Bwanga bo si mabo̱
Lodun la bato lo we̱le̱ malea ma bete̱sedi ba Bibe̱l di kwaledino̱ o mongo ma se̱le̱ na din o ebolo, lo boli pe̱ me̱se̱ o dubwa mo̱nge̱le̱ ma ndando o milema mabu. Nje ye mbale̱ ye nde ná, di titi ná di sumwa mo̱nge̱le̱ me̱se̱ ma ndando na biso̱me̱ne̱. Mo̱ nik’e mapula so̱ nde kwala ná ndando e si me̱nde̱ bo̱ ná bambam e?
Janea le ke̱nge̱nge̱
Manea ma bonabato ma si we̱li sumwa bato mo̱nge̱le̱ ma ndando o mulema. Nik’e mapula so̱ nde kwala ná janea to̱ diwo̱ di titi ná di bo̱le̱ ndando e?
Janea lena le ná di tongwe̱le̱ o bo̱le̱ ndando jangame̱n
-
1. Bola ná bato ba tukwe mo̱nge̱le̱ mabu name̱ne̱ pe̱ na nje ba masengano̱ ońola bane̱.
-
2. Bo̱le̱ bebango be mabole̱ ná ba ba we̱le̱be̱ ndando ba be̱ ndando.
-
3. Be̱ne̱ banedi ba bwam ba mombweye̱ bato be̱se̱ be owas’abu kapo̱.
-
4. Wana jalatane̱ oteten a bato ba matumba me̱se̱.
Bibe̱l e mabola biso̱ mbaki ná Loba a te̱se̱ ni ńai a janea. Di mabelabe̱ ná “janea la Loba.”—Lukas 4:43.
Jombweye nje di janea di me̱nde̱no̱ wana.
1. Esukul’a bede̱mo ba bwam
“Bonabato ba [me̱nde̱ jokwa] bia te̱me̱ la sim.”—YESAYA 26:9.
“Epum’a te̱me̱ la sim e mabe̱ nde musango, te̱me̱ la sim di maya nde wumse̱ na mbaki bebe be̱se̱.”—YESAYA 32:17.
Nika ńe nde ná nje e? Janea la Loba di me̱nde̱ jokwe̱le̱ bato nje e te̱nge̱n. Ponda bato ba mokwano̱ diwengisan le oteten a te̱me̱ la sim na si te̱me̱ la sim, mo̱nge̱le̱ ba be̱nedino̱ bane̱ ma matukwa. Bato be̱se̱ ba me̱nde̱ jemba ná nje e te̱nge̱n o bola ye nde ná ba to̱nde pat’a bato ye̱se̱.
2. Bo̱lise̱
Loba “a me̱nde̱ tuta miso̱di me̱se̱ o miso̱ mabu; kwedi e si me̱nde̱ pe̱ be̱, male̱bo to̱ musea to̱ sese ba si me̱nde̱ pe̱ be̱; ebanja mambo maboso ma mátomba.”—BEBĪSEDI 21:4.
Nika ńe nde ná nje e? Janea la Loba di me̱nde̱ bo̱le̱ sese ye̱se̱ si te̱me̱ la sim di wanno̱. Ba bena ba takise̱no̱ ba si me̱nde̱ pe̱ be̱ne̱ njo̱m o ne̱nge̱ malinga.
3. Banedi ba bwam
“A si me̱nde̱ kaise̱ kaponda byombwedi ba miso̱, to̱ bakwa kaponda sengasengane̱ la matoi, a me̱nde̱ nde kaise̱ bayaṅabe̱ kaponda te̱me̱ la sim, na bakwea batakedi b’ekombo ka ni te̱nge̱n.”—YESAYA 11:3, 4.
Nika ńe nde ná nje e? Yesu Kristo, Kiṅ’a Janea la Loba le o mo̱ń, a me̱nde̱ die̱le̱ wase o ka ni te̱nge̱n ni titi pe̱ to̱ ndando. Yesu a si mombwea ekombo ewo̱ buka yene̱, e pe̱ ná a bola ná bato ba wase ńe̱se̱ ba bupe̱ mbend’ao.
4. Jalatane̱
Janea la Loba di mokwe̱le̱ bato ná ba “be̱ nde eyal’ewo̱, [ba] be̱ne̱ mulemlem ma ndolo, [ba] be̱ pe̱ mulema mō̱ na jo̱nge̱le̱ diwo̱.”—FILIPI 2:2.
Nika ńe nde ná nje e? Jalatane̱ di me̱nde̱ be̱ oteten a bato be owas’a Janea la Loba di si me̱nde̱ be̱ eladingo̱m a jalatane̱. Ba me̱nde̱ nde be̱ “mulema mō̱” ebanja ba me̱nde̱ to̱ndo̱ne̱ mō̱ na nune̱ na mbale̱.
