1-2. Ne̱ni bō̱ ba me̱ne̱no̱ pond’a yengane̱le̱ e?

 POND’A yengane̱le̱ e mabwesane̱ muńe̱nge̱ jita. Yete̱na we o yengea moto ońola diba, ye̱ke̱i te̱ o mapula ná mambo ma dangwe bwam. Nika pe̱ nde mambo ma tombino̱ ońola bato jita. Tina, a munańango mō̱ nu maje̱ o Etiopia mo̱ ná: “Na bwane̱ ponda biso̱ na mom’am di tano̱ di yengane̱le̱ muńe̱nge̱ jita. Di ta di kwalea ońola mambo ma mweńa, nde di ta pe̱ di yo̱ lo̱ jita. Na ta bonam ponda na so̱ṅtane̱no̱ ná na so̱i moto na to̱ndino̱, ńena nu to̱ndi pe̱ mba.”

² Alessio, munasango mō̱ nu maje̱ o Holand mo̱ ná: “Na ta na bwa muńe̱nge̱ o jokwa o bia munj’am niponda di tano̱ di yengane̱le̱, nde di ta pe̱ di be̱ne̱ mitakisan.” O din jokwa di me̱nde̱ kwalea ońola mitakisan mō̱ bato be o yengane̱le̱ beno̱ ná ba be̱ne̱, na bete̱sedi ba Bibe̱l bō̱ be ná bongwane̱ babo̱ o tongwe̱le̱. Di me̱nde̱ pe̱ je̱ne̱ ne̱ni bane̱ o mwemba beno̱ ná ba sue̱le̱ bato be o yengane̱le̱ ońola diba.

JANDA LA POND’A YENGANE̱LE̱

3. Janda la pond’a yengane̱le̱ le nde ná nje e? (Minia 20:25)

³ To̱ná pond’a yengane̱le̱ e mabwesane̱no̱ muńe̱nge̱, ńe pe̱ nde tanga la mweńa di malane̱ o diba. O buńa babu ba diba, babaedi ba mabola kakane̱ oboso ba Yehova ná ba me̱nde̱ to̱ndo̱ne̱ na leane̱le̱ edube etum te̱ beno̱ longe̱. Obiana di  mabola to̱ njika kakane̱, jangame̱n se̱le̱ dutea bwambwam. (Langa Minia 20:25.) Nika ńe pe̱ mbale̱ ońola kakane̱ di mabolano̱ buńa ba diba. Ponda mome na muto beno̱ yengane̱le̱, nik’e mongwane̱ babo̱ o biane̱le̱ na o no̱ngo̱ bedomsedi ba bwam. Be bedomsedi be ná be be̱ ná ba mabane̱ to̱ ná ba membe̱ mulatako mabu. Bato bena be o yengane̱le̱ bembe̱ te̱ mulatako mabu, nik’e si mapula kwala ná ba si tongwe̱le̱. Nde nik’e malee̱ nde ná pond’a yengane̱le̱ ńongwane̱ babo̱ o no̱ngo̱ bedomsedi ba bwam.

4. Ońola nje jangame̱nno̱ be̱ne̱ je̱ne̱ la mambo di te̱nge̱n jombwea pond’a yengane̱le̱ e?

⁴ Ye mweńa ná bamilamba ba so̱ṅtane̱ ná bato baba be te̱ o yengane̱le̱ ye nde ná ba bie nga ba mapula bane̱ to̱ ke̱m. Ba be̱n te̱ di je̱ne̱ la mambo di te̱nge̱n, ba si me̱nde̱ botea yengea moto yete̱na ba si be̱n ńo̱ng’a ba mo̱ to̱ babe̱ na mo̱. Nde seto̱ bamilamba buka te̱ nde bangame̱n be̱ne̱ di je̱ne̱ la mambo di te̱nge̱n jombwea pond’a yengane̱le̱. Biso̱ be̱se̱ jangame̱n be̱ne̱ mo̱. Bō̱ ba mo̱nge̱le̱ k’eyembilan ná bato be te̱ o yengane̱le̱, bangame̱n nde bane̱ ye̱ke̱i te̱. Njika ngińa nika ńeno̱ ná e be̱ne̱ omo̱ń a kriste̱n ye mulamba e? Melissa, munańango mō̱ ńe mulamba nu maje̱ o Amerika mo̱ ná: “Munasango na munańango be te̱ o yengane̱le̱, bato bō̱ ba mengane̱ nde babo̱ ná ba bane̱ ye̱ke̱i te̱. Nik’e mabola so̱ ná bato bō̱ ba mabenga yengane̱le̱ to̱ be̱ne̱ nde ná mambo ma titi dangwa oteten abu. Bape̱pe̱ be mulamba ba mabanga yengea moto ná bambam. Nika ńe̱se̱ e matakisane̱ jita.”

BIŃO̱ WASA O BIANE̱LE̱ BWAM

5-6. Nje bato be o yengane̱le̱ ońola diba bangame̱nno̱ wasa o bia mō̱ te̱ jombwea nune̱ e? (1 Petro 3:4)

⁵ Yete̱na we o yengea moto ońola diba, nje e me̱nde̱ jongwane̱ wa o bia nga bińo̱ langame̱n bane̱ to̱ ke̱m e? Bińo̱ wasa o biane̱le̱ bwam. Pondapo̱ o wasi o bia mambo mō̱ jombwea nune̱ moto obiana o mabotea yengea mo̱. Nde tatan o be̱n epolo o bia ne̱ni nu moto eno̱ na mbale̱. (Langa 1 Petro 3:4.) Ponda weno̱ o yengea moto, we ná o bata bia ne̱ni mulatako mao na Yehova mweno̱, bede̱mo bao na mbad’ao ńa je̱ne̱ mambo. Na ponda wangame̱n we̱le̱ jalabe̱ myuedi ka min: ‘Mo̱ nu moto a me̱nde̱ be̱ mwenj’a diba ńa bwam ońol’am e?’ (Min. 31:26, 27, 30; Efe. 5:33; 1 Tim. 5:8) ‘Mō̱ ńasu te̱ e ná a to̱ndo̱ nune̱, ombwea pe̱ mo̱ ka nje te̱ e mapulano̱ e? Mō̱ ńasu te̱ e ná a  we̱lisane̱ mabo̱bo̱ ma nune̱ e?’ b (Rom. 3:23) Niponda leno̱ o yengane̱le̱ lo s’angame̱n dimbea din to̱ti la mweńa: Nje ye mweńa e titi ná lo be̱ne̱ milemlem ma bede̱mo, nde ná lo we̱le̱ so̱ṅtane̱le̱ to̱ na mawengisan me oteten ańu.

⁶ Njika mambo mape̱pe̱ wangame̱no̱ bia jombwea nune̱ moto ponda bińo̱ leno̱ o yengane̱le̱ e? Obiana besengedi bo̱ngo̱ ońol’ao be mabe̱ ngińa, bińo̱ langame̱n kwalea ońola mambo mō̱ ma mweńa, k’eyembilan nje a te̱se̱no̱ o bola o longe̱. Nje pe̱ kwala jombwea mambo ma mombweye̱ ja la bwam, bekwali ba mo̱ni to̱ mambo ma ndutu lo kusino̱ o longe̱ e? Lo titi eto̱m o kwalea ońola mambo me̱se̱ ponda la maboteano̱ o yengane̱le̱. (Ombwa Yohane 16:12.) O titi te̱ be̱be̱ o jalabe̱ myuedi mō̱ jombwea longe̱ lo̱ngo̱, langwea nune̱ ná enge̱le̱ pe̱te̱ son. Nde na ponda angame̱n bia ma mambo ná a we̱le̱ no̱ngo̱ bedomsedi ba bwam. E me̱nde̱ so̱ pula ná o be̱ mbale̱ na mo̱.

7. Nje ye ná yongwane̱ bato be o yengane̱le̱ o biane̱le̱ e? (Ombwa pe̱ edinge̱le̱ “ Yete̱na o mayengea moto ńe etum.”) (Ombwa pe̱ maduta.)

⁷ Ne̱ni weno̱ ná o bia ne̱ni moto eno̱ na mbale̱ e? We ná o baise̱ mo̱ myuedi nde o lambe̱ pe̱ toi bwam o senga malabe̱ mao. Mō̱ ńanu te̱ angame̱n be̱ mbale̱ ponda eno̱ jalabe̱, a langwa pe̱ nje a masengano̱ na mbale̱. (Min. 20:5; Yak. 1:19) Lambo diwo̱ le ná longwane̱ bińo̱ o bola nika le nde ná lo bole mambo ma mongwane̱ bińo̱ o kwala na bo̱bise̱ la ńolo, k’eyembilan, da mwemba, wala o miyenga wuma bato beno̱, na te̱ pe̱ dikalo mwemba. Le pe̱ ná lo bata biane̱le̱ ke̱ lo matombise̱ ponda na mako̱m na mbia mańu. Te̱se̱ pe̱ o bola mambo ma me̱nde̱ jongwane̱ wa o bia bedangwedi ba nu moto o bete̱medi be diwengisan na ke̱ e na ńai na ńai a bato. Maka nje Aschwin nu maje̱ o Holand a bolino̱ ponda a tano̱ a yengea Alicia. Mo̱ ná: “Di ta di bola mambo mena mongwane̱ biso̱ o biane̱le̱. O jita la ngedi, nik’e ta nde mambo ma wam ka jipe̱ mwemba to̱ bola bebolo ba mboa bepe̱pe̱. Be bebolo bongwane̱ biso̱ o bia bede̱mo ba bwam na mabo̱bo̱ ma mō̱ ńasu te̱.”

8. Nje bato be o yengane̱le̱ ba matombwane̱no̱ ke̱ ba mokwa Bibe̱l mwemba e?

⁸ Bińo̱ le pe̱ ná lo bata biane̱le̱ ke̱ lo mokwa Bibe̱l mwemba. Lo bane̱ te̱ e me̱nde̱ pula ná lo be̱ne̱ jowe̱ la ndabo a mbia, nik’e me̱nde̱ bola  ná Loba a be̱ne̱ epol’a mweńa o diba lańu. (Mul. 4:12) Ye so̱ mweńa ná lo boteye jokwa mwemba niponda leno̱ o yengane̱le̱. Ye mbale̱ ná bato be o yengane̱le̱ ba si bedi be̱ mbia mō̱, munasango pe̱ a si bedi be̱ mulopo ma munańango. Nde lo ko̱lo̱ngo̱ne̱ te̱ o jokwa mwemba, lo me̱nde̱ bia pat’a moto mō̱ ńańu te̱ eno̱ o mbad’a mudī. Max na Larisa, babaedi bō̱ ba maje̱ o Amerika be̱n tombwane̱ dipe̱pe̱ nik’e wanedino̱ babo̱. Max mo̱ ná: “Ponda di botedino̱ o yengane̱le̱, di ta jokwa kalati i makwaleye̱ ońola pond’a yengane̱le̱, diba na longe̱ la mbia. Yi kalati yongwane̱ biso̱ o kwalea ońola mambo jita ma mweńa, mena ma ta biso̱ ndutu o kwalea o bebotedi.”

MAMBO MAPE̱PE̱ WANGAME̱NNO̱ JOMBWEA

9. Nje bato be o yengane̱le̱ bangame̱nno̱ jombwea ke̱ ba madomse̱ nja ba me̱nde̱no̱ langwea nika e?

⁹ Nja bińo̱ langame̱nno̱ langwea ná le o yengane̱le̱ e? Be bedomsedi be mombwea nde bińo̱ babane̱. O bebotedi ba mulatako mańu, bińo̱ le ná lo domse̱ ná lo malangwea nde ngus’a bato buka te̱. (Min. 17:27) Na nika, lo me̱nde̱ samba jita la myuedi jombwea mulatako mańu, lo si me̱nde̱ pe̱ to̱ no̱ngo̱ bedomsedi bupisane̱ nje bato ba mengane̱no̱ bińo̱. Nde lo si langwedi te̱ to̱ moto, lo me̱nde̱ wasa wutame̱ niponda leno̱ mwemba, ná bato ba s’e̱ne̱ bińo̱. Nde bińo̱ le te̱ muso̱lo̱ki, nika ńe ná e be̱ lambi dinde̱ne̱. E me̱nde̱ so̱ be̱ dibie̱ ná lo langweye bato bō̱, sepo̱n ba bena be ná ba wanea bińo̱ jongwane̱ la mbale̱ na bola pe̱ bińo̱ malea ma bwam. (Min. 15:22) K’eyembilan, le ná lo langwea belongi bō̱ ba mbia mańu, mako̱m mou to̱ batudu o mwemba.

10. Nje bato be o yengane̱le̱ beno̱ ná ba bola ná ba be̱ne̱ bedangwedi be bosangi e? (Minia 22:3)

¹⁰ Ne̱ni be̱ne̱ bedangwedi be bosangi ponda leno̱ o yengane̱le̱ e? Ponda besengedi bańu be mabatano̱ be̱ ngińa, e me̱nde̱ be̱ bińo̱ lambo di bo̱bi o be̱ne̱ ńo̱ng’a tapane̱le̱. Nje ye ná yongwane̱ bińo̱ ná lo si bola lambo di mabwese̱ Yehova ndutu e? (1 Kor. 6:18) Samba byala be titi ko̱nji, lo si be̱ bińo̱ baba buka te̱ o epolo ewo̱, lo si ńo̱ pe̱ to̱ belam jita. (Efe. 5:3) Mambo ka man me ná mumwe̱le̱ ńo̱ng’a lata ma bola pe̱ ná e be̱ bińo̱ ndutu o bola nje ye bwam. E me̱nde̱ so̱ be̱ dibie̱ ná lo kwaleye ponda te̱ ońola mambo ma me̱nde̱ jongwane̱ bińo̱ o bolane̱le̱ edube na bupe̱ pe̱ bete̱sedi ba Yehova. (Langa Minia 22:3.) Maka nje yongwane̱ Dawit na Alma ba maje̱ o Etiopia. Ba kwali ná: “Di ta nde di tombise̱ ponda owe̱ni bato ba tano̱ jita, to̱ mwemba na mako̱m masu. To̱ buńa di si so̱be̱ biso̱ baba buka te̱ o mutoa to̱ o bolongi. Nika ńongwane̱ biso̱ o samba bete̱medi be wusa we̱le̱ biso̱ o kekise̱.”

11. Nje bato be o yengane̱le̱ bangame̱nno̱ jombwea ke̱ ba mapula o leane̱le̱ eto̱nde̱ e?

¹¹ Mo̱ bato be te̱ o yengane̱le̱ ońola diba, be ná ba leane̱le̱ eto̱nde̱ e? Niponda mulatako mańu mweno̱ bata be̱ ngińa, le ná lo po̱so̱ o leane̱le̱ ndolo o mbadi ńe ko̱nji. Nde ńo̱ng’ańu ńa lata ńe te̱ ngińa, e me̱nde̱ be̱ bińo̱ ndutu o no̱ngo̱ bedomsedi ba bwam. (Mwe. 1:2; 2:6) Lo ko̱lo̱ngo̱ne̱ pe̱ te̱ o leane̱le̱ eto̱nde̱, bińo̱ le ná lo bo̱lo̱ne̱ jalea la ńolo nde lo sukane̱ bola lambo Yehova a singe̱no̱. (Min. 6:27) Ońola nika, o bebotedi ba mulatako mańu, tese̱ye̱ bińo̱me̱ne̱ myoyo, bupisane̱ bete̱sedi ba Bibe̱l. c (1 Tes. 4:3-7) Bińo̱ babane̱ kwalea ońola myuedi ka min: ‘Ne̱ni bato ba dinge̱le̱ biso̱ ba me̱ne̱no̱ mbadi di maleane̱le̱no̱ ndolo e? Mo̱ nje di mabolano̱ ye ná yumwe̱le̱ bepuledi ba bobe omboa mō̱ ńasu e?’

12. Nje bato be o yengane̱le̱ bangame̱nno̱ bia jombwea myambo beno̱ ná ba be̱ne̱ niponda beno̱ o yengane̱le̱ e?

 ¹² Ne̱ni bińo̱ leno̱ ná lo sangilane̱ myambo e? Nje bola yete̱na ponda iwo̱ lo si maso̱ṅtane̱le̱ e? Mo̱ nik’e mapula nde kwala ná mambo ma titi ná mala oteten ańu e? Ke̱m, nik’e mapo̱ye̱ bato be̱se̱. Diba la bwam le nde mulatako ma bato baba bena ba mabole̱ ebolo mwemba ná ba buke mawengisan me oteten abu. Mbadi lo masangilane̱no̱ so̱ myambo tatan ńe ná e lee̱ nga diba lańu di me̱nde̱ tongwe̱le̱. Bińo̱ ombwea min myuedi mwemba: ‘Mo̱ di makwalisane̱ mō̱ na nune̱ na muyao na edube e? Mo̱ di mapomane̱ jemba mawuse̱ masu di keka pe̱ o po̱ngulane̱ mo̱ e? Mo̱ je be̱be̱ o jese̱le̱ nje di to̱ndino̱, o baise̱ milakisan na o lakise̱ pe̱ e?’ (Efe. 4:31, 32) Nde, yete̱na lo ko̱lo̱ngo̱ne̱ o be̱ne̱ myambo na o tanga niponda leno̱ o yengane̱le̱, mambo ma si me̱nde̱ tukwa ombusa diba lańu. O so̱ṅtane̱ te̱ ná nune̱ a titi ná a be̱ mwenj’a diba ńa bwam ońol’ango̱, ye ná e be̱ bwam ońola bińo̱ babane̱ ná lo we̱le̱ su o mulatako mańu. d

13. Njika mambo me ná mongwane̱ bato baba o bia ponda ininga bangame̱nno̱ yengane̱le̱ e?

¹³ Ponda ininga bińo̱ langame̱nno̱ o yengane̱le̱ e? Bola la mambo na musunga di yo̱ki nde wana mbo̱lo̱n. (Min. 21:5) E mapula so̱ ná lo no̱nge eyeka ponda ná lo biane̱le̱ bwam. Nde lo s’angame̱n jindise̱ pond’a yengane̱le̱ ke̱ njom a bola nika e titi. Bibe̱l e makwala pe̱ ná: “Dipita di makiṅakiṅane̱ di mabouse̱ mulema.” (Min. 13:12) Omo̱ń a nika, lo yengane̱le̱ te̱ pond’a bwaba jita, ye ná e be̱ bińo̱ ndutu o janane̱ ńo̱ng’a lata. (1 Kor. 7:9) O mulopo ma so̱nge̱le̱ ponda ininga bińo̱ leno̱ o yengane̱le̱, baise̱ nde wame̱ne̱ min myuedi: ‘Nje epe̱pe̱ nangame̱nno̱ bia jombwea nu moto ná na we̱le̱ no̱ngo̱ bedomsedi e?’

NE̱NI BANE̱ BENO̱ NÁ BA SUE̱LE̱ BATO BE O YENGANE̱LE̱ E?

14. Ne̱ni bane̱ beno̱ ná bongwane̱ bato be o yengane̱le̱ e? (Ombwa pe̱ duta.)

¹⁴ Di bi te̱ ná bato baba be o yengane̱le̱, ne̱ni jeno̱ ná jongwane̱ babo̱ e? Je ná di bele̱ babo̱ o da na biso̱, o jowe̱ lasu la ndabo a mbia to̱ o longe̱le̱ ńolo na biso̱. (Rom. 12:13) Be bete̱medi be ná be bola babo̱ epolo o bata biane̱le̱ bwam. E we̱li te̱ be̱, we ná o be̱ na babo̱ ke̱ ba mabusa, o pe̱ye̱ babo̱ o mutoa mo̱ngo̱, o bele̱ pe̱ babo̱ ombo’ango̱ ná ba si be̱ muso̱lo̱ki. (Gal. 6:10) Alicia di kwaledino̱ omo̱ń, a dia a mo̱nge̱le̱ nje mo̱ na Aschwin ba bwane̱no̱  muńe̱nge̱. Mo̱ ná: “Di ta muńe̱nge̱ jita ponda bonasango na bonańango bō̱ ba langwedino̱ biso̱ ná je ná di po̱ ombo’abu yete̱na di mapula epolo owe̱ni di si me̱nde̱no̱ be̱ muso̱lo̱ki.” Bato be o yengane̱le̱ ba baise̱ te̱ wa ná o tombise̱ ponda na babo̱, e̱ne̱ nde nika ka jongwane̱ la mweńa weno̱ wanea mako̱m mo̱ngo̱. Angame̱ye̱ ná o si dia babo̱ muso̱lo̱ki ná bambam, o bie pe̱ njika ponda jese̱le̱ babo̱ son epolo ná ba kwale.—Fil. 2:4.

15. Nje epe̱pe̱ mako̱m meno̱ ná ma bola o sue̱le̱ bato be o yengane̱le̱ e? (Minia 12:18)

¹⁵ Je pe̱ ná jongwane̱ babo̱ ke̱ di mano̱ngo̱ jangame̱ye̱ na nje di makwalano̱. Ponda iwo̱ e mapula ná di bie jalea biso̱me̱ne̱. (Langa Minia 12:18.) K’eyembilan, je ná di pula langwea bane̱ ná bato baba be o yengane̱le̱, nde ke̱ mpuli mabu mwe nde ná babo̱me̱ne̱ nde ba bīse̱ bane̱ nika. Di s’angame̱n camane̱ myango mabu to̱ sa babo̱ ońola bedomsedi be mombweye̱ nde babo̱me̱ne̱. (Min. 20:19; Rom. 14:10; 1 Tes. 4:11) Di s’angame̱n pe̱ to̱ kwala mambo to̱ baise̱ myuedi mi mabole̱ ná ba be o yengane̱le̱ bo̱nge̱le̱ ná bangame̱n pomane̱ o bane̱. Munańango Elise na mom’ao ba kwali ná: “Nik’e takise̱ biso̱ jita ponda bato ba tano̱ ba baise̱ biso̱ nga jā te̱se̱ buńa basu ba diba, nde ke̱ biso̱me̱ne̱ di si ta di mákwalea ońola nika.”

16. Ne̱ni jangame̱nno̱ bolea yete̱na bato be o yengane̱le̱ bembe̱ mulatako mabu e?

¹⁶ Nje bola yete̱na bato be o yengane̱le̱ ba no̱ngi bedomsedi o jembe̱ mulatako mabu e? Di si baise̱ babo̱ myuedi mi matakise̱ to̱ numa mō̱ ńabu njo̱m. (1 Pet. 4:15) Munańango nu mabelabe̱ ná Lea a kwali ná: “Na ta na senga ná bato ba ta ba kwala mambo jombwea nje e boli ná mba na munasango mō̱ jembe̱ mulatako masu. Nik’e bwese̱ mba ndutu jita.” Ka nje te̱ je̱nno̱ o bebotedi, bato bena be o yengane̱le̱ bembe̱ te̱ mulatako mabu, nik’e si mapula kwala ná ba si tongwe̱le̱. Nde nik’e malee̱ nde ná pond’a yengane̱le̱ ńongwane̱ babo̱ o no̱ngo̱ bedomsedi ba bwam. Nde to̱ na nika, ye ná e be̱ ná be bedomsedi be mabwese̱ babo̱ ndutu, na ná be eso̱diso̱di ponda iwo̱. Ońola nika, jangame̱n so̱ wasa o sue̱le̱ babo̱.—Min. 17:17.

17. Nje bato be o yengane̱le̱ ońola diba bangame̱nno̱ benga bola e?

¹⁷ Ka nje te̱ je̱nno̱, pond’a yengane̱le̱ e be̱n mao mitakisan nde e mabwesane̱ pe̱ muńe̱nge̱. Jessica mo̱ ná: “O kwala la mbale̱, mambo ma si ta bu ponda di tano̱ di yengane̱le̱. Nde na ta muńe̱nge̱ ná di bolane̱ pond’asu na ngud’asu o bata biane̱le̱ bwam.” We te̱ o yengea moto ońola diba, benga po̱ngo̱ miwe̱n ná lo biane̱le̱ bwam. Nik’e me̱nde̱ jongwane̱ bińo̱ babane̱ o no̱ngo̱ bedomsedi ba bwam.