OŃOLA NJE NIKA ŃENO̱ MWEŃA: Dikalo tongwea na telefon le nde mbadi po̱ ńa mweńa ńa “bola mboṅ ońola myango ma bwam.” (Bbol 20:24) * Nik’e mabola biso̱ epolo o te̱ye̱ bato dikalo niponda bete̱medi be si mabolano̱ biso̱ epolo o wala je̱ne̱ babo̱.

NE̱NI BOLA NIKA:

• Boṅsane̱. Po̱so̱ tema bupisane̱ bete̱medi. Tila mato̱ti ma mweńa o me̱nde̱no̱ to̱ndo̱ kwalea. We pe̱ ná o boṅsane̱ son a mwe̱ndi o me̱nde̱no̱ dia yete̱na moto a s’alabe̱. Ye bwam ná o je kańena weno̱ ná o ne̱nge̱le̱ mato̱ti mo̱ngo̱ m’ekwali omo̱ń a tebedi name̱ne̱ pe̱ na mambo mape̱pe̱ ma me̱nde̱ pule̱ wa, k’eyembilan elongisan owe̱ni weno̱ ná o tele̱ JW Library^® to̱ jw.org^®

• Bo̱bise̱ ńolo. To̱po̱ ka nje te̱ o ko̱lo̱ngo̱nno̱ to̱po̱ buńa te̱. Ńamwe̱le̱ son a lo̱ o po̱nge pe̱ byemban ba mā na ba boso biana nu moto e o je̱ne̱ wa. O si po̱ngo̱ pause i s’angame̱n. Ye pe̱ bwam ná o be̱ na moto nupe̱pe̱. Mot’ekwali a baise̱ te̱ myuedi, timbise̱le̱ mo̱ na doi la mo̱ń; na nika mwenj’ango̱ ńa dikalo e ná ongwane̱ wa o so̱ jalabe̱

• Bokise̱ eyot’a pe̱pe̱le̱. Mot’ekwali a lee̱le̱ te̱ ńo̱ngi, we ná o dia myuedi o me̱nde̱no̱ jalabe̱ ke̱ o bele̱ mo̱ ngedi nipe̱pe̱. We ná o lomea mo̱ mwe̱ndi to̱ dongo diwo̱ la tobotobo la kalati po̱. We pe̱ to̱ ná o lomea mo̱ sinima ńasu po̱ to̱ kalati po̱. Epolo ye̱ne̱ne̱ te̱, we ná o kwalea ońola mambo mape̱pe̱ me o mulomba masu