Kaponda Mateo 21:1-46
21 Ponda ba sisedino̱ be̱be̱ na Yerusalem, ba tunge̱ o Betfage o mudongo ma Njabi, na Yesu a loma bokwedi baba,
2 a kwalane̱ babo̱ ná: “Bińo̱ ala o mundi mwe bińo̱ oboso, lingedi te̱ oten dibokime̱ne̱, lo me̱nde̱ bomane̱ mo̱di ma ese̱l ba kakino̱, na mun’a ese̱l o mbasan mao. Bińo̱ wunja mo̱, lo waneye mba mo̱.
3 Moto a kwalane̱ te̱ bińo̱ lambo, bińo̱ kwalane̱ mo̱ ná: ‘Sango a be̱n ńo̱ng’ao.’ Nde dibokime̱ne̱, a me̱nde̱ jese̱le̱ bińo̱ ná lo no̱nge mo̱.”
4 Din di bolan nde o londise̱ byala ba muto̱ped’a mudī, ńena nu kwali ná:
5 “Langwea mun’a muto ńa Sion ná: ‘Ombwa! Kiṅ’ango̱ e mapo̱ye̱ wa, ńe pī, e jai pe̱ omo̱ń a ese̱l, e, omo̱ń a mun’a ese̱l, mun’a ńama ni mabambe̱ myūna.’”
6 Na bokwedi bala, ba bola ka nje te̱ Yesu anedino̱ babo̱.
7 Na babo̱ ba wana mu mo̱di ma ese̱l na mun’a ese̱l, ba ne̱nge̱le̱ mbo̱t’abu omo̱ń ao na Yesu a ja oten.*
8 Bato jita oteten a dimuti ba ta ba late̱le̱ mbo̱t’abu o ngea, bape̱pe̱ ba ta ba ke̱ mikanjo ma myele ba ne̱nge̱le̱ mo̱ o ngea.
9 Ba pe̱ bena ba ta ba dangwa mo̱ oboso, na ba bena ba ta ba wa mo̱ ombusa, ba ta ba benga te̱ ná: “A Loba, son, sunga Mun’a David! Bonam na nu nu mapo̱ o dina la Yehova! Sunga mo̱, son, a wa ńena ńe o mo̱ń!”
10 Ingedino̱ o Yerusalem, mundi mwe̱se̱ mu ta ná ńumańuma, na bato ba botea baise̱ ná: “Nja nu e?”
11 Na mamuti malabe̱ ná: “Muto̱ped’a mudī Yesu nu, ńa Nasaret ńa Galilea!”
12 Na Yesu ingea o tempe̱l, a panga be̱se̱ bena ba ta bandise̱ na bena ba ta banda o tempe̱l; a pimba pe̱ tebed’a bawengisane̱ mo̱ni wase na be̱nj’a bandise̱ mbenga.
13 Na mo̱ a langwea babo̱ ná: “E tilabe̱ ná: ‘Ndabo am e me̱nde̱ nde belabe̱ ná ndabo a muka,’ nde lo timbise̱ nde mo̱ mulomba ma bato ba jiba.”
14 Na bandima na bam’boko ba sisea mo̱ be̱be̱ o tempe̱l, na mo̱ a bo̱lise̱ babo̱.
15 Nde niponda banedi ba prisi na babiedi ba kalat’a Loba be̱nno̱ mambo ma betańsedi a tano̱ a bola na bana bena ba ta ba te̱ o tempe̱l ná: “A Loba, son, sunga Mun’a David!” na babo̱ ba linga,
16 ba langwea Yesu ná: “We o senga nje ba makwalano̱ e?” Na Yesu a timbise̱le̱ babo̱ ná: “E. Mo̱ lo si langi to̱ buńa ná: ‘O busise̱ esese o midumbu ma bana basadi na ma mye̱nge̱’ e?”
17 Na mo̱ a dia babo̱, a busa o mundi, ala o Betania, a tombise̱ bulu oten.
18 Nde idibaidiba, ke̱ a nitimba o mundi, na njai ńalea mo̱.
19 Na mo̱ e̱ne̱ bwele ba figue be̱be̱ na ngea, a sisedino̱ mo̱ mbasan a si so̱i to̱ lambo oten o sumo te̱ byadi, na mo̱ a kwala ná: “Botea tatan o si me̱nde̱ pe̱ ya bepuma tom.” Na bo bwele ba figue bwanja dibokime̱ne̱.
20 Nde bokwedi ba Yesu be̱nno̱ nje e bolan, na babo̱ ba ńaka, ba kwala ná: “Ne̱ni bo bwele ba figue bwanjino̱ dibokime̱ne̱ nika e?”
21 Na Yesu alabe̱ ná: “Na mbale̱, na malangwea bińo̱ ná, lo be̱n te̱ dube̱, lo si linge pe̱ to̱ penda, lo si me̱nde̱ buka te̱ bola nje na bolane̱no̱ bwele ba figue, nde to̱ lo kwalane̱ nde mun mudongo ná: ‘Asumwe̱ wa, ko̱ o munja,’ nik’e me̱nde̱ bolane̱.
22 Mambo me̱se̱ pe̱ lo me̱nde̱no̱ baise̱ o muka na dube̱, lo me̱nde̱ kusa mo̱.”
23 Ingedino̱ o tempe̱l, na banedi ba prisi na batudu ba tumba ba sisea mo̱ be̱be̱ ke̱ e o lee̱, ba baise̱ mo̱ ná: “Na njika ngińa o mabolano̱ man mambo e? Nja pe̱ nu boli wa ni ngińa e?”
24 Na Yesu a timbise̱le̱ babo̱ ná: “Mba pe̱ na mabaise̱ bińo̱ lambo diwo̱. Bińo̱ lalabe̱ te̱ mba, ke̱ mba pe̱ na me̱nde̱ langwea bińo̱ na njika ngińa na mabolano̱ man mambo:
25 Nja nu boli Yohane wonja o dubise̱ bato e? Loba ńe o mo̱ń nga bato ba benama e?” Na babo̱ ba kumwa kwalisane̱ mō̱ na nune̱ ná: “Jalabe̱ te̱ ná: ‘Loba ńe o mo̱ń,’ a me̱nde̱ langwea biso̱ ná: ‘Ońola nje so̱ bińo̱ lo si dube̱no̱ mo̱ e?’
26 Nde jalabe̱ te̱ ná: ‘Bato ba benama,’ jangame̱n bwa dimuti bo̱ngo̱, ebanja babo̱ be̱se̱ ba me̱ne̱ nde Yohane ka muto̱ped’a mudī.”
27 Na babo̱ balabe̱ Yesu ná: “Di si bi.” Na mo̱ pe̱ a timbise̱le̱ babo̱ ná: “To̱ mba pe̱ na si malangwea so̱ bińo̱ na njika ngińa na mabolano̱ man mambo.
28 “Bińo̱ lo mo̱nge̱le̱ ná nje e? Moto mō̱ a ta a be̱ne̱ bana baba. Na mo̱ ala je̱ne̱ ńaboso a kwalane̱ mo̱ ná: ‘A mun’am, ala bola ebolo o mōnda ma midiki ma wań we̱nge̱.’
29 Na nun alabe̱ mo̱ ná: ‘Na si mala,’ nde ombusa ponda, ombwe̱ na mo̱ ala oten.
30 Na nu moto a sisea pe̱ nu londe̱ baba be̱be̱, a langwea mo̱ mulemlem ma lambo, na nun a kwalane̱ mo̱ ná: ‘E, na mala,’ nde a s’alo.
31 Mo̱ nja oteten a babo̱ babane̱ nu boli jemea la sango ao e?” Na babo̱ balabe̱ ná: “Ńaboso.” Na Yesu a timbise̱le̱ babo̱ ná: “Na mbale̱ na malangwea bińo̱ ná, bako̱tedi na bito ba mbamba ba me̱nde̱ se̱le̱ bińo̱ oboso o Janea la Loba.
32 Ebanja Yohane a po̱i, a lee̱ bińo̱ nge’a te̱me̱ la sim, nde lo si dube̱ mo̱. Nde bako̱tedi na bito ba mbamba nde ba dube̱ mo̱, to̱ná bińo̱ le̱nno̱ nika, lo s’ombwe̱ ná lo dube̱ mo̱.
33 “Bińo̱ senga eyembilan epe̱pe̱: Moto mō̱ a ta a be̱ne̱ mińangadu, na mo̱ a de̱ midiki ma wań oten, a dinga mo̱ na ko̱to̱, a bokise̱ m’boki ma wań oten, a longa pe̱ njongo, nde a re̱nti mo̱ base̱ mōnda na mo̱ ala o lo̱ndo̱ o mwe̱n ekombo.
34 Nde pond’a mumbwa e po̱ino̱, na mo̱ a loma bautu bao omboa base̱ mōnda ná ba bole mo̱ bao bepuma.
35 Nde base̱ mōnda ba damedi nde ba bautu, ba dipa mō̱, ba bwa nune̱, bangwa pe̱ nupe̱pe̱ madale.
36 Na mo̱ a loma pe̱te̱ bautu bape̱pe̱ bena ba ta jita buka baboso, nde ba bolane̱ nde babo̱ mulemlem.
37 O sukan, na mo̱ a lomea babo̱ mun’ao ńa mome, a kwala ná: ‘Ba me̱nde̱ bola mun’am ńa mome edube.’
38 Nde base̱ mōnda be̱nno̱ mo̱, na babo̱ ba kwalisane̱ mō̱ na nune̱ ná: ‘Musangwedi nu. Bińo̱ ya, di bwe mo̱ ná di no̱ngo̱ne̱ mo̱ sango lao!’
39 Na babo̱ ba damea mo̱, ba busane̱ mo̱ o mōnda ma midiki ma wań, nde ba bwa mo̱.
40 Mo̱ mube̱ne̱ mōnda ma midiki ma wań a po̱i te̱, nje a me̱nde̱no̱ bolane̱ ba base̱ mōnda e?”
41 Na babo̱ balabe̱ mo̱ ná: “Kana beno̱ bobe a me̱nde̱ bwa babo̱,* na mo̱ a re̱nti base̱ mōnda bape̱pe̱ mōnda mao ma midiki ma wań, bena ba me̱nde̱ bole̱ mo̱ lao dongo o pond’a mumbwa.”
42 Na Yesu a kwalane̱ babo̱ ná: “Mo̱ lo si langi o Betiledi ná: ‘Dale lena balongedi ba bangino̱, nde di timbi mom ma dale la tóngo.* Di dale di wu nde na Yehova, ye pe̱ nde lambo la betańsedi o miso̱ masu’ e?
43 Ońola nika nde na malangweano̱ bińo̱ ná, Janea la Loba di me̱nde̱ no̱ngo̱be̱le̱ bińo̱, na mo̱ di bolabe̱ tumba lena di me̱nde̱ ye̱ bepuma bao.
44 O sumo te̱ nika, moto nu me̱nde̱ ko̱ omo̱ń a di dale a me̱nde̱ bwea. Nu pe̱ di me̱nde̱no̱ ko̱ o ńolo, a me̱nde̱ ńo̱sea.”
45 Ponda banedi ba prisi na Farisai ba sengino̱ byembilan bao, na babo̱ ba so̱ṅtane̱ ná a ta nde a kwalea ońol’abu.
46 Nde to̱ná ba tano̱ ba pula damea mo̱,* ba ta ba bwa mamuti bo̱ngo̱, ebanja ma ta nde me̱ne̱ mo̱ ka muto̱ped’a mudī.
Maki
^ E me̱ne̱ne̱ ná owan, eyala ná “oten,” e mombwea nde “mbo̱ti.”
^ Na eyem’a Grikia, “bumbise̱ babo̱.”
^ Na eyem’a Grikia, “mulopo ma tóngo.”
^ To̱ “we̱le̱ mo̱ dia o ńolo.”
