1. Ne̱ni baboledi ba Loba ba ponda ni tombi ba tano̱ ba kusa ngińa e?

 EYAL’A LOBA e mabe̱ e kwalea ońola bato ba dube̱ ka bato bena be ngińa. Nde seto̱ ponda ye̱se̱ nde ba bato ba tano̱ be̱ne̱ ná be ngińa. K’eyembilan, ponda iwo̱ kiṅe̱ David a ta a be̱ne̱ ngiń’a mulema biana a te̱se̱be̱ nde “o mudongo ma ngińa,” nde ponda ipe̱pe̱ a ta a bo̱bo̱ na mo̱ a “mańme̱ye̱.” (Mye. 30:8) Simson pe̱ a ta a be̱ne̱ ngiń’a betańsedi ponda mudī ma Loba mu tano̱ mu po̱ye̱ mo̱. Nde a ta a bia ná a si be̱n te̱ ngińa ni mawe̱ na Loba, a me̱nde̱ “bo̱bo̱, [a] timba ka moto nupe̱pe̱.” (Bak. 14:5, 6; 16:17) Yehova mo̱me̱ne̱ nde a ta a bola ba bato ba dube̱ ngińa.

2. Ońola nje ńamuloloma Paulo a kwalino̱ ná niponda a bo̱bino̱ nde eno̱ ngińa e? (2 Korinto 12:9, 10)

² Ńamuloloma Paulo a ta a bia ná a be̱n ńo̱ng’a ngińa ni mawe̱ na Yehova. (Langa 2 Korinto 12:9, 10.) Ka jita lasu, Paulo a ta a be̱ne̱ maboa ma matakise̱ mo̱. (Gal. 4:13, 14) Ponda iwo̱, e ta mo̱ ndutu o bola nje ye bwam. (Rom. 7:18, 19) Yine̱ ponda pe̱, a ta a taka oteten ao, a ta pe̱ a bwa bo̱ngo̱ ońola nje ye ná e po̱ye̱ mo̱. (2 Kor. 1:8, 9) Nde niponda Paulo a tano̱ a bo̱bo̱, nde a tano̱ ngińa. Ne̱ni e? Yehova a ta a bola Paulo ngińa ni ta ni pula mo̱ o lembe̱ mitakisan a tano̱ a be̱ne̱.

3. Njika myuedi di me̱nde̱no̱ jalabe̱ o din jokwa e?

³ Yehova a kakane̱ ná a me̱nde̱ pe̱ bola biso̱ ngińa. (1 Pet. 5:10) Nde di titi ná di kusa ni ngińa yete̱na biso̱me̱ne̱ di si po̱ngi miwe̱n. Di no̱nge eyembilan: o be̱n te̱ disi la da, ná o bwane̱ di da muńe̱nge̱, wangame̱n toa mo̱ na dia o wana mo̱ o mudumbu. Na nika nde di da di me̱nde̱no̱ wanea  wa tombwane̱. Mulemlem pe̱, Yehova a le̱le̱m o bola biso̱ ngińa ni mapule̱ biso̱, nde jangame̱n bola mambo mō̱ ná di kuse mo̱. Tongwea na nje Yehova a mabolano̱ biso̱ ngińa e? Nje pe̱ jangame̱nno̱ bola ná di kuse ni ngińa e? Ná jalabe̱ mi myuedi, di me̱nde̱ jombwea ne̱ni Yehova a bolino̱ baboledi bao balalo ba ponda ni tombi ngińa, nika ńe nde muto̱ped’a mudī Yona, Maria ńango a Yesu, na ńamuloloma Paulo. Di me̱nde̱ pe̱ je̱ne̱ ne̱ni Yehova a mabolane̱no̱ milemlem ma mambo o jembe̱ baboledi bao o nin we̱nge̱.

4. Ne̱ni jeno̱ ná di kusa ngińa ni mawe̱ na Yehova e?

⁴ Mbadi po̱ jeno̱ ná di kusa ngińa ni mawe̱ na Yehova ńe nde ná di kane̱ mo̱. Yehova a me̱nde̱ jalabe̱ mika masu na bola biso̱ “ngińa ni pakapakan.” (2 Kor. 4:7) Je pe̱ ná di kusa ngińa ke̱ di langi Eyal’ao di dutea pe̱ ońol’ao. (Mye. 86:11) Mwe̱ndi ma Yehova mwena mwe o Bibe̱l mwe “ngińa.” (Bon. 4:12) O kane̱ te̱ Yehova o langa pe̱ Eyal’ao, o me̱nde̱ kusa ngińa ni mapule̱ ná o be̱ titimbe̱, o kombe̱ muńe̱nge̱ mo̱ngo̱, o londise̱ pe̱ ebol’a ndutu e bakabe̱ wa. Jombweye ne̱ni Yehova a bolino̱ muto̱ped’a mudī Yona ngińa.

5. Ońola nje e tano̱ e pula muto̱ped’a mudī Yona ngiń’a mulema e?

⁵ E ta e pula muto̱ped’a mudī Yona ngiń’a mulema. A bo bo̱ngo̱ o wala owe̱ni Yehova a tano̱ a loma mo̱, na mo̱ a ńa mīla ala o epolo epe̱pe̱. Nik’e boli ná mo̱ na bato ba ta o bo̱lo̱ na mo̱, ba wusa o wo̱ ponda mùdi munde̱ne̱ mu tombino̱ o munja. Ponda ba pimbino̱ mo̱ o munja, ekokot’a ńam’a munja e ta e mińa mo̱, na Yona a ja o dibum lao wuma mwititi mu tano̱. O mo̱nge̱le̱ ná Yona a ta nde a senga ne̱ni e? Mo̱, o̱nge̱le̱ nde ná a me̱nde̱ wo̱, to̱ ná Yehova a caki mo̱ e? Ye̱ke̱i te̱ Yona a ta a bwa bo̱ngo̱ jita.

6. Bupisane̱ Yona 2:1, 2, 7, nje e boli Yona ngińa niponda a tano̱ o dibum la ni ńama e?

⁶ Nje Yona a bolino̱ ná a kuse ngińa niponda a tano̱ muso̱lo̱ki o dibum la ni ńama e? A kane̱ Yehova. (Langa Yona 2:1, 2, 7.) To̱ná a si sengane̱no̱ Yehova, Yona a ta mbaki ná kana ate̱le̱no̱ Yehova a me̱nde̱ senga muka mao. Yona a no̱ngi pe̱ ponda o dutea ońola bepasi ba Betiledi bena a tano̱ a málanga. Ońola nje di makwalano̱ nika e? Ońolana o muka mao mwena mu maso̱be̱ o kalat’a Yona bepasi 2, a bolane̱ milemlem ma byala mi maso̱be̱ o kalat’a Myenge. (K’eyembilan, kobisane̱ Yona 2:2, 5 na Myenge 69:2; 86:7.) Je so̱ ná di kwala ná Yona a ta a bia be bepasi bwam. Ponda a dutedino̱ ońol’ao o ndut’ao, be bepasi be boli mo̱ mbaki ná Yehova a me̱nde̱ jongwane̱ mo̱. Ombusa Yehova sunga mo̱, Yona a ta be̱be̱ o londise̱ ebolo Yehova a tano̱ a bake̱ mo̱.—Yona 2:10–3:4.

7-8. Ne̱ni munasango mō̱ ńa Taiwan a kusino̱ ngińa o lembe̱ mitakisan mao e?

⁷ Eyembilan a Yona ye ná yongwane̱ biso̱ ponda di be̱nno̱ mitakisan. K’eyembilan, munasango Zhiming b ńa Taiwan, a ta a be̱ne̱ maboa ma ngińa. Mbia mao mu ta pe̱ mu takise̱ mo̱ jita ońola dube̱ lao. A kusane̱ Yehova ngińa tongwea na muka na jokwa. Mo̱ ná: “Ponda iwo̱, mitakisan mi mabola ná mulema mu paname̱ mba, ńai na titino̱ to̱ ná nokwa.” Nde a si masibise̱ mā. Mo̱ ná: “Na mase̱le̱ nde kane̱ Yehova. Denge̱ na mabo̱to̱ besengan na mba na senga myenge masu ma Janea. Ponda  iwo̱ mo̱me̱ne̱, na malo̱ngo̱ mo̱ na doi di sibi natē̱ mulema mu siba mba. Ombusa nika, na mabotea so̱ jokwa.”

⁸ Zhiming a kusi ngińa o lembe̱ bete̱medi ba ndutu tongwea na jokwa la mo̱me̱ne̱. K’eyembilan, ponda a tano̱ a wa o domabe̱, do̱kita diwo̱ di langwedi mo̱ ná kana maya mao ma sibino̱ jita, e me̱nde̱ pula ná ba tombe̱le̱ mo̱ maya. O bulu obiana a madomabe̱, Zhiming a ta a langa myango ma munańango mō̱ ńena nu ta o mulemlem ma bete̱medi. Maya ma nu munańango ma ta ma siba buka mao, nde to̱ na nika a s’emedi ná ba tombe̱le̱ mo̱ maya, a we̱li pe̱ ja bwam. Mi myango mi boli Zhiming ngińa o benga be̱ jemea.

9. Yete̱na kekise̱ di wo̱lise̱ wa, nje weno̱ ná o bola e? (Ombwa pe̱ maduta.)

⁹ Mo̱ e mápo̱ye̱ wa ná o pond’a kekise̱, mulema mu pungweye wa ńai o titino̱ to̱ ná o kane̱ Yehova e? To̱ ná o wo̱le ńai o si be̱nno̱ to̱ ngudi o jokwa e? O si dimbea ná Yehova a bi bete̱medi bo̱ngo̱ bwambwam. To̱ o bolane̱ so̱ nde ngus’a byala buka te̱ o muka mo̱ngo̱, be̱ mbaki ná a me̱nde̱ bola wa nje e mapule̱ wa ná te̱ite̱i. (Efe. 3:20) Yete̱na ye wa ndutu o langa na o jokwa ońolana o si be̱n ja la bwam, o wo̱li to̱ ná teten e pungwedi wa, we ná o senga bolanga ba Bibe̱l to̱ ba kalat’asu. We pe̱ ná o senga myenge masu, to̱ jombwa sinima po̱ o jw.org. Yehova a mapula bola wa ngińa; a me̱nde̱ pe̱ bola nika yete̱na o kane̱ mo̱, o wasa pe̱ malabe̱ ma mika mo̱ngo̱ o Bibe̱l na o mane̱ mambo a mabolano̱ biso̱.

10. Ne̱ni bonasango na bonańango asu ba membe̱no̱ biso̱ e?

¹⁰ Yehova e ná a bolane̱ bonasango na bonańango asu o jembe̱ biso̱. Be ná ba be̱ “lo̱ko̱mea” lasu ponda di be̱nno̱ mitakisan to̱ ponda yeno̱ biso̱ ndutu o londise̱ ebolo e bakabe̱ biso̱. (Kol. 4:10, 11) Di be̱n ńo̱ng’a mako̱m tobotobo o pond’a “ndutu.” (Min. 17:17) Ponda di wo̱lino̱, bonasango asu be ná bongwane̱ biso̱, ba lo̱ko̱ biso̱, bembe̱ pe̱ biso̱ ná di benge bolea Yehova na jemea. Jombweye ne̱ni bato bape̱pe̱ bembe̱no̱ Maria, ńango a Yesu.

11. Ońola nje e tano̱ e pula Maria ngińa e?

 ¹¹ E ta e pula Maria ngińa ná a bole jemea la Yehova. Keka te̱ dutea ne̱ni mulema mu tano̱ mu pungwea Maria ponda ange̱l Gabriel e bīse̱no̱ mo̱ ná a me̱nde̱ be̱ deme̱ to̱ná a si tano̱ a babe̱. A si ta a mábongwa bana to̱ buńa, nde a ta angame̱n bongwa muna nu me̱nde̱ timbe̱ Mesia. E wusa pe̱ be̱ ndutu jita ná a tele̱ye̱ ewand’ao Yose̱f ná e deme̱, nde ke̱ a si bedi nangane̱ mome tomtom.—Lukas 1:26-33.

12. Bupisane̱ Lukas 1:39-45, ne̱ni Maria a kusino̱ ngińa ni ta ni pula mo̱ e?

¹² Ne̱ni Maria a kusino̱ ngińa ni ta ni pula mo̱ o londise̱ yen ebol’a tobotobo na ya ndutu e? A wasi jongwane̱. K’eyembilan, a baise̱ Gabriel ná a langweye mo̱ ne̱ni mambo ma me̱nde̱no̱ tomba. (Lukas 1:34) Ombusa nika, Maria a sungi o wala o “ekombo a midongo” ya Yuda, omboa mbia mao Elisabet. Di lo̱ndo̱ di ta pe̱ muse̱ṅ jita. Elisabet a sesi Maria, Yehova a tute̱le̱ pe̱ mo̱ o langwa edinge̱ e membe̱ jombwea muna nu ta Maria o dibum. (Langa Lukas 1:39-45.) Maria a kwali ná Yehova a “lee̱le̱ ngiń’a enam’ao.” (Lukas 1:46-51) Yehova a boli Maria ngińa tongwea na Gabriel na Elisabet.

13. Nje e tombi ponda munańango mō̱ ńa Bolivia a baise̱no̱ jongwane̱ la bonasango na bonańango ao e?

¹³ Kapo̱ ka Maria, wa pe̱ we ná o kusa ngińa tongwea na bonasango na bonańango. Ni ngińa nde e tano̱ e pula ná munańango Dasuri nu maje̱ o Bolivia a kuse. E ta e so̱be̱ ná sango ao a be̱n diboa lena di si mabo̱; ponda ingedino̱ o do̱kita, Dasuri a jai na mo̱ ná ombweye mo̱. (1 Tim. 5:4) Nik’e si ta lambo di bo̱bi. A kwali ná: “Ngedi jita, na ta nde na senga biana na titi pe̱ ná nalane̱ y’ebolo oboso.” O bebotedi, a si wasi jongwane̱ la bane̱. A tele̱ye̱ ná: “Na si ta na pula takise̱ bonasango na bonańango. Na ta nde na bolane̱ jo̱nge̱le̱ ná Yehova nde a me̱nde̱ waneye̱ mba jongwane̱ di mapule̱ mba. Nde na timbi so̱ṅtane̱ ná kana na si tano̱ na wasa jongwane̱ la bane̱, na ta nde na bambe̱ mitakisan mam na mbame̱ne̱.” (Min. 18:1) Dasuri a no̱ngi so̱ bedomsedi ba tilea mako̱m mao mō̱, a tele̱ye̱ babo̱ bete̱medi bao. A kwali ná: “Na si be̱n byala o tele̱ye̱ nate̱na o njika dikala bonasango na bonańango am bembe̱no̱ mba. Ba wan da o do̱kita, ba langea pe̱ mba bepasi ba Bibe̱l be membe̱. E se̱ bwam yeno̱ o bia ná di titi muso̱lo̱ki e! Je nde belongi ba mbia munde̱ne̱ ma Yehova. Bonasango asu ba mapula pe̱ o jongwane̱ biso̱, o jeya na biso̱ ponda di matakano̱, na o jembe̱ biso̱.”

14. Ońola nje jangame̱nno̱ jemea jongwane̱ la batudu e?

¹⁴ Mbadi nipe̱pe̱ Yehova a mabolano̱ biso̱ ngińa ńe nde tongwea na batudu. Be nde mabea a mabolane̱no̱ o jembe̱ na o lo̱ko̱ biso̱. (Yes. 32:1, 2) O be̱n so̱ te̱ lambo di matakise̱ wa, langwea mo̱ mutudu mō̱. O si banga pe̱ to̱ jongwane̱ lena batudu ba mawaneano̱ wa. Yehova e ná a bola wa ngińa tongwea na babo̱.

15. Njika dipita le tiki ońola kriste̱n ye̱se̱ e?

¹⁵ Makaki ma Bibe̱l me ná ma bola biso̱ dipita na ngińa o benga bolea Yehova. (Rom. 4:3, 18-20) Kriste̱n iwo̱ i be̱n dipita la be̱ longe̱ o bwindea o mo̱ń, ipe̱pe̱ i be̱n dipita la be̱ longe̱ o bwindea o wase ni me̱nde̱ timbe̱ paradisi. Dipita lasu di mabola biso̱ ngińa o lembe̱ mitakisan, o  langwa myango ma bwam, na o londise̱ bebolo basu o mwemba. (1 Tes. 1:3) Dipita a tano̱ a be̱ne̱ nde di boli ńamuloloma Paulo ngińa.

16. Ońola nje e tano̱ e pula ńamuloloma Paulo ngińa e?

¹⁶ E ta e pula Paulo ngińa. O leta a tiledino̱ mwemba ma Korinto, a langisane̱ mo̱me̱ne̱ n’ewa ya weya yena e bo̱bi. A kwali ná a ta endea, a ta o mańaka, a ta a takisabe̱, a kwesabe̱ pe̱ o wase. Ngedi iwo̱, a subi na kwedi. (2 Kor. 4:8-10) Paulo a tili nde be byala o lo̱ndo̱ lao di londe̱ malalo. Ombusa mo̱ tila be byala, a kusi pe̱te̱ mitakisan ma ngińa jita. Dimuti di kwedi mo̱ o ńolo, a damabe̱le̱, indi o munja, a we̱le̱be̱ pe̱ o beboa.

17. Bupisane̱ 2 Korinto 4:16-18, nje e boli Paulo ngińa o lembe̱ mitakisan e?

¹⁷ Paulo a kusi ngińa o lembe̱ ebanja a ta a te̱se̱ miso̱ o dipita lao. (Langa 2 Korinto 4:16-18.) A langwedi bonasango ba Korinto ná to̱ mot’ao ń’eboko “a ńama nde,” a si mabo̱bo̱. Paulo a ta nde ombwa kie̱le̱ ni maye̱. Dipita lao la be̱ longe̱ o bwindea o mo̱ń di ta di be̱ne̱ “dime̱ne̱ la bodilo di pakapakan.” Di dipita di ta tiki o miso̱ ma Paulo kańena a ta be̱be̱ o lembe̱ to̱ njika mitakisan nde, ná a we̱le̱ kusa bowe̱n bao. Paulo a ta a dutea ońola dipita lao, nik’e ta so̱ e bola ná e̱ne̱ nde biana mot’ao ńa teten a “matimba peńa buńa na buńa.”

18. Ne̱ni dipita ońola kie̱le̱ ni maye̱ di bolino̱ Tihomir na mbia mao ngińa e?

¹⁸ Dipita di mabola munasango Tihomir ńa Bulgaria ngińa. Mimbu to̱ mininga we̱nge̱, munańango ao nusadi Zdravko a wedi o aksidan. Nik’e bwese̱ Tihomir ndutu jita. Ná ba we̱le̱ lembe̱ ni ndutu, mo̱ na mbia mao ba mabe̱ bo̱nge̱le̱ nje e me̱nde̱ tombe̱ o bepumbwedi. A matele̱ye̱ ná: “Di mabe̱ k’eyembilan di kwalea ońola epolo di me̱nde̱no̱ kasa Zdravko, njika da di me̱nde̱no̱ jipe̱ ońol’ao, ba nja di me̱nde̱no̱ bele̱ o ndema laboso di me̱nde̱no̱ po̱ngise̱ ombusa bepumbwedi bao, na nje di me̱nde̱no̱ langwea mo̱  jombwea mińa misukan.” Tihomir a kwali ná te̱se̱ miso̱ o dipita labu di mabola mbia mao ngińa o benga lembe̱ na jenge̱le̱ ponda ńena Yehova a me̱nde̱no̱ pumbwe̱le̱ munańango ao.

19. Nje weno̱ ná o bola ná wouse̱ dipita lo̱ngo̱ e? (Ombwa pe̱ duta.)

¹⁹ Ne̱ni weno̱ ná wouse̱ dipita lo̱ngo̱ e? O be̱n te̱ dipita la be̱ longe̱ o bwindea o wase, langa k’eyembilan bepasi ba Bibe̱l be makwaleye̱ ońola paradisi, o duteye pe̱ ońol’ao. (Yes. 25:8; 32:16-18) O̱nge̱le̱ ne̱ni longe̱ di me̱nde̱no̱ be̱ o was’a peńa. E̱ne̱ wame̱ne̱ oten. Keka dutea banja weno̱ je̱ne̱, myumban weno̱ senga, na besengedi o be̱nno̱. O jongwane̱ wa o dutea ne̱ni paradisi e me̱nde̱no̱ be̱, ombwa maduta o kalat’asu ma malee̱ paradisi to̱ musiki mō̱ mu lati na bedinge̱dinge̱ oteten a min: O was’a peńa, Nik’e ta po̱n nde be̱be̱, to̱ Imagine ce jour. Di ko̱lo̱ngo̱ne̱ te̱ jo̱nge̱le̱ dipita lasu la was’a peńa, di me̱nde̱ je̱ne̱ ná ndut’asu i “wam,” ye pe̱ nde ońola “son a ponda.” (2 Kor. 4:17) Dipita Yehova a bolino̱ wa di me̱nde̱ bola wa ngińa.

20. To̱ o ponda di me̱ne̱no̱ ná di bo̱bi, ne̱ni jeno̱ ná di kusa ngińa e?

²⁰ To̱ o ponda di me̱nde̱no̱ je̱ne̱ ná di bo̱bi, “na Loba nde di me̱nde̱no̱ bola bebolo ba ngum.” (Mye. 108:14) Yehova a máboṅsane̱ nje ye̱se̱ e mapule̱ wa ná o kusane̱ mo̱ ngińa. O be̱n so̱ te̱ ńo̱ng’a jongwane̱ ná o londise̱ ebolo ewo̱, o lembe̱ mitakisan to̱ ná o kombe̱ muńe̱nge̱ mo̱ngo̱, kane̱ Yehova na iwiye̱ o wase pe̱ bediedi bao tongwea na jokwa la wame̱ne̱. Emea jongwane̱ la bonasango na bonańango. Be̱ne̱ ko̱lo̱ngo̱ne̱ o jo̱nge̱le̱ dipita lo̱ngo̱ ońola kie̱le̱ ni maye̱. Na nika, o me̱nde̱ ‘jembame̱ na ngińa ńe̱se̱ kaponda ngum a bosangi ba [Loba] o be̱ titimbe̱ ńe̱se̱ na we̱lisane̱.’—Kol. 1:11.