SALOMO a cakino̱ jowē̱ la mbale̱, Israe̱l ńabedi nde kana Yehova a se̱le̱no̱ bīse̱. Mun’ao Rehabeam nu timbane̱ mo̱ a ta njo jita. Nika e bola dom la matumba la Israe̱l di banga bediedi bao di boka janea la pongo, di belabe̱ ná Israe̱l. Matumba mabā ma tiki be̱ jemea na Kiṅe̱ ni ta o kond’a David o Yerusale̱m, ma boka Janea la mikondo di belabe̱ ná Yuda.

Ma manea mabane̱ ma si ta ma bama, ońolana kiṅ’abu i si ta i be̱ne̱ dube̱ i si ta pe̱ to̱ sengane̱. Ndut’a Israe̱l e ta e bita buka ńa Yuda ońolana kiṅ’ao e tute̱le̱ bato o jowē̱ la losango botea o bebayedi. To̱na bebolo ba ngińa ba bato̱pe̱ bedinge̱ kana Elia na Elisa bena ba pumbwe̱le̱ bawedi, Israe̱l e tiki nde timba o nge’ao ńa bobe. O sukan Loba ese̱le̱ ná Asiria e bule̱le̱ di janea la pongo.

Yuda e bati ja buka lambo ka ebwe’a mbu ombusa Israe̱l, nde mo̱ pe̱ e timbi ko̱kisabe̱ na Loba. Ngus’a kiṅ’a Yuda nde i kasi mome̱le̱ ma bato̱pe̱ bedinge̱ ba Loba i keka pe̱ bola ná tumba di timbe na Yehova. K’eyembilan, Kiṅe̱ Yosea a botedi sangise̱ Yuda tongwea na bo̱le̱ jowē̱ la losango na longa la tempe̱l a Yehova peńa. Nipóndá kalat’a Mambemda ma Loba ni se̱le̱ tilabe̱ ni bolabe̱ pe̱ tongwea na Mose e so̱be̱no̱, Yosea a ta a bwa ndutu ninde̱ne̱ nika e bola mo̱ ālane̱ ebol’ao ya bo̱le̱ jowē̱ la losango oboso na ngińa.

Lambo di ta ndutu le nde ná, bátimbane̱ Yosea ba si bupe̱ eyembilan a bwam a ni kiṅe̱. Na Yehova ese̱le̱ ná tumba la Babilon di dumbe Yuda di bule̱le̱ Yerusale̱m na tempe̱l ao. Ba bena bōngi bāla o mbumwa o Babilon. Loba a ta a se̱le̱ bīse̱ ná mu mbumwa mu me̱nde̱ jinda 70 ma mbu. Yuda e comabe̱ nipóndá ńe̱se̱ natē̱ tumba di kusa wonja o timba o mundi mao bupisane̱ dikaki.

Nde kiṅe̱ to̱ po̱ ńa mbia ma David e si wusa pe̱ janea natē̱ janea la Musungedi ńa dikaki, Mesia nu se̱le̱ bīsabe̱ di po̱. Kiṅe̱ jita yena i jai o kond’a janea ńa David o Yerusale̱m i lee̱le̱ ná bato ba titi ke̱nge̱nge̱ ba si dongame̱n o die̱le̱. Bukate̱ Mesia nde a dongame̱n na mbale̱. Yehova a langwea so̱ kiṅe̱ ni sukan ya yi i jai o kond’a janea ńa David ná: “Songwa ekot’ango̱ a kiṅe̱. . . . Nde e si ma ja nika, natē̱ nu nu be̱n doi omo̱ń ao a po̱; na mba na bake̱ mo̱ mo̱.”​—Hesekiel 21:26, 27.

​—Nika e se̱medi o 1 Kiṅe̱; 2 Kiṅe̱; 2 Myango bepasi 10 nate̱na 36; Yeremia 25:8-11.