Mboṅ a Yehova i biane̱ jita. Bō̱ be moyo mo̱ngo̱ ma mboa, o mabomane̱ pe̱ bō̱ o don, o ebolo, o esukulu, o nge’a tongo to̱so̱ o nge’a eyidi. Mo̱, o mákwalea na mō̱ ońola Bibe̱l e? Nde ba nja so̱ jeno̱ na mbale̱ e? Ońola nje di mate̱no̱ dikalo e?

Je nde ka bane̱ bato be̱se̱. Kana o eyidi myele meno̱ ńai na ńai, Mboṅ a Yehova i be̱n ńai na ńai a bete̱medi. Bō̱ ba si ta bowe̱ Loba, bape̱pe̱ ba wu o bebasi. Nde mō̱ na mō̱ ńasu te̱ emedi o wasa belēdi ba Bibe̱l, obiana di mabe̱ Mboṅ a Yehova. (Bebolo 17:11) Nje jokono̱ e tapi biso̱ o mulema, na biso̱ di po̱so̱ esibe̱ mińakisan o jowe̱ Yehova Loba.

Jokwa la Bibe̱l di mawanea biso̱ tombwane̱. Ka mbel’a moto ńe̱se̱, biso̱ pe̱ di be̱n yasu ndutu. Nde di so̱i ná, dangwa bupisane̱ bete̱sedi ba Bibe̱l di wanedi biso̱ minam jita. (Myenge 128:2, 3) Ońola nika nde di malangweano̱ bape̱pe̱ mambo ma bwam di mokwano̱ o Bibe̱l tongwea na dikalo.

Di madangwa nde bupisane̱ bete̱sedi ba Loba. Bete̱sedi di mokwano̱ o Bibe̱l be mongwane̱ biso̱ o be̱ne̱ ja la bwam, o bola bape̱pe̱ edube, o be̱ mbale̱ na muyao. Be bete̱sedi be mabola ná di be̱ne̱ longe̱ la mbia la bwam, beka pe̱ biso̱ o be̱ne̱ bedangwedi ba bobe. Bia ná “Loba a titi ndando” di mongwane̱ biso̱ ná di be̱ mbia mulati o wase ńe̱se̱ tongwea na belēdi básu. Eyem’a bwambo to̱ politik ba si maba biso̱. Je tobotobo seto̱ ońola nje jeno̱, nde ońola mulatako masu.​—Bebolo 4:13; 10:34, 35.

• Nje Mboṅ a Yehova i be̱nno̱ ka mbel’a moto ńe̱se̱ e?

• Nje jokwa la Bibe̱l di mawaneano̱ biso̱ e?