Yesu a timbi nde Prisi Ninde̱ne̱ ponda a dubisabe̱no̱ o mbu 29 P.A. Ne̱ni di bino̱ nika e? O pond’a dubise̱ lao Yesu a lee̱le̱ ná e be̱be̱ o bola longe̱ lao o diyo̱ la “jemea” la Loba. (Gal. 1:4; Bon. 10:5-10) Kana di diyo̱ lena le nde eyemban, di bokisabe̱no̱ o pond’a dubise̱ la Yesu, tempe̱l ninde̱ne̱ ńa mudī​—ńe nde bete̱sedi ba jowe̱ le bosangi la Yehova di se̱medi o eyot’a diko̱ti​—pe̱ e bokisabe̱ nde o mu mulemlem ma ponda me̱ne̱. Diyo̱ le nde elongisan a mweńa ya ni tempe̱l a mudī.​—Mat. 3:16, 17; Bon. 5:4-6.

Kana tempe̱l a mudī ninde̱ne̱ e tano̱ e mábokisabe̱, e ta so̱ e pula prisi ninde̱ne̱ ni maboleye̱ oten. O londe̱ ni ńo̱ngi, Yesu o̱kisabe̱ “na Mudī-musangi na ngińa.” (Bebolo 10:37, 38; Marko 1:9-11) Nde ne̱ni jeno̱ ná di be̱ mbaki ná Yesu a te̱se̱be̱ ka Prisi Ninde̱ne̱ oboso ba kwed’ao na bepumbwedi bao e? Di maso̱ eyembilan a kobisan ke̱ jombwedi eyembilan a Aron na basangwedi bao bena ba boledi ka prisi inde̱ne̱ owas’a Mbend’a Mose.

Bupisane̱ Mbenda, prisi ninde̱ne̱ buka te̱ nde e ta e be̱ne̱ bwam o jingea o wum’a bosangi bo peti o muno̱ko̱, ombusa ponda pe̱ o wum’a bosangi bo peti o tempe̱l. Ekeṅan e ta yena e ta yaba wum’a bosangi na wum’a bosangi bo peti. Prisi ninde̱ne̱ e ta nde e tombea o ekeṅan buka te̱ o Buńa ba te̱ l’ebula. (Bon. 9:1-3, 6, 7) Ka nje te̱ Aron na basangwedi bao ba se̱le̱no̱ jo̱kisabe̱ ka prisi inde̱ne̱ obiana ba ‘matombea o ekeṅan [e longabe̱ na mā]’ ya muno̱ko̱, nika pe̱ nde Yesu a se̱le̱no̱ te̱se̱be̱ ka Prisi Ninde̱ne̱ ńa tempe̱l ninde̱ne̱ ńa mudī ńa Yehova obiana a mawo̱ denge̱ ombusa ponda a ‘matombea o ekeṅan, nika ńe nde ná eyobo ao’ o wala o mo̱ń. (Bon. 10:20) Ońola nika nde ńamuloloma Paulo a kwalino̱ ná Yesu a mapo̱ “ka prisi ninde̱ne̱” nde a tombea o “muno̱ko̱ mwasam na mu peti, mwena mu si longabe̱ na mā,” wala o “mo̱ń mo̱me̱ne̱.”​—Bon. 9:11, 24.

Diwengisan to̱ diwo̱ di titi oteten a ponda male ma peńa ma ńo̱be̱no̱ na ponda ma no̱ngino̱ ngińa. Ońola nje nika e? Ponda Yesu ondedino̱ o mo̱ń na mo̱ a bola longe̱ lao la ke̱nge̱nge̱ ka jabea ońol’asu, a po̱ngi nde tanga laboso la malalo lena di mabole̱ male ngińa. Di tanga nde di boli ma male ngińa. Ma matanga ma ta nde nje e?

Laboso, Yesu a te̱m oboso ba Yehova; di londe̱ maba, Yesu a boli Yehova mweńa ma jabea lao; di londe̱ malalo, Yehova emedi mweńa ma maya ma Yesu ma komabe̱. Male ma peńa ma no̱ngi so̱ nde ngińa ponda ma matanga malalo ma po̱ngo̱be̱no̱.

Bibe̱l e si malangwea biso̱ ná te̱ite̱i njika ponda Yehova emedino̱ mweńa ma jabea la Yesu. Di titi so̱ ná di langwa ná te̱ite̱i njika ponda male ma peńa ma ńo̱be̱no̱, to̱ ponda ma no̱ngino̱ ngińa. Nde di bi ná Yesu ondedi o mo̱ń dom la mińa oboso ba Buńa ba Mwatanu. (Bebolo 1:3) O ponda po̱ ńa yi son a pambo a ponda nde a bolino̱ Yehova mweńa ma jabea lao, Yehova pe̱ a kasa mo̱. (Bon. 9:12) Nje ye̱ne̱ne̱ na miso̱ o Buńa ba Mwatanu e lee̱ ná male ma peńa ma no̱ngi ngińa botea ni ponda. (Bebolo 2:1-4, 32, 33) Male ma peńa ma ta so̱ ma máno̱ngo̱ ngińa, mabola pe̱ ebolo.

O pe̱m n’esungu, male ma peńa ma ńo̱be̱ nde ma no̱ngo̱ pe̱ ngińa ombusa Yehova jemea mweńa ma maya ma Yesu ma komabe̱. Male ma ta so̱ ma mábe̱ne̱ Prisi Ninde̱ne̱, Yesu, ńe pe̱ Muwaled’a ma male.​—Bon. 7:25; 8:1-3, 6; 9:13-15.