu ya mua aha.
22 Aƒewo le mia si be miaɖu nu ahano nu le wo me ɖe? Alo ɖe miedoa vlo Mawu ƒe hame la, eye miedoa ŋukpe ame siwo si naneke mele o laa? Nya kae magblɔ na mi? Ðe makafu mia? Nyemele mia kafum le nu sia me o.
23 Elabena nu si mexɔ tso Aƒetɔ la gbɔ lae metsɔ de asi na mi, be le zã si me woade Aƒetɔ Yesu asi la, etsɔ abolo,
24 eye esi wòda akpe ɖe eta vɔ la, eŋe eme, gblɔ be: “Esia tsi tsitre ɖi na nye ŋutilã, si wotsɔ na ɖe mia ta. Minɔ esia wɔm hena ŋkuɖoɖo dzinye.”
25 Nenema kee wòwɔ le kplu la hã gome le fiẽnuɖuɖu la megbe, esi wògblɔ be: “Kplu sia tsi tsitre ɖi na nubabla yeye, si wowɔ to nye ʋu dzi la. Minɔ esia wɔm, ɣesiaɣi si mienoe la, hena ŋkuɖoɖo dzinye.”
26 Elabena ɣesiaɣi si mieɖu abolo sia, eye mieno nu le kplu sia nu la, miele gbeƒã ɖem Aƒetɔ la ƒe ku, va se ɖe esime wòava ɖo.
27 Eya ta ame sia ame si ɖua abolo la, alo noa nu le Aƒetɔ la ƒe kplu la nu madzemadzee la, aɖi fɔ le Aƒetɔ la ƒe ŋutilã kple eƒe ʋu ŋu.
28 Ame nedzro eɖokui me kpɔ nyuie gbã be yedze hã, eye ale wòaɖu abolo la ƒe ɖe, eye wòano nu le kplu la nu.
29 Elabena ame si medzro nu si ŋutilã la fia me kpɔ nyuie hafi ɖunɛ, eye wònonɛ o la, eɖua ʋɔnudɔdrɔ̃ henoa ʋɔnudɔdrɔ̃ na eɖokui.
30 Esia tae mia dometɔ geɖewo gbɔdzɔ, eye wodze dɔ, eye geɖewo hã le alɔ̃ dɔm le ku me.
31 Gake ne míadzro mía ɖokui me kpɔ nyuie la, womadrɔ̃ ʋɔnu mí o.
32 Ke hã, ne wodrɔ̃ ʋɔnu mí la, Yehowae le hehe nam mí, bene woagabu fɔ mí kpe ɖe xexea ŋu o.
33 Eya ta nɔvinyewo, ne mieva kpe ta be yewoaɖui la, milala mia nɔewo.
34 Ne dɔ le ame aɖe wum la, neɖu nu le aƒe me, bene miagava kpe ta wòazu ʋɔnudɔdrɔ̃ na mi o. Ke ne meva ɖo mia gbɔ afi ma hã la, makpɔ nya susɔeawo gbɔ.
