OŃOLA BABAEDI
3: Edube
NJE NIKA E MAPULANO̱ KWALA
Kalati Ten Lessons to Transform Your Marriage, mo̱ ná, “Babaedi ba mabolane̱le̱ edube ba mombwea mō̱ na nune̱, to̱ o ponda ba titino̱ jo̱nge̱le̱ diwo̱. Ba si mamińane̱, moto te̱ a ja na mo̱me̱ne̱. Nde, ba mabenga kwalisane̱le̱ jombwea mitakisan mabu. Ba malambe̱ye̱ mō̱ na nune̱ toi n’edube, ba wasa pe̱ mwano mu do̱lisane̱ babo̱ babane̱ o buka mi mitakisan.”
BETE̱SEDI BA BIBE̱L: “Ndolo . . . e si mapulise̱ bwam bao mo̱me̱ne̱.”—1 Korinto 13:4, 5.
“Bola la munj’am edube di mapula nde kwala ná na mabwane̱ bede̱mo bao muńe̱nge̱, na si mabola pe̱ to̱ lambo le ná di takise̱ mo̱ to̱ diba lasu.”—Mika.
OŃOLA NJE NIKA ŃENO̱ MWEŃA
Edube e titi te̱, ekwali oteten a babaedi e matimba nde ya misan, ya byala ba bobe, na ya mayaṅako. Bamuwaso ba makwala ná ma mambo nde ma mawane̱ kwed’a diba.
“Sa la munj’ango̱, jangwea la mo̱ make̱ṅ ma byala, na make̱ko, ba me̱nde̱ nde bola ná a si be̱ne̱ne̱ pe̱ mo̱me̱ne̱ lakisane̱, to̱ mbaki, ba ńamse̱ pe̱ diba lo̱ngo̱.”—Brayan.
NJE WENO̱ NÁ O BOLA
KEKA WAME̱NE̱
Ombwea byala na beboledi bo̱ngo̱ ońola woki po̱. Nde o baise̱ na wame̱ne̱ ná:
-
‘Ngedi ininga na saino̱ nu na baino̱ e, ngedi ininga pe̱ na sesino̱ mo̱ e?’
-
‘O njika mbad’a tobotobo na lee̱le̱no̱ nu na baino̱ edube e?’
KWALA NA NU O BAINO̱
-
Njika beboledi na byala be mabole̱ ná mō̱ te̱ e̱ne̱ ná a mabolabe̱ edube e?
-
Njika beboledi na byala be mabole̱ ná mō̱ te̱ e̱ne̱ ná a si mabolabe̱ edube e?
MALEA
-
Tila mbadi ilalo o me̱nde̱no̱ to̱ndo̱ bolabe̱ edube. Bola ná nu o baino̱ a bole mulemlem. Bińo̱ wengisane̱le̱ mapapa nde lo we̱ ná lo leane̱le̱ edube o nje mō̱ te̱ a mengane̱no̱ nune̱.
-
Tila bede̱mo ba bwam ba nu o baino̱. Nde o langweye mo̱ nate̱na njika dime̱ne̱ o to̱ndino̱ be bede̱mo bao.
“Bola la mom’am edube di mapula nde kwala ná na malee̱le̱ o bebolo ná e mba mweńa, na mapula pe̱ bonam bao. E titi ponda ye̱se̱ lambo la tobotobo; ponda iwo̱ ngus’a mambo ma malee̱le̱ edube ende̱ne̱.”—Megan.
To̱ti l’edube di titi so̱ je̱ne̱ la wame̱ne̱ ka mō̱ nu bi bole̱ bane̱ edube; nde ná nu o baino̱ e̱ne̱ ná a mabolabe̱ edube.
BETE̱SEDI BA BIBE̱L: “Bińo̱ bo̱to̱ so̱ nded’a mulema, bwam, sibise̱ la ńolo, pī, we̱lisane̱.”—Kolose 3:12.
