Mboṅ a Yehova i si masawea batudu babu mo̱ni. Kana o ponda bamuloloma, batudu be nde bato be be̱be̱ na Yehova, bená Mudī-musangi mu te̱se̱no̱ o jombwea “mwemba ma Loba.” (Bebolo 20:28) Batudu be nde bato ba be̱n dube̱ la Yehova di bam, babo̱ nde ba madie̱le̱ ebol’a mwemba. Ba mabola, “seto̱ ońola muse̱ṅ ma bobe nde na mulema mwe̱se̱.” (1 Petro 5:1-3) Njik’ebolo batudu ba mabolano̱ ońol’asu e?

Ba mombwea na tata pe̱ biso̱. Batudu ba mabolane̱ Bibe̱l o die̱le̱, tata, na jongwane̱ mwemba o be̱ be̱be̱ na Yehova. Nika ba bino̱ ná Loba nde a boli babo̱ mu m’bē̱, ba si manea jemea lasu, ba mongwane̱ nde o muńe̱nge̱ masu. (2 Korinto 1:24) Kana mutate̱ mido̱ngi a mombweano̱ dibemba lao, nikame̱ne̱ pe̱ nde batudu ba mombweano̱ mō̱ na mō̱ ńasu te̱ o mwemba.​—Minia 27:23.

Ba mokwe̱le̱ biso̱ ne̱ni bola jemea la Loba. Woki te̱, batudu nde ba madie̱le̱ ndongame̱n ya mwemba o bwam ná dube̱ lasu di bate joua. (Bebolo 15:32) Babo̱ nde ba madie̱le̱ ebol’a dikalo, bongwane̱ pe̱ biso̱ o mbad’a te̱ la dikalo ye̱se̱ ná bam.

Ba membe̱ mō̱ na mō̱ ńasu te̱. Ná mō̱ na mō̱ ńasu te̱ a be̱ne̱ mulatako ma bwam na Yehova, batudu ba mabola biso̱ malea o Ndabo a Janea, ba mape̱pe̱le̱ pe̱ biso̱ o mamboa masu.​—Yakobo 5:14, 15.

O sumo te̱ ebol’abu ya batudu o mwemba, jita la batudu ba be̱n m’bē̱ ma jombwea mbia mabu na wasea babo̱ da la buńa, nika e mabaise̱ babo̱ ponda. Jangame̱ne̱ bola ba bonasango edube, ońola ebol’a ngińa ba mabolano̱ oteten a mwemba.​—1 Tesalonika 5:12,  13.

• Njik’ebolo batudu ba be̱nno̱ o mwemba e?

• Ne̱ni batudu ba malee̱le̱no̱ ná ba to̱ndi biso̱ e?