Yakobo a kobisane̱ Bibe̱l na je̱ne̱ lena di mongwane̱ biso̱ o bia pat’a moto jeno̱. (Yak. 1:22-25) Ne̱ni jeno̱ ná di bolane̱ Bibe̱l ka je̱ne̱ e?

Langa mo̱ o njiba. Yete̱na jombo biso̱me̱ne̱ o je̱ne̱ na musungan, ye ná e po̱ ná di se̱ne̱ mambo jangame̱nno̱ po̱ngulane̱. Ná je̱ne̱ mambo ma mot’asu ńa teten mena jeno̱ ná di po̱ngulane̱, e me̱nde̱ be̱ bwam ná di lange Eyal’a Loba o njiba.

Po̱ngulane̱ nde mambo mo̱ngo̱ se̱to̱ ma bane̱. Di si te̱se̱ te̱ je̱ne̱ bwam o jombwa boso basu, je ná di sukan je̱ne̱ moto nupe̱pe̱. Mulemlem pe̱, je ná di langa Bibe̱l nde je̱ne̱ mawuse̱ ma moto nupe̱pe̱. Ni mbad’a bola e si me̱nde̱ jongwane̱ biso̱ o po̱ngulane̱ mawuse̱ masu.

Bia je̱ne̱ nje e te̱nge̱n. Jombo te̱ je̱ne̱ nde di tika nde je̱ne̱ mambo ma si male̱, je ná di sukan bo̱bo̱. E mapula so̱ ná di be̱ skwe̱ ke̱ di malanga Eyal’a Loba na ninka ná di s’engane̱ biso̱me̱ne̱ buka nje Yehova a m’engane̱no̱ biso̱.—Yak. 3:17.