Wena o bia njika Janea di e?— Di Janea le nde Janea la Loba lena di me̱nde̱ bole̱ ná wase e timbe paradisi. O to̱ndi jokwa mambo jita jombwea di Janea e?—

Janea te̱ di be̱n Kiṅe̱ ni madie̱le̱ bato b’ekombo ao. O bi nja ńe Kiṅ’a Janea la Loba e?— Ńe nde Yesu Kristo. A maja nde o mo̱ń. Son a ponda a mabe̱ Kiṅ’a bato be̱se̱ o wase! O mo̱nge̱le̱ ná di mabe̱ muńe̱nge̱ ponda Yesu a me̱nde̱no̱ janea wase ńe̱se̱ e?—

Di mabe̱ muńe̱nge̱ jita! O Paradisi, bato ba si me̱nde̱ pe̱ jana o ekombo to̱ wala o bila. Moto te̱ a me̱nde̱ to̱ndo̱ nune̱. To̱ moto a si me̱nde̱ boa, to̱ wo̱. Mot’a ndima a me̱nde̱ je̱ne̱, mot’a ndo̱ki a me̱nde̱ senga, bato ba eboki ba me̱nde̱ ńa mīla na wema. Moto te̱ a me̱nde̱ be̱ne̱ da jita. Ńama i me̱nde̱ be̱ mako̱m na yine̱ ńama, i be̱ pe̱ mako̱m na biso̱. Bato ba wedi ba me̱nde̱ pe̱te̱ timba o longe̱. Jita la bome na bito ka Rebeka, Rahab, David na Elia bena o sengino̱ dina o nun muna kalati, ba me̱nde̱ pe̱te̱ timba be̱ longe̱!  O me̱nde̱ to̱ndo̱ kwala na babo̱ ponda ba me̱nde̱no̱ timba o longe̱ e?—

Yehova a to̱ndi wa, a mapula pe̱ ná o be̱ muńe̱nge̱. O bengi te̱ o jokwa jombwea Yehova na sengane̱ pe̱ mo̱, o me̱nde̱ be̱ longe̱ o bwindea o paradisi ni do̱li jita! Nika nde o mapulano̱ e?—