Yesu a kwali ná kriste̱n yangame̱n dubisabe̱. (Langa Mateo 28:19, 20.) Nde dubise̱ le nde nje e? Nje pe̱ moto angame̱nno̱ bola ná a dubisabe̱ e?

1. Dubise̱ le nde nje e?

Eyala ná “dubise̱” e mawa nde n’eyal’a Grikia e mapule̱ kwale̱ ná “duba” o madiba. Ponda Yesu a dubisabe̱no̱, ba lo̱ise̱ nde mo̱ o mo̱pi ma Yordan, na mo̱ ‘a wa o madiba.’ (Marko 1:9, 10) Mulemlem pe̱, kriste̱n ya mbale̱ i madubisabe̱ te̱, i malo̱isabe̱ nde o madiba.

2. Nje moto a malee̱no̱ ponda a madubisabe̱no̱ e?

Ponda moto a madubisabe̱no̱, a malee̱ nde ná a mábake̱ mo̱me̱ne̱ na Yehova Loba. Ne̱ni moto a mabake̱no̱ mo̱me̱ne̱ na Loba e? Obiana moto a madubisabe̱, a makane̱ Yehova ke̱ e muso̱lo̱ki, o langwea mo̱ ná a mapula bolea mo̱ longe̱ lao le̱se̱. A makakane̱ o jowe̱ Yehova mo̱me̱ne̱ mō̱ na we̱le̱ pe̱ jemea lao o epol’a boso o longe̱ lao. A mapo̱so̱ o ‘to̱bo̱ mo̱me̱ne̱ na bupe̱’ belēdi ba Yesu n’eyembilan ao. (Mateo 16:24) Ponda moto a mabake̱no̱ mo̱me̱ne̱ na Loba a dubisabe̱ pe̱, a matimba diko̱m la Yehova na la bato bape̱pe̱ bena ba mowe̱ mo̱.

3. Nje moto angame̱nno̱ bola obiana a madubisabe̱ e?

Obiana o madubisabe̱, wangame̱n jokwa o bia Yehova, o be̱ne̱ye̱ pe̱ mo̱ dube̱ di bam. (Langa Bonahebe̱r 11:6.) Nika so̱ṅtane̱ lo̱ngo̱ na dube̱ lo̱ngo̱ ba mabatano̱ ńaka, nika pe̱ nde o mabatano̱ to̱ndo̱ Yehova. O me̱nde̱ so̱ be̱ne̱ ńo̱ng’a te̱ye̱ bane̱ dikalo na ńo̱ng’a bupe̱ bete̱sedi ba Loba. (2 Timoteo 4:2; 1 Yohane 5:3) Ponda moto a madie̱le̱no̱ longe̱ lao kana “yangame̱nno̱ o Sango na do̱lisane̱ mo̱ o mambo me̱se̱,” e ná a no̱ngo̱ bedomsedi ba bake̱ mo̱me̱ne̱ na Loba na dubisabe̱ pe̱.—Kolose 1:9, 10. a

 ALA O NJIBA

4. Belēdi di mabusane̱no̱ o dubise̱ la Yesu

Langa Mateo 3:13-17 ná wokwe mambo mape̱pe̱ jombwea dubise̱ la Yesu. Ombusa nika kwalea ońola min myuedi:

• Mo̱ Yesu a dubisabe̱ nde ke̱ e mwe̱nge̱ ma muna e?

• Ne̱ni a dubisabe̱no̱ e? Mo̱ ba myase̱le̱ nde mo̱ madiba buka te̱ e?

Yesu a botedi nde ebol’a tobotobo Loba a tano̱ a bola mo̱ o wase, ponda a dubisabe̱no̱. Langa Lukas 3:21-23 na Yohane 6:38, nde lo kwaleye pe̱ ońola min myuedi:

• Ombusa dubise̱ lao, njik’ebolo Yesu a we̱le̱no̱ o epol’a boso o longe̱ lao e?

5. Dubise̱ le nde tanga weno̱ ná o po̱ngo̱

Bake̱ la ńolo na dubise̱ be ná ba bwesane̱ bo̱ngo̱ o bebotedi. Nde na ponda we ná o timba be̱ mbaki ná we ná o no̱ngo̱ be bedomsedi ba mweńa. Ná we̱ne̱ bato bō̱ bena ba boli nika, ombwa SINIMA.

SINIMA: Be̱ne̱ mulatako na Yehova (1:11)

Langa Yohane 17:3 na Yakobo 1:5, nde lo kwaleye pe̱ ońola min myuedi:

• Nje ye ná yongwane̱ moto o boṅsane̱ ońola dubise̱ e?

• 1
• 2

1. Di mabake̱ nde biso̱me̱ne̱ na Yehova ke̱ di kakane̱ o muka o bolea mo̱ longe̱ lasu le̱se̱

2. O pond’a dubise̱ lasu, di malee̱ bane̱ ná di bake̱ biso̱me̱ne̱ na Loba

 6. Dubise̱ di mabola ná di timbe elong’a mbia ma Yehova

Ponda di madubisabe̱no̱, di matimba nde elong’a mbia mwena mu lati o wase ńe̱se̱. Di dube̱ nde milemlem ma mambo, di madangwa pe̱ nde bupisane̱ milemlem ma bete̱sedi, e be̱ to̱ we̱ni jeno̱ to̱ mbadi di kokisabe̱no̱. Langa Myenge 25:14 na 1 Petro 2:17, nde lo kwaleye pe̱ ońola min myuedi:

• Bupisane̱ ben bepasi, nje moto a matombwane̱no̱ ponda a madubisabe̱no̱ e?

 EBONGOLO

Yesu a kwali ná kriste̱n yangame̱n dubisabe̱. Obiana moto a madubisabe̱, angame̱n be̱ne̱ye̱ Yehova dube̱ di bam, dangwa kaponda bete̱sedi bao, na bake̱ mo̱me̱ne̱ na Loba.

Ndimbisedi

• Dubise̱ le nde nje e, ońola nje pe̱ leno̱ mweńa e?

• Njika mulatako mwe oteten a bake̱ la ńolo na dubise̱ e?

• Nje moto angame̱nno̱ bola obiana a mabake̱ mo̱me̱ne̱ na Loba a dubisabe̱ pe̱ e?

BATA WASA

Okwa nje dubise̱ leno̱ na nje di titino̱.

“Dubise̱ le nde nje e?” (Tema o mulomba)

Ombwea pe̱te̱ matanga moto angame̱nno̱ po̱ngo̱ oboso ba dubise̱.

“Ndolo na masoma o be̱nedino̱ Yehova ba me̱nde̱ tute̱le̱ wa o dubisabe̱” (Njongo a Betatedi, So̱ṅe̱ 2020)

Langa nje e tute̱le̱ moto mō̱ o dubisabe̱.

“Ba ta ba pula ná mbame̱ne̱ na be̱ mbaki ná mbale̱ ni” (Njongo a Betatedi, Ngo̱nde̱ 1, 2013)

Ombwea ońola nje dubise̱ leno̱ tanga la mweńa, na ne̱ni weno̱ ná o boṅsane̱ ońol’ao.

“Mo̱ nangame̱n dubisabe̱ e?” (Myuedi beso̱mbe̱ be mabaise̱no̱—Malabe̱ mena ma mongwane̱, Do̱ 2, dongo 37)