Yesu a lango “myango ma bwam ma Janea la Loba.” (Lk 4:43) A kwalane̱ pe̱ bato ná ba kane̱ ońola di Janea. (Mt 6:9, 10) O mo̱di ma Tinini, di me̱nde̱ po̱ngo̱ miwe̱n ma tobotobo o kwalisane̱ bato jombwea Janea la Loba. (Mt 24:14) Po̱ngulane̱ mudango mo̱ngo̱ ná o no̱nge dongo o mususu o di dikalo la tobotobo. Paonia ye̱se̱ ya epas’a ponda ye ná i po̱so̱ o bola 30 to̱ 50 ma hawa o mu mo̱di.

Langea bato jita o mōnda mo̱ngo̱ epas’a Bibe̱l e mombweye̱ Janea la Loba etum te̱ epolo ye̱ne̱ne̱no̱. Ombwea ebas’a moto weno̱ o kwalisane̱ ke̱ o mapula langea mo̱ epas’a Bibe̱l. Moto a lee̱le̱ te̱ ńo̱ngi o ekwal’a boso, bola mo̱ Njongo a Betatedi No̱. 2 2020. Ombusa nika benga pe̱pe̱le̱ mo̱ ná o boteye jokwa la Bibe̱l o kalati po̱ ńa Mukoba masu ma belongisan ba belēdi. Ponda ńena Janea la Loba di me̱nde̱no̱ ńo̱so̱ mane̱ manea ma mate̱nge̱ne̱ mo̱ e si po̱ti pe̱. (Da 2:44; 1Ko 15:24, 25) Ońola nika, di tombwane̱ so̱ nin pond’a tobotobo o lee̱ ná je nde o mudi ma Yehova na Janea lao!