1, 2. (a) Bediedi ba nja jangame̱nno̱ bupe̱ e? (b) Njika myuedi di me̱nde̱no̱ jombwea o din jokwa e?

PONDA o tano̱ muna, ye̱ke̱i te̱ bayedi bo̱ngo̱ ba ta ba baise̱ wa ná o bole mambo o si tano̱ o pula bola. O ta o to̱ndo̱ babo̱ o bia pe̱ ná wangame̱n sengane̱ babo̱, nde o si ta o pula sengane̱ babo̱ ponda iwo̱.

² Di bi ná Sango asu Yehova, a to̱ndi biso̱. A mombwea biso̱, na bola pe̱ ná di be̱ne̱ me̱se̱ ma mapule̱ o bwane̱ longe̱ muńe̱nge̱. A mabola biso̱ bediedi bangame̱n ná di tongwe̱le̱. Ponda iwo̱, a mabolane̱ bato bape̱pe̱ o die̱le̱ biso̱. Jangame̱n bola doi la byanedi la Yehova edube. (Minia 24:21) Nde ońola nje yeno̱ biso̱ ndutu ponda iwo̱ o bupe̱ bediedi e? Ońola nje Yehova a mabaise̱no̱ biso̱ ná di bupe̱ bediedi e? Ne̱ni pe̱ di malee̱no̱ ná di mabola doi lao la byanedi edube e?​—Ombwa Maki ma su la kalati 9.

3, 4. Ońola nje bato ba titino̱ ke̱nge̱nge̱ e? Ońola nje yeno̱ ná e be̱ ndutu o bupe̱ bediedi be mawe̱ na bape̱pe̱ e?

³ Kana jeno̱ bato ba benama, di le̱le̱m o be̱ pamo. To̱ná ba wekabe̱no̱ ná ke̱nge̱nge̱, Adam na Eva,  mom’a boso na mut’a boso ba boli bobe ońolana ba te̱nge̱ne̱ doi la byanedi la Loba. Botea ni ponda bato be̱se̱ ba mayabane̱ nde bobe. Si be̱ lasu la ke̱nge̱nge̱ le nde njo̱m po̱ ońola nje yeno̱ biso̱ ndutu o bupe̱ bediedi be mawe̱ na Yehova to̱ na bato ba benama. Njo̱m nipe̱pe̱ ńe nde ná to̱ ba bena Yehova a mabolane̱no̱ o die̱le̱ biso̱ pe̱ ba titi ke̱nge̱nge̱.​—Bebotedi 2:15-17; 3:1-7; Myenge 51:7; Roma 5:12.

⁴ Kana di titino̱ ke̱nge̱nge̱, di le̱le̱m o be̱ kumba. Kumba e mabola ná e be̱ biso̱ ndutu o bupe̱ bediedi. K’eyembilan, o Israel ńa kwaṅ, Yehova a ta a po̱so̱ Mose o die̱le̱ tumba lao. Kora nu ta muboled’a Yehova mimbu jita, a botedi o be̱ kumba na mo̱ a yaṅa Mose. To̱ná Mose a tano̱ a die̱le̱ tumba la Loba, a si ta kumba. E kwalabe̱ ońol’ao ná a ta nde moto ńena nu ta nu sibise̱ ńolo buka be̱se̱ o ni ponda. Nde Kora a bangi bediedi ba Mose, a lo̱ndo̱ pe̱ dimuti la bato o lata na mo̱ o te̱nge̱ne̱ Mose. Nje e po̱yedi Kora na bato ba lati na mo̱ e? Ba bwabe̱. (Miso̱ngi 12:3; 16:1-3, 31-35) O Bibe̱l, di maso̱ byembilan jita be malee̱ biso̱ ná kumba ńe bobe.​—2 Myango 26:16-21; ombwa Maki ma su la kalati 10.

5. Ne̱ni bato bō̱ ba bolane̱no̱ doi labu la byanedi bobe e?

⁵ Pondapo̱ o másenga byala ná “Doi la byanedi di matukwa moto.” Myango mi malee̱ ná bato jita ba bolane̱ doi labu la byanedi bobe. (Langa Mulangwedi 8:9.) K’eyembilan, Saul a ta nde mot’a bwam, nu sibise̱ pe̱ ńolo ponda Yehova a po̱sino̱ mo̱ o be̱ kiṅ’a Israel. Nde ese̱le̱ ná kumba na eko̱n ba  londe mo̱ o mulema, nje e tute̱le̱ mo̱ o takise̱ David, moto nu si ta nu be̱ne̱ njo̱m. (1 Samuel 9:20, 21; 10:20-22; 18:7-11) Ombusa ponda David a timbi be̱ mō̱ ńa kiṅ’a bwam ya Israel. Nde na ponda, David pe̱ a bolane̱ doi lao la byanedi bobe. A nangane̱ Batseba munj’a Uria; nde o pula wuta bobe bao, a lom Uria o bwemba ná a bwabe̱.​—2 Samuel 11:1-17.

6, 7. (a) Nje ndol’asu na Yehova e matute̱le̱no̱ biso̱ o bola e? (b) Nje e me̱nde̱ jongwane̱ biso̱ o be̱ sengane̱ to̱ ponda nika ńeno̱ biso̱ ndutu e?

⁶ Di mabola bediedi be mawe̱ na Yehova edube ebanja di to̱ndi mo̱. Kana di to̱ndino̱ Yehova buka to̱ nje na to̱ nja nupe̱pe̱, di mapula bwese̱ mo̱ muńe̱nge̱. (Langa Minia 27:11; Marko 12:29, 30.) Botea pond’a mom’a boso na mut’a boso o mōnda ma Ede̱n, Satan a mapula ná bato ba te̱nge̱ne̱ doi la byanedi la Yehova. Diabolo a mapula ná jo̱nge̱le̱ ná Yehova a si be̱n bwam o langwea biso̱ nje jangame̱nno̱ bola. Nde di bi ná mpoṅ mu. Je jo̱nge̱le̱ diwo̱ na ben byala ná: “Wa, a Sango asu na Loba lasu, o dongame̱n o kusa sesa n’edube na ngińa; ebanja wa nde o weki mambo me̱se̱.”​—Bebīsedi 4:11.

⁷ Ponda o tano̱ muna, ye̱ke̱i te̱ ba lee̱ wa ná o sengane̱ bayedi bo̱ngo̱ to̱ ke̱ o si mapula. Nika pe̱ nde yeno̱ biso̱ baboledi ba Yehova ndutu o be̱ sengane̱ ponda iwo̱. Nde di to̱ndi Yehova di be̱nedi pe̱ mo̱ edube, ońola nika di mabola me̱se̱ o sengane̱ mo̱.  Yesu a boli biso̱ eyembilan. A sengane̱ Yehova to̱ ponda nika e tano̱ mo̱ ndutu. A we̱li so̱ langwea Sango ná: “Nde seto̱ jemea lam, nde lo̱ngo̱ nde di bolane̱.”​—Lukas 22:42; ombwa Maki ma su la kalati 11.

8. O njika mbadi Yehova a madie̱le̱no̱ biso̱ e? (Ombwa edinge̱le̱ “ Senga malea.”)

⁸ Yehova a madie̱le̱ biso̱ o mbadi jita we̱nge̱. K’eyembilan, a boli biso̱ Bibe̱l. A boli pe̱ biso̱ batudu oteten a mwemba. Di malee̱ ná di mabola doi la byanedi la Yehova edube ke̱ di masengane̱ bato a mabolane̱no̱ o die̱le̱ biso̱. Di bangi te̱ jongwane̱ labu, ke̱ di bangi nde bediedi ba Yehova. Ponda Bonaisrael ba te̱nge̱ne̱no̱ Mose, Yehova e̱n ná nika e ta bobe. E ta nde biana ba ta nde ba te̱nge̱ne̱ mo̱.​—Miso̱ngi 14:26, 27; ombwa Maki ma su la kalati 12.

9. Ne̱ni ndolo e me̱nde̱no̱ tute̱le̱ biso̱ o bupe̱ bediedi e?

⁹ Ponda di mabolano̱ doi la byanedi edube, nika e malee̱ pe̱ ná di to̱ndi bonasango na bonańango asu. Dutea te̱ o nje e mabupe̱. Mbeu a ńolo e kwedi te̱, bato ba mongwane̱ ba mabola ebolo mwemba o sunga jita la bato. Ná ba tongwe̱le̱, mō̱ angame̱n die̱le̱ mambo, bane̱ pe̱ ba bupe̱ bediedi bao. Nde ne̱ni e me̱nde̱no̱ be̱ yete̱na moto mō̱ a bangi bupe̱ be bediedi a bola nde nje a mapulano̱ e? To̱ e be̱ nde ná mo̱nge̱le̱ mao me bwam, banga lao la sengane̱ le ná di takise̱ ebolo, pondapo̱, di sengise̱ na mako̱m mao m’ebolo sese. Biso̱ pe̱ di si bupe̱ te̱ bediedi ba Yehova na ba bato bena a bolino̱ doi la byanedi, nika ńe ná e takise̱ bato bape̱pe̱. Di masengane̱ te̱ Yehova, di malee̱ nde ná di to̱ndi bonasango  asu, na ná di mabola pe̱ bete̱sedi ba Yehova edube.​—1 Korinto 12:14, 25, 26.

10, 11. Nje di malano̱ jombwea tatan e?

¹⁰ Nje ye̱se̱ Yehova a mabaise̱no̱ biso̱ ye nde ońola bwam basu. Di lee̱le̱ te̱ edube ońola doi la byanedi o mbia, o mwemba na oboso ba baboledi ba go̱bina, be̱se̱ ba matombwane̱.​—Ndimbisedi 5:16; Roma 13:4; Efeso 6:2, 3; Bonahebe̱r 13:17.

¹¹ Di so̱ṅtane̱ te̱ ońola nje Yehova a mapulano̱ ná di bole bane̱ edube nika e me̱nde̱ jongwane̱ biso̱ o bola nika. Jombweye ne̱ni jeno̱ ná di lee̱le̱ edube o matongo malalo ma longe̱.

12. Ne̱ni mome eno̱ ná a lee̱ ná a mabola doi la byanedi edube e?

¹² Yehova a weki mbia, a bola pe̱ elong’ao te̱  yao ebolo. Moto te̱ a so̱ṅtane̱ te̱ nje Yehova a mengane̱no̱ mo̱, mambo ma madangwa bwam, mbia mwe̱se̱ pe̱ mu tombwane̱. (1 Korinto 14:33) Yehova a te̱se̱ ná mome a be̱ mulopo ma mbia. Nika e mapula nde kwala ná Yehova a mengane̱ mo̱ ná a bongwe munj’ao na bana bao, a die̱le̱ pe̱ babo̱ na ndolo. Mome angame̱n so̱ bola Yehova bolangi ba mbadi a mabongwano̱ babo̱. Mome ńe kriste̱n e muyao na ndolo, a mabongwa pe̱ mbia mao ka ne̱ni te̱ Yesu a bongono̱ mwemba. Mome a boli te̱ nika, a malee̱ nde ná a mabola Yehova edube.​—Efeso 5:23; ombwa Maki ma su la kalati 13.

13. Ne̱ni muto eno̱ ná a lee̱ ná a mabola doi la byanedi edube e?

¹³ Muto ńe kriste̱n pe̱ a be̱n epol’a mweńa na  y’edube. A masue̱le̱ mom’ao kana nun a mabolano̱ ebolo na iwiye̱ o be̱ sango a mbia ńa bwam. A mabola ebolo mwemba na mom’ao o jokwe̱le̱ bana. Mbadi po̱ a mokwe̱le̱no̱ babo̱ o lee̱le̱ edube, ńe nde ná a be̱ babo̱ eyembilan a bwam. (Minia 1:8) A mabola mom’ao edube a sue̱le̱ pe̱ bedomsedi bao. To̱ ponda a titino̱ jo̱nge̱le̱ diwo̱ na mo̱ jombwea lambo, a mateleye̱ besengedi bao o mbad’a bwam na ń’edube. Kriste̱n ńena ni babe̱ na moto nu titi Mboṅ a Yehova e be̱n ndutu tobotobo. Nde yete̱na e mabenga jombwea mom’ao na ndolo e bola pe̱ mo̱ edube, yen ebe mo̱ pe̱ e ná a pula jowe̱ Yehova.​—Langa 1 Petro 3:1.

14. Ne̱ni bana beno̱ ná ba bola doi la byanedi edube e?

¹⁴ Bana be Yehova tiki, ba be̱n pe̱ ńo̱ng’a betatedi na bediedi tobotobo. Bana ba masengane̱ te̱ bayedi babu, ba mabwese̱ babo̱ muńe̱nge̱. Ba mabola te̱ nika ba malee̱le̱ nde Yehova edube ba bwese̱ pe̱ mo̱ muńe̱nge̱. (Minia 10:1) O jita la mbia mome to̱ muto buka te̱ nde a makokise̱ bana. Nika ńe ná e be̱ bayedi na bana ndutu jita. Nde bana be te̱ sengane̱ ba sue̱le̱ pe̱ ńango abu to̱ sango abu, longe̱ labu la mbia di me̱nde̱ be̱ bwam. Nde to̱ e be̱ nde o njika bete̱medi, mbia to̱ mō̱ mu titi ke̱nge̱nge̱. Nde mbia te̱ mwe ná mu be̱ bonam yete̱na elong’ao te̱ e mabupe̱ bediedi ba Yehova. Nika e masesa Yehova, Muweked’a mbia me̱se̱.​—Efeso 3:14, 15.

15. Ne̱ni jeno̱ ná di bola doi la byanedi edube oteten a mwemba e?

¹⁵ Yehova a madie̱le̱ biso̱ tongwea na mwemba  ma kriste̱n, a boli pe̱ Yesu ngińa ńe̱se̱ omo̱ń’ao. (Kolose 1:18) Yesu pe̱ a boli “mūt’a jemea na jangwa” mboṅ a sabangane̱ tumba la Loba o wase. (Mateo 24:45-47) We̱nge̱ “mūt’a jemea na jangwa” e nde Dibe̱le̱ di Madie̱le̱. Dibe̱le̱ di Madie̱le̱ di mabola biso̱ nje yangame̱n o ponda ni te̱nge̱n, o jongwane̱ biso̱ o jouse̱ dube̱ lasu. Batudu, baboledi, na baboledi b’ebondo ba masue̱le̱ myemba ma wase ńe̱se̱, ba makusane̱ pe̱ Dibe̱le̱ di Madie̱le̱ bediedi. Ba bonasango be̱se̱ ba be̱n ebol’a sabangane̱ biso̱. Ba mabola Yehova bolangi ońola mbadi ba malondise̱no̱ y’ebolo. Di mabola so̱ te̱ babo̱ edube, ke̱ je nde bola Yehova edube.​—Langa 1 Tesalonika 5:12; Bonahebe̱r 13:17; ombwa Maki ma su la kalati 14.

16. Ońola nje jeno̱ ná di kwala ná batudu na baboledi ba te̱se̱be̱ nde na mudī-musangi e?

¹⁶ Batudu na baboledi ba mongwane̱ mwemba o benga be̱ jemea na mulatako. Ye mbale̱ ná be nde bato ba titi ke̱nge̱nge̱ ka biso̱. Ne̱ni so̱ ba mapo̱so̱be̱no̱ e? Ba bonasango bangame̱n sa bede̱mo ba mudī bena be maso̱be̱ o Bibe̱l. (1 Timoteo 3:1-7, 12; Tito 1:5-9) Yehova a bolane̱ mudī-musangi o jongwane̱ batiledi ba Bibe̱l o teleye̱ be bede̱mo. Batudu ba makwane̱ Yehova mudī mao musangi ponda ba mombweano̱ moto beno̱ ná ba te̱se̱ ka mutudu to̱ muboledi. Na mbale̱, myemba me nde owas’a bediedi ba Yesu na Yehova. (Bebolo 20:28) Bome bena ba te̱se̱be̱ o sue̱le̱ na jombwea biso̱ be nde jabea di mawe̱ na Loba.​—Efeso 4:8.

17. Nje munańango angame̱nno̱ bola ponda iwo̱ o lee̱le̱ edube e?

 ¹⁷ Ponda iwo̱, ye ná e po̱ ná mutudu to̱ muboledi to̱ mō̱ a titi ná a bole ebolo ewo̱ o mwemba. Bonasango bape̱pe̱ bena ba dubisabe̱ be ná bongwane̱, nde ye pe̱ te̱ ná to̱ mō̱ a titi, munańango e ná a belabe̱ o bola ebolo yena yangame̱n nde bolabe̱ na munasango nu dubisabe̱. Ye te̱ nika, angame̱n so̱ kudumane̱ mulopo mao, na lambo ka wangisi to̱ ekoto. (1 Korinto 11:3-10) Na nika, a malee̱ ná a mabola bete̱sedi ba Yehova jombwea bediedi edube, e be̱ o ndabo a mbia to̱ o mwemba.​—Ombwa Maki ma su la kalati 15.

18, 19. (a) Nje di mokwano̱ o Roma 13:1-7 e? (b) Ne̱ni di mabolano̱ go̱bina edube e?

¹⁸ We̱nge̱, Yehova ese̱le̱ ná manea ma be̱ne̱ doi la byanedi, jangame̱n so̱ bola mo̱ edube. Ma mate̱se̱ mambo o bekombo na o mindi ná ma dangwe bwam; ma mongwane̱ pe̱ bato o londe̱ ńo̱ng’abu iwo̱. Kriste̱n i mabupe̱ bediedi be tilabe̱ o Roma 13:1-7. (Langa.) Di mabola “manea ma be̱n ngińa” edube, di bupe̱ pe̱ mambenda ma ekombo to̱ mundi owe̱ni di majano̱. Ma mambenda me ná ma tapa mbia masu, ebol’asu to̱ mabe̱ne̱ masu. K’eyembilan, di masawa tax, je pe̱ mbale̱ ke̱ di malondise̱ mapapa ma go̱bina. Nde, nje jangame̱nno̱ bola yete̱na go̱bina e baise̱ biso̱ ná di bole lambo di mate̱nge̱ne̱ mambenda ma Loba e? Ńamuloloma Petro a kwali ná: “Yangame̱n o sengane̱ Loba buka bato.”​—Bebolo 5:28, 29.

 ¹⁹ Yete̱na di te̱m oboso ba muboled’a go̱bina kana mukaisedi to̱ polisi, jangame̱n bola mo̱ edube. Beso̱mbe̱ be kriste̱n be mabola balēdi babu edube nikame̱ne̱ pe̱ na bane̱ baboledi b’esukulu. O wum’asu y’ebolo, di mabola sango asu ń’ebolo edube, to̱ e be̱ nde ná bane̱ baboledi ba si mabola nika. Di boli te̱ nika, di membilane̱ nde ńamuloloma Paulo ńena nu boli baboledi ba go̱bina edube, to̱ná nika e tano̱ ndutu ponda iwo̱. (Bebolo 26:2, 25) To̱ e be̱ nde ná bane̱ ba si mabolea biso̱ bwam, di mabenga te̱ nde bola babo̱ edube.​—Langa Roma 12:17, 18; 1 Petro 3:15.

20, 21. Njika tombwane̱ le ná di be̱ yete̱na di boli bane̱ edube e?

²⁰ O wase ńe̱se̱, bato ba si mawe̱le̱ pe̱ bola bane̱ edube. Nde baboledi ba Yehova be diwengisan. Jangame̱n wasa o bola be̱se̱ edube. Di mabupe̱ bediedi ba ńamuloloma Petro ná: “Bola be̱se̱ edube.” (1 Petro 2:17) Di mabola te̱ bane̱ edube, nika e matapa babo̱. Yesu a kwalane̱ biso̱ ná: “Ese̱le̱ mwe̱ne̱n mańu pe̱ mu pańe nikame̱ne̱ oboso ba bato, ná be̱ne̱ bebolo bańu ba bwam, nde ba sese Sango.”​—Mateo 5:16.

²¹ Di malee̱le̱ te̱ edube oteten a ndabo a mbia, oteten a mwemba, na o matongo mape̱pe̱ ma longe̱ lasu, eyembilan asu ya bwam ye ná e tute̱le̱ bane̱ o pula bia Yehova. Di mabola te̱ bane̱ edube, ke̱ Yehova mo̱me̱ne̱ nde di mabolano̱ edube. Nika e mabwese̱ Yehova muńe̱nge̱, e lee̱ pe̱ mo̱ ná di to̱ndi mo̱.