O PAMBO a ponda ńa mimbu jita, bamisan ba kwali ná kiṅe̱ Belsasar, ńena kalat’a Daniel e mato̱peano̱, a si ta longe̱ to̱ buńa. (Dan. 5:1) Ba ta nde ba kwala nika ońolana bawase̱le̱ bembamba ba si ta ba máso̱ lambo to̱ diwo̱ di wusa bamse̱ ná a ta longe̱ na mbale̱. Nde nika e tuko o mbu 1854. Ońola nje e?

O mu mbu, nunde̱ne̱ mō̱ ńa Inglisi J. G. Taylor a ta a wase̱le̱ bembamba bō̱ o mundi ma kwaṅ ma Ur, mwe o mikondo ma Irak nin we̱nge̱. Oten, o ekokot’a njongo, nu mot’a muwaso a ta a so̱ ńai na ńai a bewa ba weya ba te̱ngiledi. Be bewa ba te̱ngiledi, ba 10 la se̱ntimeta ewo̱ te̱, be ta be kikabe̱ na matila ma makabe̱. Tila lena di ta o ewa ewo̱ di ta di be̱ne̱ muka ońola longe̱ la bwaba la kiṅe̱ Nabonido na mun’ao ńa mutudu, Belsasar. Nate̱na mo̱me̱ne̱ bamisan ba ta bangame̱n jemba ná be bewa be so̱be̱ be bamse̱ ná Belsasar a ta longe̱ na mbale̱.

Nde, Bibe̱l e si makwala buka te̱ ná Belsasar a ta longe̱, nde ná a ta pe̱ kiṅe̱. To̱ na nika bamisan ba si ta te̱ nde ba dube̱. K’eyembilan, o ebwe’a mbu e londe̱ 19, ńadibie̱ la wase mō̱ ńa Inglisi William Talbot a tili ná bō̱ ba makwala ná: “Bel-sar-usur [Belsasar] anedi mwemba na sango Nabonido o mulemlem ma ponda. Nde lambo to̱ diwo̱ di si mabamse̱ nika.”

Bo bwambo bo timbi nde doma ponda matila ma bewa ba weya bepe̱pe̱ ma bīse̱no̱ ná sango a Belsasar, kiṅe̱ Nabonido, asumwe̱ o mundi maboso, o pambo a ponda po̱. Nje e tombi niponda a si tano̱ e? Kalati Encyclopaedia Britannica e makwala ná: “Ponda Nabonido alono̱ o mbumwa, a bake̱ nde Belsasar kond’a janea na dongo dinde̱ne̱ la milo̱ṅ mao ma bwemba.” Na mbale̱, Belsasar anedi so̱ Babilon mwemba na sango o ni pambo a ponda. Alan Millard, ńamuwaso na mubie̱ leme̱, a kwali ná e ta e te̱nge̱n ná “kalat’a Daniel e bele̱ Belsasar ná ‘kiṅe̱.’”

Ye mbale̱ ná ońola baboledi ba Loba, njo̱m a mom ni mabole̱ mboṅ ná kalat’a Daniel e wu nde na Loba, na ná je ná di lakisane̱ mo̱, e maso̱be̱ nde o Bibe̱l mo̱me̱ne̱.​—2 Tim. 3:16.