Mana nde Bonaisrael ba dedino̱ jita o 40 ma mbu ba tombise̱no̱ o eyaṅ. (Bbu. 16:35) Yehova a boli pe̱ babo̱ lokwale ngedi iba. (Bbu. 16:12, 13; Mis. 11:31) Nde Bonaisrael ba ta pe̱ ba be̱ne̱ ngus’a mambo ipe̱pe̱ ba tano̱ ba da.

K’eyembilan, ponda iwo̱ Yehova a ta a die̱le̱ tumba lao o “wuma ba mawumse̱no̱,” owe̱ni ba tano̱ ba be̱ne̱ madiba ma ńo̱ na lambo la da. (Mis. 10:33) Epolo ewo̱ oteten a ben e ta e belabe̱ ná Elim, “wuma dom la tongo na iba na musamba ma male̱nde̱ ba tano̱;” man ma ta nde ye̱ke̱i te̱ male̱nde̱ ma beńe̱nge̱ń. (Bbu. 15:27) Kalati po̱ ńena ni makwaleye̱ ońola myele ma Bibe̱l e makwala ná le̱nde̱ la beńe̱nge̱ń, lena “di mapumeye̱ o ńai na ńai a bepolo, nde le bwele bo mabole̱ da jita o eyaṅ; di le̱nde̱ di mabola lodun la bato da, mula na wum’a mulo̱lo̱ko̱.”

E me̱ne̱n ná Bonaisrael ba te̱m pe̱ o epolo ende̱ne̱ be̱be̱ na nje e mabelabe̱ we̱nge̱ ná Tongo a Feiran. a Kalati po̱ ni makwaleye̱ ońola mindi ma Bibe̱l e makwala jombwea ni tongo to̱ mu mpo̱lo̱lo̱ ná “ńe bwaba ba 130 kilometa, mo̱ pe̱ nde ńe bwaba, mpesa, e biane̱ pe̱ buka yine̱ tongo ye̱se̱ ya Sinai.” Ni kalati e bati pe̱ ná moto a dango te̱ 45 ma kilometa jasumwe̱ la mulopo ma ni tongo, a matunge̱ o epol’a mpesa ewo̱ e mabelabe̱ ná Feiran yena ye bwaba ba 4.8 kilometa; y’epolo e be̱n male̱nde̱, e maso̱be̱ pe̱ o lambo ka 610 meta omo̱ń a dime̱ne̱ la munja. Ye mpesa kańena ba langisan mo̱ na mōnda ma Ede̱n. Botea pond’a kwaṅ, lokoli la male̱nde̱ lena lo maso̱be̱ oten lo tute̱le̱ bato jita o po̱ boka o wa wuma.

Ponda basumwe̱no̱ o Egipto, Bonaisrael balane̱ m’bo̱ndo̱ ma bewolo, beboki, name̱ne̱ pe̱ na mbasi na mula yen ebe. Mbale̱ ńe nde ná ma mambo ma si wusa jinda. Bato balane̱ pe̱ “mabemba mande̱ne̱ ma mido̱ngi na ńaka.” (Bbu. 12:34-39) Nde kana longe̱ di tano̱ ndutu jita o eyaṅ, ye̱ke̱i te̱ byembe jita be wedi. Bonaisrael ba dedi pe̱ dongo la byembe. O be̱n pe̱ be bena be bolabe̱ ka mabea, yen ebe ońola maloba ma mpoṅ. b (Bebolo 7:39-43) Nde to̱ na nika,  Bonaisrael ba ta te̱ nde ba be̱ne̱ mabemba ma byembe; ben byala Yehova a langwedino̱ babo̱ ponda ba si lee̱le̱no̱ dube̱ nde be mabole̱ ná di kwale nika: “Bana bańu pe̱ ba me̱nde̱ be̱ batate̱ byembe etum a mwane̱i ma mbu o yen eyaṅ.” (Mis. 14:33) Nik’e ta so̱ e bola ná ba be̱ne̱ miliki na ńama o da ponda iwo̱, nde nik’e si wusa dongame̱n o dese̱ lambo ka lodun la bato lolalo etum a 40 ma mbu. c

Owe̱ni byembe be tano̱ be so̱ da na madiba e? d O ni ponda, e me̱ne̱n ná mbua e ta e yo̱le̱ jita o eyaṅ, myele pe̱ mi ta jita. Kalati Étude perspicace des Écritures, Volume 1 e makwala ná 3 500 la mbu we̱nge̱, “madiba ma ta o Arabia jita buka we̱nge̱. Di bi nde nika ońolana o nin we̱nge̱ di maso̱ oten tongo a njiba yena yanji, owe̱ni madiba ma tano̱ ma sulea kwaṅ.” To̱ na nika ńe̱se̱, y’eyaṅ e ta te̱ nde wum’a ngońa na ya maladi. (Ndi. 8:14-16) Ye̱ke̱i te̱, esibe̱ madiba Yehova a tano̱ a bola babo̱ o mbad’a betańsedi, Bonaisrael na byembe babu ba wusa nde wo̱.—Bbu. 15:22-25; 17:1-6; Mis. 20:2, 11.

Mose a langwedi Bonaisrael ná Yehova a ta nde a dese̱ babo̱ na mana “o lee̱ [babo̱] ná seto̱ ońola bewolo mo̱me̱ne̱ nde moto a mabe̱no̱ longe̱, nde a mabe̱ nde longe̱ ońola to̱ nje e mabuse̱ o mudumbu ma Yehova.”—Ndi. 8:3.