Ke̱m, Bibe̱l to̱ myango ba si makwala ná ni ńai a lambo e bolane̱.

Mbadi mu mwemba mu tukwabe̱no̱ o Bibe̱l iwo̱ e mabola nde ná moto o̱nge̱le̱ ná o ebwe’a mbu yaboso, bato ba ta ba dubisabe̱ ońola bawedi. K’eyembilan Bibe̱l iwo̱ i makwala nde ná: “Yete̱na bepumbwedi be titi, ońola nje bō̱ ba dubisabe̱no̱ ońola bawedi e?”

Nde, maka nje bamabie̱ ba Bibe̱l ba nin wase baba ba kwalino̱. Dr. Gregory Lockwood a kwali ná mboṅ to̱ po̱ e titi o Bibe̱l to̱ o myango ni malee̱ ná moto mō̱ a dubisabe̱ o epol’a moto nupe̱pe̱ nu ta nu máwo̱. Mulēdi Gordon D. Fee pe̱ alo nde o mu musulan me̱ne̱. Mo̱ ná Bibe̱l to̱ myango ba si mabola eyembilan a ni ńai a dubise̱. A bati ná nik’e si maso̱be̱ to̱ wuma o Male̱ ma peńa, na ná mboṅ to̱ po̱ e titi ni malee̱ ná kriste̱n ya ebwe’a mbu yaboso to̱ bebasi bena be busi ombusa kwed’a bamuloloma ba boli ni ńai a lambo.

Bibe̱l e makwala ná bokwedi ba Yesu ‘ba timbise̱ matumba me̱se̱ bokwedi, ba dubise̱ babo̱ . . . , na lee̱ babo̱ o ne̱nge̱ mambo me̱se̱’ Yesu anedino̱ babo̱. (Mat. 28:19, 20) Obiana moto a madubisabe̱, angame̱n se̱le̱ jokwa bia Yehova na Mun’ao, nde a dube̱ pe̱ babo̱. Moto ńena nu wedi a titi ná a bola nika; to̱ kriste̱n ńena ńe longe̱ pe̱ e titi ná e bola nika ońol’ao.​—Mul. 9:5, 10; Yohane 4:1; 1 Kor. 1:14-16.

Nje so̱ Paulo a tano̱ a pula kwala e?

Kriste̱n iwo̱ i ta i kwala ná bawedi ba si me̱nde̱ pumbwabe̱le̱. (1 Kor. 15:12) Paulo a lee̱ babo̱ ná ba si te̱nge̱n. A kwalane̱ babo̱ ná ‘e nde ńa kwedi buńa te̱.’ Ye mbale̱, a ta a dia longe̱. Nde to̱ na mbeu a ńolo ye̱se̱ a tano̱ a kusa, a ta mbaki ná ombusa kwed’ao, a me̱nde̱ pumbwabe̱le̱ o be̱ longe̱ o mo̱ń ka Yesu.​—1 Kor. 15:30-32, 42-44.

Bato ba Korinto ba ta bangame̱n so̱ṅtane̱ ná be̱ la kriste̱n ńo̱kisabe̱ nik’e ta nde e pula kwala ná ba me̱nde̱ se̱le̱ lembe̱ mitakisan, ba wo̱, to̱ biana ba mapumbwabe̱le̱. “Dubisabe̱ o Kristo Yesu” nika ńe nde “dubisabe̱ . . . o kwed’ao.” (Rom. 6:3) Nik’e ta nde e pula kwala ná ka Yesu, ba wusa lembe̱ mitakisan na kwedi ná ba pumbwabe̱le̱.

Buka mbu miba ombusa dubisabe̱ la Yesu o madiba, a kwalane̱ bokwedi bao ná: “Dubise̱ . . . mba na madubisabe̱no̱ lo me̱nde̱ dubisabe̱ mo̱.” (Marko 10:38, 39) Yesu a si ta a mádubisabe̱ o madiba. A ta nde a kwala ná be̱ lao la Loba jemea di me̱nde̱ nde o lenea mo̱ kwedi. Paulo a tili ná bo̱kisabe̱ ba me̱nde̱ ‘taka mwemba na mo̱ na mbale̱, ná [ba] be̱ pe̱ o bosangi mwemba na mo̱.’ (Rom. 8:16, 17; 2 Kor. 4:17) Babo̱ pe̱ ba ta so̱ bangame̱n wo̱ ná ba pumbwabe̱le̱ ońola longe̱ o mo̱ń.

E te̱nge̱n so̱ ná byala ba Paulo be timbisabe̱ nde ná: “E titi te̱ nika, ke̱ nje so̱ ba be o dubisabe̱ o be̱ bawedi ba me̱nde̱no̱ bola e? Yete̱na bawedi ba si mapumbwa, ke̱ ońola nje ba madubisabe̱no̱ so̱ o be̱ bawedi e?”