NE̱NI longe̱ leno̱ na di be̱ yete̱na tumba la mususu na mudied’ao ba bupe̱ Yehova ka Mwaned’abu Ńāsam ba sengane̱ pe̱ mambenda Mao e? Jalabe̱ la mun muedi le̱ne̱ne̱ o pambo a póndá ńa 40 ma mbu ma Janea la Kiṅe̱ Salomo.

Obiana David a ma wo̱ a po̱si mun’ao Salomo ka mutimbane̱ mo̱. Loba a ta a kwalane̱ Salomo o ndo̱ti ná ākwane̱ mo̱ lambo. Na Salomo a baise̱ mo̱ dibie̱ na so̱ṅtane̱ ná a kaise̱ tumba o mbadi ni te̱nge̱n na ńa dibie̱. Yehova a bwa muńe̱nge̱ a bola Salomo mulema ma dibie̱ na ma so̱ṅtane̱. Yehova a kakane̱ pe̱ mo̱ ná yete̱na a tiki be̱ sengane̱, a mabe̱ m’bwaṅ, a be̱ne̱ pe̱ edube na longe̱ la bwaba.

Salomo a ta a biane̱ jita ońola bia lao la kaise̱. O ngedi po̱, bito babā ba ta ba sungane̱ mwe̱nge̱ ma muna mome, mō̱ te̱ a ka ná mo̱ nde e ńango. Na Salomo anea ná muna a domabe̱ bepasi bebā ba bole muto te̱ epasi ewo̱. Mut’a boso emea, nde ńango a muna a so̱so̱me̱ye̱ dibokime̱ne̱ ná ba bole nune̱ muto muna. Wa nde Salomo a so̱ino̱ ná muto nu lee̱le̱ ndedi nde a ta ńango, a bola mo̱ muna. Israe̱l ńe̱se̱ e senga myango ma mbako a mu muka, na tumba le̱se̱ lēmba ná Salomo a ta a be̱ne̱ dibie̱ la Loba.

Ebol’a Salomo ewo̱ ya be bende̱ne̱ be buki be̱se̱ e ta nde longa la tempe̱l a Yehova, ekokot’a mudo̱led’a bolongi o Yerusale̱m yena e ta yángame̱ne̱ bolane̱ ka wuma jowē̱ o Israe̱l. O tele̱ la tempe̱l, Salomo a kane̱ ná: “Ombwa mo̱ń na mo̱ń a mo̱ń ye̱se̱ ba titi ná ba koka wa, ngedi ininga so̱ na nin ndabo ná longino̱!”​—1 Kiṅe̱ 8:27.

Dina la Salomo di ta di camane̱ o mindi mipe̱pe̱, etum nate̱na o Seba, o Arabia. Kiṅ’a muto ńa Seba e ta e po̱ je̱ne̱ edube na m’bwaṅ ma Salomo na was’a pe̱ bia njib’a dibie̱ lao. Ni kiṅ’a muto ńubane̱ dibie̱ la Salomo na m’bwaṅ ma Israe̱l o dime̱ne̱ lena, e sesa Yehova ońol’a kiṅ’a dibie̱ a tese̱no̱. Na mbale̱, bediedi ba Salomo nde be wan m’bwaṅ na musango buka be̱se̱ o Israe̱l a kwaṅ ońol’a minam a kusane̱no̱ Yehova.

Nje ye ndutu ye nde ná, Salomo a si tiki bola mambo bupisane̱ dibie̱ la Yehova. Esibe̱ mo̱ jombwea mbend’a Loba, a ba bebwea ba bito sepo̱n jita lena di ta lowē̱ maloba ma basibi. Bito bao ba pandise̱ mulema mao son a son na Yehova o wala jowē̱ njimbidi. Na Yehova a langwea Salomo ná dongo diwo̱ la janea di me̱nde̱ no̱ngo̱be̱ mo̱. Loba a kwala ná ońola kakane̱ a bolino̱ David, sango a Salomo, epasi ewo̱ bukate̱ nde mbia mao mu me̱nde̱no̱ diane̱. Yehova a tiki tingame̱ o male a ńo̱dino̱ na David ońol’a Janea, to̱ná Salomo a si tano̱ pe̱ sengane̱.

​—Nika e se̱medi o 1 Kiṅe̱, epasi 1 nate̱na 11; 2 Myango, epasi 1 nate̱na 9; Ndimbisedi 17:17.