Ke̱m. Nde nje David a tilino̱ e te̱nge̱n.

O mu mwemba David a kwali ná, “Na masesa dina lo̱ngo̱ bebe be̱se̱.” (Mye. 145:1, 2) O mwemba mupe̱pe̱ David a kwali ná, “Na masesa wa, a Sango, Loba lam, na mulema mam mwe̱se̱, na mabusise̱ dina lo̱ngo̱ bebe be̱se̱.”—Mye. 86:12.

David a si ta o̱nge̱le̱ ná a si me̱nde̱ wo̱ to̱ buńa niponda a tilino̱ be byala. A ta a bia ná Yehova a ta a kwala ná bato ba benama ba me̱nde̱ wo̱ ońola bobe ba sangono̱. David pe̱ a ta nde moto nu yabe̱ owas’a bobe. (Bot. 3:3, 17-19; Mye. 51:6, 7) A ta a bia ná nate̱na mo̱me̱ne̱ bato bena Loba a tano̱ a do̱lisane̱ ka Abraham, Isak, na Yakob, ba wedi. David a ta pe̱ a bia ná mo̱ pe̱ a me̱nde̱ wo̱. (Mye. 37:25; 39:5) Nde byala bao be tilabe̱ o Myenge 145:2 be malee̱ nde ńo̱ngi a tano̱ a be̱ne̱ o sesa Loba bebe be̱se̱, nika ńe nde ná etum te̱ mo̱ David a wusano̱ be̱ longe̱.—2 Sam. 7:12.

Ponda iwo̱ David a ta nde a tila ońola mambo a kusino̱ o longe̱ lao, k’eyembilan myango ma longe̱ lao mena mi tilabe̱ o Myenge 18, 51, na 52. O Myenge 23, David a kwali ná Yehova e nde mutatedi nu mabole̱ bediedi, lo̱ko̱mea, na betatedi. Ni ńai a mutatedi nde David a tano̱. Ńo̱ng’ao e ta nde ná a boleye Loba ‘o longe̱ lao le̱se̱.’—Mye. 23:6.

O si dimbea pe̱ to̱ ná, mudī ma Yehova nde mu tute̱le̱ David o tila nje ye̱se̱ a tilino̱. O mambo mena a tilino̱ o be̱n bedinge̱ bena be ta be kwalea ońola mambo mena ma ta mangame̱n bolane̱ ombusa ponda. K’eyembilan, o Myenge 110, David a kwaledi ońola ponda ńena Sango ao a me̱nde̱no̱ “ja o dia la mom la [Loba]” a kusa ngińa ninde̱ne̱ o mo̱ń. O bola nje e? O janea basingedi ba Loba na “kaise̱ matumba” o wase. David a ta nde mbamba Yesu, ńena nu ta Mesia, na ńena nu me̱nde̱ janeye̱ la mo̱ń ka “prisi po̱ko̱po̱ko̱.” (Mye. 110:1-6) Yesu a kwali ná edinge̱ ye o Myenge 110 e ta nde yombwea mo̱, na ná e me̱nde̱ londa o mińa mi maye̱.—Mat. 22:41-45.

E, mudī ma Yehova mu ta mu tute̱le̱ David o tila mambo mena ma ta mombwea seto̱ buka te̱ mińa mao nde na mińa mi maye̱ pe̱, niponda a me̱nde̱no̱ pumbwa, na jowe̱ pe̱ Yehova o bwindea. Nika e mongwane̱ biso̱ o je̱ne̱ ná Myenge 37:10, 11, 29 mi makwalea nde ońola bete̱medi bena be ta o Israel ńa kwaṅ name̱ne̱ pe̱ na ne̱ni mambo ma me̱nde̱no̱ be̱ o mińa mi maye̱ o wase ńe̱se̱ niponda ńena Loba a me̱nde̱no̱ londise̱ makakan mao.—Ombwa dongo 8 la mulopo ma jokwa “O mabe̱ na mba o paradisi” o nin Njongo a Betatedi.

Byala ba David be o Myenge 145:2 na ba myemba mipe̱pe̱ me bowan be malee̱ ná David a ta a pula sesa Yehova natē̱ a wo̱. Be byala be mokwe̱le̱ biso̱ nje David a me̱nde̱no̱ bola o kie̱le̱ ni maye̱ ponda Yehova a me̱nde̱no̱ pumbwe̱le̱ mo̱.