JOKWA 35

Ne̱ni jeno̱ ná di no̱ngo̱ bedomsedi ba bwam

OKA

Biso̱ be̱se̱ di be̱n bedomsedi di mano̱ngo̱no̱. Jita la be bedomsedi be ná be be̱ bwam to̱ bobe ońol’asu na ońola mulatako masu na Yehova. K’eyembilan je ná di be̱ne̱ ná di po̱se wuma di majano̱, ebolo di mabolano̱ to̱ nga di me̱nde̱ ba to̱ ke̱m. Di no̱ngi te̱ bedomsedi ba bwam, je ná di be̱ne̱ longe̱ le bonam di do̱lisane̱ pe̱ Yehova.

1.Ne̱ni Bibe̱l ńeno̱ ná ńongwane̱ wa o no̱ngo̱ bedomsedi ba bwam e?

Obiana o mano̱ngo̱ bedomsedi, kane̱ Yehova ná ongwane̱ wa, o lange pe̱ Bibe̱l ná o bie ne̱ni a me̱ne̱no̱ mambo. (Langa Minia 2:3-6.) O bete̱medi bō̱, Yehova a mabola mbenda ńe ná bwē. Bupe̱ la ni mbenda nde le bedomsedi ba bwam weno̱ ná o no̱ngo̱.

Nde nje bola yete̱na Bibe̱l e si boli mbenda ńe ná bwē ni malangweye̱ wa nje bola e? Yehova a me̱nde̱ te̱ nde die̱le̱ wa “o ngea o do̱lino̱ dangwa.” (Yesaya 48:17) Ne̱ni e? Tongwea na bete̱sedi ba Bibe̱l. Bete̱sedi ba Bibe̱l be nde mbale̱ i si matukwe̱, yena i mongwane̱ o so̱ṅtane̱ nje Loba a mo̱nge̱le̱no̱ na ne̱ni a masengano̱. Ponda di malangano̱ myango ma Bibe̱l mō̱, di mabe̱ di so̱ṅtane̱ jo̱nge̱le̱ la Loba jombwea lambo diwo̱. Di so̱ṅtane̱ te̱ jo̱nge̱le̱ la Yehova, je ná di no̱ngo̱ bedomsedi be mabwese̱ mo̱ muńe̱nge̱.

2.Njika mambo wangame̱nno̱ jombwea obiana o mano̱ngo̱ bedomsedi e?

Bibe̱l e makwala ná: “Ńajangwa a mame̱me̱ matanga mao.” (Minia 14:15) Nika e mapula nde kwala ná obiana di mano̱ngo̱ bedomsedi, jangame̱n no̱ngo̱ ponda o dutea ońola nje di malano̱ po̱so̱. Ońola lambo te̱ weno̱ ná o po̱so̱, baise̱ wame̱ne̱ ná: ‘Njika bete̱sedi ba Bibe̱l neno̱ ná na bolane̱ e? Na po̱si te̱ din lambo, mo̱ di me̱nde̱ wanea mba musango ma teten e? Ne̱ni bedomsedi bam be me̱nde̱no̱ tapa bane̱ e? Di buki me̱se̱, mo̱ be me̱nde̱ bwese̱ Yehova muńe̱nge̱ e?’—Ndimbisedi 32:29.

Yehova a be̱n bwam o langwea biso̱ nje ye bwam na nje ye bobe. Di mokwa te̱ o bia mambenda mao na bete̱sedi bao di no̱ngo̱ pe̱ ngaban o bupe̱ mo̱, je nde jokwe̱le̱ doi lasu la mulema. Doi la mulema le nde dibie̱ le biso̱ oteten o jemba bwam na bobe. (Roma 2:14, 15) Doi la mulema lena lokwabe̱le̱ bwam di me̱nde̱ jongwane̱ biso̱ o no̱ngo̱ bedomsedi ba bwam.

ALA O NJIBA

Okwa ne̱ni bete̱sedi ba Bibe̱l na doi lasu la mulema ba mongwane̱no̱ biso̱ o no̱ngo̱ bedomsedi.

3. Ese̱le̱ ná Bibe̱l e die̱le̱ wa

Ne̱ni bete̱sedi ba Bibe̱l beno̱ ná be die̱le̱ biso̱ ke̱ di mano̱ngo̱ bedomsedi e? Ombwa SINIMA, nde lo kwaleye pe̱ ońola myuedi mi mabupe̱.

SINIMA: Ese̱le̱ ná bete̱sedi ba Bibe̱l be die̱le̱ wa (5:54)

Nje ye wonj’a bepo̱sedi e?
Ońola nje Yehova a bolino̱ biso̱ wonj’a bepo̱sedi e?
Nje a bolino̱ biso̱ o jongwane̱ biso̱ o bolane̱ wonj’asu ńa bepo̱sedi o mbad’a bwam e?

Ná we̱ne̱ bete̱sedi ba Bibe̱l bō̱, langa Efeso 5:15, 16. Ombusa nika kwalea ońola ne̱ni weno̱ ná o “bolane̱ ponda bwam” o . . .

langa Bibe̱l ponda te̱.
be̱ mome to̱ mut’a bwam, muyed’a bwam na mun’a bwam.
jukea o ndongame̱n.

4. Okwe̱le̱ doi lo̱ngo̱ la mulema ná o no̱nge bedomsedi ba bwam

Mbenda ńe ná bwē jombwea lambo ńe te̱ o Bibe̱l, no̱ngo̱ la bedomsedi ba bwam le ná di be̱ lambo di wam. Nde e mabe̱ nde ne̱ni ke̱ mbenda e titi e? Ombwa SINIMA, nde lo kwaleye pe̱ ońola myuedi mi mabupe̱.

SINIMA: “Kombe̱ doi la mulema di sangi” (5:13)

O ni sinima, njika mambo nu munańango a bolino̱ ná okwe̱le̱ doi lao la mulema, a no̱nge pe̱ bedomsedi be mabwese̱ Yehova muńe̱nge̱ e?

Ońola nje di s’angame̱nno̱ baise̱ bane̱ ná ba no̱nge bedomsedi o epol’asu e? Langa Bonahebe̱r 5:14, nde lo kwaleye pe̱ ońola min myuedi:

To̱ná yeno̱ ná e be̱ lambo di bo̱bi o baise̱ bane̱ ná ba no̱nge bedomsedi o epol’asu, nje biso̱me̱ne̱ jangame̱nno̱ we̱le̱ jemba e?
Nje ye ná yongwane̱ wa o jokwe̱le̱ doi lo̱ngo̱ la mulema na o no̱ngo̱ bedomsedi ba bwam e?

Kapo̱ ka duta la mundi, doi lasu la mulema di madie̱le̱ biso̱ o longe̱

5. Bola doi la mulema la bane̱ edube

Bato be̱se̱ ba si me̱nde̱ no̱ngo̱ milemlem ma bedomsedi. Ne̱ni jeno̱ ná di bola doi la mulema la bane̱ edube e? Jombweye bete̱medi beba:

Bete̱medi 1: Munańango mō̱ nu to̱ndi pene̱ boso alo o mwemba mupe̱pe̱, wuma nika e matakise̱no̱ jita la bonańango.

Langa Roma 15:1 na 1 Korinto 10:23, 24, nde lo kwaleye pe̱ ońola min myuedi:

Bupisane̱ ben bepasi, nje nu munańango eno̱ ná a po̱so̱ o bola e? Nje o me̱nde̱no̱ bola yete̱na we na moto ńena doi lao la mulema di mabangane̱ mo̱ ná a bole lambo lena lo̱ngo̱ doi la mulema di si mabangano̱ e?

Bete̱medi 2: Munasango mō̱ a bi ná Bibe̱l e si mabanga ńo̱ la belam n’ede̱mo, nde mo̱ a po̱si ná a si mańo̱. Alo o ndema wuma bonasango bape̱pe̱ beno̱ o ńo̱ belam.

Langa Mulangwedi 7:16 na Roma 14:1, 10, nde lo kwaleye pe̱ ońola min myuedi:

Bupisane̱ ben bepasi, nje nu munasango eno̱ ná a po̱so̱ o bola e? Nje o me̱nde̱no̱ bola yete̱na we̱n moto nupe̱pe̱ a mabola lambo lena doi lo̱ngo̱ la mulema di mabangane̱no̱ wa ná o bole e?

Njika matanga ma mongwane̱ o no̱ngo̱ bedomsedi ba bwam e?

1. Kane̱ Yehova ná ongwane̱ wa o po̱so̱ nje bola.—Yakobo 1:5.

2. Po̱ngo̱ muwaso o Bibe̱l na o kalati i se̱medi o Bibe̱l ná o so̱ bete̱sedi be ná bongwane̱ wa. We pe̱ ná o baise̱ kriste̱n yena you malea.

3. Dutea ne̱ni bedomsedi bo̱ngo̱ be me̱nde̱no̱ tapa doi lo̱ngo̱ la mulema na doi la mulema la bane̱.

BATO BA MAKWALA NÁ: “Longe̱ lam di, na mabola nde nje na to̱ndino̱, na si mombwea nje bane̱ ba mo̱nge̱le̱no̱.”

Ońola nje jangame̱nno̱ jombwea nje Loba a mo̱nge̱le̱no̱, name̱ne̱ pe̱ na nje bane̱ ba mo̱nge̱le̱no̱ e?

EBONGOLO

Di mano̱ngo̱ bedomsedi ba bwam ke̱ di so̱ṅtane̱ ne̱ni Yehova a me̱ne̱no̱ mambo, jombwea pe̱ nga bebolo basu be me̱nde̱ jongwane̱ bane̱ to̱ takise̱ babo̱.